Lalaki ug Babaye​—Ang Dungganong Papel sa Matag Usa

SI Jehova nga Diyos naglalang una kang Adan, dayon kang Eva. Sa wala pa lalanga si Eva, si Adan aduna nay kasinatian sa pagkinabuhi. Nianang yugtoa, gihatagan siya ni Jehova ug tinong mga instruksiyon. (Genesis 2:15-20) Isip tigpamaba sa Diyos, kinahanglang isulti kini ni Adan ngadto sa iyang asawa. Busa, makataronganon nga si Adan ang manguna sa tanang kalihokan nga nalangkit sa pagsimba.

Ang samang kahikayan naglungtad diha sa Kristohanong kongregasyon, ug kita makabenepisyo pinaagi sa pagsusi niini. Si apostol Pablo misulat: “Dili ako motugot sa usa ka babaye nga . . . magbuot sa lalaki, kondili magpakahilom lamang siya. Kay si Adan unang giumol, unya gisunod si Eva.” (1 Timoteo 2:12, 13) Kini wala magkahulogan nga ang babaye bug-os nga magpakahilom panahon sa panagkatigom sa Kristohanong kongregasyon. Siya magpakahilom sa diwa nga siya dili makiglantugi sa lalaki. Dili niya angayng pakamenoson ang tinudlong katungdanan sa lalaki, o mosulay sa pagpanudlo diha sa kongregasyon. Ang mga lalaki ang gihatagan sa katungdanan sa pagdumala ug pagpanudlo sa kongregasyon, apan ang mga babaye dakog ikatampo sa Kristohanong mga tigom pinaagi sa pagpakigbahin diha niana sa nagkalainlaing paagi.

Aron atong masabtan ang tagsatagsa ka papel sa mga lalaki ug babaye diha sa kahikayan sa Diyos, si apostol Pablo misulat: “Ang lalaki dili gikan sa babaye, kondili ang babaye gikan sa lalaki . . . Gawas pa, maylabot sa Ginoo walay babaye kon walay lalaki ni may lalaki kon walay babaye [ni sila mahimong independente sa usag usa]. Kay ingon nga ang babaye gikan sa lalaki, sa ingon usab ang lalaki maoy pinaagi sa babaye; apan ang tanang butang gikan sa Diyos.”—1 Corinto 11:8-12.

Ang mga Babaye Adunay Maayong mga Pribilehiyo

Ilalom sa Balaod nga gihatag sa Diyos ngadto sa Israel, ang mga babaye adunay daghang pribilehiyo ug may kagawasan sa paggamit sa ilang kaugalingong pagbulot-an. Pananglitan, ang Proverbio 31:10-31 naghisgot bahin sa usa ka “asawa nga takos” nga nagpalit ug maayong klaseng mga materyal ug naghimog maanindot kaayong mga besti alang sa iyang panimalay. Aw, “siya naghimo [pa gani] ug pang-ilalom nga mga besti ug nagbaligya niini”! (Bersikulo 13, 21-24) “Sama sa mga barko sa usa ka magpapatigayon,” kining kugihang babaye mangitag lamiang pagkaon, bisag iya pa kanang makuha gikan sa lagyong mga dapit. (Bersikulo 14) “Siya naghunahuna ug usa ka uma ug nanag-iya niini,” ug siya “nagtanom ug usa ka parasan.” (Bersikulo 16) Tungod kay “ang iyang patigayon maayo,” ang iyang mga kalihokan dakog kita. (Bersikulo 18) Gawas pa sa ‘pagbantay sa mga panghitabo sa iyang panimalay,’ kining kugihang babaye nga may kahadlok kang Jehova nagtabang sa uban sa dili-mahakogong paagi. (Bersikulo 20, 27) Walay duhaduha nga siya gidayeg!—Bersikulo 31.

