Higugmaa ang Diyos nga Nahigugma Kanimo
Higugmaa ang Diyos nga Nahigugma Kanimo
“Higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan.”—MATEO 22:37.
1, 2. Unsay lagmit nga hinungdan nga gipatungha ang pangutana bahin sa kinadak-ang sugo?
ANG pangutanang gipatungha lagmit gilalisan pag-ayo sa mga Pariseo sa adlaw ni Jesus. Sa kapin sa 600 ka balaod nga naglangkob sa Moisesnong Balaod, unsa ang labing hinungdanon? Ang balaod ba nga naglangkit sa halad? Sa pagkatinuod, ang mga halad gihimo aron mapasaylo ang mga sala ug magpasalamat sa Diyos. O ang labing hinungdanong balaod mao kaha ang balaod sa sirkunsisyon? Hinungdanon usab kana, tungod kay ang sirkunsisyon maoy ilhanan sa pakigsaad nga gihimo ni Jehova uban kang Abraham.—Genesis 17:9-13.
2 Sa laing bahin, ang mga tawong konserbatibo dayag nga nangatarongan nga sanglit ang matag balaod nga gihatag sa Diyos hinungdanon man—bisan tuod ang uban tingali dili kaayo hinungdanon—sayop nga ituboy ang bisan hain nianang sugoa ibabaw sa uban. Ang mga Pariseo nakahukom sa pagpangutana kang Jesus bahin nianang kontrobersiyal nga isyu. Basin may isulti siya nga makadaot sa iyang kredibilidad. Ang usa kanila miduol kang Jesus ug nangutana: “Unsa ang kinadak-ang sugo diha sa Balaod?”—Mateo 22:34-36.
3. Unsay giingon ni Jesus nga kinadak-ang sugo?
3 Ang tubag ni Jesus hinungdanon kaayo alang kanato karon. Sa iyang tubag, iyang gisumaryo kon unsa ang labing hinungdanong bahin sa matuod nga pagsimba kaniadto ug hangtod sa hangtod. Nagkutlo sa Deuteronomio 6:5, si Jesus miingon: “‘Higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan.’ Kini mao ang kinadak-an ug unang sugo.” Bisan tuod usa lang ka sugo ang gipangayo sa Pariseo, si Jesus mihatag ug lain pa. Nagkutlo sa Levitico 19:18, siya miingon: “Ang ikaduha, nga susama niini, mao kini, ‘Higugmaon mo ang imong silingan sama sa imong kaugalingon.’” Dayon gipakita ni Jesus nga kining duha ka balaod mao ang diwa sa putli nga pagsimba. Aron dili na nila ipasulti kaniya kon unsang mga balaora ang nagsunod depende sa pagkahinungdanon niini, siya mihinapos: “Niining duha ka sugo nagsukad ang tibuok Balaod, ug ang mga Manalagna.” (Mateo 22:37-40) Niining artikuloha, atong hisgotan ang kinadak-an niining duha ka sugo. Nganong angay natong higugmaon ang Diyos? Sa unsang paagi mapasundayag nato nga gihigugma nato siya? Ug sa unsang paagi maugmad nato ang maong gugma? Hinungdanon nga mahibaloan ang mga tubag niining mga pangutanaha, tungod kay aron mapahimut-an si Jehova, kinahanglang higugmaon nato siya sa tibuok natong kasingkasing, kalag, ug kaisipan.
Ang Kahinungdanon sa Gugma
4, 5. (a) Nganong wala man matingala ang Pariseo sa gisulti ni Jesus? (b) Unsay labawng bililhon para sa Diyos kay sa mga halad?
