Mapuslanon Gayod ang Pagkamaminatud-on

ANG pagkadili-maminatud-on naglungtad na sukad sa tanaman sa Eden. Apan, daghang kultura ug mga katilingban ang nagpabili sa pagkamaminatud-on ug nag-isip sa pagpamakak ug pagpanglimbong ingong dili tilinguhaon ug salawayon. Kon ikaw giisip nga kasaligan, angay kang malipay niana. Apan, ang pagkadili-maminatud-on anam-anam nga giisip nga kinahanglanon aron makasagubang sa modernong katilingban. Unsay imong pagbati bahin niini? Angay bang ugmaron ang pagkamaminatud-on? Unsay imong sukdanan sa paghukom kon unsay maminatud-on ug dili-maminatud-on nga panggawi?

Aron mapahimut-an ang Diyos, kita kinahanglang magmaminatud-on sa atong sinultihan ug sa atong pagkinabuhi. Si apostol Pablo nagtambag sa iyang mga isigka-Kristohanon: “Magsulti sa tinuod ang matag usa kaninyo sa iyang silingan.” (Efeso 4:25) Si Pablo misulat usab: “Buot namong magmaminatud-on sa tanang butang.” (Hebreohanon 13:18) Ang atong motibo sa pagkamaminatud-on dili aron dayegon sa atong mga isigkatawo. Kita maminatud-on tungod kay atong gitahod ang atong Maglalalang ug gusto natong pahimut-an siya.

Ayaw Pagpakaaron-ingnon

Sa daghang kayutaan, ang mga tawo magpakaaron-ingnon aron makabatog mga bentaha. Sila magkuhag mini nga mga dokumento, diploma, ug mga papeles nga nagpaila sa ilang kaugalingon aron ilegal nga makasulod sa usa ka nasod o makakuhag trabaho o katungdanan nga sila dili kuwalipikado. Ang pipila ka mga ginikanan magpalsipikar sa mga sertipiko sa pagkatawo sa ilang mga anak aron makaeskuyla pag dugay.

Apan, aron kita kahimut-an sa Diyos, kinahanglang dili kita malimbongon. Ang Bibliya nag-ingon nga si Jehova maoy “Diyos sa kamatuoran” ug siya nagdahom nga magmaminatud-on kadtong mga suod kaniya. (Salmo 31:5) Kon buot kitang makahupot ug suod nga relasyon uban kang Jehova, kinahanglang dili nato sundogon ang ‘bakakong mga tawo,’ kadtong ‘nagpakaaron-ingnon.’—Salmo 26:4.

Ang mga tawo kasagarang dili motug-an sa tinuod kon ilang mahibaloan nga sila disiplinahon tungod sa ilang sayop nga nahimo. Bisan diha sa Kristohanong kongregasyon, ang usa ka tawo lagmit matental sa paghimo niana. Pananglitan, sa usa ka kongregasyon giangkon sa usa ka batan-ong lalaki ngadto sa mga ansiyano nga siya nakahimog pipila ka sala. Apan, wala niya angkona ang pagpangawat bisag dunay ebidensiya batok kaniya. Sa ngadtongadto nahibaloan ra nga siya namakak ug nangawat gayod ug busa siya gipalagpot gikan sa kongregasyon. Dili ba mas maalamon nga siya nagmatinud-anon gayod ug matabangan aron mapasig-uli ang iyang bililhong relasyon kang  Jehova? Sa pagkatinuod, ang Bibliya nag-ingon: “Ayaw pakamenosa ang disiplina gikan ni Jehova, ni maluya sa dihang ikaw tul-iron niya; kay ang gihigugma ni Jehova iyang ginadisiplina.”—Hebreohanon 12:5, 6.

Usahay, ang usa ka igsoong lalaki nga gustong makabatog pribilehiyo sa kongregasyon maningkamot sa pagtago sa personal nga mga problema o kasaypanan sa nangagi. Pananglitan, sa dihang magpil-ap ug aplikasyon alang sa espesyal nga pribilehiyo sa pag-alagad, lagmit dili niya isulat ang kompletong tubag sa mga pangutana bahin sa kahimsog ug moralidad, kay naghunahuna nga kining mga butanga makadiskuwalipikar kaniya. Tingali siya mangrason, ‘Wala gayod ako mamakak,’ apan maminatud-on ba gayod siya sa uban? Matikdi ang punto nga gihisgotan sa Proverbio 3:32: “Ang hiwi nga tawo maoy dulumtanan kang Jehova, apan ang Iyang pagpakigsuod anaa uban sa mga matul-id.”

Labaw sa tanan, ang pagkamaminatud-on nagkahulogan nga kita matinud-anon sa atong kaugalingon. Kita sagad motuo kon unsay gusto natong tuohan imbes tuohan kon unsay husto o tinuod. Pagkadali ra gayod natong mamasangil sa uban sa sayop nga atong nahimo! Pananglitan, si Haring Saul misulay sa pagpakamatarong sa iyang pagkamasinupakon pinaagi sa pagpasangil niini sa uban. Tungod niana, gisalikway siya ni Jehova ingong hari. (1 Samuel 15:20-23) Pagkalahi ni Haring David, kinsa miampo kang Jehova: “Sa kataposan gisugid ko kanimo ang akong sala, ug wala ko taboni ang akong kasaypanan. Miingon ako: ‘Isugid ko kang Jehova ang akong mga kalapasan.’  Ug ikaw mismo nagpasaylo sa pagkadaotan sa akong mga sala.”—Salmo 32:5.

