“Ang Dakong Adlaw ni Jehova Haduol Na”
“Ang Dakong Adlaw ni Jehova Haduol Na”
“Ang dakong adlaw ni Jehova haduol na. Kini haduol na, ug nagadali sa hilabihan.”—SOFONIAS 1:14.
1, 2. (a) Unsang espesyal nga adlaw ang gipaabot sa mga Kristohanon? (b) Unsang mga pangutana ang kinahanglang isukna nato, ug ngano?
ANG usa ka malipayong dalaga mahinamong nagpaabot sa adlaw sa iyang kasal. Ang nagsabak nga inahan mahigugmaong nagpaabot sa pagkatawo sa iyang anak. Ang lapoy nga trabahador naghinamhinam sa pagsugod sa iyang dugay-nang-gipaabot nga bakasyon. Sa unsa sila managsama? Silang tanan nagpaabot sa usa ka espesyal nga adlaw—usa ka adlaw nga mag-apektar sa ilang kinabuhi. Sila adunay lalom apan managlahi kaayo nga mga emosyon. Ang adlaw nga ilang gihulat sa kataposan moabot, ug kon moabot na kana, sila nanghinaot nga andam unta sila nianang panahona.
2 Ang tinuod nga mga Kristohanon karon mahinamon usab nga nagpaabot sa usa ka espesyal nga adlaw. Kana ang dakong “adlaw ni Jehova.” (Isaias 13:9; Joel 2:1; 2 Pedro 3:12) Unsa kining taliabot nga “adlaw ni Jehova,” ug sa unsang paagi ang pag-abot niini mag-apektar sa katawhan? Dugang pa, sa unsang paagi kita makaseguro nga kita andam sa pag-abot niini? Kinahanglang susihon nato ang mga tubag niining mga pangutanaha karon tungod kay gipakita sa mga ebidensiya nga tinuod ang mosunod nga mga pulong sa Bibliya: “Ang dakong adlaw ni Jehova haduol na. Kini haduol na, ug nagadali sa hilabihan.”—Sofonias 1:14.
“Ang Dakong Adlaw ni Jehova”
3. Unsa “ang dakong adlaw ni Jehova”?
3 Unsa “ang dakong adlaw ni Jehova”? Sa tibuok Kasulatan, ang ekspresyong “adlaw ni Jehova” nagtumong sa linaing mga panahon sa dihang si Jehova nagpahamtang ug paghukom sa iyang mga kaaway ug naghimaya sa iyang dakong ngalan. Ang dili-matinumanong katawhan sa Juda ug Jerusalem maingon man ang madaogdaogong mga molupyo sa Babilonya ug Ehipto miatubang sa ‘mga adlaw ni Jehova’ sa dihang naagoman nila ang pagpahamtang sa mga paghukom ni Jehova. (Isaias 2:1, 10-12; 13:1-6; Jeremias 46:7-10) Apan, ang kinadak-ang “adlaw ni Jehova” anaa pa sa unahan. Kana mao ang “adlaw” sa dihang ang paghukom ni Jehova ipahamtang ngadto sa nagpasipala sa iyang ngalan. Kini magsugod sa paglaglag sa “Dakong Babilonya,” ang tibuok-kalibotang imperyo sa bakak nga relihiyon, ug matapos sa paglaglag sa nahibilin sa daotang sistema sa mga butang panahon sa gubat sa Armagedon.—Pinadayag 16:14, 16; 17:5, 15-17; 19:11-21.
4. Nganong ang kadaghanan sa katawhan angayng mahadlok sa tuling-nagsingabot nga adlaw ni Jehova?
4 Naamgohan man nila kini o wala, ang kadaghanan sa katawhan angayng mahadlok niining tuling-nagsingabot nga adlaw. Ngano? Pinaagi kang manalagnang Sofonias, si Jehova mitubag: “Kanang adlawa maoy usa ka adlaw sa mabangis nga kasuko, usa ka adlaw sa kasakitan ug kagul-anan, usa ka adlaw sa bagyo ug sa kagun-oban, usa ka adlaw sa kangitngit ug kangiob, usa ka adlaw sa panganod ug sa mabagang kangiob.” Makahahadlok gayod! Dugang pa, ang manalagna miingon: “Ako magpahinabog kasakit sa mga tawo . . . tungod kay sila nakasala batok kang Jehova.”—Sofonias 1:15, 17.
