“Ikaw Magmalipayon Gayod”

“Saulogon mo ang pista alang kang Jehova . . . , ug ikaw magmalipayon gayod.”—DEUTERONOMIO 16:15.

1. (a) Unsang mga isyu ang gipatungha ni Satanas? (b) Unsay gitagna ni Jehova human sa pagrebelde ni Adan ug Eva?

 SA DIHANG nadani ni Satanas si Adan ug Eva sa pagrebelde batok sa ilang Maglalalang, iyang gipatungha ang duha ka hinungdanon kaayong mga isyu. Una, iyang gihagit ang pagkamatinud-anon ni Jehova ug ang pagkahusto sa iyang paagi sa pagmando. Ikaduha, gipasumbingay ni Satanas nga ang mga tawo mag-alagad sa Diyos tungod lamang sa hakog nga mga tinguha. Ang ikaduhang isyu tin-awng gipahayag sa panahon ni Job. (Genesis 3:1-6; Job 1:9, 10; 2:4, 5) Apan, si Jehova milihok dayon aron sa pagsulbad niana. Bisan sa dihang si Adan ug Eva didto pa sa tanaman sa Eden, gitagna na ni Jehova kon unsaon Niya paghusay ang maong mga isyu. Iyang gitagna ang pag-abot sa usa ka “binhi” kinsa, human masamdan ang iyang tikod, magsamad usab kang Satanas sa ulo nga mosangpot sa kamatayon niini.—Genesis 3:15.

2. Unsang kahayag ang gihatag ni Jehova bahin sa paagi sa pagtuman niya sa tagna nga nasulat diha sa Genesis 3:15?

² Sa paglabay sa panahon, si Jehova anam-anam nga naghatag ug dugang kahayag bahin sa maong tagna, sa ingon nagpakita nga kini matuman ra gayod. Pananglitan, giingnan sa Diyos si Abraham nga ang “binhi” motungha taliwala sa iyang mga kaliwat. (Genesis 22:15-18) Ang apo ni Abraham nga si Jacob nahimong amahan sa 12 ka tribo sa Israel. Sa 1513 W.K.P., sa dihang ang maong mga tribo nahimong usa ka nasod, gihatagan sila ni Jehova ug usa ka sistema sa mga balaod nga naglakip sa lainlaing tinuig nga mga pista. Si apostol Pablo miingon nga ang maong mga pista maoy “landong sa mga butang nga moabot.” (Colosas 2:16, 17; Hebreohanon 10:1) Kini naghatag ug pasiunang kahayag sa katumanan sa katuyoan ni Jehova alang sa Binhi. Ang pagsaulog sa maong mga pista nakapalipay pag-ayo sa Israel. Ang daklit nga paghisgot niana magpalig-on sa atong pagtuo sa pagkakasaligan sa mga saad ni Jehova.

Ang Binhi Mitungha

3. Kinsa ang gisaad nga Binhi, ug sa unsang paagi gisamaran ang iyang tikod?

³ Kapin sa 4,000 ka tuig human sa orihinal nga tagna ni Jehova, mitungha ang gisaad nga Binhi. Kadto mao si Jesus. (Galacia 3:16) Ingong hingpit nga tawo, gihuptan ni Jesus ang iyang integridad hangtod sa kamatayon ug sa ingon nagpamatuod nga bakak ang mga sumbong ni Satanas. Gawas pa, sanglit wala may sala si Jesus, ang iyang kamatayon maoy bililhon kaayong halad. Pinaagi niana, si Jesus nagtaganag kagawasan gikan sa sala ug kamatayon alang sa matinumanong mga kaliwat ni Adan ug Eva. Ang kamatayon ni Jesus diha sa estaka sa pagsakit mao ang ‘pagsamad sa tikod’ sa gisaad nga Binhi.—Hebreohanon 9:11-14.

