Kon Unsay Kahulogan sa Paghigugma sa Atong Silingan

“Higugmaon mo ang imong silingan sama sa imong kaugalingon.”—MATEO 22:39.

1. Sa unsang paagi mapakita nato nga kita nahigugma sa Diyos?

 UNSAY gikinahanglan ni Jehova sa iyang mga magsisimba? Sa pipila ka yano ug makahuloganong mga pulong gisumaryo ni Jesus ang tubag. Matod niya, ang kinadak-ang sugo mao ang paghigugma kang Jehova sa tibuok natong kasingkasing, kalag, kaisipan, ug kusog. (Mateo 22:37; Marcos 12:30) Sa ato nang nasabtan sa nag-unang artikulo, ang paghigugma sa Diyos naglangkit sa pagsugot kaniya ug pagtuman sa iyang mga sugo agig balos sa gugma nga iyang gipakita kanato. Alang niadtong nahigugma sa Diyos, dili bug-at ang pagbuhat sa iyang kabubut-on; kini makapalipay kanila.—Salmo 40:8; 1 Juan 5:2, 3.

2, 3. Nganong angay natong hatagag pagtagad ang sugo nga higugmaon ang atong silingan, ug unsang mga pangutana ang motungha?

² Ang ikaduhang kinadak-ang sugo, matod ni Jesus, nalangkit sa nag-una: “Higugmaon mo ang imong silingan sama sa imong kaugalingon.” (Mateo 22:39) Kining sugoa ang atong hatagag pagtagad karon, ug may maayong katarongan. Ang panahon nga atong gikinabuhian gitiman-an sa mahakogon, tinuis nga matang sa gugma. Sa iyang inspiradong kahubitan sa “kataposang mga adlaw,” si apostol Pablo misulat nga ang mga tawo mahigugma, dili sa usag usa, kondili sa ilang kaugalingon, sa salapi, ug sa mga kalipayan. Daghan ang “walay kinaiyanhong pagbati,” o sumala sa usa ka hubad sa Bibliya, sila “walay kinaiyanhong pagmahal sa ilang mga pamilya.” (2 Timoteo 3:1-4) Si Jesu-Kristo nagtagna: “Ang daghan . . . magbudhiay sa usag usa ug magdumtanay sa usag usa. . . . Mobugnaw ang gugma sa kadaghanan.”—Mateo 24:10, 12.

³ Apan, matikdi nga wala moingon si Jesus nga mobugnaw ang gugma sa tanan. Duna gayoy magpakita sa matang sa gugma nga gikinahanglan ni Jehova ug takos ipakita kaniya. Kadtong tinuod nga nahigugma kang Jehova maningkamot sa paglantaw sa uban sama sa iyang paglantaw kanila. Apan, kinsa man ang atong silingan nga angay natong higugmaon? Unsaon nato pagpakitag gugma sa atong silingan? Ang Kasulatan motabang kanato sa pagtubag niining hinungdanong mga pangutana.

 Kinsa ang Akong Silingan?

4. Sumala sa Levitico kapitulo 19, kinsay angayng pakitaag gugma sa mga Hudiyo?

⁴ Sa dihang giingnan niya ang Pariseo nga ang ikaduhang kinadak-ang sugo mao ang paghigugma sa silingan sama sa kaugalingon, gihisgotan ni Jesus ang usa ka espesipikong balaod nga gihatag ngadto sa Israel. Nasulat kini sa Levitico 19:18. Nianang kapituloha, giingnan ang mga Hudiyo nga angay nilang isipong mga silingan ang uban gawas sa mga isigka-Israelinhon. Ang bersikulo 34 nag-ingon: “Ang langyaw nga pumoluyo nga nagapuyo ingong langyaw uban kaninyo kinahanglang mahisama sa lumad taliwala kaninyo; ug higugmaon mo siya ingon sa imong kaugalingon, kay kamo nahimong langyaw nga mga pumoluyo sa yuta sa Ehipto.” Busa, bisan ang mga dili-Hudiyo, ilabina ang mga kinabig, kinahanglang pakitaag gugma.