5. Unsang masanag nga panglantaw ang nabatonan sa milyonmilyon maylabot sa adlaw ni Jehova, ug ngano?
5 Apan, milyonmilyong uban pa ang mahinamong nagpaabot sa adlaw ni Jehova. Ngano? Nahibalo sila nga kana maoy panahon sa kaluwasan ug kagawasan sa mga matarong, usa ka adlaw diin si Jehova mismo pagabayawon ug ang iyang mahimayaong ngalan pagabalaanon. (Joel 3:16, 17; Sofonias 3:12-17) Ang ginabuhat karon sa mga tawo maoy magpaila kon sila nahadlok o kaha mahinamong nagpaabot nianang adlawa. Unsay imong panglantaw nianang nagsingabot nga adlaw? Andam ka na ba niana? Nag-apektar ba sa imong adlaw-adlaw nga pagkinabuhi karon ang kamatuoran nga ang adlaw ni Jehova haduol na?
“Adunay Mangabot nga mga Mabiaybiayon Uban sa Ilang mga Pagbiaybiay”
6. Unsay panglantaw sa kadaghanang tawo sa “adlaw ni Jehova,” ug nganong ang matuod nga mga Kristohanon dili matingala niini?
6 Bisan pa sa pagkadinalian sa situwasyon, ang kadaghanan sa mga molupyo sa yuta wala mabalaka sa nagsingabot nga “adlaw ni Jehova.” Sila nagbugalbugal ug nagbiaybiay niadtong nagpasidaan kanila nga hapit na kining moabot. Ang matuod nga mga Kristohanon dili matingala niini. Ilang gihinumdoman ang pasidaan nga gisulat ni apostol Pedro: “Una sa tanan hibaloi ninyo kini, nga sa kataposang mga adlaw adunay mangabot nga mga mabiaybiayon uban sa ilang mga pagbiaybiay, nga magpahiuyon sa ilang kaugalingong mga tinguha ug magaingon: ‘Hain na man kining gisaad nga presensiya niya? Aw, sukad sa adlaw nga ang atong mga katigulangan nangatulog sa kamatayon, ang tanang butang nagpadayon nga mao ra gayod sukad sa sinugdan sa kalalangan.’”—2 Pedro 3:3, 4.
7. Unsay motabang kanato aron mahuptan ang pagbati sa pagkadinalian?
7 Unsay motabang kanato sa pagsalikway nianang negatibong panghunahuna ug sa ingon mahuptan ang pagbati sa pagkadinalian? Giingnan kita ni Pedro: “Ginapukaw ko ang inyong tin-awng mga gahom sa panghunahuna agig usa ka pahinumdom, nga kamo kinahanglang mahinumdom sa mga pulong nga gisulti kanhi sa balaang mga manalagna ug sa sugo sa Ginoo ug Manluluwas pinaagi sa inyong mga apostoles.” (2 Pedro 3:1, 2) Ang atong pagpatalinghog sa matagnaong mga pasidaan motabang kanato sa ‘pagpukaw sa atong tin-awng mga gahom sa panghunahuna.’ Tingali sublisubli na natong nadungog kining maong mga pahinumdom, apan hinungdanon nga karon, labaw kay sukad masukad, magpadayon kita sa pagpatalinghog niining maong mga pasidaan.—Isaias 34:1-4; Lucas 21:34-36.
8. Nganong daghan ang wala manumbaling sa mga pahinumdom sa Bibliya?
8 Nganong ang pipila wala manumbaling niining maong mga pahinumdom? Si Pedro nagpadayon: “Sumala sa ilang gitinguha, sila wala makamatikod niining butanga, nga dihay mga langit gikan sa kakaraanan ug usa ka yuta nga nagbarog nga lig-on gikan sa tubig ug sa taliwala sa tubig pinaagi sa pulong sa Diyos; ug pinaagi niini ang kalibotan niadtong panahona nakaagom sa kalaglagan sa dihang kini gilunopan sa tubig.” (2 Pedro 3:5, 6) Oo, adunay mga tawo nga dili gustong moabot ang adlaw ni Jehova. Dili nila gustong mabalda ang ilang naandan nga paagi sa pagkinabuhi. Dili nila gustong manubag kang Jehova sa ilang hakog nga estilo sa kinabuhi! Sumala sa giingon ni Pedro, sila nagkinabuhi ‘uyon sa ilang kaugalingong mga tinguha.’
