Kon Unsaon nga Ikaw Magmalamposon
Kon Unsaon nga Ikaw Magmalamposon
SAMA nga ang mga ginikanan nag-atiman sa ilang mga anak ug buot nga sila molampos, sa ingon ang atong langitnong Amahan nag-atiman usab kanato ug buot nga kita molampos. Aron ipakita ang iyang malulotong pag-atiman, siya naghatag kanatog daghang impormasyon bahin sa kalamposan ug kapakyasan. Ngani, sa naghisgot bahin sa usa ka tawo nga magpatalinghog sa gisulti sa Diyos, ang Bibliya masaligong nag-ingon: “Ang tanan nga ginabuhat niya magmalamposon.”—Salmo 1:3.
Apan, kon mao kana, nganong wala man mabatoni sa daghang tawo ang malamposon, malipayon, ug makapatagbaw nga kinabuhi? Ang pagsusi niining maong salmo maghatag kanatog tubag ug magpakita kanato kon unsaon nga kita magmalamposon usab.
“Tambag sa mga Daotan”
Ang salmista nagpasidaan bahin sa kapeligrohan sa pagpamati “sa tambag sa mga daotan.” (Salmo 1:1) Ang numero unong “daotan” mao si Satanas nga Yawa. (Mateo 6:13) Ang Kasulatan nagsugilon kanato nga siya ang “magmamando niining kalibotana” ug nga “ang tibuok kalibotan nailalom sa gahom sa usa nga daotan.” (Juan 16:11; 1 Juan 5:19) Busa, dili ikatingala nga ang kadaghanang tambag nga imong madungog sa kalibotan nagbanaag sa panghunahuna ni Satanas.
Unsang matanga sa tambag ang ginatanyag sa mga daotan? Sa katibuk-an, ang mga daotan wala magtahod sa Diyos. (Salmo 10:13) Ang ilang tambag, nga nagsalikway o wala magtahod sa Diyos, kaylap kaayo. Gipalambo sa modernong katilingban ang “tinguha sa unod ug ang tinguha sa mga mata ug ang mapagawalong pagpasundayag sa mga kahinguhaan sa kinabuhi sa usa.” (1 Juan 2:16) Ang media nagpasiugda kanunay sa pilosopiya nga “pahimusli pag-ayo ang imong kinabuhi.” Sa tibuok kalibotan ang mga kompaniya naggasto ug kapin sa 500 bilyones dolyares (U.S.) sa usa ka tuig sa panganunsiyo aron sa pagdani sa mga tawo sa pagpalit sa ilang mga produkto—nagkinahanglan man niana ang mga mamalitay o wala. Ug kini nga propaganda nakapausab dili lamang sa mga batasan sa mga tawo sa pagpamalit. Gidaot usab niini ang panglantaw sa mga tawo kon unsay ipasabot sa kalamposan.
Tungod niini, bisan tuod nabatonan na sa daghan ang mga butang nga katuigan kanhi ila lamang gipangandoy, wala gihapon matagbaw ang ilang kauhaw sa pagbatog dugang materyal. Sila nagtuo nga gawas kon ikaw makabaton niining mga butanga, ikaw dili magmalipayon o magmalamposon. Kining hunahunaa bakak ug “wala magagikan sa Amahan, apan nagagikan sa kalibotan.”—1 Juan 2:16.
Ang atong Maglalalang nahibalo kon unsay makapahimo kanatong tinuod nga malamposon. Ang iyang tambag lahi sa “tambag sa mga daotan.” Busa, ang pagsulay sa pagbaton sa pag-uyon sa Diyos samtang nagalakaw diha sa dalan sa kalibotan ngadto sa kalamposan nahisama ra sa pagsulay sa paglakaw diha sa duha ka lahi nga dalan sa samang panahon. Dili gayod kana mahimo. Dili ikatingala nga ang Bibliya nagpasidaan: “Ayaw gayod pagpahiuyon sa mga sukdanan niining kalibotana”!—Roma 12:2, Today’s English Version.