5. Unsay pagsabot sa mga Hudiyo sa paghigugma sa silingan?

⁵ Apan, ang Hudiyong mga pangulo sa adlaw ni Jesus lahig panglantaw. Ang uban nagtudlo nga ang mga terminong “higala” ug “silingan” mapadapat lamang sa mga Hudiyo. Ang mga dili-Hudiyo pagadumtan. Ang maong mga magtutudlo nangatarongan nga kinahanglang tamayon sa mga magsisimba sa Diyos ang walay diyos. “Sa ingon niana nga kahimtang,” matod pa sa usa ka reperensiyang basahon, “seguradong molambo ang pagdumot. Daghang butang ang mag-aghat niana.”

6. Unsang duha ka punto ang gipasiugda ni Jesus sa dihang naghisgot bahin sa paghigugma sa silingan?

⁶ Sa iyang Wali sa Bukid, gihisgotan ni Jesus kining maong isyu, nga nagpunting kon kinsay angayng pakitaag gugma. Siya miingon: “Nadungog ninyo nga kini giingon, ‘Higugmaon mo ang imong silingan ug dumtan ang imong kaaway.’ Apan, ako magaingon kaninyo: Magpadayon sa paghigugma sa inyong mga kaaway ug sa pag-ampo alang sa mga nagalutos kaninyo; aron inyong mapamatud-an ang inyong kaugalingon nga mga anak sa inyong Amahan nga anaa sa mga langit, sanglit siya magapasubang sa iyang adlaw diha sa mga tawong daotan ug sa mga maayo ug magapaulan diha sa mga tawong matarong ug sa mga dili-matarong.” (Mateo 5:43-45) Dinhi gipasiugda ni Jesus ang duha ka punto. Una, si Jehova manggihatagon ug maluloton ngadto sa maayo ug sa daotan. Ikaduha, kinahanglang sundon nato ang iyang panig-ingnan.

7. Unsang pagtulon-an ang atong mapupo gikan sa sambingay sa buotang Samarianhon?

⁷ Sa laing higayon, usa ka Hudiyo nga batid sa Balaod nangutana kang Jesus: “Kinsa ba gayod ang akong silingan?” Si Jesus mitubag pinaagi sa pag-asoy ug sambingay bahin sa usa ka Samarianhon nga nakakitag usa ka Hudiyo nga gidagmalan sa mga tulisan ug gikawatan sa tanan niyang kabtangan. Bisan tuod ang mga Hudiyo sa katibuk-an nagtamay sa mga Samarianhon, gihunaran ug gibugkosan sa Samarianhon ang mga samad sa maong tawo ug gidala siya ngadto sa usa ka balay-abotanan, diin maulian siya sa iyang mga samad. Unsay atong mapupo nga pagtulon-an? Ang atong gugma sa silingan kinahanglang ipakita usab ngadto sa mga tawo nga dili nato parehog rasa, nasyonalidad, o relihiyon.—Lucas 10:25, 29, 30, 33-37.

Kon Unsay Kahulogan sa Paghigugma sa Atong Silingan

8. Sumala sa Levitico kapitulo 19, unsaon pagpakita ang gugma?

⁸ Ang paghigugma sa silingan, sama sa paghigugma sa Diyos, dili usa ka pagbati lamang; kini naglangkit  ug buhat. Mapuslanon ang dugang pagkonsiderar sa konteksto sa sugo nga nasulat sa Levitico 19 nga nag-awhag sa katawhan sa Diyos sa paghigugma sa ilang silingan sama sa ilang kaugalingon. Didto atong mabasa nga ang mga Israelinhon gisugo nga tugotan ang mga sinakit ug ang langyawng mga pumoluyo sa pag-ambit sa ani. Gidid-an sila sa pagpangawat, pagpanglimbong, o pagpamakak. Maylabot sa hudisyal nga mga butang ang mga Israelinhon kinahanglang dili magmapihigon. Bisan tuod sila mahimong mobadlong kon gikinahanglan, sila espesipikong gisultihan: “Dili ka magdumot sa imong igsoon diha sa imong kasingkasing.” Kini ug ang daghan pang mga sugo gisumaryo sa mga pulong: “Higugmaon mo ang imong isigkatawo sama sa imong kaugalingon.”—Levitico 19:9-11, 15, 17, 18.

