‘Ipatuman ni Jehova ang Hustisya’

“Dili ba ipatuman sa Diyos ang hustisya alang sa iyang mga pinili nga nagatuaw kaniya adlaw ug gabii?”—LUCAS 18:7.

1. Kinsay nakapadasig kanimo, ug ngano?

 SA TIBUOK kalibotan, ang mga Saksi ni Jehova nalipay nga makig-uban sa Kristohanong mga igsoon nga matinumanong nagaalagad kang Jehova sulod sa daghang katuigan. May kaila ka ba niining minahal nga mga igsoon? Tingali mosantop sa imong hunahuna ang usa ka tigulang nga sister nga nabawtismohan daghang katuigan na ang milabay ug panagsa rang mopalta sa tigom sa Kingdom Hall. O mahunahunaan nimo ang usa ka tigulang nga brader nga maunongong nakigbahin sa pagsangyaw sa kanataran sa kongregasyon matag semana ug naghimo niana sulod na sa daghang katuigan. Tinuod, kadaghanan niining matinumanong mga igsoon naghunahuna nga niining panahona natapos na unta ang Armagedon. Apan, ang kamatuoran nga kining walay-hustisya nga kalibotan naglungtad gihapon wala makapahuyang sa ilang pagsalig sa mga saad ni Jehova ug sa ilang determinasyon nga ‘molahutay hangtod sa kataposan.’ (Mateo 24:13) Ang giladmon sa pagtuo nga gipakita nianang maunongong mga alagad ni Jehova makapadasig gayod sa tibuok kongregasyon.—Salmo 147:11.

2. Unsang situwasyon ang makapasubo kanato?

² Apan, usahay lahi ang atong mamatikdan. Ang ubang mga Saksi nakigbahin sa ministeryo sulod sa daghang katuigan, apan sa ngadtongadto mihuyang ang ilang pagtuo kang Jehova, ug sila mihunong na sa pagpakig-uban sa Kristohanong kongregasyon. Masubo kita nga ang kanhing mga kauban mibiya kang Jehova, ug atong kinasingkasing nga tinguha nga magpadayon sa pagtabang sa matag “nawala nga karnero” aron makabalik sila sa panon. (Salmo 119:176; Roma 15:1) Bisan pa niana, kining magkaatbang nga mga sangpotanan—ang uban nagpabiling matinumanon samtang ang uban wala—nagpatunghag mga pangutana. Unsay nakapaarang sa daghang Saksi sa paghupot sa ilang pagtuo sa mga saad ni Jehova samtang ang uban nawad-an niana? Unsay atong mahimo aron maseguro nga magpabiling lig-on ang atong pagtuo nga “ang dakong adlaw ni Jehova” nagkaduol na? (Sofonias 1:14) Tagdon nato ang usa ka ilustrasyon nga mabasa diha sa Ebanghelyo ni Lucas.

Usa ka Pasidaan Niadtong mga Buhi “Inig-abot sa Anak sa Tawo”

3. Kinsay ilabinang makabenepisyo sa ilustrasyon sa babayeng balo ug sa maghuhukom, ug ngano?

³ Sa Lucas kapitulo 18, atong mabasa ang ilustrasyon ni Jesus mahitungod sa babayeng balo ug sa usa ka maghuhukom. Susama kini sa ilustrasyon mahitungod sa porsigidong tig-abiabi, nga atong gihisgotan sa nag-unang artikulo. (Lucas 11:5-13) Apan, ang konteksto sa asoy sa Bibliya nga naghisgot sa ilustrasyon sa babayeng balo ug sa maghuhukom nagpakita nga kini ilabinang mapadapat niadtong mga buhi “inig-abot sa Anak sa tawo” aron magmando sa Gingharian, nga ang yugto sa panahon nagsugod sa 1914.—Lucas 18:8. a