Ayaw Pagpaumol sa Kalibotan
Ang kalibotan nga impluwensiyado ni Satanas naningkamot sa pagpakita nga kini daw interesado sa atong kaayohan. Apan kita angayng magbantay. Hinumdomi nga si Satanas mahakogong naglimbong sa unang babaye, si Eva, alang sa iyang kaugalingong mga tumong. Dayon iyang gigamit si Eva aron agakon ang iyang bana sa pagpakasala. Karon, si Satanas naggamit usab ug mga tawo sa pagpasa sa iyang daotang tambag.
Pananglitan, si David, nga gihisgotan sa unang artikulo, gidahom nga mag-obertaym ug kanunayng mobiyahe tungod sa negosyo. “Mobiya akog sayo sa Lunes sa buntag ug mobalik sa Huwebes sa gabii,” si David miingon. Kay nagtuo nga ang maong mga sakripisyo gikinahanglan aron mabatonan ang kalibotanong kalamposan, ang sinserong mga higala, mga membro sa pamilya, ug mga kauban sa trabaho nagdasig kang David: “Buhata kana alang sa imong pamilya.” Sila nangatarongan nga buhaton niya kana sulod ra sa pipila ka tuig hangtod nga siya maestablisar. Si David misaysay: “Kini makaayo kono sa akong pamilya kay sila akong madad-an ug daghang kuwarta—ako magmalamposon pa gayod. Ang akong mga higala nagpatuo kanako nga mas dako kono ang akong ginahatag sa akong pamilya bisag dili nako sila kanunayng makauban.” Sama kang David, daghan ang naghago sa paghatag sa ilang pamilya sa tanang butang nga sa ilang hunahuna gikinahanglan sa ilang mga minahal sa kinabuhi. Apan ang pagsunod ba sa maong tambag mosangpot sa kalamposan? Unsa man gayoy gikinahanglan sa usa ka pamilya?
Nahibaloan kini ni David sa dihang didto siya sa layo tungod sa negosyo. “Nakig-estorya kanako ang akong anak babaye nga si Angelica diha sa telepono, nga miingon: ‘Pa, nganong di ka man gustong magpuyo sa balay uban namo?’ Makapaguol kadto,” matod pa ni David. Ang gisulti sa iyang anak nakapalig-on sa iyang tinguha sa pagretiro. Si David nakahukom sa paghatag sa iyang pamilya sa tinuod nilang gikinahanglan—siya.
Ang Pagpadapat sa Tambag sa Diyos Motultol sa Kalamposan
Unsaon man nimo pag-atubang ang makapahisalaag nga propaganda nga kaylap niining kalibotana? Ang salmista nagsulti kanato nga ang malamposon ug malipayong tawo mao ang usa nga “ang iyang kalipay anaa sa balaod ni Jehova, ug sa iyang balaod siya nagabasa sa hinayng tingog sa adlaw ug gabii.”—Salmo 1:2.
Sa dihang ang Diyos nagtudlo kang Josue ingon nga lider sa nasod sa Israel, siya gisultihan: “Sa hinayng tingog kinahanglang magbasa ka [sa Pulong sa Diyos] adlaw ug gabii.” Oo, ang pagbasa ug pagpamalandong sa Pulong sa Diyos gikinahanglan, apan kinahanglan usab nga si Josue “mag-amping sa pagbuhat sumala sa tanang nahisulat niini.” Siyempre, ang pagbasa sa Bibliya dili awtomatikong magpahimo kanimong malamposon. Kinahanglan nimong ipadapat ang imong mabasa. Si Josue giingnan: “Sa ingon magmalamposon ka sa imong dalan ug sa ingon molihok ka nga maalamon.”—Josue 1:8.