9. Nganong gisugo ni Jehova ang mga Israelinhon nga magpabiling bulag gikan sa ubang mga nasod?

⁹ Bisan tuod ang mga Israelinhon gisugo sa pagpakitag gugma sa uban, kinahanglang magpabilin silang bulag niadtong nagsimba ug mini nga mga diyos. Gipasidan-an sila ni Jehova bahin sa mga kapeligrohan ug mga sangpotanan sa daotang pakig-uban. Pananglitan, mahitungod sa mga nasod nga gipapahawa sa mga Israelinhon sa ilang yuta, si Jehova nagsugo: “Dili ka makig-alyansa sa kaminyoon uban kanila. Ang imong anak nga babaye dili mo ihatag ngadto sa iyang anak nga lalaki, ug ang iyang anak nga babaye dili mo kuhaon alang sa imong anak nga lalaki. Kay iyang italikod ang imong anak sa pagsunod kanako, ug sila tinong moalagad ug laing mga diyos; ug ang kasuko ni Jehova mosilaob gayod batok kaninyo.”—Deuteronomio 7:3, 4.

10. Batok sa unsa nga kita kinahanglang magbantay?

¹⁰ Sa samang paagi, ang mga Kristohanon magbantay batok sa pagpakigsuod niadtong mga tawo nga makapahuyang sa ilang pagtuo. (1 Corinto 15:33) Gitambagan kita: “Ayaw pagpayugo nga dili timbang sa mga dili-magtutuo,” kadtong dili bahin sa Kristohanong kongregasyon. (2 Corinto 6:14) Dugang pa, ang mga Kristohanon gitambagan nga magminyo “lamang diha sa Ginoo.” (1 Corinto 7:39) Apan, dili gayod nato tamayon kadtong wala magatuo kang Jehova. Si Kristo namatay alang sa mga makasasala, ug daghan nga nagbuhat kanhi ug daotang mga butang ang nagbag-o sa ilang panggawi ug napasig-uli sa Diyos.—Roma 5:8; 1 Corinto 6:9-11.

11. Unsa ang labing maayong paagi sa pagpakita ug gugma niadtong wala mag-alagad kang Jehova, ug ngano?

¹¹ Sa pagpakitag gugma niadtong wala mag-alagad sa Diyos, ang labing maayong paagi mao ang pagsundog kang Jehova mismo. Bisan tuod gidumtan niya ang pagkadaotan, nagpakita siya ug mahigugmaong-kalulot sa tanan pinaagi sa paghatag kanilag kahigayonan nga motalikod sa ilang daotang mga dalan ug makadawat ug kinabuhing walay kataposan. (Ezequiel 18:23) Si Jehova “nagtinguha nga ang tanan makakab-ot sa paghinulsol.” (2 Pedro 3:9) Iyang kabubut-on nga “ang tanang matang sa mga tawo mangaluwas unta ug makadangat sa tukmang kahibalo sa kamatuoran.” (1 Timoteo 2:4) Mao nga gisugo ni Jesus ang iyang mga sumusunod sa pagsangyaw ug pagpanudlo ug sa “paghimog mga tinun-an sa katawhan sa tanang kanasoran.” (Mateo 28:19, 20) Pinaagi sa atong pagpakigbahin niining buluhatona, atong mapakita ang gugma alang sa Diyos ug sa silingan, oo, lakip na gani sa atong mga kaaway!

