“Ang Unang Pagkabanhaw”​—Nagapadayon Karon!

“Kadtong nangamatay nga nahiusa kang Kristo mouna pagbangon.”—1 TESALONICA 4:16.

1, 2. (a) Unsay paglaom alang niadtong nangamatay? (b) Pinasukad sa unsa nga ikaw nagtuo sa pagkabanhaw? (Tan-awa ang potnot.)

 “ANG mga buhi nasayod nga sila mamatay.” Sukad makasala si Adan, mao na kanay kahimtang. Sa tibuok kasaysayan, ang matag usa nga natawo nahibalo nga sa ngadtongadto siya mamatay, ug daghan ang naghunahuna: ‘Unsay sunod nga mahitabo? Unsay kahimtang sa mga patay?’ Ang Bibliya nagtubag: “Bahin sa mga patay, sila walay nahibaloan nga bisan unsa.”—Ecclesiastes 9:5.

² Nan, aduna bay paglaom alang niadtong nangamatay? Oo. Sa pagkatinuod, aduna gayod aron matuman ang orihinal nga katuyoan sa Diyos alang sa katawhan. Latas sa kasiglohan, ang maunongong mga alagad sa Diyos nagpasundayag ug pagtuo sa saad ni Jehova bahin sa Binhi nga maglaglag kang Satanas ug magwagtang sa kadaot nga iyang gihimo. (Genesis 3:15)  Kadaghanan kanila nangamatay na. Aron makita nila ang katumanan sa maong saad ug sa uban pang gisaad ni Jehova, kinahanglang banhawon sila gikan sa mga patay. (Hebreohanon 11:13) Posible ba kana? Oo, posible. Si apostol Pablo miingon: “Aduna unyay pagkabanhaw sa mga matarong ug sa mga dili-matarong.” (Buhat 24:15) Kaniadto, gibanhaw ni Pablo ang usa ka batan-on nga ginganlag Eutiko, kinsa nahulog gikan sa ikatulong andana nga bentana ug “gialsa nga patay na.” Mao kini ang kataposan sa siyam ka pagkabanhaw nga natala diha sa Bibliya.—Buhat 20:7-12. a

3. Unsang kahupayan ang imong nabatonan gikan sa mga pulong ni Jesus nga natala sa Juan 5:28, 29, ug ngano?

³ Kanang siyam ka pagkabanhaw maoy pasukaranan nga motuo kita sa gisulti ni Pablo. Nagpalig-on kini sa atong pagsalig sa saad ni Jesus: ‘Ang takna nagsingabot nga ang tanan nga anaa sa handomanang mga lubnganan makadungog sa tingog ni Jesus ug manggula.’ (Juan 5:28, 29) Makapadasig gayod kana nga mga pulong! Ug pagkamakapahupay niana alang sa milyonmilyon kansang mga minahal nangatulog na sa kamatayon!

4, 5. Unsang lainlaing mga pagkabanhaw ang gihisgotan sa Bibliya, ug unsay hisgotan niining artikuloha?

⁴ Ang kadaghanan niadtong pagabanhawon mopuyo sa yuta nga himoong malinawon ilalom sa Gingharian sa Diyos. (Salmo 37:10, 11, 29; Isaias 11:6-9; 35:5, 6; 65:21-23) Apan, ang ubang mga pagkabanhaw mahitabo una pa niana. Una, si Jesu-Kristo kinahanglang banhawon aron itanyag ang bili sa iyang halad ngadto sa Diyos alang kanato. Si Jesus namatay ug gibanhaw niadtong 33 K.P.

⁵ Sunod, ang dinihogang mga membro sa “Israel sa Diyos” kinahanglang moduyog kang Ginoong Jesu-Kristo sa langitnong himaya, diin sila “mahiuban kanunay sa Ginoo.” (Galacia 6:16; 1 Tesalonica 4:17) Ang maong hitabo gitawag ug “mas sayo nga pagkabanhaw” o “unang pagkabanhaw.” (Filipos 3:10, 11; Pinadayag 20:6) Sa dihang matapos na ang maong pagkabanhaw, panahon na nga ang  milyonmilyon banhawon dinhi sa yuta uban ang paglaom nga makabaton ug kinabuhing dayon sa Paraiso. Busa, langitnon man o yutan-on ang atong paglaom, kita maikag pag-ayo sa “unang pagkabanhaw.” Unsang matanga kana sa pagkabanhaw? Kanus-a kana mahitabo?