4. Unsay gihisgotan ni Jesus una pa niya iasoy ang ilustrasyon nga mabasa diha sa Lucas kapitulo 18?

⁴ Sa wala pa niya isulti ang maong ilustrasyon, si Jesus miingon nga ang pamatuod sa iyang presensiya ingong magmamando sa Gingharian kaylap nga masabtan ‘maingon sa kilat’ nga “modan-ag gikan sa usa ka bahin sa ilalom sa langit  ngadto sa laing bahin sa ilalom sa langit.” (Lucas 17:24; 21:10, 29-33) Bisan pa niana, kadaghanang tawo nga nagkinabuhi sa “panahon sa kataposan” dili magtagad nianang klarong pamatuod. (Daniel 12:4) Nganong dili man? Sa samang katarongan nga ang mga tawo sa panahon ni Noe ug ni Lot wala manumbaling sa mga pasidaan ni Jehova. Niadtong mga panahona, ang mga tawo ‘nanagpangaon, nanag-inom, nanagpamalit, nanagbaligya, nanagtanom, ug nanagpanukod hangtod sa adlaw nga sila gilaglag.’ (Lucas 17:26-29) Nangamatay sila tungod kay sila nalinga pag-ayo sa adlaw-adlawng mga kalihokan nga wala na sila magtagad sa kabubut-on sa Diyos. (Mateo 24:39) Karon, ang mga tawo sa katibuk-an nalinga usab pag-ayo sa adlaw-adlawng mga kalihokan nga napakyas sila sa pagkakita sa pamatuod nga ang kataposan niining dili-diyosnon nga kalibotan haduol na.—Lucas 17:30.

5. (a) Kang kinsa gitumong ni Jesus ang pasidaan, ug ngano? (b) Unsay hinungdan nga ang uban nawad-an ug pagtuo?

⁵ Tin-aw nga si Jesus nabalaka nga ang iyang mga sumusunod malinga usab sa kalibotan ni Satanas, hangtod sa punto nga sila tingali ‘mobalik sa mga butang sa luyo.’ (Lucas 17:22, 31) Ug, sa pagkatinuod, nahitabo kini sa pipila ka Kristohanon. Sulod sa daghang katuigan ang maong mga Kristohanon nagpaabot sa adlaw nga taposon ni Jehova kining daotang kalibotan. Apan, sa dihang wala mahitabo ang Armagedon sa panahon nga ilang gidahom, sila nahigawad. Ang ilang pagsalig sa pagkaduol na sa adlaw sa paghukom ni Jehova mihuyang. Sila naghinayhinay na diha sa ministeryo ug inanay nga napuliki sa adlaw-adlawng mga butang sa kinabuhi nga gamay na lang ang panahon nga nahibilin para sa espirituwal nga mga butang. (Lucas 8:11, 13, 14) Sa ngadtongadto, sila ‘namalik sa mga butang sa luyo’—pagkamakapasubo!

Ang Panginahanglan nga “Mag-ampo Kanunay”

6-8. (a) Iasoy ang ilustrasyon sa babayeng balo ug sa maghuhukom. (b) Sa unsang paagi gipadapat ni Jesus kining maong ilustrasyon?

⁶ Unsay atong mahimo aron maseguro nga ang atong lig-ong pagsalig nga matuman ang mga saad ni Jehova dili mohuyang? (Hebreohanon 3:14) Gitubag ni Jesus kanang pangutanaha human gayod niya pasidan-i ang mga tinun-an sa dili pagbalik ngadto sa daotang kalibotan ni Satanas.

⁷ Si Lucas nagtaho nga si Jesus “misugilon kanilag usa ka sambingay maylabot sa panginahanglan nga sila mag-ampo kanunay ug dili moundang.” Si Jesus nag-ingon: “Sa usa ka siyudad dihay usa ka maghuhukom nga walay kahadlok sa Diyos ug walay pagtahod sa tawo. Apan dihay usa ka babayeng balo niana nga siyudad ug siya nagsigeg adto kaniya, nga nag-ingon, ‘Paneguroa baya nga ako kahatagag hustisya gikan sa akong kaaway sa hukmanan.’ Buweno, sa hamubong panahon dili niya buot, apan sa ulahi siya miingon sa iyang kaugalingon, ‘Bisan tuod ako walay kahadlok sa Diyos o pagtahod sa tawo, bisan pa niana, tungod sa mapinadayonong pagsamok kanako niini nga babayeng balo, paneguroon ko nga mahatagan siyag hustisya, aron dili na siya magsigeg anhi ug mag-ugtas kanako sa bug-os.’”

⁸ Human iasoy kining ilustrasyona, gipadapat  kini ni Jesus: “Pamatia ninyo kon unsay giingon sa maghuhukom, bisag dili-matarong! Nan, sa tino, dili ba ipatuman sa Diyos ang hustisya alang sa iyang mga pinili nga nagatuaw kaniya adlaw ug gabii, bisan tuod siya adunay hataas-nga-pailob kanila? Ako magaingon kaninyo, Iyang ipatuman sa madali ang hustisya kanila. Bisan pa niana, inig-abot sa Anak sa tawo, makakaplag ba gayod siyag pagtuo dinhi sa yuta?”—Lucas 18:1-8.