4. Sa unsang paagi gilandongan ang halad ni Jesus?

⁴ Si Jesus namatay sa Nisan 14, 33 K.P. a Sa Israel, ang Nisan 14 maoy malipayong adlaw sa pagsaulog sa Paskuwa. Kada tuig nianang adlawa, ang pagkaon nga salohan sa mga pamilya naglakip sa usa ka walay-depektong kordero. Niining paagiha, ilang gihinumdoman ang papel sa dugo sa kordero diha sa kaluwasan sa panganay sa mga Israelinhon sa dihang ang manulonda sa kamatayon nagpatay sa panganay sa mga Ehiptohanon sa Nisan 14, 1513 W.K.P. (Exodo 12:1-14) Ang kordero sa Paskuwa naglandong kang Jesus, nga bahin kaniya si apostol Pablo miingon: “Si Kristo nga atong inihaw sa paskuwa gihalad na.” (1 Corinto 5:7) Sama sa dugo sa kordero sa Paskuwa, ang giula nga dugo ni Jesus nagtaganag kaluwasan alang sa daghan.—Juan 3:16, 36.

 ‘Ang Unang Bunga Gikan sa mga Patay’

5, 6. (a) Kanus-a nabanhaw si Jesus, ug sa unsang paagi gilandongan diha sa Balaod ang maong hitabo? (b) Sa unsang paagi ang pagkabanhaw ni Jesus nagpaposible sa katumanan sa Genesis 3:15?

⁵ Sa ikatulong adlaw, si Jesus gibanhaw aron itanyag ang bili sa iyang halad ngadto sa iyang Amahan. (Hebreohanon 9:24) Ang iyang pagkabanhaw gilandongan sa laing pista. Ang adlaw human sa Nisan 14 mao ang sinugdanan sa Pista sa mga Tinapay nga Walay Igpapatubo. Pagkaugma, Nisan 16, ang mga Israelinhon magdala ug usa ka binangan sa unang ani sa sebada, ang kinaunahang maani nga lugas sa Israel, aron itabyog kini sa saserdote atubangan ni Jehova. (Levitico 23:6-14) Haom gayod nga sa tuig 33 K.P., sa mao gihapong adlaw, gisanta ni Jehova ang mapintas nga mga paningkamot ni Satanas sa pagpahilom sa dayon sa iyang “matinumanon ug matuod nga saksi”! Sa Nisan 16, 33 K.P., gibanhaw ni Jehova si Jesus gikan sa mga patay ngadto sa imortal nga espirituhanong kinabuhi.—Pinadayag 3:14; 1 Pedro 3:18.

⁶ Si Jesus nahimong “unang bunga kanilang nangatulog sa kamatayon.” (1 Corinto 15:20) Dili sama niadtong gibanhaw kaniadto apan nangamatay ra, si Jesus wala na mamatay pag-usab. Hinunoa, siya misaka sa langit ngadto sa tuong kamot ni Jehova, diin siya naghulat hangtod nga siya gipalingkod ingong Hari sa langitnong Gingharian ni Jehova. (Salmo 110:1; Buhat 2:32, 33; Hebreohanon 10:12, 13) Sukad sa pagpalingkod kaniya ingong Hari, si Jesus makahimo na sa pagsamad sa iyang dakong kaaway, si Satanas, diha sa ulo ug sa ingon maglaglag kaniya ug sa iyang binhi sa dayon.—Pinadayag 11:15, 18; 20:1-3, 10.

Dugang mga Membro sa Binhi ni Abraham

7. Unsa ang Pista sa mga Semana?

⁷ Si Jesus mao ang Binhi nga gisaad didto sa Eden ug pinaagi kaniya ‘bungkagon ni Jehova ang mga buhat sa Yawa.’ (1 Juan 3:8) Apan, sa dihang nakigsulti si Jehova kang Abraham, Iyang gipaila nga ang “binhi” ni Abraham dili usa ka tawo lamang. Kini ‘mahisama sa mga bituon sa kalangitan ug sa mga lugas sa balas nga anaa sa baybayon.’ (Genesis 22:17) Ang pagtungha sa ubang mga membro sa “binhi” gilandongan sa lain pang masadya nga pista. Kalim-an ka adlaw human sa Nisan 16, gisaulog sa Israel ang Pista sa mga Semana. Ang Balaod bahin niini nag-ingon: “Hangtod sa adlaw human sa ikapitong igpapahulay kinahanglan kamong mag-ihap, kalim-an ka adlaw, ug magatanyag kamo ug bag-ong halad-nga-lugas ngadto kang Jehova. Gikan sa inyong puloy-anang mga dapit magdala kamo ug duha ka tinapay ingong halad-nga-tinabyog. Kini sila kinahanglan nga hinimo sa duha sa ikanapulo ka bahin sa usa ka ephah nga pinong harina. Kinahanglan nga lutoon sila nga may lebadura, ingong unang hinog nga mga bunga alang kang Jehova.” b—Levitico 23:16, 17, 20.

