Itudlo Kon Unsay Tinuod nga Gitudlo sa Bibliya
Itudlo Kon Unsay Tinuod nga Gitudlo sa Bibliya
“Paghimog mga tinun-an sa katawhan sa tanang kanasoran, . . . nga magatudlo kanila.”—MATEO 28:19, 20.
1. Unsa ka daghang katawhan ang nakabaton sa Bibliya diha sa ilang kaugalingong pinulongan?
ANG Pulong ni Jehova, ang Balaang Bibliya, maoy usa sa labing karaan ug labing kaylap nga napanagtag nga mga basahon sa tibuok kalibotan. Nahubad na sa kapin ug 2,300 ka pinulongan ang labing menos usa ka bahin niini. Kapin sa 90 porsiyento sa katawhan sa yuta nakabaton sa Bibliya diha sa ilang kaugalingong pinulongan.
2, 3. (a) Nganong adunay kalibog bahin sa mga pagtulon-an sa Bibliya? (b) Unsang mga pangutana ang atong hisgotan?
2 Ang milyonmilyong tawo nagbasa sa usa ka bahin sa Bibliya kada adlaw. Ang pipila nakabasa nag daghang beses sa katibuk-an niini. Ang linibong relihiyosong grupo nangangkon nga ilang gipasukad sa Bibliya ang ilang mga pagtulon-an, apan wala sila magkauyon bahin sa gitudlo niini. Ang grabeng mga panagsumpaki tali sa mga membro sa samang relihiyon nakapasamot sa kalibog. Ang pipila may mga pagduhaduha bahin sa Bibliya, sa sinugdanan, ug sa kahinungdanon niini. Giisip sa daghan nga kini sagradong basahon nga gamiton lamang sa seremonyas alang sa mga pagpanaad o sa pagpanumpa nga mosulti lamang sa tinuod diha sa hukmanan.
3 Sa pagkatinuod, ang Bibliya nasudlan sa puwersadong pulong o mensahe sa Diyos alang sa katawhan. (Hebreohanon 4:12) Ingon nga mga Saksi ni Jehova, buot gayod nato nga ang mga tawo mahibalo kon unsay gitudlo sa Bibliya. Malipayon natong ginatuman ang buluhaton nga gihatag ni Jesu-Kristo sa iyang mga sumusunod sa dihang siya miingon: “Panglakaw kamo ug paghimog mga tinun-an sa katawhan sa tanang kanasoran, . . . nga magatudlo kanila.” (Mateo 28:19, 20) Sa atong publikong pagsangyaw, atong makaplagan ang mga tawo nga adunay matinud-anong kasingkasing nga nabalaka tungod sa relihiyosong kalibog nga kaylap sa kalibotan. Buot nilang masayran ang kamatuoran bahin sa atong Maglalalang ug nagtinguha sila nga makat-onan kon unsay gisulti sa Bibliya bahin sa kahulogan sa kinabuhi. Atong hisgotan ang tulo ka pangutana nga mahinungdanon sa daghang tawo. Sa matag kahimtang, atong tagdon kon unsay sayop nga gisulti sa relihiyosong mga pangulo, ug unya atong repasohon kon unsay tinuod nga gitudlo sa Bibliya. Ang mga pangutana mao: (1) May pagtagad ba ang Diyos kanato? (2) Nganong ania kita sa yuta? (3) Unsay mahitabo kanato sa dihang mamatay kita?
May Pagtagad ba ang Diyos?
4, 5. Nganong ang mga tawo naghunahuna nga ang Diyos walay pagtagad kanato?
4 Sugdan nato ang panaghisgot sa pangutana nga, May pagtagad ba ang Diyos kanato? Ikasubo, daghang tawo ang naghunahuna nga ang tubag maoy wala. Nganong kana ang ilang pagbati? Ang usa ka katarongan mao nga sila nagkinabuhi sa kalibotan nga napunog pagdumot, gubat, ug pag-antos. ‘Kon tinuod nga may pagtagad ang Diyos,’ sila nangatarongan, ‘iya gayod untang pugngan nga mahitabo ang maong mga trahedya.’
