Usa ka Isyu nga Naglangkit Kanimo

ADUNA ka bay higala o membro sa pamilya nga suod kaayo nimo? Komosta kon may moakusar kanimo nga nakigsuod ka lang kaniya tungod sa hinakog nga mga katarongan? Dili ka ba masakitan, nga lagmit masuko pa gani? Kana gayod ang akusasyon ni Satanas nga Yawa batok sa tanang adunay suod nga relasyon kang Jehova nga Diyos.

Palandonga ang nahitabo sa dihang milampos si Satanas sa paghaylo sa unang magtiayon, si Adan ug Eva, sa paglapas sa balaod sa Diyos ug sa pagduyog kaniya sa iyang pagrebelde sa Diyos. Ang mao bang panghitabo nagpasabot nga ang mga tawo magpabilin lang nga masinugtanon kang Jehova kon ang pagbuhat niana makaayo kanila? (Genesis 3:1-6) Mga 2,500 ka tuig human makasala si Adan, gipatungha ni Satanas kining isyuha mismo—niining higayona may kalabotan sa tawo nga ginganlag Job. Sanglit ang akusasyon nga gihimo sa Yawa tin-awng nagpaila sa isyu nga nalangkit, atong susihon pag-ayo ang asoy sa Bibliya.

“Dili Ko Wad-on ang Akong Integridad”

Si Job maoy “usa ka tawo nga walay-ikasaway ug matul-id, mahadlokon sa Diyos ug naglikay sa daotan.” Apan, gidaot ni Satanas ang katul-id ni Job. “Mahadlok ba sa Diyos si Job sa wala lamay kapuslanan?” iyang gisukna si Jehova. Dayon, gidaot sa Yawa ang Diyos ug si Job sa pag-akusar nga gipalit ni Jehova ang pagkamaunongon ni Job pinaagi sa pagpanalipod ug pagpanalangin kaniya. “Ingon nga kausaban,” mihagit si Satanas, “palihog bakyawa ang imong kamot, ug tandoga ang tanang butang nga anaa kaniya ug tan-awa kon dili ka ba niya tunglohon sa imong nawong mismo.”—Job 1:8-11.

Aron matubag ang maong mga pangangkon, gitugotan ni Jehova si Satanas sa pagsulay kang Job. Sa iyang pagpaningkamot sa pagpatalikod kang Job sa pag-alagad sa Diyos, ang Yawa nagpahamtang ug sunodsunod nga mga kalamidad sa maong matinumanong tawo. Ang tanang binuhing hayop ni Job gikawat o gipamatay, ang iyang mga alagad ug ang iyang mga anak gipamatay usab. (Job 1:12-19) Apan milampos ba si Satanas? Wala gayod! Bisan pag wala siya mahibalo nga ang Yawa maoy hinungdan sa iyang mga pagsulay, si Job miingon: “Si Jehova mihatag, ug si Jehova mikuha. Padayong dayegon ang ngalan ni Jehova.”—Job 1:21.

Human niana, miatubang si Satanas kang Jehova, ug iyang giingnan si Satanas: ‘Gihuptan gihapon ni Job ang iyang integridad, bisan pag imo akong giaghat batok kaniya sa paglamoy kaniya sa walay hinungdan.’ (Job 2:1-3) Ang hinungdanong isyu mao ang integridad ni Job—usa ka hiyas nga nagkinahanglag dili-mokompromisong pagkamaunongon sa Diyos ug pagsunod gayod sa pagkamatarong. Hangtod niining puntoha, si Job nagmadaogon bahin sa isyu sa integridad. Ugaling lang, ang Yawa wala pa mosurender.