8. Unsang talagsaong hitabo ang nahitabo sa Pentekostes 33 K.P.?

⁸ Sa dinhi pa si Jesus sa yuta, ang Pista sa mga Semana nailhan ingong Pentekostes (gikan sa Gregong pulong nga nagkahulogang “ika-kalim-an”). Sa Pentekostes 33 K.P., ang mas dakong Hataas nga Saserdote, ang nabanhawng Jesu-Kristo, nagbubo sa balaang espiritu ngadto sa gamayng pundok sa 120 ka tinun-an nga nagtigom sa  Jerusalem. Busa ang maong mga tinun-an nahimong dinihogang mga anak sa Diyos ug mga igsoon ni Jesu-Kristo. (Roma 8:15-17) Sila nahimong bag-ong nasod, ang “Israel sa Diyos.” (Galacia 6:16) Gikan sa pipila lang ka membro, ang maong nasod sa kataposan mokabat ug 144,000.—Pinadayag 7:1-4.

9, 10. Sa unsang paagi gilandongan ang kongregasyon sa dinihogang mga Kristohanon panahon sa Pentekostes?

⁹ Ang kongregasyon sa dinihogang mga Kristohanon gilandongan sa duha ka tinapay nga may lebadura nga gitabyog sa atubangan ni Jehova matag Pentekostes. Ang pagkaanaay lebadura sa mga tinapay nagpakita nga ang dinihogang mga Kristohanon nakabaton pa sa lebadura sa napanunod nga sala. Bisan pa niana, makaduol sila kang Jehova pinasukad sa halad lukat ni Jesus. (Roma 5:1, 2) Nganong duha man ka tinapay? Lagmit nagpunting kana sa kamatuoran nga ang dinihogang mga anak sa Diyos sa ngadtongadto pagakuhaon gikan sa duha ka pundok—una gikan sa kinaiyanhong mga Hudiyo ug sa ulahi gikan sa mga Hentil.—Galacia 3:26-29; Efeso 2:13-18.

¹⁰ Ang duha ka tinapay nga gihalad panahon sa Pentekostes naggikan sa unang ani sa trigo. Sa katumbas, kadtong inanak-sa-espiritu nga mga Kristohanon gitawag nga “usa ka matang sa unang mga bunga sa iyang mga linalang.” (Santiago 1:18) Sila ang unang nakadawat ug kapasayloan sa ilang mga sala pinasukad sa giula nga dugo ni Jesus, ug nagpaposible kana nga sila mahatagan ug imortal nga kinabuhi didto sa mga langit, diin sila magmando uban kang Jesus sa iyang Gingharian. (1 Corinto 15:53; Filipos 3:20, 21; Pinadayag 20:6) Nianang kahimtanga, sa dili madugay sila “magabantay sa [kanasoran] pinaagig olisi nga puthaw” ug makita si ‘Satanas nga madugmok ilalom sa ilang mga tiil.’ (Pinadayag 2:26, 27; Roma 16:20) Si apostol Juan miingon: “Mao kini sila ang nagpadayon pagsunod sa Kordero bisan asa siya moadto. Kini sila gipalit gikan sa katawhan ingong mga unang bunga ngadto sa Diyos ug sa Kordero.”—Pinadayag 14:4.

Usa ka Adlaw nga Nagpasiugda sa Kaluwasan

11, 12. (a) Unsay nahitabo panahon sa Adlaw sa Pagtabon sa Sala? (b) Unsang mga benepisyo ang nadawat sa Israel gikan sa mga halad nga toro ug mga kanding?

