Nahinumdom Ka Ba?

Gipabilhan mo ba ang pagbasa sa bag-ong mga gula sa Ang Bantayanang Torre? Buweno, tan-awa kon makatubag ka ba sa mosunod nga mga pangutana:

• Unsay makatabang kanimo kon ang usa ka minahal mobiya kang Jehova?

Palig-ona ang imong kaugalingon ug ang ubang matinumanong mga membro sa pamilya. Magmapuliki sa espirituwal nga mga buluhaton. Magmaandam sa pagtabang sa uban. Ayaw pagpakawala sa paglaom nga tingali mobalik ra ang imong minahal. Ayawg basola ang imong kaugalingon. Tahora ang kahikayan sa Diyos sa pagdisiplina, ug ipahayag ang imong mga pagbati ngadto sa imong mga higala.—9/1, panid 18-21.

• Unsa ang duha ka paagi nga ang Kasulatan makatabang kanato sa pag-ila sa “kataposang mga adlaw”?

Ang Bibliya nagtagna ug mga hitabo nga mahitabo sa “kataposan sa sistema sa mga butang.” (Mateo 24:3, 7, 8; Lucas 21:11) Kini usab naghubit sa kausaban sa mga tinamdan ug binuhatan sa mga tawong magkinabuhi sa “kataposang mga adlaw.” (2 Timoteo 3:1-5) Labing hinungdanon, ang maayong balita sa gingharian kinahanglang igawali usab niining panahona.—9/15, panid 4-6.

• Unsay himoon sa mga ansiyano kon ang usa ka Kristohanon nga nagdrayb ug sakyanan maaksidente nga magpahinabog kamatayon sa uban?

Ang mga ansiyano nga mosusi sa kaso tingali makasuta nga ang drayber dili sad-an sa dugo tungod kay siya wala kaayoy mahimo o wala gayoy kontrol sa mga kahimtang nga nakapahinabog kamatayon. Apan kon mapamatud-an nga siya sad-an sa dugo apan mahinulsolon, makadawat siyag Kasulatanhong pagbadlong ug matangtangan sa mga pribilehiyo sa kongregasyon.—9/15, panid 30.

• Nganong ang kinabuhing walay kataposan wala mag-agad sa pag-uswag sa siyensiya?

Adunay gihimong siyentipikanhong mga paningkamot aron lugwayan ang kinabuhi, sama sa pagsulay sa paglugway sa gidaghanon sa pagbag-o-bag-o sa mga selula o pinaagig therapeutic cloning aron makapatunghag bag-o ug tukma nga mga organo sa mga pasyente. Apan ang Bibliya nagpakita nga ang bugtong paagi aron ang tawo makabaton ug kinabuhing walay kataposan mao ang lukat ni Jesus.—10/1, panid 3-5.

• Ang Hudiyohanong seremonyal nga pagkaligo ba mao ang sinugdanan sa Kristohanong bawtismo?

Dili. Ang mga Judiyo naghimog seremonyal nga pagpanghinlo alang sa ilang kaugalingon nga wala himoa sa bawtismo nga gihimo ni Juan. Ang pagpanghinlo nga gisugo sa Moisesnong Balaod kinahanglang usbon, apan ang Kristohanong bawtismo himoon lamang sa makausa.—10/15, panid 12-13.

• Unsa ang Tunghaan sa Ministeryal nga Pagbansay?

Kini maoy walo-ka-semana nga klase alang sa mga ansiyano ug ministeryal nga mga alagad sa kongregasyon nga tagsaanon ug andam nga moalagad sa dapit nga dakog panginahanglan. Kana mahimong sa kongregasyon nga ilang gigikanan, sa bisan haing dapit sa ilang nasod, o sa laing nasod.—11/15, panid 10-11.

• Unsa o kinsa ang antikristo nga gihisgotan sa 1 Juan 2:18; 4:3?

Sa katibuk-an, ang “antikristo” nagtumong sa tanan nga misupak o bakak nga nangangkon nga siya si Kristo o sila iyang mga hawas. Ang mga pulong ni Jesus ug Juan nagpakita nga ang antikristo maoy linangkob nga grupo nga naglakip sa indibiduwal nga mga antikristo kinsa nagpakaylap ug relihiyosong panglimbong ug nagsalikway sa Gingharian sa Diyos.—12/1, panid 4-6.