“Paneguroa Baya nga Ako Kahatagag Hustisya”

9. Unsang tema ang gipasiugda sa ilustrasyon sa babayeng balo ug sa maghuhukom?

⁹ Tin-aw kaayo ang pangunang tema niining buhi nga ilustrasyon. Gisulti kini sa mga indibiduwal nga gihisgotan diha sa ilustrasyon ug ni Jesus usab. Ang babayeng balo nangamuyo: “Paneguroa baya nga ako kahatagag hustisya.” Ang maghuhukom miingon: “Paneguroon ko nga mahatagan siyag hustisya.” Si Jesus misukna: “Dili ba ipatuman sa Diyos ang hustisya?” Ug bahin kang Jehova, si Jesus miingon: “Iyang ipatuman sa madali ang hustisya kanila.” (Lucas 18:3, 5, 7, 8) Kanus-a ba gayod “ipatuman sa Diyos ang hustisya”?

10. (a) Kanus-a gipadapat ang hustisya sa unang siglo? (b) Kanus-a ug sa unsang paagi ipatuman ang hustisya alang sa mga alagad sa Diyos karon?

¹⁰ Sa unang siglo, ang “mga adlaw sa pagpadapat sa hustisya” (o, “mga adlaw sa panimalos,” Kingdom Interlinear) midangat sa 70 K.P. sa dihang ang Jerusalem ug ang templo niini gilaglag. (Lucas 21:22) Alang sa katawhan sa Diyos karon, ang hustisya ipatuman sa “dakong adlaw ni Jehova.” (Sofonias 1:14; Mateo 24:21) Nianang panahona, si Jehova “mobalos ug kasakitan niadtong nagsakit” sa iyang katawhan “sa dihang [si Jesu-Kristo] manimalos kanilang wala makaila sa Diyos ug kanilang wala magsunod sa maayong balita bahin sa atong Ginoong Jesus.”—2 Tesalonica 1:6-8; Roma 12:19.

11. Sa unsang paagi ang hustisya moabot “sa madali”?

¹¹ Apan, unsay kahulogan sa pasalig ni Jesus nga ipatuman ni Jehova ang hustisya “sa madali”? Gipakita sa Pulong sa Diyos nga “bisan tuod [si Jehova] adunay hataas-nga-pailob,” ipahamtang niya sa madali ang hustisya sa takdang panahon. (Lucas 18:7, 8; 2 Pedro 3:9, 10) Sa panahon ni Noe, sa dihang miabot ang Lunop, ang mga daotan gilaglag nga walay langan. Sa samang paagi, sa adlaw ni Lot, sa dihang nag-ulan ug kalayo gikan sa langit, ang mga daotan nangalaglag. Si Jesus miingon: “Maingon usab unya niini sa adlaw nga igapadayag ang Anak sa tawo.” (Lucas 17:27-30) Sa makausa pa, ang mga daotan makaagom ug “kalit nga kalaglagan.” (1 Tesalonica 5:2, 3) Sa pagkatinuod, bug-os kitang makasalig nga dili tugotan ni Jehova nga molapas ug usa ka adlaw ang paglungtad sa kalibotan ni Satanas kon moabot na ang gitakdang panahon sa pagpatuman sa hustisya.

‘Iyang Ipatuman ang Hustisya’

12, 13. (a) Unsang pagtulon-an ang mapupo gikan sa ilustrasyon ni Jesus sa babayeng balo ug sa maghuhukom? (b) Nganong makaseguro kita nga si Jehova mamati sa atong mga pag-ampo ug magpatuman sa hustisya?

¹² Ang ilustrasyon ni Jesus sa babayeng balo ug sa maghuhukom nagpasiugda sa lain pang hinungdanong mga kamatuoran. Sa pagpadapat sa ilustrasyon, si Jesus miingon: “Pamatia ninyo kon unsay giingon sa maghuhukom, bisag dili-matarong! Nan, sa tino, dili ba ipatuman sa Diyos ang hustisya alang sa iyang mga pinili?” Siyempre, wala itandi ni Jesus si Jehova sa maghuhukom nga daw nagpasabot nga trataron sa Diyos ang mga magtutuo sa samang paagi. Hinunoa, gitudloan ni Jesus ang iyang mga sumusunod ug pagtulon-an bahin kang Jehova pinaagi sa pagpasiugda sa kalainan tali sa maghuhukom ug sa Diyos. Unsa ang pipila ka paagi nga sila managlahi?