4 Ang Pariseo nga nangutana kang Jesus morag wala matugaw ni matingala sa tubag ni Jesus kaniya. Siya nahibalo nga ang gugma sa Diyos maoy hinungdanong bahin sa matuod nga pagsimba, bisan tuod daghan ang napakyas sa pagpakita niana. Diha sa mga sinagoga, maoy batasan ang paglitok ug kusog sa Shema, o pagpahayag sa pagtuo, ug kini naglakip sa mga teksto nga makita sa Deuteronomio 6:4-9, nga gikutlo ni Jesus. Sumala sa susamang asoy diha sa Marcos, ang Pariseo miingon kang Jesus: “Magtutudlo, maayo ang imong pagkasulti nga subay sa kamatuoran, ‘Siya Usa, ug wala nay lain gawas Kaniya’; ug kining paghigugma kaniya sa tibuok kasingkasing ug sa tibuok pagpanabot ug sa tibuok kusog ug kining paghigugma sa silingan sama sa kaugalingon labaw pa kaayog bili kay sa tanang tibuok nga mga halad-nga-sinunog ug sa mga halad.”—Marcos 12:32, 33.
5 Sa pagkatinuod, bisan tuod ang mga halad-nga-sinunog ug ang uban pang mga halad gisugo sa Balaod, ang gipabilhan gayod sa Diyos mao ang kinasingkasing nga gugma sa iyang mga alagad. Ang usa ka goryon nga gihalad ngadto sa Diyos uban ang gugma ug debosyon labi pang bililhon kaniya kay sa libolibong laking karnero nga gihalad uban ang sayop nga motibo. (Miqueas 6:6-8) Hinumdomi ang asoy bahin sa kabos nga babayeng balo nga nakita ni Jesus diha sa templo sa Jerusalem. Ang duha ka gagmayg kantidad nga mga sensilyo nga iyang gihulog sa panudlanag bahandi dili ikapalit ug bisan usa ka buok goryon. Apan, ang maong amot, nga gihatag uban ang kinasingkasing nga gugma alang kang Jehova, labi pang bililhon sa Diyos kay sa dagkong donasyon nga gihatag sa mga adunahan gikan sa ilang mga sobra. (Marcos 12:41-44) Pagkamakapadasig ang pagkahibalo nga para kang Jehova ang labing bililhon mao ang mahimong ipakita natong tanan bisan unsay atong sirkumstansiya—ang atong gugma kaniya!
6. Unsay gisulat ni Pablo bahin sa pagkahinungdanon sa gugma?
6 Sa pagpasiugda sa pagkahinungdanon sa gugma diha sa matuod nga pagsimba, si apostol Pablo misulat: “Kon ako nagasulti sa mga pinulongan sa mga tawo ug sa mga manulonda apan walay gugma, ako nahimong usa ka banha nga tulonggong tumbaga o usa ka nagapangkaay nga piyangpiyang. Ug kon ako may gasa sa pagpanagna ug sinati sa tanang sagradong mga tinago ug sa tanang kahibalo, ug kon nabatonan ko ang tanan nga pagtuo aron ilalin ang mga bukid, apan walay gugma, ako walay kapuslanan. Ug kon ihatag ko ang tanan kong mga gipanag-iya aron pakaonon ang uban, ug kon itugyan ko ang akong lawas, aron ako makapanghambog, apan walay gugma, kini dili magapulos kanako.” (1 Corinto 13:1-3) Tin-aw nga ang gugma hinungdanon aron ang atong pagsimba makapahimuot sa Diyos. Apan, sa unsang paagi ikapakita nato ang atong gugma kang Jehova?
Kon sa Unsang Paagi Ikapakita Nato ang Atong Gugma Kang Jehova
7, 8. Sa unsang paagi ikapakita nato ang atong gugma kang Jehova?
7 Daghan ang nagtuo nga ang gugma maoy pagbati nga dili kaayo nato makontrolar; ang mga tawo moingon nga sila nahigugma. Apan, ang tinuod nga gugma dili lamang usa ka pagbati. Kini maila ug makita sa lihok. Ang Bibliya naghisgot sa gugma ingong “labaw pa gayod nga paagi” ug ingong usa ka butang nga atong ‘pangagpason.’ (1 Corinto 12:31; 14:1) Ang mga Kristohanon giawhag sa paghigugma, dili lamang “pinaagi sa pulong ni sa dila, kondili sa buhat ug sa kamatuoran.”—1 Juan 3:18.