“Sa Unsang Matanga sa Lawas?”

6, 7. (a) Sa dili pa moadto sa langit ang dinihogang mga Kristohanon, unsay kinahanglang mahitabo? (b) Sa unsang matanga sa lawas sila pagabanhawon?

⁶ Sa iyang unang sulat sa mga taga-Corinto, nagpatungha si Pablo ug pangutana bahin sa unang pagkabanhaw: “Sa unsang paagi ang mga patay pagabangonon? Oo, sa unsang matanga sa lawas nga sila mamao unya?” Dayon iyang gitubag kana: “Ang imong ipugas dili mabuhi gawas kon kini mamatay una . . . apan ang Diyos magahatag niini ug lawas sumala sa iyang gikahimut-an . . . Ang himaya sa mga lawas nga langitnon usa ka matang, ug kanang sa mga lawas nga yutan-on lain nga matang.”—1 Corinto 15:35-40.

⁷ Ang mga pulong ni Pablo nagpakita nga ang mga Kristohanon nga gidihogan sa balaang espiritu kinahanglang mamatay una pa sila makadawat sa ilang langitnong ganti. Sa pagkamatay nila, ang ilang yutan-ong lawas mobalik sa abog. (Genesis 3:19) Sa tinudlong panahon sa Diyos, sila pagabanhawon uban sa matang sa lawas nga haom sa kinabuhi sa langit. (1 Juan 3:2) Hatagan usab sila sa Diyos ug imortalidad o pagkawalay-kamatayon. Dili kana kinaiya nga nabatonan nila sukad sa pagkatawo, nga morag gihatagan na silang daan ug dili-mamatay nga kalag. “Kini nga may-kamatayon angay magsul-ob ug pagkawalay-kamatayon,” miingon si Pablo. Ang pagkawalay-kamatayon maoy gasa gikan sa Diyos, nga ‘isul-ob’ niadtong nalakip sa unang pagkabanhaw.—1 Corinto 15:50, 53; Genesis 2:7; 2 Corinto 5:1, 2, 8.

8. Giunsa nato pagkahibalo nga wala pilia sa Diyos ang 144,000 gikan sa mga membro sa lainlaing relihiyon?

⁸ Usa ka gatos ug kap-atag-upat ka libo lamang ang makadawat sa unang pagkabanhaw. Si Jehova nagsugod pagpili kanila sa Pentekostes 33 K.P., wala madugay human niya banhawa si Jesus. Silang tanan ‘nakabaton sa ngalan ni Jesus ug sa ngalan sa iyang Amahan nga nasulat diha sa ilang mga agtang.’ (Pinadayag 14:1, 3) Busa, wala sila pilia gikan sa daghang nagkalainlaing relihiyon. Ang tanan maoy mga sumusunod ni Kristo, ug ang tanan magarbohong nagdala sa ngalan sa Amahan—si Jehova. Sa dihang banhawon sila, hatagan silag buluhaton didto sa langit. Makapalipay gayod alang kanila ang paglaom nga direktang mag-alagad sa Diyos.

Nagapadayon Karon?

9. Sa unsang paagi ang Pinadayag 12:7 ug 17:14 motabang kanato sa pagbanabana kon kanus-a nagsugod ang unang pagkabanhaw?

⁹ Kanus-a nahitabo ang unang pagkabanhaw? Adunay lig-ong pamatuod nga kana nagapadayon karon. Pananglitan, itandi ang duha ka kapitulo sa Pinadayag. Una, tan-awa ang Pinadayag kapitulo 12. Dinha atong mabasa nga ang bag-ong naentronong si Jesu-Kristo, kauban sa iyang balaang mga manulonda, nakiggubat kang Satanas ug sa iyang mga demonyo. (Pinadayag 12:7-9) Ingon sa subsob nga gipakita niining magasina, kanang gubata nagsugod sa 1914. b Apan, matikdi nga walay dinihogang sumusunod ni Kristo nga kauban niya nianang gubat sa langit. Karon tan-awa ang kapitulo 17 sa Pinadayag. Atong mabasa dinha nga human malaglag ang “Dakong Babilonya,” pagadag-on sa Kordero ang kanasoran. Dayon midugang kini: “Dugang pa, kadtong mga tinawag ug pinili ug matinumanon kaniya mobuhat usab sa ingon.” (Pinadayag 17:5, 14) Ang “mga tinawag ug pinili ug matinumanon” kinahanglang nabanhaw na nianang tungora aron sila makapakig-uban kang Jesus sa kataposang pagdaog sa kalibotan ni Satanas. Nan, makaiikag nga ang mga dinihogan nga mangamatay sa wala pa ang Armagedon mabanhaw tali sa 1914 ug sa Armagedon.

