Kalamposan—Unsaon Nimo Pagsukod Kini?

SI Jesse Livermore gibantog sa paghimog maalamong mga desisyon sa negosyo, ug siya giisip sa pipila ingon nga labing malamposong stock trader sa Wall Street sa tanang panahon. Tungod niini, siya nakatigom ug dakong bahandi. Siya nagsul-ob ug kinanindotang mga amerkana nga gipatuyo ug tahi, nagpuyo sa mansiyon nga may 29 ka lawak, ug nagsakay sa itom nga Rolls-Royce nga may sinuholang drayber.

Si David a determinado usab nga magmalamposon. Ingong bise presidente ug heneral nga manedyer sa usa ka dakong kompaniya sa graphics, siya may purohan nga mahimong presidente sa usa ka dibisyon sa kompaniya. Ang bahandi ug kabantog nakadani kaniya. Ugaling lang, si David midesisyon sa pagretiro. “Ako nahibalo nga dili na gayod ako makabaton pag-usab ug dakog-kita nga posisyon sa pagka-ehekutibo,” si David miingon. Sa imong hunahuna sayop kaha ang desisyon ni David?

Daghang tawo nagtuo nga ang kalamposan nalangkit sa pagbaton ug bahandi, pabor, o pagkainila. Apan, kadtong nangadato mahimong mobati gihapon ug kahaw-ang ug pagkawalay-kahulogan ug pagkawalay-katuyoan sa kinabuhi. Mao kanay kahimtang ni G. Livermore. Bisan pa sa iyang bahandi, siya nagkinabuhi nga puno sa kasakit, kalisdanan, ug kaguol. Siya nakaagom ug depresyon, napakyas nga mga kaminyoon, ug dili suod nga relasyon sa iyang mga anak nga lalaki. Sa kataposan, human mawala ang dakong bahin sa iyang katigayonan, usa ka adlaw niana si G. Livermore milingkod sa bar sa usa ka mahalon nga hotel ug mimulo sa iyang kapildihan. Miorder siyag bino, mikuha sa iyang notbok nga kinoberan ug panit, ug misulat ug panamilit sa iyang asawa. Human niyag inom,  miadto siya sa usa ka ngitngit nga kuwarto ug nagpakamatay.

Bisan pag ang mga hinungdan sa iyang pagpakamatay dayag nga komplikado, kining hitaboa nagpamatuod nga husto ang giingon sa Bibliya: “Sila nga determinadong madato . . . nagtusaktusak sa ilang kaugalingon sa daghang kasakitan.”—1 Timoteo 6:9, 10.

Dili ba kaha nga kadtong nagsukod sa kalamposan pinaagi sa bahandi, posisyon, o kabantog naggamit ug sayop nga sukdanan? Giisip ba nimo ang imong kaugalingon nga malamposon? Nganong giisip nimo ang imong kaugalingon nga ingon niana? Unsang sukdanan ang imong gigamit sa pagtino niana? Unsay nakaimpluwensiya sa imong panglantaw sa kalamposan? Ang mosunod nga artikulo magsusi sa usa ka epektibong tambag nga nakatabang sa milyonmilyong tawo sa pagkab-ot sa kalamposan. Atong susihon kon sa unsang paagi ikaw magmalamposon usab.

[Footnote]