5 Ang laing katarongan kon nganong naghunahuna ang mga tawo nga ang Diyos walay pagtagad kanato mao nga kanay gipatuo kanila sa mga klerigo. Unsay kasagarang isulti sa mga klerigo kon may mahitabong trahedya? Sa dihang ang usa ka babaye namatyan sa iyang duha ka bata tungod sa aksidente sa kotse, ang iyang ministro miingon: “Pagbuot kadto sa Diyos. Ang Diyos nagkinahanglag duha pa ka anghel.” Sa dihang ang mga klerigo mosulti sa ingon niana, ilang gibasol gayod ang Diyos sa daotang mga panghitabo. Apan ang tinun-ang si Santiago misulat: “Sa dihang pagasulayon, dili siya angay moingon: ‘Ako gisulayan sa Diyos.’ Kay ang Diyos dili masulayan sa daotang mga butang ni siya mosulay kang bisan kinsa.” (Santiago 1:13) Si Jehova nga Diyos dili gayod magpahinabo ug daotang butang. Sa pagkatinuod, “halayo ra sa matuod nga Diyos nga mobuhat sa pagkadaotan.”—Job 34:10.
6. Kinsay hinungdan sa pagkadaotan ug pag-antos niining kalibotana?
6 Nan, nganong adunay hilabihang pagkadaotan ug pag-antos? Ang usa ka hinungdan mao nga gisalikway sa kadaghanang tawo ang Diyos ingong Magmamando, nga dili gustong magpasakop sa iyang matarong nga mga balaod ug mga prinsipyo. Ang mga tawo, nga wala mahibalo niana, nagpasakop sa Kaaway sa Diyos, si Satanas, kay “ang tibuok kalibotan nailalom sa gahom sa usa nga daotan.” (1 Juan 5:19) Kini nga kamatuoran motabang kanato nga mas masabtan kon nganong naglungtad ang daotang mga kahimtang. Si Satanas daotan, napunog pagdumot, maglilimbong, ug mapintas. Busa angay natong dahomon nga ang kalibotan magpasundayag sa personalidad sa magmamando niini. Dili katingad-an nga adunay hilabihang pagkadaotan!
7. Unsay pipila ka hinungdan sa pag-antos nga atong naagoman?
7 Ang pagkadili-hingpit sa tawo maoy laing hinungdan sa pag-antos nga atong naagoman. Ang makasasalang mga tawo lagmit manlimbasog nga gamhan ang uban, ug kana kasagarang moresulta sa mga gubat, pagpanglupig, ug pag-antos. Ang Ecclesiastes 8:9 haom nga nag-ingon: “Ang tawo nagmando sa tawo alang sa iyang kadaotan.” Ang lain pang hinungdan sa pag-antos mao “ang panahon ug ang wala damhang panghitabo.” (Ecclesiastes 9:11) Ang mga tawo kasagarang makaagom ug katalagman tungod kay dili tinuyong sila anaa sa usa ka peligrosong dapit.
8, 9. Nganong nahibalo kita nga si Jehova tinuod nga may pagtagad kanato?
8 Makapahupay ang pagkahibalo nga si Jehova dili magpahinabog pag-antos. Apan tinuod bang may pagtagad ang Diyos kon unsay nagakahitabo sa atong kinabuhi? Ang makapalipay nga tubag maoy oo! Nahibalo kita nga si Jehova may pagtagad tungod kay ang iyang inspiradong Pulong nagtug-an kanato kon nganong iyang gitugotan ang mga tawo sa pagsubay ug daotang dalan. Duha ka isyu ang nalangkit sa mga katarongan sa Diyos: ang iyang pagkasoberano ug ang integridad sa mga tawo. Tungod kay siya ang labing-gamhanang Maglalalang, dili obligado si Jehova sa pagtug-an kanato kon nganong iyang gitugotan ang pag-antos. Bisan pa niana, siya nagtug-an kanato tungod kay siya may pagtagad kanato.
9 Tagda ang lain pang ebidensiya nga ang Diyos may pagtagad kanato. Siya “nasakitan diha sa iyang kasingkasing” sa dihang ang yuta napuno sa pagkadaotan sa mga adlaw ni Noe. (Genesis 6:5, 6) Lahi ba ang gibati sa Diyos karong adlawa? Dili, kay siya dili mausab. (Malaquias 3:6) Giayran niya ang inhustisya ug dili niya gustong makita nga mag-antos ang mga tawo. Ang Bibliya nagtudlo nga hapit nang tul-iron sa Diyos ang tanang kadaot nga resulta sa pagmando sa tawo ug sa impluwensiya sa Yawa. Dili ba kana makapakombinsir nga pamatuod nga may pagtagad ang Diyos kanato?
10. Unsay pagbati ni Jehova bahin sa pag-antos sa tawo?
10 Gidaot sa relihiyosong mga pangulo ang Diyos sa dihang sila moingon nga ang mga trahedya nga atong naagoman maoy iyang pagbuot. Sa kasukwahi, si Jehova nangandoy sa pagwagtang sa pag-antos sa tawo. “Siya may kahingawa kaninyo,” nag-ingon ang 1 Pedro 5:7. Kana ang tinuod nga gitudlo sa Bibliya!
