Ang Antikristo Giyagyag

SA UNSANG paagi mapanalipdan mo ang imong kaugalingon kon nahibalo ka nga ang usa ka makapatayng epidemya nag-atake sa inyong dapit? Lagmit imong palig-onon ang imong sistema sa imyunidad ug magpalayo ka sa mananakod nga mga tawo. Kinahanglan natong buhaton usab kana sa espirituwal nga diwa. Ang Kasulatan nagsulti kanato nga ang antikristo “ania na sa kalibotan.” (1 Juan 4:3) Kon buot natong makalikay sa “impeksiyon,” kinahanglang makaila kita sa “mga tigpasa sa sakit” ug likayan sila. Mapasalamaton kita nga ang Bibliya naghatag ug dakong katin-awan bahin sa maong ulohan.

Ang “antikristo” nagkahulogan nga “batok (o kapuli) ni Kristo.” Busa sa labing malangkobon nga kahulogan, kining pulonga nagpunting sa tanan nga mosupak o bakakong nangangkon nga mao ang Kristo o iyang mga hawas. Si Jesus mismo miingon: “Siya nga dili dapig kanako maoy batok kanako [o antikristo], ug siya nga dili motipon kanako matibulaag.”—Lucas 11:23.

Hinuon, si Juan misulat bahin sa antikristo kapig 60 ka tuig pagkatapos mamatay si Jesus ug mabanhaw ngadto sa langit. Busa, ang mga kalihokan sa antikristo kinahanglang sabton sumala sa ilang epekto diha sa maunongong mga sumusunod ni Jesus sa yuta.—Mateo 25:40, 45.

Ang Antikristo Batok sa mga Sumusunod ni Kristo

Si Jesus nagpasidaan sa iyang mga sumusunod nga sila pagadumtan sa kadaghanan sa kalibotan. Siya miingon: “Itugyan kamo sa mga tawo ngadto sa kasakitan ug pagapatyon kamo, ug kamo pagadumtan sa tanang kanasoran tungod sa akong ngalan. Ug daghang mini nga mga manalagna motungha ug magpahisalaag sa daghan.”—Mateo 24:9, 11.

Kay pagalutoson man ang mga tinun-an ni Jesus “tungod sa . . . ngalan [ni Jesus],” ang mga maglulutos tin-aw nga maoy mga antikristo, nga batok kang Kristo. Ang “mini nga mga manalagna,” nga ang pipila kanila kanhi maoy mga Kristohanon, mga antikristo usab. (2 Juan 7) Kining “daghang  . . . antikristo,” misulat si Juan, “namahawa gikan kanato, apan sila dili sama kanato; kay kon sila sama pa kanato, magpabilin unta sila uban kanato.”—1 Juan 2:18, 19.

Ang mga pulong ni Jesus ug ni Juan tin-awng nagpaila nga ang antikristo dili kay usa ka tawo lamang kondili gilangkoban ug daghang indibiduwal nga mga antikristo. Dugang pa, kay sila mini nga mga manalagna, ang usa sa ilang pangunang mga tumong maoy relihiyosong paglimbong. Unsay pipila sa ilang mga taktika?

Pagpakaylap ug Bakak nga mga Pagtulon-an

Si apostol Pablo nagpasidaan sa iyang kaubang magbubuhat nga si Timoteo sa pagbantay sa mga pagtulon-an sa mga apostata, sama kang Himeneo ug Fileto, kansang “pulong mokanap samag gangrena.” Si Pablo midugang pa: “Kining mga tawhana mismo mitipas gikan sa kamatuoran, nga nag-ingon nga ang pagkabanhaw nahitabo na; ug ilang gidaot ang pagtuo sa pipila.” (2 Timoteo 2:16-18) Si Himeneo ug si Fileto lagmit nagtudlo nga ang pagkabanhaw maoy simboliko ug ang mga Kristohanon nabanhaw na sa espirituwal nga diwa. Tinuod, sa panan-aw sa Diyos, ang usa ka tawo mabuhi sa dihang siya mahimong tinuod nga tinun-an ni Jesus, nga tin-awng gipahayag ni Pablo mismo. (Efeso 2:1-5) Bisan pa niana, ang pagtulon-an ni Himeneo ug ni Fileto nagsalikway sa saad ni Jesus bahin sa literal nga pagkabanhaw sa mga patay ilalom sa pagmando sa Gingharian sa Diyos.—Juan 5:28, 29.

