Magpabiling Malig-on sa Dihang Morebelde ang Imong Anak

USA ka Kristohanong babaye nga atong nganlag Joy naningkamot sa pagmatuto sa iyang anak lalaki aron mahigugma kang Jehova nga Diyos. Apan, sa dihang siya nahingkod nang tin-edyer, siya mirebelde ug milayas sa balay. “Kadto ang kinagrabehang kagul-anan nga akong gibati sukad,” matod pa ni Joy. “Gibati ko nga ako giluiban, nga nagun-ob ang akong kasingkasing, ug nahiubos pag-ayo. Ako nawad-ag paglaom.”

Ikaw lagmit naningkamot usab sa pagmatuto sa imong mga anak aron mahigugma ug mag-alagad sila sa Diyos—ug unya imong makita nga ang usa o daghan sa imong mga anak motalikod kaniya. Sa unsang paagi makasagubang ka sa grabeng kahiubos? Unsay makatabang kanimo aron magpabiling malig-on sa imong pag-alagad kang Jehova?

Sa Dihang Mirebelde ang mga Anak ni Jehova

Ang unang tikang mao nga imong amgohon nga si Jehova nahibalo gayod kon unsay imong pagbati. Sa Isaias 49:15, atong mabasa: “Malimot ba ang usa ka asawa sa iyang masuso nga sa ingon dili niya kaluy-an ang anak sa iyang tiyan? Bisan kining mga babayhana makalimot, apan ako mismo dili makalimot kanimo.” Oo, nasinati ni Jehova ang mga pagbati nga kasagarang bation sa mga amahan ug mga inahan. Busa, pagkadako sa kalipay nga iyang gibati sa dihang ang iyang tanang manulondang mga anak nagdayeg ug nag-alagad kaniya. Samtang nagtubag si Jehova sa patriarkang si Job “gikan sa unos,” si Jehova naghinumdom sa malipayong mga panahon uban sa iyang nagkahiusa nga pamilya sa espiritung mga linalang, nga nag-ingon: “Diin ka man sa pagtukod ko sa kalibotan? . . . Sa dihang ang mga bituon sa kabuntagon nagdungan paghugyaw sa kalipay, ug ang tanang anak sa Diyos misinggit sa pagdayeg?”—Job 38:1, 4, 7.

Ngadtongadto, nakita sa matuod nga Diyos nga ang usa ka hingpit niyang manulondang anak mirebelde kaniya ug nahimong Satanas, nga sa Hebreohanon nagkahulogang “Masuklanon.” Nakita usab ni Jehova nga ang iyang unang tawhanong anak, si Adan, ug ang iyang hingpit nga asawa, si Eva, miduyog sa pagrebelde. (Genesis 3:1-6; Pinadayag 12:9) Sa ulahi, ang ubang manulondang mga anak “mitalikod sa ilang nahiangay nga puloy-anang dapit” ug mirebelde batok sa Diyos.—Judas 6.

Ang Kasulatan wala magsulti kanato kon unsay gibati ni Jehova sa dihang ang uban niyang hingpit nga mga anak mirebelde usab. Hinunoa, ang Bibliya tin-aw nga nag-ingon: “Nakita ni Jehova nga ang pagkadaotan sa tawo dagaya diha sa yuta ug ang matag kiling sa mga hunahuna sa iyang  kasingkasing daotan lamang sa tanang panahon. Ug si Jehova nagbasol nga iyang gibuhat ang mga tawo sa yuta, ug siya nasakitan diha sa iyang kasingkasing.” (Genesis 6:5, 6) Ang pagrebelde sa piniling katawhan ni Jehova, ang Israel, ‘nakapasakit’ ug nakapaguol usab kaniya.—Salmo 78:40, 41.

Walay duhaduha nga si Jehova nagmabination sa mga ginikanan nga naguol ug nasakit tungod sa panggawi sa rebelyosong mga anak. Siya naghatag ug maayong tambag ug pagdasig diha sa iyang Pulong, ang Bibliya, aron matabangan ang maong mga ginikanan sa pagsagubang sa ilang kahimtang. Ang Diyos nag-awhag kanila nga itugyan kaniya ang ilang kabalaka, magmapainubsanon, ug mobarog nga malig-on batok kang Satanas nga Yawa. Atong tan-awon kon sa unsang paagi ang pagsunod niining tambaga makatabang kanimo sa pagpabiling malig-on sa dihang morebelde ang imong anak.