Handurawa ang usa ka mapahiyomong bata nga nagpasabak sa iyang mahigugmaong ginikanan samtang ilang gibasa ang usa ka paboritong sugilanon. Bisag makadaghan na nila kining nabasa kaniadto, ila gihapong gipabilhan ang maong bililhong mga gutlo. Sa samang paagi, ang tawong nahigugma sa Diyos makakaplag nga ang adlaw-adlaw nga pagbasa sa Bibliya maoy usa ka makapalipay nga kasinatian—usa ka maayong panahon nga gigugol uban sa iyang langitnong Amahan. Pinaagi sa pagsunod sa tambag ug paggiya ni Jehova, ang maong tawo “mahisama gayod sa usa ka kahoy nga natanom sa daplin sa kasapaan sa tubig, nga mobunga sa iyang panahon ug ang iyang mga dahon dili malaya, ug ang tanan nga ginabuhat niya magmalamposon.”—Salmo 1:3.
Ang kahoy nga gihubit sa salmista wala motubo ug iya. Kadto maampingong gitanom duol sa agosanan sa tubig ug giatiman sa mag-uuma. Sa samang paagi, ang atong langitnong Amahan magpasibo ug magtul-id sa atong panghunahuna pinaagi sa tambag nga makaplagan sa Kasulatan. Ingong resulta, kita molambo ug magpatunghag diyosnong mga hiyas.
Apan, “dili ingon niana ang daotan.” Tinuod, sila molambo tingali sa makadiyot, apan sa kataposan daotan ang ilang dangatan. Sila ‘dili makabarog sa paghukom.’ Hinunoa, “ang dalan sa mga daotan mahanaw.”—Salmo 1:4-6.
Busa ayaw ipaumol sa kalibotan ang imong mga tumong ug mga prinsipyo. Bisan pag ikaw tingali abilidaran ug may purohan nga molampos niining kalibotana, pagbantay kon unsaon nimo paggamit ang imong mga abilidad o kon giunsa nimo pagpagamit niini sa kalibotan. Ang walay pulos, materyalistikong mga pangagpas ‘makapalaya’ sa usa ka tawo. Sa laing bahin, ang pagbaton ug maayong relasyon uban sa Diyos moresulta sa tinuod nga kalamposan ug kalipay.
Kon Unsaon nga Ikaw Magmalamposon
Kon sundon sa usa ka tawo ang tambag sa Diyos, nganong molampos man ang tanan niyang ginabuhat? Ang salmista wala maghisgot bahin sa kalamposan niining kalibotana. Ang kalamposan sa usa ka diyosnong tawo nalangkit sa iyang pagbuhat sa kabubut-on sa Diyos—ug ang kabubut-on sa Diyos malamposon kanunay. Atong susihon kon sa unsang paagi ang pagpadapat sa mga prinsipyo sa Bibliya makapahimo kanimong malamposon.
Pamilya: Ang Kasulatan nagtambag sa mga bana nga “maghigugma sa ilang mga asawa sama sa ilang kaugalingong mga lawas,” ug ang Kristohanong asawa gisugo nga magpakitag “halawom nga pagtahod sa iyang bana.” (Efeso 5:28, 33) Ang mga ginikanan gidasig sa paggugol ug panahon uban sa ilang mga anak, pagkinataw-anay uban kanila, ug sa pagtudlo kanila sa mahinungdanong mga butang sa kinabuhi. (Deuteronomio 6:6, 7; Ecclesiastes 3:4) Ang Pulong sa Diyos nagtambag usab sa mga ginikanan: “Ayaw palagota ang inyong mga anak.” Kon kining tambaga ipadapat, sayon alang sa mga anak nga “magmasinugtanon sa [ilang] mga ginikanan” ug sa ‘pagpasidungog sa ilang amahan ug sa ilang inahan.’ (Efeso 6:1-4) Ang pagsunod niining maong tambag sa Diyos motultol sa usa ka malamposon nga pamilyahanong kinabuhi.