Sunod, si Satanas mihimog malangkobong pangangkon nga mag-apektar sa tanang tawo. Iyang giingnan si Jehova: “Panit alang sa panit, ug ang tanang butang nga anaa sa usa ka tawo iyang ihatag tungod sa iyang kalag. Ingon nga kausaban, palihog bakyawa ang imong kamot, ug tandoga hangtod ang iyang bukog ug ang iyang unod ug tan-awa kon dili ka ba niya tunglohon sa imong nawong mismo.” (Job 2:4, 5) Pinaagi sa paggamit sa malangkobong  termino nga “usa ka tawo” imbes sa ngalang Job, gikuwestiyon sa Yawa ang integridad sa tanang tawo. Sa pagkamatuod, siya nangangkon: ‘Buhaton sa tawo ang tanan aron lang maluwas ang iyang kinabuhi. Hatagi akog higayon, ug akong patalikdon ang tanang tawo gikan sa Diyos.’ Aduna kahay tawo nga magpabiling maunongon sa Diyos ilalom sa tanang kahimtang ug bisag unsa pay mahitabo?

Gitugotan ni Jehova ang Yawa sa pagsakit kang Job pinaagig grabeng balatian. Si Job nag-antos pag-ayo nga siya miampo nga mamatay na lang unta siya. (Job 2:7; 14:13) Bisan pa niana, si Job nag-ingon: “Hangtod nga ako mamatay dili ko wad-on ang akong integridad gikan kanako!” (Job 27:5) Kini ang giingon ni Job tungod kay iyang gihigugma ang Diyos, ug walay makausab niana. Gipamatud-an ni Job ang iyang kaugalingon nga usa ka tawo nga may integridad. “Kon bahin kang Jehova,” matod sa Bibliya, “iyang gipanalanginan ang kaulahian ni Job labaw pa kay sa iyang sinugdan.” (Job 42:10-17) Aduna bay laing mga tawo nga sama kang Job? Unsay gibutyag sa paglabay sa panahon?

Kon sa Unsang Paagi Natubag ang Hagit

Sa kapitulo 11 sa basahon sa Bibliya nga Hebreohanon, ginganlan ni apostol Pablo ang daghang matinumanong mga lalaki ug babaye sa wala pa ang Kristohanong panahon, nga naglakip kang Noe, Abraham, Sara, ug Moises. Dayon ang apostol miingon: “Kulangon ako sa panahon kon mopadayon ako sa pag-asoy bahin [sa uban].” (Hebreohanon 11:32) Daghan kaayo ang matinumanong mga alagad sa Diyos nga si Pablo naghisgot kanila ingong ‘bagang panganod sa mga saksi,’ nga nagtandi kanila sa usa ka bagang panganod nga milukop sa kalangitan. (Hebreohanon 12:1) Oo, paglabay sa daghang siglo, gigamit sa dakong panon sa mga tawo ang ilang kagawasan sa pagpili ug mipili sa pagpabiling maunongon kang Jehova nga Diyos.—Josue 24:15.

Ang dili-malalis nga tubag sa pangangkon ni Satanas nga iyang mapatalikod ang mga tawo kang Jehova naggikan sa mismong Anak sa Diyos, si Jesu-Kristo. Bisan ang labing masakit nga kamatayon diha sa sakitanang estaka wala makabungkag sa iyang integridad sa Diyos. Sa hapit nang mabugtoan sa gininhawa si Jesus, siya miingon: “Amahan, sa imong mga kamot itugyan ko ang akong espiritu.”—Lucas 23:46.

Tin-awng gipakita sa paglabay sa panahon nga wala mapatalikod sa Yawa ang tanang tawo sa pag-alagad sa matuod nga Diyos. Daghan kaayong tawo nakahibalo na bahin kang Jehova ug nakakat-on sa ‘paghigugma kaniya sa tibuok nilang kasingkasing, kalag, ug kaisipan.’ (Mateo 22:37) Ang ilang lig-on nga pagkamaunongon kang Jehova nagpamatuod nga sayop si Satanas bahin sa isyu sa integridad sa mga tawo. Ikaw usab makapamatuod nga sayop ang Yawa pinaagi sa pagkahimong usa ka tawo nga may integridad.

Unsay Kinahanglan Mong Buhaton?

Kabubut-on sa Diyos nga ang “tanang matang sa mga tawo mangaluwas unta ug makadangat sa tukmang kahibalo sa kamatuoran.” (1 Timoteo 2:4) Sa unsang paagi imong mahimo kana? Paggahin ug panahon sa pagtuon sa Bibliya ug ‘pagkuha ug kahibalo bahin sa bugtong matuod nga Diyos ug sa usa nga iyang gipadala, si Jesu-Kristo.’—Juan 17:3.