Itugyan ang Imong Kabalaka Kang Jehova

Si Jehova nahibalo nga ang mga ginikanan mabalaka pag-ayo sa dihang ilang masayran nga ang ilang mga anak nameligrong magdaot sa ilang kaugalingon o daoton sa uban. Gipaila ni apostol Pedro ang usa ka paagi sa pagsagubang niini ug sa ubang mga kabalaka. Siya nagsulat: “Itugyan [kang Jehova] ang tanan ninyong mga kabalaka, kay siya may kahingawa kaninyo.” (1 Pedro 5:7) Nganong kini nga pagdapit ug pagpasalig ilabinang nahiangay sa mga ginikanan sa rebelyosong anak?

Sa dihang bata pa ang imong anak, ikaw nagmabinantayon sa pagpanalipod kaniya batok sa mga kapeligrohan, ug siya tingali misanong sa imong mahigugmaong pag-atiman. Apan, samtang siya nagkadako, basin nakunhoran ang imong impluwensiya diha kaniya, apan wala makunhori ang imong dakong tinguha sa pagpanalipod kaniya batok sa kadaot. Sa pagkatinuod, lagmit midako pa kana.

Ingong resulta, sa dihang ang imong anak morebelde ug makaagom ug espirituwal, emosyonal, o pisikal nga kadaot, mahimong bation nimo nga ikaw ang mabasol. Kiniy gibati ni Joy, nga gihisgotan ganina. Siya nag-ingon: “Kada adlaw, kay gitugaw sa pagbati nga ako napakyas, ako kanunayng naghunahuna sa nangaging mga panghitabo sa pagsusi kon diin ko nasayop.” Nianang mga higayona gayod nga buot ni Jehova nga imong ‘itugyan ang tanan nimong kabalaka kaniya.’ Kon imong buhaton kana, siya motabang kanimo. “Itugyan ang imong palas-anon kang Jehova,” matod sa salmista, “ug siya magasapnay kanimo. Dili gayod niya itugot nga matarog ang matarong.” (Salmo 55:22) Nasinati ni Joy ang maong kahupayan. Siya nagsaysay: “Ako nakigsulti kang Jehova bahin sa tanan  kong pagbati sa kahiladman. Gipahayag ko ang tanan kong pagbati, ug ako nahupayan pag-ayo.”

Ingong dili-hingpit nga ginikanan, mahimong nakahimo kag daghang sayop samtang nagmatuto sa imong anak. Apan nganong mga sayop lang ang imong hunahunaon? Si Jehova dayag wala lang maghunahuna niana, kay ang inspiradong salmista miawit: “Kon mga kasaypanan mao pa ang imong gibantayan, Oh Jah, Oh Jehova, kinsa ba ang makabarog?” (Salmo 130:3) Bisan kon ikaw maoy hingpit nga ginikanan, mahimong morebelde gihapon ang imong anak. Busa ipahayag ang imong mga pagbati kang Jehova diha sa pag-ampo, ug siya motabang kanimo sa pagsagubang niana. Ugaling lang, aron ikaw magpabiling malig-on sa pag-alagad kang Jehova ug makalikay nga mabiktima ni Satanas, labaw pa niana ang kinahanglan nimong buhaton.

Magmapainubsanon

“Ipaubos ang inyong kaugalingon ilalom sa gamhanang kamot sa Diyos,” misulat si Pedro, “aron nga kamo iyang bayawon sa takdang panahon.” (1 Pedro 5:6) Nganong ang pagkamapainubsanon gikinahanglan sa dihang morebelde ang imong anak? Gawas pa nga mahimong bation nimo ang pagkasad-an ug kaguol, mahimong mobati ka ug kaulaw kon ikaw adunay rebelyosong anak. Mahimong mabalaka ka nga ang binuhatan sa imong anak nakadaot sa dungog sa inyong pamilya, ilabina kon siya gipalagpot gikan sa Kristohanong kongregasyon. Ang pagbasol sa kaugalingon ug kaulawan basin magtingob mao nga ikaw mabugnaw nga dili na motambong sa Kristohanong mga tigom.