Ang mga balaod ni Jehova nga gihatag pinaagi kang Moises naghatag ug bug-os nga kahigayonan sa mga babaye sa pag-uswag sa espirituwal. Pananglitan, sa Josue 8:35, atong mabasa: “Wala gayoy usa ka pulong sa tanang gisugo ni Moises nga wala basaha ni Josue sa makusog sa atubangan sa tibuok kongregasyon sa Israel, uban sa mga babaye  ug sa mga bata ug sa langyawng mga pumoluyo nga naglakaw sa ilang taliwala.” Mahitungod sa saserdote nga si Esdras, ang Bibliya nag-ingon: “[Iyang gidala ang] balaod atubangan sa kongregasyon sa mga lalaki ingon man sa mga babaye ug sa tanan nga may igong panabot sa pagpamati, sa unang adlaw sa ikapitong bulan. Ug siya nagpadayon sa pagbasa sa makusog gikan niana sa atubangan sa plasa nga diha sa atubangan sa Ganghaan sa Tubig, sukad sa pagbanagbanag hangtod sa pagkaudto, atubangan sa mga lalaki ug sa mga babaye ug sa uban pang makasabot; ug ang mga igdulungog sa tibuok katawhan nagpatalinghog sa basahon sa balaod.” (Nehemias 8:2, 3) Ang mga babaye nakapahimulos gikan sa pagbasa sa Balaod. Sila usab nagsaulog ug relihiyosong mga pista. (Deuteronomio 12:12, 18; 16:11, 14) Labing hinungdanon, ang mga babaye sa karaang Israel makahimo sa pagbaton ug personal nga relasyon uban kang Jehova nga Diyos ug tagsatagsa nga makaampo kaniya.—1 Samuel 1:10.

Sa unang siglo K.P., ang mahinadlokon-sa-Diyos nga mga babaye nakapribilehiyo sa pag-alagad kang Jesus. (Lucas 8:1-3) Usa ka babaye nagdihog sa ulo ug mga tiil ni Jesus panahon sa usa ka panihapon didto sa Betania. (Mateo 26:6-13; Juan 12:1-7) Ang mga babaye lakip usab niadtong gipakitaan ni Jesus human sa iyang pagkabanhaw. (Mateo 28:1-10; Juan 20:1-18) Human sa pagkayab ni Jesus sa langit, ang grupo sa mga 120 ka tawo nga nagkatigom naglakip sa “pipila ka babaye ug kang Maria nga inahan ni Jesus.” (Buhat 1:3-15) Ang kadaghanan o ang tanan niining mga babayhana atua gayod sa itaas nga lawak sa Jerusalem sa adlaw sa Pentekostes 33 K.P., sa dihang gipadala ang balaang espiritu ug ang mga tinun-an ni Jesus milagrosong nakasulti ug lainlaing mga pinulongan.—Buhat 2:1-12.

Ang mga lalaki ug mga babaye parehong nakasaksi sa katumanan sa Joel 2:28, 29, sumala sa gikutlo ni apostol Pedro sa adlaw sa Pentekostes: “Ibubo ko [Jehova] ang bahin sa akong espiritu sa tanang matang sa unod, ug ang inyong mga anak nga lalaki ug ang inyong mga anak nga babaye managna . . . Ug bisan nganha sa akong mga ulipong lalaki ug nganha sa akong mga ulipong babaye ibubo ko ang bahin sa akong espiritu nianang mga adlawa.” (Buhat 2:13-18) Sulod sa usa ka panahon human sa Pentekostes 33 K.P., ang Kristohanong mga babaye gitugahan ug bililhong mga gasa sa espiritu. Sila nakasulti ug langyawng mga pinulongan ug nakapanagna, dili ang pagpanagna bahin sa umaabot, kondili ang pagsangyaw sa mga kamatuoran sa Kasulatan.

Sa iyang sulat ngadto sa mga Kristohanon sa Roma, si apostol Pablo mahigugmaong naghisgot bahin kang “Febe nga atong igsoong babaye,” nga nagrekomendar kaniya ngadto kanila. Siya usab  naghisgot bahin kang Trifena ug Trifosa, nga nagtawag kanilang “mga babaye nga nagahago diha sa Ginoo.” (Roma 16:1, 2, 12) Bisan tuod kining mga babayhana wala maghupot ug responsableng mga katungdanan sa unang Kristohanong kongregasyon, sila ug ang daghan pang ubang mga babaye nakapribilehiyo nga mapili sa Diyos nga makig-uban sa iyang Anak, si Jesu-Kristo, sa langitnong Gingharian.—Roma 8:16, 17; Galacia 3:28, 29.