¹¹ Sa ikanapulo nga adlaw sa Etanim (sa ulahi gitawag nga Tisri), c ang Israel nagsaulog ug usa ka  pista nga naglandong kon sa unsang paagi ipadapat ang mga benepisyo sa halad lukat ni Jesus. Nianang adlawa ang tibuok nasod nagtigom alang sa Adlaw sa Pagtabon sa Sala aron itanyag sa mga saserdote ang mga halad sa pagtabon sa ilang mga sala.—Levitico 16:29, 30.

¹² Sa Adlaw sa Pagtabon sa Sala, ang hataas nga saserdote mag-ihaw ug usa ka toreyong baka, ug didto sa Labing Balaan, ang ubang dugo niini iyang iwisik sa makapito atubangan sa tabon sa Arka, sa ingon mahulagwayong naghalad sa dugo atubangan ni Jehova. Ang maong halad maoy alang sa mga sala sa hataas nga saserdote ug sa “iyang balay,” nga gilangkoban sa luyoluyong mga saserdote ug sa mga Levihanon. Dayon ang hataas nga saserdote magkuhag duha ka kanding. Ang usa iyang ihawon ingong halad-sa-sala “alang sa katawhan.” Ang ubang dugo niini iwisik usab atubangan sa tabon sa Arka sa Labing Balaan. Human niana, ipatong sa hataas nga saserdote ang iyang mga kamot ibabaw sa ulo sa ikaduhang kanding ug isugid ang mga sala sa mga anak sa Israel. Dayon magsugo siyag tawo nga magdala sa kanding ngadto sa kamingawan aron dad-on sa halayo ang sala sa nasod sa simbolikong paagi.—Levitico 16:3-16, 21, 22.

13. Sa unsang paagi ang mga panghitabo sa Adlaw sa Pagtabon sa Sala naglandong sa papel nga gidula ni Jesus?

¹³ Ingon sa gilandongan sa maong mga buhat, ang dakong Hataas nga Saserdote, si Jesus, naggamit sa bili sa iyang kaugalingong dugo aron sa pagpasaylo sa mga sala. Una, ang bili sa iyang dugo ipadapat ngadto sa “espirituwal nga balay” nga gilangkoban sa 144,000 ka dinihogang mga Kristohanon, ug tungod niini sila mapahayag nga matarong ug makabaton ug hinlong baroganan atubangan ni Jehova. (1 Pedro 2:5; 1 Corinto 6:11) Gilandongan kini sa paghalad ug baka. Sa ingon nabuksan ang kahigayonan nga sila makadawat sa ilang langitnong panulondon. Ikaduha, ang bili sa dugo ni Jesus ipadapat ngadto sa milyonmilyong uban pa nga magpasundayag ug pagtuo kang Kristo, ingon sa gipakita sa paghalad ug kanding. Hatagan sila ug kinabuhing walay kataposan dinhi sa yuta, ang panulondon nga giwala ni Adan ug Eva. (Salmo 37:10, 11) Pinasukad sa iyang giula nga dugo, si Jesus nagdala sa mga sala sa katawhan ngadto sa halayo, maingon nga ang buhing kanding sa simbolikong paagi nagdala sa mga sala sa Israel ngadto sa kamingawan.—Isaias 53:4, 5.

Pagmaya Atubangan ni Jehova

14, 15. Unsay nahitabo panahon sa Pista sa mga Balongbalong, ug unsay gipahinumdom niini ngadto sa mga Israelinhon?

¹⁴ Human sa Adlaw sa Pagtabon sa Sala, ang mga Israelinhon nagsaulog sa Pista sa mga Balongbalong, ang labing sadya nga pista sa  Hudiyohanong tuig. (Levitico 23:34-43) Ang maong pista gipahigayon sukad sa ika-15 hangtod sa ika-21 nga adlaw sa Etanim ug matapos pinaagig solemne nga panagkatigom sa ika-22 nga adlaw sa bulan. Dinhi natapos ang pagpanigom sa abot ug kini maoy panahon sa pagpasalamat sa dagayang pagkamaayo sa Diyos. Tungod niana, si Jehova nagsugo sa mga nagsaulog: “Si Jehova nga imong Diyos magpanalangin kanimo sa tanan nimong abot ug sa tanang buhat sa imong kamot, ug ikaw magmalipayon gayod.” (Deuteronomio 16:15) Pagkasadya gayod niadtong panahona!