Gihagit ni Satanas ang integridad sa tawo pinaagi sa pagkuwestiyon sa mga motibo sa tawo sa pag-alagad sa Diyos. Aron ang kahibalo makaimpluwensiya sa imong mga motibo, kinahanglan kining makaabot sa imong kasingkasing. Ug aron mahitabo kini, kinahanglan kang mohimog labaw pa kay sa pagpangita lamang ug impormasyon gikan sa Bibliya. Ugmara ang pagpamalandong sa imong makat-onan. (Salmo 143:5) Sa dihang magbasa sa Bibliya o sa publikasyon nga gipasukad sa Bibliya, paneguroa nga makagahin kag panahon sa pagpamalandong sa mga pangutanang sama niini: ‘Unsay gitudlo niini kanako bahin kang Jehova? Unsang mga hiyas sa Diyos ang akong nakita nga gihisgotan dinhi? Sa unsang mga bahin sa akong kinabuhi nga kinahanglan akong mahisama niini? Unsay giuyonan o wala uyoni sa Diyos? Sa unsang paagi kini makaapektar sa akong pagbati bahin sa Diyos?’ Kanang matanga sa pagpamalandong magpuno sa imong kasingkasing sa gugma ug pagpasalamat sa Maglalalang.

Ang atong integridad ngadto sa Diyos dili kay kutob ra sa relihiyosong mga pagtulon-an. (1 Hari 9:4) Ang paghupot sa imong integridad kang Jehova nga Diyos nagkinahanglan ug moral nga  kaligdong sa tanang bahin sa kinabuhi. Apan, ang paghupot sa integridad dili gayod maghikaw kanimo sa bisan unsa mang paagi. Si Jehova maoy “malipayong Diyos,” ug buot niya nga malipay ka sa kinabuhi. (1 Timoteo 1:11) Tagda karon ang pipila ka panggawi nga kinahanglan mong likayan aron magpabilin kang hinlo sa moral ug sa ingon imong mapahimuslan ang malipayong kinabuhi ug pag-uyon sa Diyos.

Likayi ang Sayop nga Seksuwal nga Panggawi

Si Jehova mismo ang naghatag ug sukdanan alang sa kaminyoon diha sa iyang Pulong, ang Bibliya, nga nag-ingon: “Ang lalaki mobiya sa iyang amahan ug sa iyang inahan ug siya kinahanglang moipon sa iyang asawa ug sila mahimong usa ka unod.” (Genesis 2:21-24) Sanglit ang magtiayon nahimo nang “usa ka unod,” sila nagtahod sa kahikayan sa Diyos sa kaminyoon kon ilang himoon ang seksuwal nga mga relasyon tali kanilang duha lamang. Si apostol Pablo nag-ingon: “Himoa nga dungganon ang kaminyoon taliwala sa tanan, ug ang higdaanan sa kaminyoon nga dili mahugawan, kay hukman sa Diyos ang mga makihilawason ug ang mga mananapaw.” (Hebreohanon 13:4) Ang ekspresyong “higdaanan sa kaminyoon” nagpasabot sa seksuwal nga relasyon tali sa lalaki ug babaye nga legal nga naminyo sa usag usa. Si bisan kinsa kanila nga makigsekso gawas sa kaminyoon makapanapaw ug magdalag grabeng paghukom gikan sa Diyos.—Malaquias 3:5.

Komosta ang pagpakigsekso bisag wala pa maminyo? Supak usab kana sa moral nga mga sukdanan nga gilatid ni Jehova. “Kini mao ang pagbuot sa Diyos . . . nga ayran ninyo ang pakighilawas,” nag-ingon ang Bibliya. (1 Tesalonica 4:3) Ang homoseksuwalidad, pag-unay, ug bestialidad maoy mga sala usab batok sa Diyos. (Levitico 18:6, 23; Roma 1:26, 27) Si bisan kinsa nga gustong mopahimuot sa Diyos ug magpahimulos sa usa ka malipayon gayod nga kinabuhi kinahanglang maglikay sa imoral nga mga buhat.