8 Ang gugma sa Diyos magtukmod kanato sa pagbuhat kon unsay makapahimuot kaniya ug sa pagdepensa ug pagbayaw sa iyang pagkasoberano, pinaagi sa mga pulong ug buhat. Kini magpalihok kanato sa paglikay sa paghigugma sa kalibotan ug sa dili-diyosnong mga paagi niini. (1 Juan 2:15, 16) Kadtong nahigugma sa Diyos nagdumot sa kon unsay daotan. (Salmo 97:10) Ang paghigugma sa Diyos naglangkit usab sa paghigugma sa silingan, nga atong hisgotan sa sunod nga artikulo. Dugang pa, ang paghigugma sa Diyos nagkinahanglan nga kita magmasinugtanon. Ang Bibliya nag-ingon: “Kini ang kahulogan sa paghigugma sa Diyos, nga atong bantayan ang iyang mga sugo.”—1 Juan 5:3.
9. Sa unsang paagi gipakita ni Jesus ang iyang gugma sa Diyos?
9 Hingpit nga gipasundayag ni Jesus kon unsay kahulogan sa paghigugma sa Diyos. Ang gugma nagpalihok kaniya sa pagbiya sa iyang pinuy-anan sa langit ug sa pagpuyo dinhi sa yuta ingong tawo. Kini nagtukmod kaniya sa paghimaya sa iyang Amahan pinaagi sa mga butang nga iyang gibuhat ug gitudlo. Ang gugma nagpalihok kaniya nga ‘magmasinugtanon hangtod sa kamatayon.’ (Filipos 2:8) Ang maong pagkamasinugtanon—nga nagpakita sa iyang gugma—nagbukas sa dalan aron ang matinumanong mga tawo makabaton ug matarong nga baroganan atubangan sa Diyos. Si Pablo misulat: “Pinaagi sa pagkadili-masinugtanon sa usa ka tawo [si Adan] daghan ang nahimong makasasala, sa ingon usab pinaagi sa pagkamasinugtanon sa usa ka persona [si Kristo-Jesus] daghan ang mahimong matarong.”—Roma 5:19.
10. Nganong ang paghigugma sa Diyos naglangkit ug pagkamasinugtanon?
10 Sama kang Jesus, atong ikapakita ang atong gugma pinaagi sa pagkahimong masinugtanon sa Diyos. Misulat ang pinalanggang apostol ni Jesus nga si Juan: “Kini mao ang kahulogan sa gugma, nga kita magpadayon sa paglakaw sumala sa iyang mga sugo.” (2 Juan 6) Kadtong tinuod nga nahigugma kang Jehova nangandoy sa iyang giya. Kay nakaamgo nga dili sila molampos sa pagtultol sa ilang kaugalingong mga lakang, sila nagsalig sa kaalam sa Diyos ug nagpasakop sa iyang mahigugmaong pagtultol. (Jeremias 10:23) Nahisama sila sa hamilig-hunahuna nga mga tawo sa karaang Berea kinsa midawat sa mensahe sa Diyos uban ang “kaikag sa hunahuna,” nga nakabaton ug dulot nga tinguha sa pagbuhat sa kabubut-on sa Diyos. (Buhat 17:11) Mainampingon nilang gisusi ang Kasulatan aron mas bug-os nga masabtan ang kabubut-on sa Diyos, nga nakatabang kanila sa pagpakitag gugma diha sa dugang pang mga buhat sa pagkamasinugtanon.