¹⁵ Panahon sa maong pista, ang mga Israelinhon magpuyo sa mga balongbalong sulod sa pito ka adlaw. Sa ingon napahinumdoman sila nga dihay higayon nga sila nagpuyo sa mga balongbalong didto sa kamingawan. Ang pista naghatag kanilag daghang kahigayonan sa pagpalandong sa amahanong pag-atiman ni Jehova. (Deuteronomio 8:15, 16) Ug tungod kay ang tanan, adunahan ug kabos, nagpuyo sa susamang mga balongbalong, ang mga Israelinhon napahinumdoman nga nianang panahon sa pista, silang tanan managsama.—Nehemias 8:14-16.

16. Unsay gilandongan sa Pista sa mga Balongbalong?

¹⁶ Ang Pista sa mga Balongbalong maoy pista sa pag-ani, usa ka masadya nga pagsaulog sa pagpanigom sa ani, ug kini naglandong sa malipayong pagpanigom niadtong nagpasundayag ug pagtuo kang Jesu-Kristo. Ang pagpanigom nagsugod sa Pentekostes 33 K.P., sa dihang ang 120 ka tinun-an ni Jesus gidihogan aron mahimong bahin sa “usa ka balaang pagkasaserdote.” Maingon nga ang mga Israelinhon nagpuyo diha sa mga balongbalong sulod sa pipila ka adlaw, ang mga dinihogan nahibalo nga sila maoy “temporaryong mga pumoluyo” lamang niining dili-diyosnong kalibotan. Ang ilang paglaom maoy langitnon. (1 Pedro 2:5, 11) Ang maong pagpanigom sa dinihogang mga Kristohanon matapos niining “kataposang mga adlaw,” sa dihang gitigom ang kataposang mga membro sa 144,000.—2 Timoteo 3:1.

17, 18. (a) Unsay nagpaila nga ang uban gawas sa dinihogang mga Kristohanon makabenepisyo sa halad ni Jesus? (b) Kinsa karon ang nakabenepisyo sa mahulagwayong Pista sa mga Balongbalong, ug kanus-a modangat sa kinatayuktokan niini kanang masadya nga pista?

¹⁷ Takos tagdon nga panahon niining karaang  pista, 70 ka torong baka ang gihalad. (Numeros 29:12-34) Ang numerong 70 naghawas sa 7 nga gipilopilo sa 10, mga numero nga sa Bibliya naghawas sa langitnon ug yutan-ong kahingpitan. Busa, ang halad ni Jesus makabenepisyo sa mga matinumanon gikan sa 70 ka pamilya sa katawhan nga naggikan kang Noe. (Genesis 10:1-29) Nahiuyon niana, sa atong panahon ang pagpanigom mikaylap aron ilakip ang mga indibiduwal gikan sa tanang kanasoran nga nagpasundayag ug pagtuo kang Jesus ug adunay paglaom nga mabuhi sa paraisong yuta.

¹⁸ Nakita ni apostol Juan sa panan-awon kining modernong-adlaw nga pagpanigom. Una, iyang nadungog ang pagpahibalo sa pagtimbre sa kataposang mga membro sa 144,000. Dayon nakita niya ang “usa ka dakong panon, nga walay tawong makaihap,” nga nagbarog atubangan ni Jehova ug ni Jesus, nga “nanagdalag mga palwa sa palma diha sa ilang mga kamot.” Kini sila “ang nakalabang sa dakong kasakitan,” ngadto sa bag-ong kalibotan. Sila usab maoy temporaryong mga pumoluyo lamang niining daang sistema sa mga butang, ug sila masaligong nagpaabot sa panahon sa dihang “ang Kordero . . . magabantay kanila, ug magatultol kanila ngadto sa mga tuboran sa mga tubig sa kinabuhi.” Nianang panahona, “ang Diyos magapahid sa tanang luha gikan sa ilang mga mata.” (Pinadayag 7:1-10, 14-17) Ang mahulagwayong Pista sa mga Balongbalong modangat sa kinatayuktokan niini sa pagkatapos sa Usa ka Libo ka Tuig nga Pagmando ni Kristo sa dihang ang dakong panon, duyog sa matinumanong mga binanhaw, hatagan ug kinabuhing walay kataposan.—Pinadayag 20:5.