Pagkadakong pribilehiyo ang napahimuslan sa diyosnong mga babaye karon! “Si Jehova nag-ingon; ang kababayen-an nga nagapahayag sa maayong balita maoy usa ka dakong panon,” nag-ingon ang Salmo 68:11. Dalayegon ang maong mga babaye. Pananglitan, tungod sa ilang katakos sa pagpanudlo sa mga pagtuon sa Bibliya sa balay, daghan ang midawat sa matuod nga mga pagtulon-an nga makapahimuot sa Diyos. Ang minyo nga Kristohanong mga babaye nga nagtabang sa ilang mga anak nga mahimong mga magtutuo ug nagpaluyo sa ilang mga bana nga daghag buluhaton sa kongregasyon takos usab sa pagdayeg. (Proverbio 31:10-12, 28) Ang tagsaanong mga babaye usab adunay dungganong luna sa kahikayan sa Diyos, ug ang Kristohanong mga lalaki giawhag sa ‘pagmaymay sa tigulang nga mga babaye ingong mga inahan, sa batan-ong mga babaye ingong igsoong mga babaye uban sa bug-os nga kaputli.’—1 Timoteo 5:1, 2.

Nagkalainlaing Buluhaton sa mga Lalaki

Ang usa ka Kristohanong lalaki adunay hinatag-sa-Diyos nga katungdanan ug siya gidahom sa pagtuman niini. Si Pablo nag-ingon: “Buot ko nga mahibalo kamo nga ang ulo sa matag lalaki mao si Kristo; sa baylo ang ulo sa usa ka babaye mao ang lalaki; sa baylo ang ulo ni Kristo mao ang Diyos.” (1 Corinto 11:3) Ang lalaki usab adunay ulo—ang Kristo. Sa pagkatinuod, ang lalaki manubag kang Kristo ug sa kataposan ngadto sa Diyos. Ug ang Diyos nagdahom nga gamiton sa lalaki ang iyang pagkaulo sa mahigugmaong paagi. (Efeso 5:25) Kini mao ang kahikayan sukad nga gilalang ang tawo dinhi sa yuta.

Ang Bibliya nagpakita nga ang Diyos naghatag sa mga lalaki ug mga buluhaton nga nahiuyon sa iyang pagkaulo. Pananglitan, gipabuhat ni Jehova si Noe ug arka aron maluwas ang mga kinabuhi panahon sa Lunop. (Genesis 6:9–7:24) Si Abraham gisaaran nga pinaagi sa iyang binhi, ang tanang pamilya ug mga nasod sa yuta magapanalangin sa ilang kaugalingon. Ang pangunang bahin niana nga binhi mao si Kristo Jesus. (Genesis 12:3; 22:18; Galacia 3:8-16) Gitudlo sa Diyos si Moises sa pagpanguna sa mga Israelinhon pagawas sa Ehipto. (Exodo 3:9, 10, 12, 18) Pinaagi kang Moises, si Jehova naghatag sa kodigo sa mga balaod nga nailhang pakigsaad sa Balaod, o ang Balaod ni Moises. (Exodo 24:1-18) Ug mga lalaki lamang ang mga magsusulat sa Bibliya.

Ingong Ulo sa Kristohanong kongregasyon, si Jesus “mihatag ug mga gasa nga mga lalaki.” (Efeso 1:22; 4:7-13) Sa dihang gilista ang mga kuwalipikasyon alang sa mga magtatan-aw, si Pablo nagtumong sa mga lalaki. (1 Timoteo 3:1-7; Tito 1:5-9) Busa ang mga kongregasyon sa mga Saksi ni Jehova gialagaran ug lalaking mga magtatan-aw, o mga ansiyano, ug pinaagi sa tinudlong mga lalaki nga ministeryal nga mga alagad. (Filipos 1:1, 2; 1 Timoteo 3:8-10, 12) Mga lalaki lamang ang mag-alagad ingong mga magbalantay sa Kristohanong kongregasyon. (1 Pedro 5:1-4) Apan sama sa nahisgotan na, ang mga babaye adunay talagsaong mga pribilehiyo nga hinatag sa Diyos.

Malipayon sa Ilang mga Katungdanan

Ang pagtuman sa ilang hinatag-sa-Diyos nga katungdanan magdalag kalipay sa mga lalaki ug babaye. Malipayong panagtiayon ang mosangpot kon ang mga bana ug mga asawa magsundog sa panig-ingnan ni Kristo ug sa iyang kongregasyon. Misulat si Pablo: “Mga bana, magpadayon sa paghigugma sa inyong mga asawa, ingon nga si Kristo nahigugma usab sa kongregasyon ug nagtugyan sa iyang kaugalingon alang niini . . . Kinahanglang higugmaon gayod sa matag usa ang iyang asawa sama sa iyang kaugalingon.” (Efeso 5:25-33) Busa, ang mga bana kinahanglan magpasundayag sa ilang pagkaulo, dili sa mahakogong paagi, kondili sa mahigugmaong paagi. Dili hingpit ang mga tawo nga naglangkob sa kongregasyon ni Kristo. Apan, gihigugma ug giatiman kini ni Jesus. Sa samang paagi, ang usa ka Kristohanong bana kinahanglang maghigugma ug mag-atiman sa iyang asawa.