9. Unsang tinamdan ang gipakita sa mga tawo sa mga adlaw ni Noe ug Lot?
9 Tungod sa “ilang gitinguha,” kini nga mga mabiaybiayon mipalabi sa dili pagpanumbaling nga si Jehova nangilabot sa kalihokan sa katawhan sa miaging panahon. Si Jesu-Kristo ug apostol Pedro naghisgot ug duha nianang mga hitaboa—ang “mga adlaw ni Noe” ug ang “mga adlaw ni Lot.” (Lucas 17:26-30; 2 Pedro 2:5-9) Sa wala pa ang Lunop, ang mga tawo wala manumbaling sa pasidaan nga gihatag ni Noe. Sa susama, una pa sa kalaglagan sa Sodoma ug Gomora, si Lot “daw usa ka tawong nagtiawtiaw” sa mga mata sa iyang mga umagad nga lalaki.—Genesis 19:14.
10. Unsay reaksiyon ni Jehova niadtong wala manumbaling?
10 Mao man usab karon. Apan, matikdi ang reaksiyon ni Jehova niadtong wala manumbaling: “Akong pagatagdon ang mga lalaki nga samag milugdang diha sa ilang linugdang sa bino ug nga nag-ingon diha sa ilang kasingkasing, ‘Si Jehova dili magbuhat ug maayo, ug siya dili magbuhat ug daotan.’ Ug ang ilang bahandi pagailogon ug ang ilang mga balay pagalumpagon. Ug sila magatukod ug mga balay, apan dili nila pagapuy-an; ug sila magatanom ug mga parasan, apan sila dili magainom sa bino niana.” (Sofonias 1:12, 13) Ang mga tawo magpadayon tingali sa ilang “naandan” nga kalihokan sa adlaw-adlaw, apan dili sila makabaton ug permanenteng kaayohan gikan sa ilang paghago. Ngano? Tungod kay ang adlaw ni Jehova kalit nga moabot, ug ang bisan unsang materyal nga mga bahandi nga ilang natigom dili makaluwas kanila.—Sofonias 1:18.
“Padayon sa Pagpaabot Niini”
11. Unsang tambag ang angay natong hinumdoman?
11 Dili sama sa daotang kalibotan sa palibot nato, kinahanglang hinumdoman nato ang tambag nga gisulat ni manalagnang Habacuc: “Ang panan-awon alang pa sa tinudlong panahon, ug kini nagadali paingon sa kataposan, ug kini dili magbakak. Bisan pa kon kini malangan, padayon sa pagpaabot niini; kay kini matuman gayod. Kini dili maulahi.” (Habacuc 2:3) Bisan pag kanang adlawa morag malangan sumala sa atong dili-hingpit nga panglantaw, kinahanglang hinumdoman nato nga si Jehova dili langaylangayan. Ang iyang adlaw moabot gayod sa takdang panahon, sa takna nga wala damha sa mga tawo.—Marcos 13:33; 2 Pedro 3:9, 10.
12. Bahin sa unsa nga si Jesus nagpasidaan, ug sa unsang paagi sukwahi kini sa gibuhat sa matinumanong mga sumusunod ni Jesus?
12 Sa pagpasiugda sa pagkahinungdanon sa padayong pagpaabot sa adlaw ni Jehova, si Jesus nagpasidaan nga bisan ang pipila sa iyang mga sumusunod mawad-an usab sa ilang pagbati sa pagkadinalian. Nagtagna siya bahin kanila: “Kon ugaling kanang daotang ulipon magaingon diha sa iyang kasingkasing, ‘Nalangan ang akong agalon,’ ug magabun-og sa iyang mga isigkaulipon ug magakaon ug magainom kauban sa mga nailhang palahubog, ang agalon nianang ulipona moabot sa adlaw nga wala niya dahoma ug sa takna nga wala niya mahibaloi, ug silotan siya sa hilabihan gayod.” (Mateo 24:48-51) Sa kasukwahi, ang matinumanon ug maalamong ulipon nga matang maunongong naghupot sa ilang pagbati sa pagkadinalian. Ang ulipon nga matang padayong nagbantay ug nagpamatuod sa ilang kaugalingon nga andam. Si Jesus nagtudlo kanila “ibabaw sa tanan niyang mga kabtangan” dinhi sa yuta.—Mateo 24:42-47.