Kinahanglang gamiton nimo ang praktikal nga kaalam aron masagubang ang maong kahimtang. Ang Proverbio 18:1 nagpasidaan: “Ang nagalain sa iyang kaugalingon mangita sa iyang hakog nga tinguha; siya mobatok sa tanang praktikal nga kaalam.” Pinaagi sa regular nga pagtambong sa Kristohanong mga tigom bisan pa sa imong kagul-anan, imong mabatonan ang bililhong tinubdan sa instruksiyon ug pagdasig. “Sa sinugdan, dili ko buot moatubang kang bisan kinsa,” miangkon si Joy. “Apan gipahinumdoman ko ang akong kaugalingon bahin sa kahinungdanon sa akong espirituwal nga rutina. Gawas pa, kon magpabilin ko sa balay, ako maghunahuna lamang sa akong mga suliran. Ang mga tigom mitabang kanako sa pagsentro sa akong hunahuna sa makapalig-ong espirituwal nga mga butang. Ako mapasalamaton kaayo nga wala ako magpalain sa akong kaugalingon, busa akong natagamtam ang mahigugmaong pagsuportar sa akong mga igsoong lalaki ug babaye.”—Hebreohanon 10:24, 25.

Hinumdomi, usab, nga ang matag sakop sa pamilya kinahanglang “magpas-an sa iyang kaugalingong luwan” sa Kristohanong responsabilidad. (Galacia 6:5) Si Jehova nagdahom nga ang mga ginikanan mahigugma ug magdisiplina sa ilang mga anak. Siya nagdahom usab nga ang mga anak magmasinugtanon ug magmatinahoron sa ilang mga ginikanan. Kon buhaton sa mga ginikanan ang ilang maarangan sa pagmatuto sa ilang mga anak diha sa “disiplina ug pagdumala-sa-kaisipan ni Jehova,” mabatonan sa mga ginikanan mismo ang maayong dungog uban sa Diyos. (Efeso 6:1-4) Kon morebelde ang usa ka anak batok sa mahigugmaong pagdisiplina sa ginikanan, ang dungog sa anak mao ang madaot. “Pinaagi sa iyang mga binuhatan ang usa ka bata magpaila sa iyang kaugalingon kon ang iyang kalihokan maoy lunsay ug matul-id,” nag-ingon ang Proverbio 20:11. Ang pagrebelde ni Satanas wala gayod makadaot sa dungog ni Jehova taliwala sa mga tawo nga nahibalo sa kamatuoran.

Barog Kamo Batok sa Yawa

“Hupti ninyo ang maayong panghunahuna, magmabinantayon,” nagpasidaan si Pedro. “Ang inyong kaaway, ang Yawa, nagasuroysuroy sama sa usa ka leyon, nga nagapangitag matukob.” (1 Pedro 5:8) Sama sa usa ka leyon, kasagarang gipuntirya sa Yawa ang mga batan-on ug mga way-kasinatian.  Sa karaang panahon, ang mga leyon nagsuroysuroy sa Israel, busa nameligro ang binuhing kahayopan. Kon ang usa ka nating karnero mabulag gikan sa panon, kini daling matukob. Kinaiyanhong ipameligro sa usa ka inahang karnero ang iyang kinabuhi mismo aron mapanalipdan ang iyang nati. Ugaling lang, bisan ang hingkod nga karnero dili makasukol sa leyon. Busa, gikinahanglan ang maisogong mga magbalantay aron mapanalipdan ang panon.—1 Samuel 17:34, 35.

Aron mapanalipdan ang iyang masambingayong mga karnero batok sa “nagangulob nga leyon,” gihikay ni Jehova nga ang espirituwal nga mga magbalantay mag-atiman sa panon ilalom sa “pangulong magbalantay,” si Jesu-Kristo. (1 Pedro 5:4) Si Pedro naghatag niining tambaga sa maong tinudlong mga tawo: “Bantayi ninyo ang panon sa Diyos nga ubos sa inyong pag-atiman, dili nga pinugos, kondili kinabubut-on; ni tungod sa gugma sa kinitaan pinaagig limbong, apan maikagon.” (1 Pedro 5:1, 2) Uban sa inyong kooperasyon ingong mga ginikanan, ang maong mga magbalantay mahimong makatabang sa usa ka batan-on aron mapasig-uli siya sa iyang maayong espirituwal nga kahimtang.