¹³ Ang maghuhukom sa ilustrasyon ni Jesus “dili-matarong,” samtang “ang Diyos mao ang Maghuhukom nga matarong.” (Salmo 7:11; 33:5) Ang maghuhukom walay personal nga interes sa babayeng balo, apan si Jehova interesado sa matag indibiduwal. (2 Cronicas 6:29, 30) Ang maghuhukom dili andam nga motabang sa babayeng balo, apan si Jehova andam motabang niadtong nag-alagad Kaniya. (Isaias 30:18, 19) Unsang pagtulon-an ang mapupo nato niini? Kon ang dili-matarong nga maghuhukom namati sa mga hangyo sa babayeng balo ug naghatag niini ug hustisya, labi pa gayong mamati si Jehova sa mga  pag-ampo sa iyang katawhan ug tinong ipatuman ang hustisya kanila!—Proverbio 15:29.

14. Nganong dili kita angayang mawad-ag pagtuo sa pag-abot sa adlaw sa Diyos sa paghukom?

¹⁴ Busa, kadtong nawad-ag pagtuo sa pag-abot sa adlaw sa Diyos sa paghukom nasayop gayod. Ngano? Pinaagi sa pagsalikway sa ilang hugot nga pagtuo nga “ang dakong adlaw ni Jehova” haduol na, ila na hinuong gikuwestiyon kon kasaligan ba si Jehova sa pagtuman sa iyang mga saad. Apan walay angayang makakuwestiyon sa pagkamatinumanon sa Diyos. (Job 9:12) Ang balidong pangutana mao, Kita ba mismo magpabiling matinumanon? Ug mao gayod kanay isyu nga gipatungha ni Jesus sa kataposan sa ilustrasyon bahin sa babayeng balo ug sa maghuhukom.

“Makakaplag ba Gayod Siya Niining Maong Pagtuo Dinhi sa Yuta?”

15. (a) Unsang pangutana ang gisukna ni Jesus, ug ngano? (b) Unsay angay natong ipangutana sa atong kaugalingon?

¹⁵ Gipatungha ni Jesus kining makaiikag nga pangutana: “Inig-abot sa Anak sa tawo, makakaplag ba gayod siya niining maong pagtuo dinhi sa yuta?” (Lucas 18:8, potnot sa New World Translation of the Holy Scriptures—With References) Ang ekspresyong “niining maong pagtuo” nagpaila nga si Jesus nagtumong, dili sa pagtuo sa katibuk-ang diwa, kondili sa usa ka partikular nga matang sa pagtuo—pagtuo nga sama nianang nabatonan sa babayeng balo. Wala tubaga ni Jesus ang iyang pangutana. Gipatungha niya kini aron ang iyang mga tinun-an maghunahuna bahin sa kalidad sa ilang pagtuo mismo. Kini ba nagakahuyang, mao nga sila nameligrong mobalik sa mga butang nga ila nang gibiyaan? O nabatonan ba nila ang matang sa pagtuo nga gipakita sa babayeng balo? Karon, angay usab natong pangutan-on ang atong kaugalingon, ‘Unsa kahang matanga sa pagtuo ang nakaplagan sa “Anak sa tawo” dinhi sa akong kasingkasing?’

16. Unsang matanga sa pagtuo ang nabatonan sa babayeng balo?

¹⁶ Aron malakip kita niadtong makadawat sa hustisya ni Jehova, kinahanglang sundogon nato ang babayeng balo. Unsang matanga sa pagtuo ang iyang nabatonan? Siya nagpakitag pagtuo pinaagi sa pagsigeg “adto [sa maghuhukom], nga nag-ingon, ‘Paneguroa baya nga ako kahatagag hustisya.’” Ang maong babayeng balo nagsigeg hangyo aron makadawat ug hustisya gikan sa usa ka tawo nga dili-matarong. Sa samang paagi, ang mga alagad sa Diyos karon makasalig nga sila makadawat sa hustisya ni Jehova—bisan pag dangtan kini ug taas-taas nga panahon kay sa ilang gidahom. Dugang pa, ilang gipakita ang ilang pagsalig sa mga saad sa Diyos pinaagi sa pagpadayon sa pag-ampo—oo, pinaagi sa ‘pagtuaw kang Jehova adlaw ug gabii.’ (Lucas 18:7) Sa pagkatinuod, kon ang usa ka Kristohanon mohunong sa pag-ampo nga ipatuman ang hustisya, iyang gipakita nga siya nawad-ag pagsalig nga si Jehova molihok alang sa iyang mga alagad.

17. Unsay atong mga katarongan nga molahutay sa pag-ampo ug huptan ang atong pagtuo nga seguradong moabot ang adlaw sa paghukom ni Jehova?