10, 11. (a) Kinsa ang 24 ka ansiyano, ug unsay gibutyag sa usa kanila ngadto kang Juan? (b) Unsay atong ikahinapos niini?

¹⁰ Ikasulti ba nato kon kanus-a eksaktong nagsugod ang unang pagkabanhaw? Ang makaiikag nga timailhan makita diha sa Pinadayag 7:9-15, diin si apostol Juan naghubit sa iyang  panan-awon bahin sa “usa ka dakong panon, nga walay tawong makaihap.” Gipadayag sa usa sa 24 ka ansiyano ngadto kang Juan kon kinsa kanang dakong panon, ug kini nga mga ansiyano naghawas sa 144,000 ka kaubang mga manununod ni Kristo sa ilang langitnong himaya. c (Lucas 22:28-30; Pinadayag 4:4) Si Juan mismo may langitnong paglaom; apan sanglit tawo pa siya dinhi sa yuta sa dihang ang ansiyano nakigsulti kaniya, sa maong panan-awon si Juan naghawas sa mga dinihogan dinhi sa yuta nga wala pa makadawat sa ilang langitnong ganti.

¹¹ Nan, unsay atong ikahinapos sa kamatuoran nga usa sa 24 ka ansiyano nagpaila sa dakong panon ngadto kang Juan? Mopatim-aw nga ang nabanhaw nang mga membro sa 24 ka ansiyano mahimong nalangkit karon sa pagpasa ug mga kamatuoran gikan sa Diyos. Nganong hinungdanon kana? Tungod kay gipadayag ngadto sa dinihogang mga alagad sa Diyos sa yuta niadtong 1935 kon kinsa ang dakong panon. Kon gigamit ang usa sa 24 ka ansiyano sa pagpasa nianang hinungdanong kamatuoran, nan nabanhaw na siya ngadto sa langit pagka-1935 o sayosayo pa niana. Magpaila kana nga ang unang pagkabanhaw nagsugod tali sa 1914 ug 1935. Posible bang mohatag ug mas eksaktong tubag?

12. Ipatin-aw kon nganong ang tingpamulak sa 1918 mahimong lantawon ingong panahon nga posibleng nagsugod ang unang pagkabanhaw.

¹² Niining puntoha, makatabang tingali ang pagkonsiderar sa giisip nga usa ka kaamgiran diha sa Bibliya. Si Jesu-Kristo gidihogan ingong umaabot nga Hari sa Gingharian sa Diyos sa tinghunlak sa 29 K.P. Tulo ka tuig ug tunga sa ulahi, sa tingpamulak sa 33 K.P., siya gibanhaw ingong gamhanang espiritung persona. Nan, mahimo kahang ipangatarongan nga sanglit si Jesus naentrono sa tinghunlak sa 1914, ang pagkabanhaw sa iyang matinumanong dinihogang mga sumusunod nagsugod tulo ka tuig ug tunga sa ulahi, sa tingpamulak sa 1918? Makaiikag kana nga posibilidad. Bisan tuod kini dili direktang mapamatud-an diha sa Bibliya, kini nahiuyon sa ubang mga teksto nga nagpaila nga ang unang pagkabanhaw nagsugod wala madugay human magsugod ang presensiya ni Kristo.

13. Sa unsang paagi gipaila sa 1 Tesalonica 4:15-17 nga ang unang pagkabanhaw nagsugod sa sayong bahin sa presensiya ni Kristo?

