Lalaki ug Babaye​—Gihimo Alang sa Usag Usa

ANG lalaki ug babaye kanunayng nangandoy nga magkauban. Ang Diyos maoy nagmugna niini. Nakita ni Jehova nga dili maayo nga padayong mag-inusara ang unang lalaki, si Adan. Busa ang Diyos naghimog ‘usa ka katabang alang sa lalaki, ingon nga iyang katimbang.’

Gipahinanok ni Jehova si Adan, ug dayon iyang gikuha ang usa sa iyang mga gusok ug ‘gihimo kini nga usa ka babaye ug gidala siya ngadto sa lalaki.’ Hilabihang lipaya ni Adan sa pagkakita niining matahom nga linalang ni Jehova nga siya miingon: “Kini sa kataposan bukog sa akong mga bukog ug unod sa akong unod.” Uban sa mga kinaiya nga iya sa babaye, ang hingpit nga babaye, si Eva, maoy hiligugmaon gayod. Ug ang hingpit nga si Adan nga may panagway nga iya sa lalaki maoy takos sa pagtahod. Sila gihimo alang sa usag usa. Ang Bibliya nag-ingon: “Mao nga ang lalaki mobiya sa iyang amahan ug sa iyang inahan ug siya kinahanglang moipon sa iyang asawa ug sila mahimong usa ka unod.”—Genesis 2:18-24.

Apan karon, ang mga pamilya nagakabungkag, ug ang relasyon tali sa lalaki ug babaye sagad giabusohan o gigamhan sa kahakog. Ang espiritu sa pakig-indig tali sa mga lalaki ug babaye nakadugang sa problema. Kining tanan maoy sukwahi sa katuyoan sa Diyos alang sa lalaki ug babaye. Ang lalaki gidisenyo sa pagtuman sa usa ka talagsaong papel dinhi sa yuta. Ang babaye adunay talagsaon ug dungganong papel ingong katimbang sa lalaki. Sila kinahanglang magalihok nga magkauyonay. Sukad nga naglungtad ang tawo, ang diyosnong mga lalaki ug babaye matinumanong naningkamot sa pagtuman sa maong mga papel nga gituyo ni Jehova alang kanila, ug kini nakaamot sa ilang kalipay ug katagbawan. Unsa ang maong mga papel, ug sa unsang paagi kita makatuman niini?

[Hulagway sa panid 3]

Ang lalaki ug babaye gidisenyo sa pagtuman sa dungganong mga papel diha sa kahikayan sa Diyos