¹⁷ Ang partikular nga mga sirkumstansiya nianang babayeng balo nagpakita kanato nga kita adunay dugang mga katarongan sa paglahutay sa pag-ampo. Tagda ang pipila ka kalainan tali sa iyang situwasyon ug sa atoa. Ang babayeng balo nagsigeg adto sa maghuhukom bisan pag walay nagdasig kaniya sa pagbuhat niana, apan ang Pulong sa Diyos nagdasig kanato sa ‘paglahutay sa pag-ampo.’ (Roma 12:12) Ang babayeng balo wala pasaligi nga ang iyang mga hangyo ihatag, apan gipasaligan kita ni Jehova nga ipatuman niya ang hustisya. Pinaagi sa iyang manalagna, si Jehova miingon: “Bisan pa kon kini malangan, padayon sa pagpaabot niini; kay kini matuman gayod. Kini dili maulahi.” (Habacuc  2:3; Salmo 97:10) Ang babayeng balo walay magtatabang nga mangamuyo para kaniya aron mahimong mas puwersado ang iyang hangyo. Apan kita adunay gamhanang magtatabang, si Jesus, “nga anaa sa tuong kamot sa Diyos, nga nangamuyo usab alang kanato.” (Roma 8:34; Hebreohanon 7:25) Busa, kon ang babayeng balo, bisan pa sa iyang malisod nga situwasyon, nagpadayon sa pagpangamuyo sa maghuhukom sa paglaom nga ipatuman ang hustisya, labi pa gayong huptan nato ang atong pagtuo nga seguradong moabot ang adlaw sa paghukom ni Jehova!

18. Sa unsang paagi ang pag-ampo mopalig-on sa atong pagtuo ug motabang kanato sa pagkadawat ug hustisya?

¹⁸ Ang ilustrasyon sa babayeng balo nagtudlo kanato nga adunay dakong kalabotan tali sa pag-ampo ug sa pagtuo ug nga ang atong padayon nga pag-ampo makasanta sa mga impluwensiya nga makapahuyang sa atong pagtuo. Siyempre, wala kini magpasabot nga ang panggawas lamang nga pagpasundayag sa pagtanyag ug mga pag-ampo maoy makapugong sa pagkawala sa pagtuo. (Mateo 6:7, 8) Kon natukmod kita sa pag-ampo tungod kay atong naamgohan nga kita bug-os nga nagasalig sa Diyos, nan ang pag-ampo makapasuod kanato sa Diyos ug makapalig-on sa atong pagtuo. Ug tungod kay ang pagtuo gikinahanglan sa kaluwasan, masabtan kon nganong giisip ni Jesus nga kinahanglang dasigon ang iyang mga tinun-an nga “mag-ampo kanunay ug dili moundang”! (Lucas 18:1; 2 Tesalonica 3:13) Tinuod, ang pag-abot sa “dakong adlaw ni Jehova” wala magdepende sa atong mga pag-ampo—kini moabot nag-ampo man kita labot niini o wala. Apan ang atong pagkadawat ug hustisya ug pagkalabang-buhi sa gubat sa Diyos nagdepende gayod sa pagtuo nga atong nabatonan ug sa atong pagkamainampoon.

19. Unsaon nato pagpamatuod nga kita hugot nga nagtuo nga “ipatuman sa Diyos ang hustisya”?

¹⁹ Sa atong mahinumdoman, si Jesus misukna: “Inig-abot sa Anak sa tawo, makakaplag ba gayod siya niining maong pagtuo dinhi sa yuta?” Unsay tubag sa iyang makaiikag nga pangutana? Pagkadako sa atong kalipay nga milyonmilyong matinumanong mga alagad ni Jehova sa tibuok yuta karon nagpamatuod pinaagi sa ilang mga pag-ampo, pagkamapailobon, ug pagkamalahutayon nga nabatonan nila kining maong pagtuo! Busa, ang pangutana ni Jesus matubag nga positibo. Oo, bisan pa sa mga inhustisya nga gipahamtang kanato karon sa kalibotan ni Satanas, kita hugot nga nagtuo nga “ipatuman sa Diyos ang hustisya alang sa iyang mga pinili.”

[Footnote]

Nahinumdom Ka Ba?

• Nganong ang pipila ka Kristohanon nawad-ag pagtuo?

• Nganong hugot kitang makatuo nga moabot ang adlaw sa paghukom ni Jehova?

• Unsay atong mga katarongan nga molahutay sa pag-ampo?

• Sa unsang paagi ang padayon nga pag-ampo motabang kanato nga dili mawad-an sa atong pagtuo?

[Mga Pangutana sa Pagtuon]

[Hulagway sa panid 26]

Unsay gipasiugda sa ilustrasyon sa babayeng balo ug sa maghuhukom?

[Mga hulagway sa panid 29]

Milyonmilyon karon ang hugot nga nagtuo nga “ipatuman sa Diyos ang hustisya”