Imo Bang Mapasangkad ang Imong Gugma?

ANG kadena nga naghawid sa angkla sa usa ka barko kinahanglang lig-ong makasugakod sa gamhanang mga puwersa aron dili maanod ang barko. Apan, posible lamang kini kon lig-on ang mga kutay sa kadena. Kay kon dili, mabugto ang kadena.

Ingon usab niana ang ikaingon bahin sa Kristohanong kongregasyon. Aron ang usa ka kongregasyon mahimong lig-on ug himsog, ang tagsatagsa ka membro niini kinahanglang magkahiusa. Unsa bay magpahiusa kanila? Ang gugma, nga mao ang kinalig-onang bugkos sa panaghiusa. Walay duhaduha nga giingnan ni Jesu-Kristo ang iyang mga tinun-an: “Ako magahatag kaninyog bag-ong sugo, nga kamo maghigugmaay sa usag usa; ingon sa akong paghigugma kaninyo, nga kamo usab maghigugmaay sa usag usa. Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.” Sa pagkatinuod, ang matuod nga mga Kristohanon adunay matang sa gugma nga labaw pa kay sa yanong panaghigalaay ug pagtahod sa usag usa. Ilang giugmad ang gugma nga nagasakripisyo sa kaugalingon.—Juan 13:34, 35.

Pagpabili sa Atong mga Isigkamagtutuo

Daghang kongregasyon ang gilangkoban ug mga tawo nga lainlaig pangedaron, rasa, nasyonalidad, kultura, pinulongan, ug kagikan. Ang matag membro lainlaig mga gusto ug dili gusto, mga gilaoman ug gikabalak-an, ug kasagaran ang matag usa adunay kaugalingong problema nga gisagubang—tingali dili-maayong panglawas o kalisod sa panalapi. Kini nga kalainan mahimong makababag sa Kristohanong panaghiusa. Nan, unsay makatabang kanato sa pagpasangkad sa atong gugma ug sa pagpabiling nahiusa bisan pa sa mga suliran? Ang tiunay nga pagpabili alang sa tanan diha sa kongregasyon motabang kanato sa pagpalalom pa sa atong gugma alang sa usag usa.

Apan, unsay kahulogan sa pagpabili sa usa ka tawo? Sumala sa The New Shorter Oxford English Dictionary, ang pulong “pagpabili” nagkahulogan nga “magmahunahunaon; maayo ug pagtamod; pag-ila ingong bililhon o hamili; magmapasalamaton.” Kon atong gipabilhan ang atong mga isigkamagtutuo, kita mahunahunaon sa ilang mga panginahanglan, maayo ang atong pagtamod kanila, ato silang gipakahamili, ug kita mapasalamaton nga sila miduyog kanato sa pagsimba. Tungod niana, kita mahigugma pag-ayo kanila. Ang mubo nga paghisgot sa gisulat ni apostol Pablo ngadto sa unang-siglong mga Kristohanon sa Corinto motabang kanato sa pagsabot kon sa unsang paagi kita makapasundayag ug Kristohanong gugma sa bug-os nga maarangan.

“Hagip-ot ug Luna” ang mga Taga-Corinto

Gisulat ni Pablo ang iyang unang sulat ngadto sa mga taga-Corinto sa 55 K.P. ug ang iyang ikaduhang sulat mga usa ka tuig pagkahuman sa unang sulat. Gipaila sa iyang mga komento nga ang pipila diha sa kongregasyon sa Corinto wala kaayo magpabili sa ilang mga isigkamagtutuo. Gihubit ni Pablo ang kahimtang niining mga pulonga: “Ang among baba gibuka nganha kaninyo, mga taga-Corinto, ang among mga kasingkasing gipasangkad. Kamo dili hagip-ot ug luna sulod kanamo, kondili kamo hagip-ot ug luna diha sa inyong malumong mga pagmahal.” (2 Corinto 6:11, 12) Unsay gipasabot ni Pablo sa iyang paghubit kanila ingong “hagip-ot ug luna”?