Sa dihang ang Kristohanong mga magbalantay kinahanglang magtambag sa imong rebelyosong anak, basin buot nimong panalipdan siya batok sa disiplina. Apan, sayop gayod ang paghimo niana. Si Pedro nag-ingon: “Barog kamo batok [sa Yawa]”—dili batok sa espirituwal nga mga magbalantay.—1 Pedro 5:9.

Sa Dihang Bug-at ang Ipahamtang nga Disiplina

Kon ang imong anak dili mahinulsolon ug usa ka bawtismadong Kristohanon, mahimong ipahamtang kaniya ang kinalabwang disiplina—ang pagpalagpot kaniya gikan sa kongregasyon. Ang pagpakigkontak kaniya sukad niana magdepende sa iyang edad ug sa ubang mga kahimtang.

Kon ang imong anak menor-de-edad ug nagpuyo sa balay, natural nga ipadayon nimo ang pagtagana sa iyang pisikal nga mga panginahanglan. Siya nagkinahanglan usab sa pagbansay bahin sa moralidad ug disiplina, ug ikaw ang may responsibilidad sa paghatag niini. (Proverbio 1:8-18; 6:20-22; 29:17) Basin buot nimong dumalahan siyag pagtuon sa Bibliya, nga naglakip sa iyang direktang pagsalmot niana. Mahimo nimong ipasiugda kaniya ang nagkalainlaing kasulatan ug ang mga basahon nga gitagana sa “matinumanon ug maalamong ulipon.” (Mateo 24:45) Mahimong ikuyog usab nimo ang imong anak sa Kristohanong mga tigom ug palingkoron siya sa imong tupad. Kining tanan mahimong buhaton sa paglaom nga basin mosunod siya sa Kasulatanhong tambag.

Lahi ang kahimtang kon ang gipalagpot maoy dili menor-de-edad ug wala magpuyo sa inyong balay. Si apostol Pablo mitambag sa mga Kristohanon sa karaang Corinto: “[Hunong] na sa pagpakig-uban kang bisan kinsa nga gitawag ug igsoon nga usa ka makihilawason o tawong dalo o tigsimbag idolo o tigsultig pasipala o palahubog o mangingilkil, dili gani mokaon uban sa maong tawo.” (1 Corinto 5:11) Bisan pag gikinahanglan ang pagpakigkontak sa usa nga gipalagpot samtang inyong giatiman ang kinahanglanong mga butang maylabot sa pamilya, ang usa ka Kristohanong ginikanan maningkamot gayod sa paglikay sa dili-kinahanglanong pagpakig-uban.

Sa dihang disiplinahon sa Kristohanong mga magbalantay ang imong nakasalang anak, dili gayod maalamon nga imong sulayan ang pagsalikway o dili pagpanumbaling sa ilang aksiyon nga gipasukad sa Bibliya. Ang pagdapig sa imong rebelyosong anak dili gayod makahatag kaniyag tinuod nga panalipod batok sa Yawa. Sa pagkatinuod, imong gipameligro ang imong espirituwal nga kahimsog. Sa laing bahin, pinaagi sa pagsuportar sa mga paningkamot sa mga magbalantay, ikaw magpabiling “malig-on sa pagtuo” ug makatabang sa labing maayong paagi sa imong anak.—1 Pedro 5:9.

Si Jehova Magasapnay Kanimo

Kon morebelde ang imong anak, hinumdomi nga wala ka mag-inusara. Ang ubang Kristohanong mga ginikanan may susamang mga kasinatian. Bisan pa sa mga pagsulay nga atong antoson, si Jehova makasapnay kanato.—Salmo 68:19.

Salig kang Jehova pinaagi sa pag-ampo. Makig-uban nga regular sa Kristohanong kongregasyon. Suportahi ang disiplina sa tinudlong mga magbalantay. Sa paghimo niana, ikaw makapabiling malig-on. Ug ang imong maayong panig-ingnan makatabang sa imong anak nga mosanong sa mahigugmaong pagdapit ni Jehova sa pagbalik kaniya.—Malaquias 3:6, 7.

[Mga hulagway sa panid 18]

Pagbatog kalig-on pinaagi sa pag-ampo ug sa pagpakig-uban sa Kristohanong kongregasyon