Gugma Alang sa Atong Kristohanong mga Igsoon

12. Unsay gisulat ni apostol Juan bahin sa paghigugma sa atong igsoon?

¹² Si apostol Pablo misulat: “Buhaton nato ang maayo ngadto sa tanan, apan ilabina kanila nga atong kabanay sa pagtuo.” (Galacia 6:10) Ingong mga Kristohanon, kita may obligasyon nga magpakitag gugma niadtong atong kabanay sa pagtuo—ang atong espirituwal nga mga igsoon. Unsa ka hinungdanon kining maong gugma? Sa pagpasiugda niining hinungdanong punto, si apostol Juan misulat: “Ang matag usa nga nagadumot sa iyang igsoon maoy usa ka mamumuno . . . Kon adunay magpahayag: ‘Gihigugma ko ang Diyos,’ apan nagdumot sa iyang igsoon, siya bakakon. Kay siya nga wala mahigugma sa iyang igsoon, nga iyang nakita, dili makahimo sa paghigugma sa Diyos, nga wala niya makita.” (1 Juan 3:15; 4:20) Kini maoy puwersadong mga pulong. Gipadapat ni Jesu-Kristo ang mga pulong “mamumuno” ug “bakakon” kang Satanas nga Yawa. (Juan 8:44) Dili gayod nato buot nga ipadapat kanato kanang mga pulonga!

13. Sa unsang paagi kita makapakita ug gugma sa mga isigkamagtutuo?

¹³ Ang matuod nga mga Kristohanon “gitudloan na sa Diyos nga maghigugmaay sa usag usa.”  (1 Tesalonica 4:9) Kita gisugo nga maghigugmaay “dili pinaagi sa pulong ni sa dila, kondili sa buhat ug sa kamatuoran.” (1 Juan 3:18) Ang atong gugma kinahanglang “walay pagkasalingkapaw.” (Roma 12:9) Ang gugma magtukmod kanato nga mahimong maluloton, mabination, mapinasayloon, mapailobon ug dili abughoan, dili hambogiro, dili mapahitas-on, o hakog. (1 Corinto 13:4, 5; Efeso 4:32) Kini magtukmod kanato sa ‘pagpaulipon sa usag usa.’ (Galacia 5:13) Giingnan ni Jesus ang iyang mga tinun-an nga higugmaon ang usag usa ingon sa iyang paghigugma kanila. (Juan 13:34) Busa ang usa ka Kristohanon kinahanglang andam gani nga mamatay alang sa iyang mga isigkamagtutuo kon gikinahanglan.

14. Sa unsang paagi ikapakita nato ang gugma sulod sa pamilya?

¹⁴ Ang gugma kinahanglang ipakita gayod sulod sa Kristohanong pamilya, ilabina sa bana ug asawa. Suod kaayo ang bugkos sa kaminyoon nga si Pablo miingon: “Ang mga bana angay nga maghigugma sa ilang mga asawa sama sa ilang kaugalingong mga lawas.” Siya miingon pa: “Siya nga nahigugma sa iyang asawa nahigugma sa iyang kaugalingon.” (Efeso 5:28) Atong makita nga gisubli ni Pablo kining tambaga sa bersikulo 33. Ang bana nga nahigugma sa iyang asawa dili mosundog sa mga Israelinhon sa adlaw ni Malaquias kinsa nagluib sa ilang mga kapikas. (Malaquias 2:14) Mahalon sa bana ang iyang asawa. Higugmaon niya kini sama sa paghigugma ni Kristo sa kongregasyon. Sa samang paagi, ang gugma magtukmod usab sa asawa sa pagtahod sa iyang bana.—Efeso 5:25, 29-33.