Ang iyang gipasabot mao nga sila mapihigon ug  dili mahigugmaon. Usa ka eskolar sa Bibliya nag-ingon nga ang gugma sa mga taga-Corinto alang kang Pablo “gibabagan sa malisod nga mga kahimtang tungod sa walay-pasikaranang mga pagduda . . . ug natandog nga garbo.”

Matikdi ang gitambag ni Pablo: “Agig balos—ako mosulti sama ug ngadto sa mga anak—kamo, usab, magpasangkad.” (2 Corinto 6:13) Gidasig ni Pablo ang mga taga-Corinto nga magpasangkad sa ilang gugma ngadto sa ilang mga isigkamagtutuo. Kini nagkahulogan nga sila mapalihok, dili sa kawalay-pagsalig ug ginagmayng mga kabingkilan, kondili sa positibong tinamdan ug pagkamahigugmaon.

Pagpasangkad sa Atong Gugma Karon

Makapalipay gayod ang pagkakita sa matuod nga mga magsisimba sa Diyos karon nga naningkamot gayod sa pagpasangkad sa ilang gugma alang sa usag usa. Tinuod, ang pagpasangkad nanginahanglag paningkamot. Kini dili kay basta pagkasayod lang kon unsay angayng buhaton. Ang pagpasangkad nagpasabot nga kita molihok nga lahi gikan sa mga tawo nga wala magkinabuhi subay sa mga sukdanan sa Bibliya. Ang maong mga tawo kasagarang wala kaayo magpabili sa uban. Sila mahimong walay pagtagad, dili matinahoron, ug mabiaybiayon. Busa, dili gayod nato tugotan ang atong kaugalingon nga maimpluwensiyahan niini nga mga tinamdan. Pagkamakapasubo kon ang atong gugma mababagan sa pagbati sa kawalay-pagsalig, sama sa mga taga-Corinto! Kini mahimong mahitabo kon kita himantayon sa kasaypanan sa usa ka Kristohanong igsoon apan dili kaayo magmatikod sa iyang maayong mga hiyas. Kini mahimong mahitabo usab kon kita hagip-ot ug luna diha sa atong mga pagbati tungod kay ang usa naggikan sa laing kultura.

Sa kasukwahi, ang usa ka alagad sa Diyos nga nagpasangkad sa iyang gugma adunay tinuod nga pagpabili sa iyang mga isigkamagtutuo. Siya adunay dakong pagtamod kanila, nagtahod sa ilang dignidad, ug mahunahunaon sa ilang mga panginahanglan.  Bisan pag adunay tinuod nga katarongan sa pagreklamo, siya andam sa pagpasaylo ug dili gayod magdumot. Hinunoa, siya masaligon nga ang iyang mga isigkamagtutuo walay daotang motibo. Ang pagkamahigugmaon motabang kaniya sa pagpakita sa matang sa gugma nga anaa sa hunahuna ni Jesus sa dihang siya mitagna: “Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.”—Juan 13:35.

Paningkamoti nga Makabaton ug Bag-ong mga Higala

Ang kinasingkasing nga gugma magpalihok kanato sa pagpaningkamot nga makabaton ug dugang pang mga higala ug makig-uban sa atong mga kakongregasyon nga dili nato kanunayng ikauban. Kinsa man kining mga tawhana? Ang pipila sa atong Kristohanong mga igsoon lagmit maulawon, ug diyutay rag higala. Tingali sa sinugdan kita mobati nga kita ug ang maong mga igsoon managlahi ug mga hilig, nga nagkauyon lamang diha sa pagsimba. Apan dili ba ang pipila sa suod nga mga managhigala diha sa Bibliya maoy mga tawo nga, sa atong tan-aw, dili sama ug mga hilig?