11. Unsay kahulogan sa paghigugma sa Diyos uban sa tibuok natong kasingkasing, kaisipan, kalag, ug kusog?
11 Sumala sa giingon ni Jesus, ang paghigugma sa Diyos naglangkit sa atong tibuok nga kasingkasing, kaisipan, kalag, ug kusog. (Marcos 12:30) Ang maong gugma naggikan sa kasingkasing, nga naglangkit sa atong mga pagbati, tinguha, ug kinasulorang mga hunahuna, ug kita nagtinguha gayod sa pagpahimuot kang Jehova. Kita mahigugma usab pinaagi sa atong hunahuna. Ang atong debosyon dili binuta; kita nakabaton ug kahibalo bahin kang Jehova—sa iyang mga hiyas, sukdanan, ug mga katuyoan. Atong gigamit ang atong kalag, ang atong tibuok nga pagkatawo ug ang kinabuhi nga atong nabatonan, sa pag-alagad ug pagdayeg kaniya. Ug gigamit nato ang atong kusog sa maong katuyoan usab.
Kon Nganong Angay Kitang Mahigugma Kang Jehova
12. Nganong nagsugo ang Diyos nga higugmaon nato siya?
12 Ang usa ka katarongan kon nganong angay kitang mahigugma kang Jehova mao nga siya nagsugo nga ibanaag nato ang iyang mga hiyas. Ang Diyos mao ang tuboran ug ang kinalabwang ehemplo sa gugma. “Ang Diyos gugma,” misulat ang inspiradong si apostol Juan. (1 Juan 4:8) Ang mga tawo gilalang sa dagway sa Diyos; kita gidisenyo nga mobatig gugma. Sa pagkatinuod, ang pagkasoberano ni Jehova gipasukad sa gugma. Ang gusto niyang mahimong mga sakop mao lamang kadtong moalagad kaniya tungod kay sila nahigugma ug nakaangay sa iyang matarong nga paagi sa pagmando. Sa pagkatinuod, ang gugma gikinahanglan aron may pakigdait ug panaghiusa sa tibuok kalalangan.
13. (a) Nganong gisugo ang mga Israelinhon: “Higugmaon mo si Jehova nga imong Diyos”? (b) Nganong makataronganon nga dahomon ni Jehova nga higugmaon nato siya?
13 Ang laing katarongan kon nganong angay natong higugmaon si Jehova mao nga kita mapasalamaton sa iyang nahimo alang kanato. Hinumdomi nga si Jesus miingon ngadto sa mga Hudiyo: “Higugmaon mo si Jehova nga imong Diyos.” Wala dahoma kanila nga ilang higugmaon ang usa ka diyos nga halayo ug wala nila hiilhi. Sila gisugo nga higugmaon ang Diyos nga nagpakitag gugma kanila. Si Jehova mao ang ilang Diyos. Siya mao ang Usa nga nagpagawas kanila gikan sa Ehipto ug nagdala kanila ngadto sa Yutang Saad, ang Usa nga nanalipod, nagtabang, ug nagmahal kanila, ang Usa nga nagdisiplina kanila diha sa gugma. Ug karon, si Jehova mao ang atong Diyos, ang usa nga naghatag sa iyang Anak ingong lukat aron kita makabaton ug kinabuhing walay kataposan. Makataronganon gayod nga dahomon ni Jehova nga higugmaon usab nato siya! Ang atong gugma maoy balos sa iyang gugma; kita gisugo nga higugmaon ang Diyos nga nahigugma kanato. Ang atong gugma maoy alang sa Usa nga “unang nahigugma kanato.”—1 Juan 4:19.