Komosta ang pagkarinyohay bisag wala pa maminyo? Kini nga panggawi wala kahimut-i ni Jehova. (Galacia 5:19) Ang usa kinahanglang maglikay usab sa dili-hinlong mga panghunahuna. Si Jesus miingon: “Ang matag usa nga magpadayon sa pagtan-aw sa usa ka babaye aron sa pagbaton ug kaibog kaniya nakapanapaw na uban kaniya diha sa iyang kasingkasing.” (Mateo 5:28) Kanang mga pulonga mapadapat usab sa pagtan-aw ug pornograpikong mga larawan diha sa mga basahon, sa sine o video, o sa Internet; sa pagbasag mga sugilanon bahin sa pagpakigsekso; ug sa pagpaminaw sa mahilayong mga liriko sa mga awit. Ang paglikay sa maong mga butang makapahimuot sa Diyos ug makapalig-on sa kinabuhi sa usa.

Komosta ang bahin sa pagbirigbirig? Kini gihubit ingong “dili-seryosong pagpakitag kaibog o makapukaw sa sekso” nga panggawi. Kon ang usa ka minyong lalaki o babaye magbirigbirig sa laing tawo nga dili niya kapikas, kana supak sa mga prinsipyo sa Bibliya ug usa ka ilhanan nga wala niya tahora si Jehova. (Efeso 5:28-33) Dili gayod angay nga ang usa ka dili-minyo nga lalaki o babaye magpakitag romantikong pagbati sa usag usa aron lang malingaw! Komosta kon seryosohon kini sa gibirigbirigan? Hunahunaa lang ang emosyonal nga kasakit nga ipahinabo niini. Makapahinuklog usab ang kamatuoran nga ang pagbirigbirig mahimong mosangpot sa pagpanapaw o pakighilawas. Sa laing bahin, ang pagtratar sa mga tawo nga kaatbang ug sekso nga may kaputli magpauswag sa pagtahod sa kaugalingon.—1 Timoteo 5:1, 2.

Pagpahimuot sa Diyos Diha sa Ubang mga Bahin sa Kinabuhi

Ang makahubog nga mga ilimnon dali rang mabatonan diha sa daghang kayutaan. Sayop ba ang pag-inom niini? Ang kasarangang pag-inom ug bino, serbesa, o uban pang alkoholikong mga ilimnon wala idili sa Kasulatan. (Salmo 104:15; 1 Timoteo 5:23) Apan, ang sobrang pag-inom ug ang paghuboghubog maoy sayop sa panan-aw sa Diyos. (1 Corinto 5:11-13) Dayag nga dili ka gustong madaot ang imong panglawas ug ang imong pamilyahanong kinabuhi tungod sa sobrang pag-inom.—Proverbio 23:20, 21, 29-35.

Si Jehova maoy “Diyos sa kamatuoran.” (Salmo 31:5) “Dili gayod mahimo nga mamakak ang Diyos,” nag-ingon ang Bibliya. (Hebreohanon 6:18) Kon gusto kang mauyonan sa Diyos, likayi ang pagpamakak. (Proverbio 6:16-19; Colosas 3:9, 10) “Magsulti sa tinuod ang matag usa kaninyo sa iyang silingan,” nag-awhag ang Bibliya sa mga Kristohanon.—Efeso 4:25.

 Anaa usab ang pagpanugal. Bisan pag popular kini sa daghan, ang pagpanugal maoy usa ka matang sa kadalo, tungod kay kini maoy pagsulay sa pagbaton ug salapi pinaagi sa kapildihan sa uban. Wala gayod uyoni ni Jehova kadtong “dalo sa kinitaan pinaagig limbong.” (1 Timoteo 3:8) Busa, kon gusto mong pahimut-an si Jehova, imong likayan ang tanang matang sa pagpanugal, nga naglakip sa mga loteriya, binggo, ug pagpusta sa mga lumba sa kabayo. Sa baylo, imong makaplagan nga ikaw aduna diay daghang salapi nga magamit aron matagan-an ang mga panginahanglan sa imong pamilya.