Pananglitan, si Ruth ug Naomi dili sama ug pangedaron, nasyonalidad ug kultura, ug managlahi pa ug pinulongan. Bisan pa niana, ang ilang panaghigalaay wala maapektohi sa maong mga kalainan. Si Jonatan gipadako nga usa ka prinsipe, ug si David ingong usa ka magbalantay sa karnero. Dakog diperensiya ang ilang pangedaron, apan ang ilang panaghigalaay maoy usa sa labing suod nga panaghigalaay nga gihisgotan diha sa Balaang Kasulatan. Ang maong mga panaghigalaay maoy usa ka tuboran sa kalipay ug espirituwal nga kalig-on sa matag usa kanila.—Ruth 1:16; 4:15; 1 Samuel 18:3; 2 Samuel 1:26.

Bisan karon, ang suod nga mga panaghigalaay maugmad taliwala sa matuod nga mga Kristohanon nga lainlaig pangedaron o mga kahimtang sa kinabuhi. Pananglitan, si Regina maoy usa ka nag-inusarang inahan nga may duha ka tin-edyer nga mga anak. a Siya adunay puliking eskedyul ug wala kaayoy panahon sa paglingawlingaw. Si Harald ug Ute maoy retiradong magtiayon nga walay mga anak. Sa atong tan-aw, kining duha ka pamilya morag dili sama ug hilig. Apan gipadapat ni Harald ug Ute ang tambag sa Bibliya nga magpasangkad. Sila naningkamot nga iapil si Regina ug ang iyang mga anak diha sa daghang kalihokan, nga nakig-uban kanila sa pagsangyaw ug nagpahimulos sa pipila ka lingawlingaw.

Kita ba makapasangkad pinaagig pagbaton ug dugang pang mga higala? Nganong dili makighigala sa mga isigkamagtutuo nga lahi ug nasyonalidad, kultura, ug pangedaron?

Mahunahunaon sa mga Panginahanglan sa Uban

Ang pagkamahigugmaon mopalihok kanato nga magmahunahunaon sa mga panginahanglan sa uban. Unsa kana nga mga panginahanglan? Aw, susiha ang mga membro sa Kristohanong kongregasyon. Ang mga batan-on nanginahanglag giya, ang mga tigulang nanginahanglag pagdasig, ang mga bug-os-panahong ministro nanginahanglag pagdayeg ug pagpaluyo, ug ang mga isigkamagtutuo nga nagmasulub-on nanginahanglag kasumbongan nga andam sa pagpamati. Ang matag usa adunay mga panginahanglan. Gusto kitang makatabang sa ilang mga panginahanglan kutob sa atong maarangan.

Ang pagpasangkad nagkahulogan usab nga kita magmasinaboton niadtong may linaing mga panginahanglan. Aduna ka bay kaila nga may grabeng sakit o nag-atubang ug usa ka matang sa pagsulay sa kinabuhi? Ang pagpasangkad sa gugma ug pag-ugmad sa malulotong kasingkasing motabang kanimo nga magmasinaboton ug magmapaluyohon niadtong mga nanginahanglan.

Samtang nagakatuman ang mga tagna sa Bibliya alang sa duol nang umaabot, ang lig-ong mga bugkos sa panaghiusa taliwala sa kongregasyon mas bililhon gayod kay sa mga kabtangan, katakos, o kalamposan. (1 Pedro 4:7, 8) Ang matag usa kanato personal nga makaamot sa pagpalig-on sa mga bugkos sa panaghiusa sa atong kaugalingong kongregasyon pinaagi sa pagpasangkad sa atong gugma ngadto sa atong mga isigkamagtutuo. Kita makasalig nga dagayang panalanginan ni Jehova ang atong paglihok nga kaharmonya sa mga pulong sa iyang Anak, si Jesu-Kristo, kinsa miingon: “Mao kini ang akong sugo, nga maghigugmaay kamo sa usag usa ingon sa akong paghigugma kaninyo.”—Juan 15:12.

[Footnote]

[Blurb sa panid 10]

Ang pagpabili sa atong mga igsoon nagkahulogan nga kita adunay maayong pagtamod kanilang tanan, nagtahod sa ilang dignidad, ug mahunahunaon sa ilang mga panginahanglan