Mahimo Bang Tul-iron ang Usa ka Huwes?

SI Sladjana, usa sa mga Saksi ni Jehova sa Croatia, naeskedyul nga moatubang sa korte bahin sa pipila ka kaso sa panalapi. Siya mipresentar sa iyang kaugalingon atubangan sa usa ka huwes. Ugaling lang, ang kaatbang sa kaso naulahi. Si Sladjana gustong mosangyaw, busa samtang ang tanang tawo naghulat, siya nagbatog kaisog sa pagpakigsulti sa huwes.

“Sir, nahibalo ka ba nga sa dili madugay wala nay mga huwes ug mga korte dinhi sa yuta?” siya misukna. Siyempre, siya nagtumong sa mga huwes sumala sa atong nailhan karon.

Sa katingala, ang huwes mitan-aw lamang kaniya nga wala makatingog. Dayon gisugdan ang husay. Sa dihang sila nahuman ug si Sladjana mitindog na aron mopirma sa usa ka dokumento, ang huwes mipaduol ug mihunghong kaniya nga nangutana: “Segurado ka ba sa imong giingon kanako ganina, nga sa dili madugay wala nay mga huwes ug mga korte dinhi sa yuta?”

“Oo, Sir. Segurado kaayo ko!” mitubag si Sladjana.

“Unsa may imong pamatuod niana?” ang huwes nangutana.

“Makaplagan man na sa Bibliya Sir,” si Sladjana mitubag.

Ang huwes miingon nga buot siyang mobasa sa maong ebidensiya, apan wala siyay Bibliya. Mao nga si Sladjana mitanyag nga dad-an siyag usa ka kopya. Ang mga Saksi miduaw sa huwes, mihatag kaniyag Bibliya, ug midasig kaniya sa pagtuon sa Bibliya matag semana. Misugot niini ang huwes ug sa wala madugay siya nahimong usa sa mga Saksi ni Jehova.

Sa matagnaong paagi, ang Salmo 2:10 nag-ingon: “Karon, Oh mga hari, gamita ang hait nga salabotan; magpatul-id kamo, Oh mga maghuhukom sa yuta.” Makapadasig gayod sa dihang ang maong mga tawo mapaubsanong modawat sa mahigugmaong pagtultol ni Jehova.

[Hulagway sa panid 32]

Si Sladjana uban sa huwes