¹³ Pananglitan, si Pablo misulat: “Kitang mga buhi nga makapabiling buhi hangtod sa presensiya sa Ginoo [dili, hangtod sa kataposan sa iyang presensiya] dili gayod mag-una kanila nga nangatulog sa kamatayon; kay ang Ginoo manaog gikan sa langit uban sa singgit sa pagsugo, uban sa tingog sa arkanghel ug uban sa trompeta sa Diyos, ug kadtong nangamatay nga nahiusa kang Kristo mouna pagbangon. Pagkahuman kitang mga buhi nga makapabiling buhi, duyog kanila, pagasakgawon sa mga panganod sa pagsugat sa Ginoo diha sa kahanginan; ug sa ingon niana kita mahiuban kanunay sa Ginoo.” (1 Tesalonica 4:15-17) Busa, ang dinihogang mga Kristohanon nga nangamatay una pa sa presensiya ni Kristo mas unang gibanhaw ngadto sa langitnong kinabuhi kay niadtong buhi pa panahon sa presensiya ni Kristo. Nagpasabot kini nga ang unang pagkabanhaw nagsugod na sa sayong bahin sa presensiya ni Kristo, ug kini nagpadayon “panahon sa iyang presensiya.” (1 Corinto 15:23) Imbes dungang banhawon ang tanan, ang unang pagkabanhaw mahitabo sulod sa usa ka yugto sa panahon.

“Ang Matag Usa Kanila Gihatagan ug Maputing Taas nga Besti”

14. (a) Kanus-a natuman ang mga panan-awon nga natala sa Pinadayag kapitulo 6? (b) Unsay gihulagway diha sa Pinadayag 6:9?

¹⁴ Tagda usab ang pamatuod nga anaa sa Pinadayag kapitulo 6. Dinha si Jesus nakita nga miasdang ingong nagapangdaog nga Hari. (Pinadayag 6:2) Ang kanasoran nalangkit sa gubat sa talagsaong gilapdon. (Pinadayag 6:4) Adunay kaylap nga kagutom. (Pinadayag 6:5, 6) Ang makamatayng mga hampak naglaglag sa katawhan. (Pinadayag 6:8) Kining tanang gitagna nga mga hitabo klarong mohaom sa kahimtang sa kalibotan sukad sa 1914. Apan duna pay laing mahitabo. Ang atong pagtagad gipunting ngadto sa halaran. Sa ilalom niini anaa “ang mga kalag niadtong gipamatay  tungod sa pulong sa Diyos ug tungod sa pagpamatuod nga ilang gihimo.” (Pinadayag 6:9) Sanglit “ang kalag [o, kinabuhi] sa unod anaa sa dugo,” ang tinuod nga gihulagway ingong anaa sa ilalom sa halaran mao ang dugo sa matinumanong mga alagad ni Jesus nga gipamatay tungod sa ilang maisogon ug masibotong pagpamatuod.—Levitico 17:11.

15, 16. Ipatin-aw kon nganong ang mga pulong sa Pinadayag 6:10, 11 nagtumong sa unang pagkabanhaw.

¹⁵ Sama sa dugo sa matarong nga si Abel, ang dugo niining Kristohanong mga martir nangayog hustisya. (Genesis 4:10) “Sa makusog nga tingog sila naninggit, nga nag-ingon: ‘Hangtod kanus-a, Soberanong Ginoo nga balaan ug matuod, nga ikaw magpugong pa sa paghukom ug sa pagpanimalos sa among dugo batok kanilang nanagpuyo sa yuta?’” Unsay sunod nga nahitabo? “Ang matag usa kanila gihatagan ug maputing taas nga besti; ug sila gisultihan sa pagpahulay una sa makadiyot, hangtod nga mabug-os usab ang gidaghanon sa ilang mga isigkaulipon ug sa ilang mga igsoon nga hapit nang pamatyon ingon usab kanila.”—Pinadayag 6:10, 11.

¹⁶ Kini bang maputing taas nga mga besti gihatag ngadto sa nagbanaw nga dugo diha sa ilalom sa halaran? Siyempre wala! Ang taas nga mga besti gihatag ngadto sa mga tawo kansang dugo giula, ingnon ta, diha sa halaran. Ilang gihalad ang ilang kinabuhi sa ngalan ni Jesus ug karon gibanhaw na ingong espiritung mga persona. Giunsa nato pagkahibalo niana? Sa unang bahin sa basahon sa Pinadayag, atong mabasa: “Siya nga magmadaogon pagasul-oban ug maputing panggawas nga mga besti; ug dili ko gayod papason ang iyang ngalan gikan sa basahon sa kinabuhi.” Hinumdomi usab nga ang 24 ka ansiyano “nagsul-ob ug maputing panggawas nga mga besti, ug diha sa ilang ulo may mga koronang bulawan.” (Pinadayag 3:5; 4:4) Busa human daota sa gubat, gutom, ug kamatay ang yuta, ang mga membro sa 144,000 nga nangamatay na, nga gihulagwayan sa dugo diha sa ilalom sa halaran, gibanhaw ngadto sa langitnong kinabuhi ug gisul-oban sa simbolikong maputing taas nga mga besti.