15. Tungod sa gipakitang inigsoong gugma, unsay gisulti ug gibuhat sa pipila?

¹⁵ Tin-aw nga kining matanga sa gugma maoy timailhan sa matuod nga mga Kristohanon. Si Jesus miingon: “Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.” (Juan 13:35) Tungod sa atong gugma sa usag usa, madani ang mga tawo sa pagduol sa Diyos nga atong gihigugma ug gihawasan. Pananglitan, gikan sa Mozambique dunay taho bahin sa usa ka pamilyang Saksi. “Wala pa gayod kami makakita ug ingon niini. Sa hapon, misugod paghuros ang makusog nga hangin, nga gisundan sa pagbunok sa ulan ug pag-ulan ug yelo. Tungod sa makusog nga hangin, naguba ang among balay nga gama sa tangbo, ug napadpad ang mga atop nga sin. Sa dihang ang mga igsoon gikan sa sikbit nga mga kongregasyon nangabot ug mitabang sa pagtukod pag-usab sa among balay, ang among natingalang mga silingan miingon: ‘Maayo kaayo ang inyong relihiyon. Wala pa gayod kami makadawat sukad ug tabang nga sama niini gikan sa among relihiyon.’ Among gibuksan ang Bibliya ug gipakita kanila ang Juan 13:34, 35. Daghan sa among mga silingan ang nagtuon na karon sa Bibliya.”

Gugma Alang sa mga Indibiduwal

16. Unsay kalainan tali sa paghigugma sa usa ka grupo ug sa paghigugma sa mga indibiduwal?

¹⁶ Dili lisod ang paghigugma sa atong mga silingan sa katibuk-an, ingong grupo. Apan, ang paghigugma sa mga indibiduwal mahimong lisod kaayong ipakita. Pananglitan, ang gugma sa pipila ka tawo para sa silingan naglangkit lamang ug paghatag ug donasyon ngadto sa pipila ka organisasyon sa buhat sa kaluoy. Sa pagkatinuod, mas sayon ang pag-ingon nga gihigugma nato ang atong silingan kay sa paghigugma sa usa ka isigkatrabahante nga morag wala makaangay kanato, sa ngil-ad ug batasan nga tawo nga nagpuyo duol sa atong balay, o sa usa ka higala nga nakapahigawad kanato.

17, 18. Giunsa pagpakita ni Jesus ug gugma ngadto sa mga indibiduwal, ug unsay iyang motibo sa pagbuhat niana?

¹⁷ Maylabot sa paghigugma sa mga indibiduwal, may makat-onan kita kang Jesus, kinsa hingpit nga nagbanaag sa mga hiyas sa Diyos. Bisan tuod mianhi siya sa yuta aron sa pagkuha sa sala sa kalibotan, siya nagpakitag gugma alang sa mga indibiduwal—sa usa ka masakitong babaye, sa usa ka sanlahon, sa usa ka bata. (Mateo 9:20-22; Marcos 1:40-42;  7:26, 29, 30; Juan 1:29) Sa samang paagi, ikapakita nato ang gugma sa atong silingan sa paagi nga kita nakiglabot sa mga indibiduwal nga atong mahibalag kada adlaw.

¹⁸ Apan, dili gayod nato kalimtan nga ang paghigugma sa silingan nalangkit sa paghigugma sa Diyos. Bisan tuod gitabangan ni Jesus ang mga kabos, giayo ang mga masakiton, ug gipakaon ang gigutom, ang iyang motibo sa pagbuhat niining tanan maingon man sa pagtudlo sa panon sa katawhan mao ang pagtabang kanila nga mapasig-uli kang Jehova. (2 Corinto 5:19) Gihimo ni Jesus ang tanang butang alang sa kahimayaan sa Diyos, nga wala gayod malimot nga siya naghawas ug nagsumbalik-silaw sa Diyos nga iyang gihigugma. (1 Corinto 10:31) Pinaagi sa pagsundog sa panig-ingnan ni Jesus, kita makapakita usab ug tiunay nga gugma sa silingan ug sa samang higayon makapabiling dili bahin sa kalibotan sa daotang katawhan.