Ang usa ka Kristohanong asawa “angay nga adunay  halawom nga pagtahod sa iyang bana.” (Efeso 5:33) Niining paagiha, siya makalantaw sa kongregasyon ingong panig-ingnan. Ang Efeso 5:21-24 nag-ingon: “Magpasakop sa usag usa diha sa kahadlok kang Kristo. Ang mga asawa kinahanglang magpasakop sa ilang mga bana ingon nga sa Ginoo, tungod kay ang bana maoy ulo sa iyang asawa ingon nga si Kristo usab maoy ulo sa kongregasyon, sanglit siya mao ang manluluwas niining maong lawas. Sa pagkatinuod, ingon nga ang kongregasyon nagapasakop kang Kristo, mao man usab ang mga asawa angay nga magpasakop sa ilang mga bana sa tanang butang.” Bisan tuod malisdan usahay ang asawa sa pagpasakop sa iyang bana, kini maoy “angay [haom, husto] diha sa Ginoo.” (Colosas 3:18) Ang pagpasakop sa iyang bana mas masayon kon iyang hinumdoman nga kini makapahimuot ni Ginoong Jesu-Kristo.

Bisan pag ang iyang bana dili sama niyag tinuohan, ang usa ka Kristohanong asawa kinahanglang magpasakop sa iyang pagkaulo. Si apostol Pedro nag-ingon: “Kamong mga asawa, magpasakop kamo sa inyong mga bana, aron nga, kon aduna may dili-masinugtanon sa pulong, sila makabig nga walay pulong pinaagi sa panggawi sa ilang mga asawa, tungod kay mga saksing-nakakita sa inyong maputling panggawi uban ang halawom nga pagtahod.” (1 Pedro 3:1, 2) Si Sara, kinsa nagtahod sa iyang bana nga si Abraham, nakapribilehiyo sa pagpanganak kang Isaac ug nahimong katigulangan ni Jesu-Kristo. (Hebreohanon 11:11, 12; 1 Pedro 3:5, 6) Ang mga asawa nga naggawi sa ilang kaugalingon sama kang Sara seguradong gantihan sa Diyos.

Ang kalinaw ug panaghiusa mopatigbabaw kon ang mga lalaki ug babaye magtuman sa ilang hinatag-sa-Diyos nga mga katungdanan. Kini moresulta sa ilang katagbawan ug kalipay. Dugang pa, ang pagtuman sa Kasulatanhong mga kinahanglanon maghatag sa matag usa ug dignidad uban sa dungganong luna diha sa kahikayan sa Diyos.

[Kahon sa panid 7]

Kon Unsay Ilang Pagbati Bahin sa Ilang Hinatag-sa-Diyos nga Papel

“Ang akong bana nagtuman sa iyang pagkaulo sa mahigugmaon ug malulotong paagi,” miingon si Susan. “Kami sagad mag-estorya bahin sa mga desisyon, ug kon siya modesisyon kon unsay himoon o kon unsay dili himoon, ako nahibalo nga kini alang sa among kaayohan. Ang kahikayan ni Jehova alang sa Kristohanong mga asawa nakapalipay gayod kanako ug nakapalig-on sa among panagtiayon. Suod kami sa usag usa ug nagtinabangay kami aron makab-ot ang espirituwal nga mga tumong.”

Usa ka babaye nga ginganlag Mindy miingon: “Ang papel nga gihatag ni Jehova ngadto sa iyang mga alagad nga babaye maoy usa ka pasalig sa iyang gugma alang kanamo. Ako mibati nga ang pagpasidungog ug pagtahod sa akong bana ug ang pagpaluyo kaniya sa iyang mga buluhaton sa kongregasyon maoy akong paagi sa pagpakitag pagpabili kang Jehova tungod niini nga kahikayan.”

[Mga hulagway sa panid 5]

Nahiuyon sa posisyon sa pagkaulo sa lalaki, ang Diyos naghatag kang Noe, Abraham, ug Moises ug lainlaing mga buluhaton

[Hulagway sa panid 7]

“Ang kababayen-an nga nagapahayag sa maayong balita maoy usa ka dakong panon”