Nganong Ania Kita sa Yuta?
11. Unsay kasagarang isulti sa mga relihiyon niining kalibotana bahin sa pagpuyo sa tawo sa yuta?
11 Atong hisgotan karon ang ikaduhang pangutana nga gikalibgan sa daghan, Nganong ania kita sa yuta? Ang mga relihiyon niining kalibotana sagad motubag nga ang pagpuyo sa tawo sa yuta maoy temporaryo lamang. Ilang giisip ang atong planeta ingong hapitanan o tikanganan lamang padulong sa kinabuhi sa laing dapit. Ang pipila ka klerigo binakak nga nagtudlo nga may adlaw rang laglagon sa Diyos kining planetaha. Tungod sa maong mga pagtulon-an, nakahinapos ang daghang tawo nga labing maayo nga ilang pahimuslan sa bug-os ang kinabuhi tungod kay kamatayon ra man diay ang ilang paaboton. Unsa bay tinuod nga gitudlo sa Bibliya bahin sa kon nganong ania kita sa yuta?
12-14. Unsay gitudlo sa Bibliya bahin sa katuyoan sa Diyos alang sa yuta ug sa katawhan?
12 Ang Diyos adunay talagsaong katuyoan alang sa yuta ug sa katawhan. Siya “wala maglalang [sa yuta] sa wala lamay kapuslanan” kondili “nag-umol niini aron pagapuy-an.” (Isaias 45:18) Dugang pa, si Jehova ‘nagtukod sa yuta ibabaw sa pihong mga dapit; kini dili matarog hangtod sa panahong walay tino, o hangtod sa kahangtoran.’ (Salmo 104:5) Ang pagkat-on bahin sa katuyoan sa Diyos alang sa yuta ug sa katawhan makatabang kanato sa pagsabot kon nganong ania kita sa yuta.
13 Ang Genesis kapitulo 1 ug 2 nagpakita nga giandam pag-ayo ni Jehova ang yuta aron pagapuy-an sa tawo. Pagkatapos sa yugto sa paglalang sa atong planeta, ang tanan “maayo kaayo.” (Genesis 1:31) Gibutang sa Diyos ang unang lalaki ug babaye, si Adan ug Eva, sa matahom nga tanaman sa Eden ug gitagan-an silag daghang lamiang pagkaon. Ang unang tawhanong magtiayon gisugo: “Magmabungahon ug magdaghan kamo ug pun-a ang yuta ug gamhi kini.” Sila makabaton ug hingpit nga mga anak, magpauswag sa mga utlanan sa ilang tanaman nga puy-anan hangtod sa tibuok yuta, ug mahigugmaong magagahom sa kahayopan.—Genesis 1:26-28.
14 Katuyoan ni Jehova nga ang hingpit nga mga tawo magpuyo sa yuta hangtod sa hangtod. Ang Pulong sa Diyos nag-ingon: “Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.” (Salmo 37:29) Oo, gilalang ang katawhan aron magtagamtam ug walay-kataposang kinabuhi sa Paraiso sa yuta. Kana ang katuyoan sa Diyos, ug kini ang tinuod nga gitudlo sa Bibliya!
Unsay Mahitabo Kanato sa Dihang Mamatay Kita?
15. Unsay gitudlo sa kadaghanang relihiyon sa kalibotan bahin sa kon unsay mahitabo kanato sa dihang mamatay kita?
15 Atong hisgotan karon ang ikatulong pangutana nga gikabalak-an sa daghan: Unsay mahitabo kanato sa dihang mamatay kita? Ang kadaghanang relihiyon sa kalibotan nagtudlo nga adunay usa ka butang sulod sa tawo nga magpadayong buhi sa pagkamatay sa lawas. Ang pipila ka relihiyon nagtuo gihapon sa ideya nga silotan sa Diyos ang mga daotan pinaagi sa pagsakit kaniya sa walay kataposan diha sa kalayonhong impiyerno. Apan tinuod ba kana? Unsay tinuod nga gitudlo sa Bibliya bahin sa kamatayon?
16, 17. Sumala sa Bibliya, unsay kahimtang sa mga patay?
16 Ang Pulong sa Diyos nag-ingon: “Ang mga buhi nasayod nga sila mamatay; apan bahin sa mga patay, sila walay nahibaloan nga bisan unsa, ni sila aduna pay suhol.” Sanglit ang mga patay “walay nahibaloan nga bisan unsa,” sila dili makadungog, makakita, makasulti, mobati, o makahunahuna. Sila dili na masuholan. Unsaon man pagsuhol kanila nga sila dili na man makatrabaho? Gawas pa, ang “ilang gugma ug ang ilang pagdumot ug ang ilang pangabugho nahanaw na,” kay sila dili na makapahayag ug bisan unsang emosyon.—Ecclesiastes 9:5, 6, 10.