Ang Panginahanglan sa Pagkadinalian
13. Sa unsang paagi gipasiugda ni Jesus ang panginahanglan sa pagbatig pagkadinalian?
13 Kinahanglang huptan sa unang-siglong mga Kristohanon ang ilang pagbati sa pagkadinalian. Kinahanglan silang mokalagiw dayon gikan sa Jerusalem inigkakita nila nga kanang siyudara ‘libotan sa nagkampong kasundalohan.’ (Lucas 21:20, 21) Nahitabo kana sa tuig 66 K.P. Matikdi kon sa unsang paagi gipasiugda ni Jesus ang panginahanglan sa pagkadinalian sa bahin sa mga Kristohanon niadtong panahona: “Ang tawong anaa sa atop ayaw na pakanaoga aron sa pagkuhag mga butang gikan sa iyang balay; ug ang tawong anaa sa uma ayaw na pabalika sa balay aron sa pagkuha sa iyang panggawas nga besti.” (Mateo 24:17, 18) Tungod kay gipakita sa kasaysayan nga ang Jerusalem wala laglaga sulod sa upat ka tuig human sa paglikos, nganong gikinahanglan man nga ang mga Kristohanon dinalian gayong magpatalinghog sa mga pulong ni Jesus niadtong 66 K.P.?
14, 15. Nganong gikinahanglan nga molihok nga walay langan ang unang-siglong mga Kristohanon inigkakita nila nga ang Jerusalem libotan sa nagkampong kasundalohan?
14 Bisan tuod sa 70 K.P. pa gilaglag sa Romanong kasundalohan ang Jerusalem, ang upat ka tuig una pa niana dili gayod malinawon. Kadtong upat ka tuig puno sa kapintasan ug pag-ulag dugo. Ang usa ka historyano naghubit sa situwasyon sa Jerusalem nianang panahona ingong “usa ka makahahadlok ug dugoon nga sibil nga gubat, dinuyogan sa mga buhat sa makalilisang nga kabangisan.” Ang mga batan-ong lalaki girekluta aron sa pagpalig-on sa mga kuta, sa pagdalag mga armas, ug sa pagsundalo. Adlaw-adlaw silang gipailalom sa militaryong pagbansay. Kadtong dili pabor sa hilabihang mga paningkamot sa pagdepensa sa nasod giisip nga mga traydor. Kon ang mga Kristohanon nagpabilin pa diha sa siyudad, mameligro gayod sila.—Mateo 26:52; Marcos 12:17.
15 Angay natong matikdan nga si Jesus miingon nga “silang anaa sa Judea,” dili lamang sa Jerusalem, kinahanglang mosugod na sa pagkalagiw. Hinungdanon kini tungod kay sulod sa pipila ka bulan gikan sa ilang pagbiya sa Jerusalem, ang Romanong kasundalohan nagpadayon na usab sa ilang mga kampanya sa gubat. Una, ang Galilea gisakop niadtong 67 K.P., ug dayon ang Judea giparot sa sistematikong paagi pagkasunod tuig. Miresulta kini sa dakong kagul-anan diha sa kabanikanhan. Nag-anam usab ka lisod para sa mga Hudiyo ang pag-eskapo gikan sa Jerusalem mismo. Ang mga ganghaan sa siyudad gibantayan, ug si bisan kinsa nga mosulay sa pag-eskapo giisip nga dapig sa mga Romano.
16. Unsang tinamdan ang kinahanglang mabatonan sa unang-siglong mga Kristohanon aron maluwas nianang panahon sa kasakitan?
16 Kon hunahunaon nato kining mga butanga, atong masabtan kon nganong gipasiugda ni Jesus ang pagkadinalian sa maong situwasyon. Ang mga Kristohanon kinahanglang magmaandam sa paghimog mga sakripisyo, nga dili tugotan ang ilang kaugalingon nga malinga sa materyal nga mga kabtangan. Kinahanglang magmaandam sila sa ‘pagpanamilit sa tanan nilang kabtangan’ aron tumanon ang pasidaan ni Jesus. (Lucas 14:33) Kadtong mituman dayon ug mikalagiw sa pikas tampi sa Jordan nangaluwas.
Paghupot sa Atong Pagbati sa Pagkadinalian
17. Nganong angay natong palig-onon ang atong pagbati sa pagkadinalian?
17 Ang mga tagna sa Bibliya tin-awng nagpadayag nga kita nagkinabuhi na sa hinapos nga bahin sa panahon sa kataposan. Kinahanglan gayod natong palig-onon ang atong pagbati sa pagkadinalian kay sukad masukad. Panahon sa kalinaw, ang usa ka sundalo dili mobatig tensiyon ug kapeligrohan nga iyang bation panahon sa gubat. Apan, kon tungod niana, dili na siya mobatig pagkadinalian sa pagpabiling alisto ug sa kalit lang tawgon siya aron sa pagpakiggubat, lagmit dili siya andam, nga mahimong moresulta sa iyang kamatayon. Mao man usab sa espirituwal nga pagpakiggubat. Kon atong tugotan nga anam-anam nga mawala ang atong pagbati sa pagkadinalian, lagmit nga dili na kita andam nga mosukol sa mga pag-atake nga ato unyang maatubang ug dili na kita makabantay inig-abot sa adlaw ni Jehova. (Lucas 21:36; 1 Tesalonica 5:4) Kon adunay “mibiya sa pagsunod kang Jehova,” karon na ang panahon sa pagpangita kaniya pag-usab.—Sofonias 1:3-6; 2 Tesalonica 1:8, 9.