Mga higala: Ang kadaghanang tawo gustog mga higala. Kita adunay mental ug emosyonal nga kapasidad nga mahigugma ug pagahigugmaon. Giingnan ni Jesus ang iyang mga sumusunod nga sila angayng “maghigugmaay sa usag usa.” (Juan 13:34, 35) Sa ilang taliwala, atong makaplagan ang mga higala nga atong mahigugma ug masaligan—nga kasumbongan bisan gani sa atong gihambin nga mga hunahuna ug mga pagbati. (Proverbio 18:24) Labaw sa tanan, pinaagi sa pagpadapat sa mga prinsipyo sa Bibliya, kita masuod sa Diyos ug sama kang Abraham, kita matawag pa gani nga “higala ni Jehova.”—Santiago 2:23; 4:8.
Katuyoan sa Kinabuhi: Inay magkinabuhi nga walay tumong kada adlaw, kadtong tinuod nga malamposon makakaplag ug kahulogan ug katuyoan sa ilang kinabuhi. Ang ilang kinabuhi wala ipasukad sa walay-kasegurohang mga kahimtang niining sistemaha sa mga butang. Ang ilang mga tumong motultol sa matuod ug dumalayong katagbawan, kay kini nasentro sa tinuod nga katuyoan sa kinabuhi. Unsay makahatag sa usa ka tawo ug katuyoan sa kinabuhi? “Kahadloki ang matuod nga Diyos ug tumana ang iyang mga sugo. Kay kini mao ang tibuok nga obligasyon sa tawo.”—Ecclesiastes 12:13.
Paglaom: Ang pagpakighigala sa Diyos maghatag usab kanatog paglaom alang sa umaabot. Si apostol Pablo nag-awhag sa mga Kristohanon nga “magbutang sa ilang paglaom, dili sa walay-kasegurohang bahandi, kondili sa Diyos.” Niining paagiha, sila “maampingong magtipig alang sa ilang kaugalingon ug usa ka maayong patukoranan alang sa umalabot, aron sila makapangupot pag-ayo sa tinuod nga kinabuhi.” (1 Timoteo 6:17-19) Kining tinuod nga kinabuhi moabot sa dili madugay sa dihang ang langitnong Gingharian sa Diyos magpasig-uli sa Paraiso dinhi sa yuta.—Lucas 23:43.
Bisan pag imong ipadapat ang mga prinsipyo sa Bibliya, ikaw dili makalingkawas sa mga suliran, apan ikaw makalikay sa daghang kasakit ug kaguol nga ipahinabo sa mga daotan sa ilang kaugalingon. Si David nga gihisgotan ganina, ug ang milyonmilyong sama kaniya nakakat-on sa kaayohan sa pagpadapat sa mga prinsipyo sa Bibliya sa ilang kinabuhi. Human makakaplag ug trabaho nga may maayong eskedyul, si David miingon: “Ako mapasalamaton sa akong relasyon uban sa akong asawa ug mga anak ug sa pribilehiyo sa pag-alagad kang Jehova nga Diyos ingon nga ansiyano sa kongregasyon.” Dili ikatingala nga ang salmo nag-ingon bahin sa tawo nga magpatalinghog sa tambag sa Diyos: “Ang tanan nga ginabuhat niya magmalamposon”!
[Chart sa panid 6]
LIMA KA PAAGI ARON MAGMALAMPOSON
1 Ayaw pagpaumol sa mga prinsipyo niining kalibotana.
2 Basaha ug palandonga ang Pulong sa Diyos kada adlaw.
3 Ipadapat ang tambag sa Bibliya sa imong kinabuhi.
4 Pakighigala sa Diyos.
5 Kahadloki ang matuod nga Diyos, ug tumana ang iyang mga sugo.
[Mga hulagway sa panid 7]
Ginasunod ba nimo ang mga paagi aron magmalamposon?