Ang mga ideya bahin sa bug-os simboliko nga pagkabanhaw sa ulahi naugmad sa usa ka pundok nga gitawag ug mga Gnostic. Kay nagtuo nga ang kahibalo (gnoʹsis sa Grego) mabatonan sa misteryosong paagi, ang mga Gnostic nagsagol sa apostatang Kristiyanidad uban sa Gregong pilosopiya ug misteryosong mga pagtuo sa Sidlakan. Pananglitan, sila nagtuo nga daotan ang tanang pisikal nga butang, ug tungod niana, si Jesus wala moanhi sa unod kondili mipatim-aw lamang nga may tawhanong lawas—usa ka doktrinang gitawag ug Docetism. Sumala sa atong nasabtan, kini mao gayod ang gipasidaan ni apostol Juan.—1 Juan 4:2, 3; 2 Juan 7.

 Ang laing tinumotumo, nga gimugna sa daghang siglo sa ulahi, mao ang doktrina sa giingong santisima Trinidad, nga nagpatuo nga si Jesus mao ang Labing Gamhanang Diyos ug sa samang higayon Anak sa Diyos. Sa iyang librong The Church of the First Three Centuries, si Dr. Alvan Lamson nag-ingon nga ang doktrina sa Trinidad “naggikan sa tinubdan nga bug-os lahi sa Hudiyonhon ug Kristohanong Kasulatan; nga kini naugmad, ug gidugang sa Kristiyanidad, pinaagi sa mga Platonikong Amahan.” Kinsa kining “mga Platonikong Amahan”? Sila maoy apostatang mga klero nga nadani sa mga pagtulon-an sa paganong Grego nga pilosopo nga si Plato.

Ang pagdugang sa doktrinang Trinidad maoy inabtik nga paagi sa antikristo, kay ang maong doktrina naghimo sa Diyos nga daw usa ka misteryo ug naglubog sa iyang relasyon sa Anak. (Juan 14:28; 15:10; Colosas 1:15) Hunahuna lang, sa unsang paagi ang usa ‘makaduol sa Diyos,’ sumala sa gidasig sa Kasulatan, kon ang Diyos usa ka misteryo?—Santiago 4:8.

Nakadugang sa kalibog mao ang pagtangtang sa daghang maghuhubad sa Bibliya sa ngalan sa Diyos nga Jehova gikan sa ilang mga hubad, bisan pag kana makitag kapin sa 7,000 ka beses diha sa orihinal nga teksto! Tin-aw, ang pagsulay sa paghimo sa Labing Gamhanan ingong dili lang usa ka misteryo kondili usa usab ka way-ngalan nga misteryo maoy usa ka grabeng kawalay-pagtahod sa atong Maglalalang ug sa iyang inspiradong Pulong. (Pinadayag 22:18, 19) Dugang pa, ang pagpuli sa ngalan sa Diyos pinaagig mga titulo sama sa Ginoo ug Diyos maoy paglapas sa sulondang pag-ampo ni Jesus, nga nag-ingon sa bahin: “Pagabalaanon unta ang imong ngalan.”—Mateo 6:9.

Mga Antikristo Nagsalikway sa Gingharian sa Diyos

Ang mga antikristo aktibo ilabina panahon sa “kataposang mga adlaw,” nga mao ang atong panahon karon. (2 Timoteo 3:1) Ang usa ka pangunang tumong niining mga maglilimbong karon mao ang paglimbong sa mga tawo bahin sa papel ni Jesus ingong Hari sa Gingharian sa Diyos, nga usa ka langitnong gobyerno nga duol nang magmando sa tibuok yuta.—Daniel 7:13, 14; Pinadayag 11:15.