18, 19. Unsay motabang kanato sa pagbutang kanunay sa hunahuna “sa presensiya sa adlaw ni Jehova”?
18 Mao diay nga si apostol Pedro nagpasidaan kanato sa pagbutang kanunay sa hunahuna “sa presensiya sa adlaw ni Jehova”! Sa unsang paagi mahimo nato kini? Ang usa ka paagi mao ang pagpakigbahin “sa balaang mga buhat sa panggawi ug mga buhat sa diyosnong pagkamahinalaron.” (2 Pedro 3:11, 12) Ang pagkapuliki sa maong mga kalihokan motabang kanato sa pagpaabot nga mahinamon sa “adlaw ni Jehova.” Ang Gregong pulong nga gihubad ‘pagbutang kanunay sa hunahuna’ sa literal nagkahulogang “pagpadali.” Dili nato aktuwal nga mapadali ang panahon nga nahibilin hangtod sa pag-abot sa adlaw ni Jehova. Bisan pa niana, samtang nagpaabot kita nianang adlawa, ang panahon morag dali ra kaayong molabay kon kita puliki diha sa pag-alagad sa Diyos.—1 Corinto 15:58.
19 Ang pagpalandong sa Pulong sa Diyos ug sa mga pahinumdom nga makaplagan diha niana makapaarang usab kanato sa pagpaabot niini—“matinuorong maghulat (magdahom ug magpadali) sa pag-abot” nianang adlawa, ug “kanunayng maghulat” niini. (2 Pedro 3:12, The Amplified Bible; The New Testament, ni William Barclay) Nalakip niining maong mga pahinumdom ang daghang tagna dili lamang bahin sa pag-abot sa adlaw ni Jehova kondili usab sa dagayang mga panalangin nga igahatag niadtong ‘nagpadayon sa paghulat kang Jehova.’—Sofonias 3:8.
20. Unsang tambag ang kinahanglan natong sundon?
20 Karon na gayod ang panahon nga sundon natong tanan ang tambag nga gihatag pinaagi kang manalagnang Sofonias: “Sa dili pa modangat kaninyo ang nagasilaob nga kasuko ni Jehova, sa dili pa modangat kaninyo ang adlaw sa kasuko ni Jehova, pangitaa ninyo si Jehova, kamong tanang maaghop sa yuta, nga nagbuhat sa Iyang hudisyal nga hukom. Pangitaa ang pagkamatarong, pangitaa ang pagkamaaghop. Tingali kamo pagatagoan sa adlaw sa kasuko ni Jehova.”—Sofonias 2:2, 3.
21. Unsa unyay determinadong buhaton sa katawhan sa Diyos sa tuig 2007?
21 Nan, haom gayod ang tinuig nga teksto nga gipili alang sa tuig 2007: “Ang dakong adlaw ni Jehova haduol na.” Ang katawhan sa Diyos kombinsido nga “kini haduol na, ug nagadali sa hilabihan.” (Sofonias 1:14) “Kini dili maulahi.” (Habacuc 2:3) Busa samtang nagpaabot kita nianang adlawa, hinaot nga magmaalisto kita kanunay sa panahon nga atong gikinabuhian, nga nakaamgo nga ang kataposang katumanan niining mga tagnaa haduol na!
Makatubag Ka Ba?
• Unsa “ang dakong adlaw ni Jehova”?
• Nganong daghan ang wala manumbaling sa pagkadinalian sa panahon?
• Nganong ang mga Kristohanon sa unang siglo kinahanglang molihok nga may pagbati sa pagkadinalian?
• Sa unsang paagi mapausbaw nato ang atong pagbati sa pagkadinalian?
[Mga Pangutana sa Pagtuon]
[Blurb sa panid 19]
Ang tinuig nga teksto sa 2007 mao kini: “Ang dakong adlaw ni Jehova haduol na.”—Sofonias 1:14.
[Mga hulagway sa panid 16, 17]
Sama sa adlaw ni Noe, ang mga mabiaybiayon makalitan sa dihang molihok na si Jehova
[Hulagway sa panid 18]
Ang mga Kristohanon kinahanglang molihok nga walay langan inigkakita nila nga ang Jerusalem ‘libotan sa nagkampong kasundalohan’