19. Sa unsang paagi makabenepisyo kita sa paghisgot sa mga pista nga gisaulog sa Israel?

¹⁹ Kita usab “magmalipayon gayod” samtang atong palandongon ang kahulogan sa karaang mga pista sa mga Hudiyo. Makalilipay ang pagpalandong nga si Jehova naghatag ug pasiunang kahayag kon sa unsang paagi matuman ang iyang tagna nga gibungat didto sa Eden, ug makapahinam ang pagkakita sa aktuwal nga katumanan niini nga anam-anam nga nagakahitabo. Sa pagkakaron, nahibalo kita nga ang Binhi mitungha ug nga siya gisamdan sa tikod. Karon siya usa na ka Hari sa langit. Dugang pa, kadaghanan sa 144,000 nakapamatuod na sa ilang pagkamatinumanon hangtod sa kamatayon. Unsa pa may buhaton? Sa unsang paagi ang tagna matuman sa bug-os? Hisgotan kini sa sunod nga artikulo.

[Mga footnote]

Makapatin-aw Ka Ba?

• Unsay gilandongan sa kordero sa Paskuwa?

• Unsang pagpanigom ang gilandongan sa Pista sa Pentekostes?

• Unsang mga bahin sa Adlaw sa Pagtabon sa Sala ang naglandong sa kapadapatan sa halad lukat ni Jesus?

• Sa unsang paagi ang pagpanigom sa mga Kristohanon gilandongan sa Pista sa mga Balongbalong?

[Mga Pangutana sa Pagtuon]

[Chart sa panid 22, 23]

(Alang sa aktuwal nga pagkahan-ay, tan-awa ang publikasyon)

Panghitabo: Gilandongan:

Paskuwa Nisan 14 Giihaw ang kordero Gihalad si Jesus

sa Paskuwa

Pista sa mga Nisan 15 Igpapahulay

Tinapay nga Walay

Igpapatubo Nisan 16 Gihalad ang sebada Gibanhaw si Jesus

(Nisan 15-21)

↑

50 ka adlaw

↓

Pista sa mga Duha ka Gitanyag ni Jesus

Semana Sivan 6 tinapay gihalad ang iyang dinihogang

(Pentekostes) mga igsoon ngadto

kang Jehova

Adlaw sa Tisri 10 Usa ka torong Gitanyag ni

Pagtabon sa Sala baka ug duha Jesus ang bili

ka kanding gihalad sa iyang dugo

alang sa tanang

katawhan

Pista sa mga Tisri 15-21 Ang mga Ang pagpanigom

Balongbalong Israelinhon sa mga dinihogan

(Pagpanigom, malipayong ug sa “dakong panon”

mga Tabernakulo) namuyo sa mga

balongbalong ug

nagmaya tungod sa

ani, 70 ka baka

ang gihalads

[Mga hulagway sa panid 21]

Sama sa dugo sa kordero sa Paskuwa, ang giula nga dugo ni Jesus nagtaganag kaluwasan alang sa daghan

[Mga hulagway sa panid 22]

Ang unang ani sa sebada nga gihalad sa Nisan 16 naglandong sa pagkabanhaw ni Jesus

[Mga hulagway sa panid 23]

Ang duha ka tinapay nga gihalad panahon sa Pentekostes naglandong sa kongregasyon sa dinihogang mga Kristohanon

[Mga hulagway sa panid 24]

Ang Pista sa mga Balongbalong naglandong sa malipayong pagpanigom sa mga dinihogan ug sa “dakong panon” gikan sa tanang kanasoran