Pananglitan, ang pipila ka pangulo sa relihiyon nagwali nga ang Gingharian sa Diyos maoy kahimtang diha sa kasingkasing sa mga tawo, usa ka pagtuo nga walay pasikaranan diha sa Kasulatan. (Daniel 2:44) Ang uban nangangkon nga si Kristo naggamit sa tawhanong mga gobyerno ug mga institusyon sa pagtuman sa kabubut-on sa Diyos. Apan si Jesus miingon: “Ang akong gingharian dili bahin niining kalibotana.” (Juan 18:36) Sa pagkatinuod, si Satanas, dili si Kristo, mao “ang magmamando niining kalibotana” ug “ang diyos niini nga sistema sa mga butang.” (Juan 14:30; 2 Corinto 4:4) Kini ang hinungdan nga si Jesus duol nang magwagtang sa tanang tawhanong mga kagamhanan ug mahimong bugtong nga Magmamando sa yuta. (Salmo 2:2, 6-9; Pinadayag 19:11-21) Ang mga tawo nag-ampo sa maong sangpotanan sa dihang magalitok sila sa Pag-ampo sa Ginoo, nga magaingon: “Paanhia ang imong gingharian. Matuman unta ang imong kabubut-on, . . . sa yuta.”—Mateo 6:10.

Tungod kay sila nagsuportar sa politikanhong mga sistema sa kalibotan, daghang pangulo sa relihiyon nagsupak, nga naglutos pa sa mga nagmantala sa kamatuoran bahin sa Gingharian sa Diyos. Makapaikag nga ang basahong Pinadayag sa Bibliya naghisgot sa usa ka simbolikong bigaon—ang “Dakong Babilonya”—kinsa “nahubog sa dugo sa mga balaan ug sa dugo sa mga saksi ni Jesus.” (Pinadayag 17:4-6) Siya usab maoy espirituwal nga makihilawason pinaagi sa iyang pagsuportar sa “mga hari” o politikanhong mga magmamando sa yuta, nga nagdawat ug mga pabor agig balos kaniya. Kining simbolikong babaye mao ang bakak nga mga relihiyon sa kalibotan. Siya maoy dakong bahin sa antikristo.—Pinadayag 18:2, 3; Santiago 4:4.

Ang Antikristo ‘Mogitik sa mga Dalunggan’

Gawas pa sa pagsalikway sa kamatuoran sa Bibliya, ang daghang giingong mga Kristohanon nagsalikway sa mga sukdanan sa panggawi sa Bibliya ug nag-uyon hinuon sa panggawi nga gidawat sa kadaghanan. Ang maong kahimtang gitagna sa Pulong sa Diyos, nga nag-ingon: “Aduna unyay yugto sa panahon nga sila [ang katawhan nga nag-angkong nag-alagad sa Diyos] dili makaantos sa makapahimsog nga pagtulon-an, hinunoa, sumala  sa ilang kaugalingong mga tinguha, sila magtigom ug mga magtutudlo alang sa ilang kaugalingon aron gitikon ang ilang mga dalunggan.” (2 Timoteo 4:3) Ang maong mga magtutudlo ug relihiyosong kabakakan gibatbat usab ingong “mini nga mga apostoles, malimbongong mga mamumuhat, nga naghimo sa ilang kaugalingon nga mga apostoles ni Kristo.” Ang Bibliya nagpadayon pag-ingon: “Ang ilang kataposan maoy sumala unya sa ilang mga buhat.”—2 Corinto 11:13-15.

Ang ilang mga buhat naglakip sa “malaw-ayng panggawi,” nga maoy dayag nga pagsalikway sa hataas nga mga prinsipyo sa panggawi. (2 Pedro 2:1-3, 12-14) Dili ba atong nakita ang nagkadaghang mga pangulo sa relihiyon ug ilang mga sumusunod nga nagsagop—o kaha nagkonsentir—sa di-Kristohanong mga buhat, sama sa homoseksuwalidad ug pagpakigsekso sa dili kapikas sa kaminyoon? Palihog itandi makadiyot kining mga panghunahuna ug mga estilo sa kinabuhi nga gidawat sa kadaghanan ug ang gisulti sa Bibliya diha sa Levitico 18:22; Roma 1:26, 27; 1 Corinto 6:9, 10; Hebreohanon 13:4; ug Judas 7.