17 Ang gisulti sa Bibliya bahin niining maong ulohan maoy yano ug tin-aw—ang mga patay dili na magpadayong buhi sa laing dapit. Walay mogawas sa atong lawas sa dihang mamatay kita ug magpadayong buhi aron ihimugso pag-usab diha sa laing lawas, sumala sa giingon sa mga nagtuo ug reinkarnasyon. Ikapasundayag nato kini niining paagiha: Ang kinabuhi nga atong nabatonan nahisama sa siga sa kandila. Sa dihang pagngon ang siga, kini dili moadto sa bisan unsang dapit. Kini mahanaw lamang.
18. Sa dihang makat-onan sa usa ka gitun-an sa Bibliya nga ang mga patay walay nahibaloan, unsay iyang ikahinapos?
18 Hunahunaa kon unsay kahulogan nianang yano apan puwersadong kamatuoran. Sa dihang makat-onan sa usa ka gitun-an sa Bibliya nga ang mga patay walay nahibaloan, siya makahinapos dayon nga bisag unsa pa ka suko ang iyang patay nang mga katigulangan samtang sila buhi pa, sila dili na makasamok kaniya. Masabtan usab niya dayon ang punto nga ang iyang patay nang mga minahal dili na makadungog, makakita, makasulti, mobati, o makahunahuna. Busa, dili mahimong ilang gibati ang di-maantos nga kamingaw sa purgatoryo o kasakit sa kalayonhong impiyerno. Hinunoa, gitudlo sa Bibliya nga ang mga patay nga anaa sa panumdoman sa Diyos pagabanhawon. Pagkatalagsaon nga paglaom!—Juan 5:28, 29.
Usa ka Bag-ong Basahon nga Atong Magamit
19, 20. Ingong mga Kristohanon, unsay atong responsabilidad, ug unsang tabang sa pagtuon sa Bibliya ang ilabinang gilaraw nga atong gamiton sa atong ministeryo?
19 Nakahisgot kitag tulo lang ka pangutana nga gikalibgan sa daghang tawo. Sa matag kahimtang, ang gitudlo sa Bibliya maoy tin-aw ug deretso sa punto. Makapalipay gayod nga ipakig-ambit ang maong mga kamatuoran ngadto niadtong buot masayod kon unsay gitudlo sa Bibliya! Apan adunay daghan pang hinungdanong mga pangutana sa mga tawong adunay matinud-anong kasingkasing nga kinahanglang matubag sa makapatagbawng paagi. Ingong mga Kristohanon, atong responsabilidad ang pagtabang kanila sa pagkaplag sa mga tubag sa maong mga pangutana.
20 Lisod ang pagtudlo sa Kasulatanhong kamatuoran sa paagi nga matin-aw ug makatukbil sa kasingkasing. Aron matabangan kita sa paghimo niana, “ang matinumanon ug maalamong ulipon” nag-andam ug usa ka basahon nga ilabinang gilaraw nga gamiton diha sa atong Kristohanong ministeryo. (Mateo 24:45-47) Kining 224-panid nga basahon adunay titulong Unsay Tinuod nga Gitudlo sa Bibliya?
21, 22. Unsay pipila ka nindot nga mga bahin sa basahong Unsay Tinuod nga Gitudlo sa Bibliya?
21 Kining basahona giluwatan panahon sa “Diyosnong Pagkamasinugtanon” nga Distritong mga Kombensiyon sa mga Saksi ni Jehova sa tuig 2005/06, ug kini adunay nagkalainlaing nindot nga mga bahin. Pananglitan, adunay lima-ka-panid nga pasiunang pulong nga makatabang pag-ayo sa pagsugod ug mga pagtuon sa Bibliya sa balay. Lagmit sayonan ka sa paghisgot sa mga letrato ug mga teksto nga anaa sa pasiunang pulong. Magamit usab nimo ang impormasyon niining seksiyona sa pagpakita sa mga gitun-an kon unsaon pagpangita ang mga kapitulo ug mga bersikulo sa Bibliya.