14. Sa unsang paagi ang gugma ni Jehova susama nianang sa usa ka mahigugmaong ginikanan?
14 Ang gugma ni Jehova sa katawhan susama nianang sa usa ka mahigugmaong ginikanan alang sa iyang mga anak. Bisan tuod dili hingpit, ang mahigugmaong mga ginikanan naghago sulod sa daghang katuigan sa pag-atiman sa ilang mga anak, nga nagbuhat niana sa dakong sakripisyo sa materyal ug sa uban pa. Ang mga ginikanan nagtudlo, nagdasig, nagpaluyo, ug nagdisiplina sa ilang mga anak tungod kay buot nila nga ang ilang anak magmalipayon ug magmauswagon. Sa baylo unsay gitinguha sa mga ginikanan? Buot nila nga higugmaon usab sila sa ilang mga anak ug sundon ang ilang gitudlo sa ilang mga anak alang sa ilang kaayohan. Dili ba makataronganon nga dahomon sa atong hingpit nga langitnong Amahan nga magpakita kitag mahigugmaong apresasyon sa tanan niyang nahimo alang kanato?
Pag-ugmad ug Gugma Alang sa Diyos
15. Unsa ang unang lakang sa pag-ugmad ug gugma alang sa Diyos?
15 Wala pa gayod kita makakita sa Diyos ni makadungog sa iyang tingog. (Juan 1:18) Bisan pa niana, gidapit niya kita sa pagbaton ug usa ka mahigugmaong relasyon uban kaniya. (Santiago 4:8) Sa unsang paagi mahimo nato kana? Ang unang lakang aron higugmaon nato ang usa ka tawo mao ang pagbaton ug kahibalo bahin kaniya; lisod mobati ug dulot nga pagmahal sa usa ka tawo nga wala nato hiilhi. Si Jehova nagtagana sa iyang Pulong, ang Bibliya, aron makakat-on kita bahin kaniya. Mao nga si Jehova, pinaagi sa iyang organisasyon, nagdasig kanato sa pagbasa kanunay sa Bibliya. Ang Bibliya maoy nagtudlo kanato bahin sa Diyos, sa iyang mga hiyas, iyang personalidad, maingon man sa iyang mga pakiglabot sa mga tawo sulod sa libolibo ka katuigan. Samtang palandongon nato ang maong mga asoy, mouswag ang atong pagsabot ug gugma kaniya.—Roma 15:4.
16. Sa unsang paagi ang pagpamalandong bahin sa ministeryo ni Jesus makapadako sa atong gugma sa Diyos?
16 Ang pangunang paagi nga modako ang atong gugma kang Jehova mao ang pagpamalandong sa kinabuhi ug ministeryo ni Jesus. Sa pagkatinuod, si Jesus hingpit nga nagsumbalik-silaw sa iyang Amahan nga siya nakaingon: “Siya nga nakakita kanako nakakita usab sa Amahan.” (Juan 14:9) Wala ka ba matandog sa pagkamabination nga gipakita ni Jesus diha sa pagbanhaw sa bugtong anak nga lalaki sa usa ka babayeng balo? (Lucas 7:11-15) Dili ba makapalipay ang pagkahibalo nga siya—ang Anak sa Diyos ug ang labing bantogang tawo nga nabuhi sukad—mapaubsanong naghugas sa tiil sa iyang mga tinun-an? (Juan 13:3-5) Dili ka ba matandog sa pagkahibalo nga bisan tuod siya mas bantogan ug mas maalamon kay ni bisan kinsang tawo, siya daling duolon sa tanan, lakip na sa mga bata? (Marcos 10:13, 14 ) Samtang mapasalamaton kitang mamalandong niining mga butanga, kita mahisama sa mga Kristohanon nga gisulatan ni Pedro: “Bisan pag kamo wala makakita [kang Jesus], kamo nahigugma kaniya.” (1 Pedro 1:8) Sa dihang modako ang atong gugma kang Jesus, modako usab ang atong gugma kang Jehova.
17, 18. Ang pagpamalandong sa unsang mahigugmaong mga tagana ni Jehova ang makapadako sa atong gugma kaniya?
