Mga Pangutana Gikan sa mga Magbabasa

Sa unsang diwa nga ang magtitigom nakakaplag ug ‘usa lang ka tawo [o, lalaki] sa usa ka libo’ apan walay nakaplagang ‘usa ka babaye taliwala kanilang tanan’?—Ecclesiastes 7:28.

Aron masabtan sa hustong paagi kining inspiradong mga pulong, kinahanglang masabtan una nato kon unsay panglantaw sa Diyos sa kababayen-an. Ang Bibliya naghisgot kang Ruth, nga umagad sa balong si Noemi, ingong “maayo kaayo nga babaye.” (Ruth 3:11) Sumala sa Proverbio 31:10, ang usa ka maayong asawa ‘labaw pa kaayo kay sa mga korales ang bili.’ Nan, unsa may gipasabot ni Haring Solomon sa karaang Israel sa dihang siya miingon: “Ako nakakaplag . . . ug usa ka matinuorong tawo [o, lalaki] taliwala sa usa ka libo, apan wala gayod ako makakaplag ug matinuorong babaye”?—Moffatt.

Ang konteksto nagpakita nga ubos ug moral nga mga sukdanan ang kababayen-an sa panahon ni Solomon. (Ecclesiastes 7:26) Tingali ang pangunang hinungdan niini mao ang impluwensiya sa langyawng kababayen-an nga nagsimba kang Baal. Bisan si Haring Solomon naimpluwensiyahan sa iyang daghang langyaw nga mga asawa. “Siya nakabaton ug pito ka gatos ka asawa, mga prinsesa, ug tulo ka gatos ka puyopuyo,” matod pa sa Bibliya, “ug ang iyang mga asawa inanayng nagpakiling sa iyang kasingkasing” sa pagsimba sa bakak nga mga diyos. (1 Hari 11:1-4) Ubos usab ug moral nga mga sukdanan ang kalalakin-an—halos walay makaplagang usa ka matarong nga lalaki taliwala sa usa ka libo. “Kini lamang ang akong nakaplagan,” mihinapos si Solomon, “nga ang matuod nga Diyos naghimo sa katawhan nga matul-id, apan sila nagapangita ug daghang plano.” (Ecclesiastes 7:29) Kini maoy konklusyon bahin sa mga tawo sa katibuk-an, dili kay pagtandi sa lalaki sa babaye. Busa, ang mga pulong nga mabasa diha sa Ecclesiastes 7:28 angayng isipon ingong usa ka komento bahin sa katibuk-ang moral nga kahimtang sa mga tawo sa panahon ni Solomon.

Hinunoa, adunay laing posibleng kahulogan kining tekstoha. Mahimong matagnaon usab kini, kay wala pay babaye sukad nga hingpit nga nagmasinugtanon kang Jehova. Apan adunay usa ka lalaki nga hingpit nga nagmasinugtanon—si Jesu-Kristo.—Roma 5:15-17.

[Hulagway sa panid 31]

“Usa ka tawo sa usa ka libo”