22 Ang estilo sa pagsulat niining basahona maoy yano ug tin-aw. Gipaningkamotan nga maabot ang kasingkasing sa gitun-an pinaagi sa paglangkit kaniya sa panaghisgot kon posible. Ang matag kapitulo adunay daghang pasiunang mga pangutana ug usa ka kahon sa kataposan nga nag-ulohang “Kon Unsay Gitudlo sa Bibliya.” Ang kahon nasudlan sa Kasulatanhong mga tubag sa pasiunang mga pangutana. Ang nindot nga mga letrato ug mga kapsiyon ingon man mga pananglitan ug ilustrasyon sa maong basahon makatabang sa gitun-an sa pagsabot sa bag-ong mga ideya. Bisan pag gipayano ang mga impormasyon sa basahon, adunay apendise nga motugot nimo sa pagtuon nga mas detalyado pa sa 14 ka hinungdanong mga ulohan kon ang gitun-an nagkinahanglan ug dugang nga impormasyon.
23. Unsang mga sugyot ang gitanyag bahin sa paggamit sa librong Gitudlo sa Bibliya diha sa mga pagtuon sa Bibliya?
23 Ang librong Gitudlo sa Bibliya gilaraw sa pagtabang kanato sa pagtudlo sa katawhan nga may nagkalainlaing edukasyon ug relihiyon. Kon ang gitun-an walay kahibalo bahin sa Bibliya, lagmit gikinahanglan ang labaw sa usa ka sesyon sa pagtuon sa pagkobre sa usa ka kapitulo. Ayaw dalidalia pagkobre ang materyal, kondili paningkamoti nga maabot ang kasingkasing sa gitun-an. Kon dili niya masabtan ang usa ka pananglitan nga gigamit diha sa basahon, isaysay kana o gamita ang kapuling pananglitan. Pangandam pag-ayo, kutob sa imong mahimo gamita sa epektibong paagi ang libro, ug pag-ampo alang sa tabang sa Diyos aron ikaw ‘makagamit sa pulong sa kamatuoran sa hustong paagi.’—2 Timoteo 2:15.
Magmapasalamaton sa Imong Bililhong mga Pribilehiyo
24, 25. Unsang bililhong mga pribilehiyo ang gihatag ni Jehova sa iyang katawhan?
24 Si Jehova naghatag ug bililhong mga pribilehiyo sa iyang katawhan. Iyang gipahinabo nga kita makakat-on sa kamatuoran bahin kaniya. Angayng magmapasalamaton gayod kita sa maong pribilehiyo! Ngani, ang Diyos nagtago sa iyang mga katuyoan gikan sa mga mapahitas-on apan nagpadayag niana ngadto sa mga mapainubsanon. Niining bahina, si Jesus miingon: “Ako sa dayag nagadayeg kanimo, Amahan, Ginoo sa langit ug sa yuta, tungod kay gitago mo kining mga butanga gikan sa mga maalamon ug sa mga makinaadmanon ug gipadayag kini ngadto sa mga bata.” (Mateo 11:25) Talagsaong kadungganan nga maapil sa mga mapainubsanon nga nag-alagad sa Soberano sa Uniberso, si Jehova.
25 Ang Diyos naghatag usab kanato sa pribilehiyo sa pagtudlo sa uban bahin kaniya. Hinumdomi nga siya gidaot niadtong nagtudlog kabakakan bahin kaniya. Busa ang daghang tawo adunay sayop kaayo nga pagtuo bahin kang Jehova, nga naghunahuna nga siya dili matinagdanon ug gahig kasingkasing. Andam ka ba ug maikag sa pagtabang aron matul-id kana? Buot ba nimong ang mga tawong adunay matinud-anong kasingkasing sa bisan diin mahibalo sa kamatuoran bahin sa Diyos? Nan ipasundayag gayod ang imong diyosnong pagkamasinugtanon pinaagi sa masibotong pagwali ug pinaagi sa pagtudlo sa uban kon unsay giingon sa Kasulatan bahin sa hinungdanong mga ulohan. Ang mga nangita sa kamatuoran kinahanglang mahibalo kon unsay tinuod nga gitudlo sa Bibliya.
Unsay Imong mga Tubag?
• Nganong nahibalo kita nga ang Diyos may pagtagad kanato?
• Nganong ania kita sa yuta?
• Unsay mahitabo kanato sa dihang mamatay kita?
• Unsang mga bahin sa librong Gitudlo sa Bibliya ang imong nakaplagan nga mapuslanon kaayo?
[Mga Pangutana sa Pagtuon]
[Mga hulagway sa panid 22]
Ang Bibliya nagtudlo nga matapos ang pag-antos
[Credit Lines]
Top right, girl: © Bruno Morandi/age fotostock; left woman: AP Photo/Gemunu Amarasinghe; bottom right, refugees: © Sven Torfinn/Panos Pictures
[Hulagway sa panid 23]
Ang mga matarong mabuhing walay kataposan sa Paraiso