Tudloi ang Inyong mga Anak sa Pagkomento

SI Perla nga taga-Mexico nahinumdom nga sa dihang siya bata pa, ang iyang inahan nagtabang kaniya sa paghimog mubo nga mga komento alang sa Pagtuon sa Bantayanang Torre. Si Perla karon aduna nay anak nga lalaki nga nagpangedarog singko anyos. Giunsa niya siya pagtabang? “Una, kinahanglang magtuon ako. Sa dihang himoon nako kini, pangitaon nako ang parapo nga daling masabtan sa akong anak, nga mahimo niyang isaysay sa iyang kaugalingong mga pulong. Dayon isentro namo ang among pagtagad diha sa iyang gitawag nga ‘akong parapo.’ Ipasaysay nako kini kaniya pinaagig paggamit sa adlaw-adlawng mga pananglitan nga iyang nasabtan. Amo dayong ensayohon ang komento sa makadaghan. Among gamiton ang usa ka butang nga sama ka dako sa mikropono aron mahibalo siya kon unsaon kini paggunit sa dihang mokomento na siya. Nalipay kaayo ako nga wala siyay palabyon nga tigom nga dili mokomento o moisa sa iyang kamot. Kasagaran, iyang duolon ang konduktor sa dili pa magsugod ang tigom ug sultihan ang konduktor kon asang parapoha siya gustong mokomento.”

Si Jens, usa ka ansiyano nga nag-alagad sa usa ka grupo nga nagsultig Hindi, adunay duha ka anak nga lalaki nga nagpangedarog dos ug kuwatro anyos. Samtang siya ug ang iyang asawa mangandam uban sa ilang mga anak alang sa tigom, ilang gamiton ang pamaagi nga nakat-onan ni Jens gikan sa iyang mga ginikanan. Siya nag-ingon: “Tinoon namo kon unsang mga bahina sa tun-anan ang masabtan sa mga bata. Sumaryohon dayon namo ang usa ka ulohan o ang pangunang mga punto sa artikulo, human niana among isukna kanila ang mga pangutana nga gusto namong tubagon nila panahon sa tigom. Sa daghang higayon kami nahingangha kay sila mohatag ug mga tubag sa natural nga paagi. Ang ilang tinubagan nagpasundayag gayod kon unsay ilang nasabtan. Ingong resulta, ang ilang mga tubag nahimong tinuod nga pagdayeg kang Jehova ug usa ka personal nga kapahayagan sa ilang pagtuo.”