Ikaw Makasagubang sa mga Kalisdanan

NIINING malisod nga mga panahon, daghan ang nagsagubang ug samag-bagyo nga mga kalisdanan. Apan alang sa mga Kristohanon, ang gugma alang sa Diyos ug ang pagkamaunongon sa iyang mga prinsipyo makatabang kanila sa pagsagubang. Sa unsang paagi? Ang tubag makaplagan diha sa ilustrasyon nga gihatag ni Jesu-Kristo. Iyang gitandi ang iyang masinugtanong mga tinun-an ngadto sa “usa ka tawong maalamon, nga nagtukod sa iyang balay ibabaw sa dakong-bato.” Si Jesus miingon: “Mibundak ang ulan ug mibul-og ang baha ug mihuros ang hangin ug mihapak nianang balaya, apan kini wala mahugno, kay kini gitukod man ibabaw sa dakong-bato.”—Mateo 7:24, 25.

Matikdi nga bisan tuod maalamon ang tawo diha sa ilustrasyon, siya nakasinati gihapon ug mga kalisdanan—nga gihawasan sa pagbundak sa ulan, pagbul-og sa baha, ug paghuros sa kusog nga hangin. Busa, wala ipasabot ni Jesus nga ang iyang mga tinun-an dili makasinati ug mga kalisdanan ug makatagamtam lang kanunay ug malinawon, haruhay nga kinabuhi. (Salmo 34:19; Santiago 4:13-15) Apan siya nag-ingon nga ang matinumanong mga alagad sa Diyos makapangandam ug makasagubang sa maong grabe nga mga kalisdanan.

Gisugdan ni Jesus ang ilustrasyon pinaagi sa pag-ingon: “Ang matag usa nga magapatalinghog niining akong mga pulong ug magabuhat niini mahisama sa usa ka tawong maalamon, nga nagtukod sa iyang balay ibabaw sa dakong-bato.” Siyempre, si Jesus naghisgot, dili bahin sa pagtukod ug literal nga mga balay, kondili sa pag-ugmad sa Kristohanong mga motibo ug mga buhat. Kadtong magpatalinghog sa mga pulong ni Kristo magpasundayag ug pagsabot ug maayong pagpanghukom. Ilang tukoron o ugmaron ang ilang mga motibo ug mga buhat diha sa solidong dakong-bato sa mga pagtulon-an ni Kristo pinaagi sa pagpadapat sa ilang nakat-onan. Makaiikag, kining mahulagwayong dakong-bato dili makita diha sa ibabaw sa yuta. Ang tawo diha sa ilustrasyon kinahanglang magkalot ug ‘lawom’ aron makuha kana. (Lucas 6:48) Sa samang paagi, ang mga tinun-an ni Jesus padayong nanglimbasog sa pag-ugmad sa dumalayong mga hiyas nga mas makapasuod kanila sa Diyos.—Mateo 5:5-7; 6:33.

Unsay mahitabo sa dihang ang samag-bagyo nga mga kalisdanan mosulay sa integridad sa Kristohanong pundasyon sa mga sumusunod ni Jesus? Ang ilang kinabubut-ong pagtuman sa mga pagtulon-an ni Kristo ug ang ilang Kristohanong mga hiyas mapamatud-an nga tuboran sa kalig-on panahon sa mga kalisdanan ug, labaw sa tanan, panahon sa nagsingabot nga bagyo sa Armagedon. (Mateo 5:10-12; Pinadayag 16:15, 16) Oo, pinaagi sa pagtuman sa mga pagtulon-an ni Kristo, daghan ang malamposong nakasagubang sa samag-bagyo nga mga pagsulay. Ikaw makasagubang usab.—1 Pedro 2:21-23.