Ang pagpangawat, nga mao ang pagkuha sa usa ka butang nga dili imo, maoy usa usab ka laing matang sa kadalo. “Dili ka mangawat,” nag-ingon ang Bibliya. (Exodo 20:15) Sayop ang pagpalit ug kinawat nga mga butang ug ang pagkuhag mga butang nga wala mananghid. “Ang kawatan kinahanglan nga dili na mangawat,” nag-ingon ang Bibliya, “hinuon maghago siya, nga magbuhat pinaagi sa iyang mga kamot sa maayong buluhaton, aron siya adunay ikahatag sa nanginahanglan.” (Efeso 4:28) Inay mangawat ug panahon gikan sa ilang amo, ang mga nahigugma kang Jehova maoy matinud-anon ug kugihan. Sila ‘buot nga magmatinud-anon sa tanang butang.’ (Hebreohanon 13:18) Ug ang usa ka hinlong tanlag makaamot gayod sa imong pagbaton ug usa ka malinawong hunahuna.

Unsay panghunahuna sa Diyos bahin sa usa ka tawo nga masuk-anon? Ang Bibliya nagpasidaan: “Ayaw pagpakig-uban kang bisan kinsa nga masuk-anon; ug sa tawo nga daling mosilaob sa kaaligutgot dili ka makigkuyog.” (Proverbio 22:24) Ang dili-makontrolar nga kasuko sagad mosangpot sa pintas nga mga buhat. (Genesis 4:5-8) Kon bahin sa pagpanimalos, ang Bibliya nag-ingon: “Ayaw balosi si bisan kinsa ug daotan tungod sa daotan. Pagtagana ug maayong mga butang sa atubangan sa tanang tawo. Kon mahimo, kutob sa inyong maarangan, makigdinaitay sa tanang tawo. Ayaw kamo pagpanimalos, mga hinigugma, kondili hatagig dapit ang kapungot; kay nahisulat: ‘Akoa ang panimalos; ako magabalos, nag-ingon si Jehova.’” (Roma 12:17-19) Kon atong sundon kanang tambaga, ang atong kinabuhi mahimong mas malinawon—ug kana makadugang sa atong kalipay.

Magmalamposon Ka

Magmalamposon ka ba sa paghupot sa imong integridad sa Diyos bisan pa sa mga pagpit-os nga bungkagon kana? Oo, magmalamposon ka. Hibaloi nga buot sa Diyos nga magmalamposon ka sa pagpamatuod kang Satanas nga sayop bahin sa isyu sa integridad, tungod kay ang Iyang Pulong nag-ingon: “Magmaalamon, anak ko, ug lipaya ang akong kasingkasing, aron matubag ko siya nga nagatamay kanako.”—Proverbio 27:11.

Makaampo ka kang Jehova sa pagpalig-on kanimo sa pagbuhat sa kon unsay husto sa iyang panan-aw. (Filipos 4:6, 7, 13) Busa paningkamoti gayod nga mapauswag ang imong kahibalo bahin sa Pulong sa Diyos, ang Bibliya. Ang pagpamalandong sa imong nakat-onan gikan sa Bibliya makatabang kanimo sa pagpalalom sa imong gugma alang sa Diyos ug motukmod kanimo sa pagpahimuot kaniya. “Kini ang kahulogan sa paghigugma sa Diyos,” nag-ingon ang 1 Juan 5:3, “nga atong bantayan ang iyang mga sugo; ug bisan pa ang iyang mga sugo dili mabug-at.” Ang mga Saksi ni Jehova sa imong dapit malipay nga motabang kanimo sa pagtuon sa Bibliya. Amo kang gidasig sa pagkontak kanila, o makasulat ka sa mga magpapatik niining magasina.

[Hulagway sa panid 4]

Si Job nagpabiling maunongon ilalom sa pagsulay

[Hulagway sa panid 7]

Ang pagpauswag sa imong kahibalo bahin sa Pulong sa Diyos makapalig-on sa imong determinasyon sa pagbuhat kon unsay husto