Ang Pagkamaminatud-on Panalanginan

Ang pagkamaminatud-on o ang pagkadili-maminatud-on makaapektar kon unsay panglantaw kanimo sa uban. Kon mahibaloan sa mga tawo nga imo silang gilimbongan bisag kas-a lang, dili na sila mosalig kanimo, ug lisod na nimong mabakwi kana. Sa laing bahin, kon ikaw kasaligan ug maminatud-on, ikaw magtukod ug usa ka reputasyon ingong tawo nga may integridad ug kasaligan. Naangkon sa mga Saksi ni Jehova kana nga reputasyon. Tagda ang pipila ka pananglitan.

Naamgohan sa usa ka direktor sa kompaniya nga daghan sa iyang mga empleyado nanglimbong sa kompaniya, busa iya kining gipaimbestigar sa mga polis. Sa dihang iyang nahibaloan nga giapil pagdakop ang usa ka empleyado nga usa sa mga Saksi ni Jehova, miadto siya sa kapolisan aron mabuhian dayon ang maong Saksi. Ngano? Tungod kay nahibalo ang direktor nga kining tawhana maminatud-on nga trabahante ug wala manglimbong. Ang Saksi wala matangtang sa trabaho, samtang ang uban gipotbol. Nalipay ang iyang mga isigka-Saksi, kay sila nahibalo nga ang iyang panggawi nakahatag ug kadayeganan sa ngalan ni Jehova.

Ang maayong panggawi mamatikdan sa uban. Sa usa ka nasod sa Aprika, ang usa ka tulay nga nagdugtong sa usa ka dakong kanal kinahanglang ayohon tungod kay gipangawat ang pipila ka tabla niini. Nakahukom ang mga molupyo didto nga mangolekta ug kuwarta aron mailisan ang mga tabla, apan kinsa may ilang saligan nga mogunit sa kuwarta? Nagkauyon ang tanan nga kinahanglang usa ka Saksi ni Jehova ang mohimo niana.

Sa dihang ang usa ka nasod sa Aprika nakasinati ug politikal ug tribonhon nga kagubot, ang usa ka Saksi nga nagtrabaho isip accountant sa usa ka internasyonal nga kompaniya gibalhin sa iyang kompaniya tungod kay nameligro ang iyang kinabuhi. Gihikay sa kompaniya nga siya makatrabaho ug daghang bulan didto sa laing nasod nga gasto sa kompaniya hangtod moarang-arang na ang kahimtang. Ngano? Tungod kay sa miagi siya midumili sa pagpakigkunsabo sa paglimbong sa kompaniya. Nahibalo ang mga tagdumala sa iyang reputasyon nga maminatud-on gayod. Tabangan kaha nila kini nga empleyado kon siya nailhan pang limbongan?

“Ang matarong nagalakaw diha sa iyang integridad,” nag-ingon ang Proverbio 20:7. Ang usa ka maminatud-ong tawo maoy tawo nga may integridad. Siya dili gayod manikas o manglimbong sa iyang isigkatawo. Dili ba kana ang gusto nimong buhaton sa uban kanimo? Ang pagkamaminatud-on maoy hinungdanong bahin sa matuod nga pagsimba. Kini maoy usa ka pagpahayag sa atong gugma sa Diyos ug sa isigkatawo. Pinaagi sa pagkamaminatud-on, atong gipakita ang atong tinguha sa pagsunod sa prinsipyo sa panggawi nga gipahayag ni Jesus: “Ang tanang butang nga buot ninyo nga pagabuhaton sa mga tawo nganha kaninyo, kinahanglang pagabuhaton usab ninyo sa ingon ngadto kanila.”—Mateo 7:12; 22:36-39.

Ang pagkamaminatud-on sa tanang panahon mahimong adunay dili-makapahimuot nga mga sangpotanan, apan ang hinlo nga tanlag nga moresulta maoy takos kay sa bisan unsang pagsakripisyo. Sa ngadtongadto, ang pagkamaminatud-on ug pagkatul-id mag-ani ug dagayang mga kaayohan. Ang tinuod mao nga ang usa ka maayong relasyon uban kang Jehova dili kabayran. Nganong daoton mo man kini pinaagi sa pagkadili-maminatud-on aron lang dili maulawan o makapahimulos ug ilegal nga mga bentaha? Bisag unsa pang kalisdanan ang atong sagubangon, kita makasalig sa mga pulong sa salmista: “Malipayon ang tawo nga lig-on ug lawas nga nagbutang sa iyang pagsalig diha kang Jehova ug nga wala magliso sa iyang nawong ngadto sa masukihong katawhan, ni ngadto sa mga nahulog sa kabakakan.”—Salmo 40:4.

[Mga hulagway sa panid 18]

Ang matuod nga mga Kristohanon dili mopalit o mogamit ug palsipikadong mga dokumento