17. Sa unsang paagi kadtong nakadawat ug maputing taas nga mga besti ‘mopahulay’?

¹⁷ Kadtong bag-ong mga binanhaw kinahanglang ‘mopahulay.’ Kinahanglang mapailobon silang maghulat sa adlaw sa panimalos sa Diyos. Ang ilang “mga isigkaulipon,” ang dinihogang mga Kristohanon nga ania pa sa yuta, kinahanglan pang magpamatuod sa ilang integridad ilalom sa pagsulay. Inig-abot sa paghukom sa Diyos, ang “pagpahulay” matapos. (Pinadayag 7:3) Nianang panahona, kadtong nangabanhaw moduyog kang Ginoong Jesu-Kristo sa paglaglag sa mga daotan, lakip na niadtong nag-ula sa dugo sa inosenteng mga Kristohanon.—2 Tesalonica 1:7-10.

 Kon Unsay Kahulogan Niini Alang Kanato

18, 19. (a) Nganong makahinapos ka man nga ang unang pagkabanhaw nagapadayon karon? (b) Unsay imong gibati labot sa imong nasabtan bahin sa unang pagkabanhaw?

¹⁸ Ang Pulong sa Diyos wala magsulti sa eksaktong petsa sa unang pagkabanhaw, apan kini nagbutyag nga kini mahitabo sulod sa usa ka yugto sa panahon, sulod sa presensiya ni Kristo. Ang unang pagabanhawon mao ang dinihogang mga Kristohanon nga nangamatay una pa magsugod ang presensiya ni Kristo. Samtang magpadayon ang presensiya ni Kristo, ang dinihogang mga Kristohanon nga matinumanong nakatapos sa ilang yutan-ong kinabuhi mausab “sa pagpamilok sa mata” ug mahimong gamhanang espiritung mga linalang. (1 Corinto 15:52) Ang tanan bang dinihogan makadawat sa ilang langitnong ganti una pa ang gubat sa Armagedon? Wala kita masayod. Apan, nahibalo kita nga sa takdang panahon sa Diyos, ang tanang membro sa 144,000 magbarog didto sa langitnong Bukid sa Zion.

¹⁹ Nahibalo usab kita nga ang kadaghanan sa 144,000 nahiusa na kang Kristo. Diyutay na lang ang ania pa sa yuta. Pagkalig-ong pamatuod nga ang panahon sa pagpahamtang sa Diyos sa iyang paghukom nagkaduol na gayod! Sa dili madugay, ang tibuok sistema sa kalibotan ni Satanas pagalaglagon. Si Satanas mismo itambog sa bung-aw. Unya, magsugod na ang pagkabanhaw sa kadaghanan, ug ang matinumanong mga tawo, pinasukad sa halad lukat ni Jesus, ikatuboy na ngadto sa kahingpitan nga susama nianang giwala ni Adan. Ang tagna ni Jehova nga natala diha sa Genesis 3:15 nagakatuman sa kahibulongang paagi. Pagkadakong pribilehiyo nga mabuhi niining panahona!

[Mga footnote]

Makapatin-aw Ka Ba?

Sa unsang paagi ang mosunod nga mga teksto motabang kanato sa pagsabot kon kanus-a nagsugod ang “unang pagkabanhaw?”

• Pinadayag 12:7; 17:14

• Pinadayag 7:13, 14

• 1 Corinto 15:23; 1 Tesalonica 4:15-17

• Pinadayag 6:2, 9-11

[Mga Pangutana sa Pagtuon]

[Mga hulagway sa panid 26]

Unsang mga pagkabanhaw ang nahitabo una pa banhawon gikan sa mga patay ang kadaghanan sa katawhan?

[Hulagway sa panid 29]

Sa unsang paagi ang maputing taas nga besti igahatag ngadto sa pipila ka tawo nga nangatulog sa kamatayon?