17 Ang laing paagi nga modako ang atong gugma sa Diyos mao ang pagpamalandong bahin sa dagayang mahigugmaong mga tagana nga iyang gihimo aron matagamtam nato ang kinabuhi—ang katahom sa kalalangan, ang nagkadaiyang lamiang mga pagkaon, ang makapadasig nga pagpakig-uban sa suod nga mga higala, maingon man ang daghan pa kaayong butang nga naghatag kanatog kalipay ug katagbawan. (Buhat 14:17) Kon mas daghan ang atong makat-onan bahin sa Diyos, mas daghan ang atong katarongan nga magpasalamat sa iyang walay-kinutobang pagkamaayo ug pagkamanggihatagon. Hunahunaa ang tanang butang nga nahimo ni Jehova alang kanimo mismo. Dili ka ba mouyon nga siya takos sa imong paghigugma?
18 Lakip sa daghang gasa gikan sa Diyos mao ang kahigayonan nga kita makaduol kaniya pinaagi sa pag-ampo sa bisan unsang panahon, nga nahibalo nga ang “Tigpatalinghog sa pag-ampo” mamati kanato. (Salmo 65:2) Gidelegar ni Jehova sa iyang pinalanggang Anak ang awtoridad sa pagmando ug paghukom. Apan, wala niya idelegar sa uban, lakip na sa iyang Anak, ang pagpatalinghog sa atong mga pag-ampo. Siya personal nga mamati sa atong mga pag-ampo. Busa, ang mahigugmaon, personal nga kabalaka nga gipakita ni Jehova makapasuod nato kaniya.
19. Unsang mga saad ni Jehova ang makapasuod nato kaniya?
19 Masuod usab kita kang Jehova kon atong palandongon kon unsay iyang katuyoan alang sa katawhan sa umaabot. Nagsaad siya nga taposon ang sakit, kagul-anan, ug kamatayon. (Pinadayag 21:3, 4) Sa dihang mahingpit na ang katawhan, wala nay mag-antos sa depresyon, kahigawad, o trahedya. Ang gutom, kakabos, ug gubat mawala na. (Salmo 46:9; 72:16) Ang yuta mahimo nang paraiso. (Lucas 23:43) Ihatag ni Jehova kining maong mga panalangin, dili tungod kay obligado siyang mohatag niana, kondili tungod kay siya nahigugma kanato.
20. Unsay giingon ni Moises bahin sa benepisyo sa paghigugma kang Jehova?
20 Busa, adunay makapakombinsir nga mga katarongan sa paghigugma sa Diyos ug sa pagpadako nianang maong gugma. Magpadayon ka ba sa pagpalig-on sa imong gugma sa Diyos, nga tugotan siya sa pagtultol sa imong mga dalan? Anaa ra kana kanimo. Giila ni Moises ang mga benepisyo sa pag-ugmad ug pagbaton ug gugma alang kang Jehova. Sa mga Israelinhon sa karaang panahon, si Moises miingon: “Kinahanglan nga pilion mo ang kinabuhi aron ikaw magpadayong buhi, ikaw ug ang imong kaliwat, pinaagi sa paghigugma kang Jehova nga imong Diyos, pinaagi sa pagpamati sa iyang tingog ug sa pag-unong kaniya; kay siya mao ang imong kinabuhi ug ang gitas-on sa imong mga adlaw.”—Deuteronomio 30:19, 20.
Nahinumdom Ka Ba?
• Nganong hinungdanon nga kita mahigugma kang Jehova?
• Unsaon nato pagpakita ang atong gugma sa Diyos?
• Unsay atong mga katarongan sa paghigugma kang Jehova?
• Sa unsang paagi maugmad nato ang gugma alang sa Diyos?
[Mga Pangutana sa Pagtuon]
[Hulagway sa panid 20]
Pabilhan gayod ni Jehova ang mahimong ipakita natong tanan—ang atong gugma kaniya
[Mga hulagway sa panid 23]
“Siya nga nakakita kanako nakakita usab sa Amahan.”—Juan 14:9