Unsaon Nato Paghigugma ang Atong Silingan Sama sa Atong Kaugalingon?

19, 20. Unsay kahulogan sa paghigugma sa atong silingan sama sa atong kaugalingon?

¹⁹ Si Jesus miingon: “Higugmaon mo ang imong silingan sama sa imong kaugalingon.” Natural lamang nga atimanon nato ang atong kaugalingon ug batonan ang makataronganong sukod sa pagtahod sa kaugalingon. Kay kon dili, ang maong sugo dili kaayo makahuloganon. Kining hustong matang sa paghigugma sa kaugalingon dili nato pakasaypon ingong mahakogong paghigugma sa kaugalingon nga gihisgotan ni apostol Pablo sa 2 Timoteo 3:2. Hinunoa, kini maoy makataronganong pagbati ug pagtamod sa kaugalingon. Ang usa ka eskolar sa Bibliya naghubit niana ingong “timbang nga paghigugma sa kaugalingon nga dili bayawon o tamayon ang kaugalingon.”

²⁰ Ang paghigugma sa uban sama sa paghigugma nato sa atong kaugalingon nagpasabot nga atong isipon ang uban sa paagi nga gusto natong isipon nila kita ug tagdon ang uban sa paagi nga gusto natong tagdon nila kita. Si Jesus miingon: “Busa, ang tanang butang nga buot ninyo nga pagabuhaton sa mga tawo nganha kaninyo, kinahanglang pagabuhaton usab ninyo sa ingon ngadto kanila.” (Mateo 7:12) Matikdi nga si Jesus wala moingon nga atong hunahunaon kanunay kon unsay nahimo sa uban kanato sa miagi ug dayon panimaslan nato sila. Hinunoa, angay natong hunahunaon kon sa unsang paagi gusto natong tagdon kita sa uban ug unya buhaton nato kana ngadto kanila. Matikdi usab nga si Jesus wala moingon nga ipadapat lamang kini sa mga higala ug sa kaigsoonan. Gigamit niya ang pulong “mga tawo,” tingali aron ipaila nga kinahanglan kitang mogawi niining paagiha ngadto sa tanang tawo, sa tanan nga atong mahibalag.

21. Pinaagi sa pagpakitag gugma ngadto sa uban, unsay atong gipasundayag?

²¹ Ang paghigugma sa atong silingan manalipod kanato sa pagbuhat kon unsay daotan. Si apostol Pablo misulat: “Ang kalagdaan sa balaod, ‘Dili ka manapaw, Dili ka magbuno, Dili ka mangawat, Dili ka maibog nga hinakog,’ ug ang bisan unsa pang ubang sugo, nalangkob niining pulonga, nga mao, ‘Higugmaon mo ang imong silingan sama sa imong kaugalingon.’ Ang gugma dili magabuhat ug daotan ngadto sa silingan.” (Roma 13:9, 10) Ang gugma mopalihok kanato sa pagpangitag mga paagi sa pagbuhat ug maayo ngadto sa uban. Pinaagi sa paghigugma sa atong isigkatawo, atong gipakita nga nahigugma usab kita sa usa nga naglalang sa tawo sumala sa Iyang dagway, si Jehova nga Diyos.—Genesis 1:26.

Unsay Imong Tubag?

• Kang kinsa kita angayng magpakitag gugma, ug ngano?

• Sa unsang paagi ikapakita nato ang gugma niadtong wala mag-alagad kang Jehova?

• Sa unsang paagi gihubit sa Bibliya ang gugma nga angay natong mabatonan alang sa atong mga igsoon?

• Unsay kahulogan sa paghigugma sa atong silingan sama sa atong kaugalingon?

[Mga Pangutana sa Pagtuon]

[Hulagway sa panid 26]

“Kinsa ba gayod ang akong silingan?”

[Hulagway sa panid 29]

Gipakita ni Jesus ang gugma ngadto sa mga indibiduwal