“Sulayi ang Inspiradong mga Pahayag”

Tungod sa gihisgotang kahimtang, angay natong pamation ang mga pulong ni apostol Juan nga atong isipong seryoso ang atong relihiyosong mga tinuohan. “Ayaw ninyo tuohi ang matag inspiradong pahayag,” siya nagpasidaan, “hinunoa sulayi ang inspiradong mga pahayag aron masuta kon kini nagagikan ba gayod sa Diyos, tungod kay daghang mini nga mga manalagna ang nanungha sa kalibotan.”—1 Juan 4:1.

Tagda ang maayong panig-ingnan sa pipila ka “hamilig-hunahuna” nga mga tawo nga nagpuyo sa siyudad sa Berea sa unang siglo. Ilang “gidawat ang pulong uban ang tumang kaikag sa hunahuna, nga sa adlaw-adlaw maampingong nagasusi sa Kasulatan kon tinuod ba kining mga butanga [nga gisulti ni Pablo ug Silas].” (Buhat 17:10, 11) Oo, bisag maikagong makakat-on, gipaneguro sa mga taga-Berea nga ang ilang nadungog ug gidawat lig-ong gipasukad sa Kasulatan.

Ang matuod nga mga Kristohanon karon dili usab maimpluwensiyahan sa dili-pihong popular nga mga opinyon kondili hugot nga nanghawid sa kamatuoran sa Bibliya. Misulat si apostol Pablo: “Mao kini ang padayon ko nga ginaampo, nga ang inyong gugma mosamot pa sa pagdagaya uban ang tukmang kahibalo ug bug-os nga katakos sa pag-ila.”—Filipos 1:9.

Kon wala pa nimo mahimo, himoa nga imong tumong ang pagbatog “tukmang kahibalo ug bug-os nga katakos sa pag-ila” pinaagi sa pagkat-on kon unsay tinuod nga gitudlo sa Bibliya. Kadtong nagsundog sa mga taga-Berea dili malimbongan sa “mini nga mga pulong” sa mga antikristo. (2 Pedro 2:3) Hinunoa, sila mapagawas tungod sa espirituwal nga kamatuoran bahin sa tinuod nga Kristo ug sa iyang tinuod nga mga sumusunod.—Juan 8:32, 36.

[Kahon/Hulagway sa panid 4]

KON UNSAY GISULTI SA BIBLIYA BAHIN SA ANTIKRISTO

“Mga anak, mao na kini ang kataposang takna [dayag nga kataposan sa yugto sa mga apostoles], ug, ingon sa inyong nadungog nga ang antikristo moabot, bisan gani karon adunay daghang mitungha nga mga antikristo.”—1 Juan 2:18.

“Kinsa ba ang bakakon kondili siya nga nagalimod nga si Jesus mao ang Kristo? Kini mao ang antikristo, ang usa nga nagalimod sa Amahan ug sa Anak.”—1 Juan 2:22.

“Ang matag inspiradong pahayag nga wala magasugid bahin kang Jesus dili gikan sa Diyos. Dugang pa, kini ang inspiradong pahayag sa antikristo nga inyong nadungog nga moabot, ug karon kini ania na sa kalibotan.”—1 Juan 4:3.

“Daghang maglilimbong ang nagapanungha sa kalibotan, mga tawo nga wala magpahayag nga si Jesu-Kristo mianhi sa unod. Kini mao ang maglilimbong ug ang antikristo.”—2 Juan 7.

[Kahon/Mga hulagway sa panid 5]

USA KA MAGLILIMBONG NGA DAGHAG DAGWAY

Ang pulong nga “antikristo” aplikado sa tanan nga dili motuo sa gisulti sa Bibliya bahin kang Jesu-Kristo, sa tanan nga nagsupak sa iyang Gingharian, ug sa tanan nga nagdagmal sa iyang mga sumusunod. Naglakip usab kini sa mga indibiduwal, organisasyon, ug mga nasod nga bakakong nangangkon nga maoy hawas ni Kristo o sa pagkadili-tukma nangangkon sa papel sa Mesiyas pinaagi sa mapangahasong pagsaad nga magpatuman sa butang nga si Kristo lamang ang makapatuman—ang pagpatunghag tinuod nga kalinaw ug kasegurohan.

[Credit Line]

Augustine: ©SuperStock/age fotostock

[Hulagway sa panid 7]

Sama sa mga taga-Berea, angay natong ‘susihon sa adlaw-adlaw ang Kasulatan’