Tabangi ang Uban sa Pagsugot Kon Unsay Gitudlo sa Bibliya

“Mahitungod niadtong anaa sa maayong yuta, mao kini sila nga, human makadungog sa pulong uban ang maputli ug maayong kasingkasing, magpadayon sa paghupot niini ug magapamunga uban ang paglahutay.”—LUCAS 8:15.

1, 2. (a) Unsay katuyoan sa librong Unsay Tinuod nga Gitudlo sa Bibliya? (b) Sa di pa dugayng katuigan, sa unsang paagi gipanalanginan ni Jehova ang paningkamot sa iyang katawhan sa paghimog mga tinun-an?

 “MAAYO kaayo ang maong libro. Naangayan kini sa akong mga gidumalahan ug pagtuon. Naangayan ko kini. Kining libroha magamit aron masugdan ang mga pagtuon sa Bibliya uban sa mga tawo diha mismo sa ilang pultahan.” Kanay gisulti sa usa ka payunir nga ministro sa mga Saksi ni Jehova bahin sa librong Unsay Tinuod nga Gitudlo sa Bibliya? a Usa ka tigulang nga magmamantala sa Gingharian, nga naghisgot sa samang libro, miingon: “Nakapribilehiyo ako sa pagtabang ug daghang tawo nga sila makaila kang Jehova sa 50 ka tuig kong pagkaaktibo sa ministeryo. Apan ako makaingon gayod nga kining libroha maoy talagsaong tabang sa pagtuon. Kahimut-anan ang makapadasig nga mga sambingay ug mga hulagway.” Kana bay imong pagbati bahin sa librong Gitudlo sa Bibliya? Kining tabang sa pagtuon sa Bibliya gilaraw aron matabangan ka sa pagtuman sa sugo ni Jesus: “Busa panglakaw kamo ug paghimog mga tinun-an sa katawhan sa tanang kanasoran, . . . nga magatudlo kanila sa pagtuman sa tanang butang nga akong gisugo kaninyo.”—Mateo 28:19, 20.

² Walay duhaduha, magmaya ang kasingkasing ni Jehova nga makakita sa iyang mga 6.6 ka milyong Saksi nga kinabubut-ong nagsugot sa sugo ni Jesus sa paghimog mga tinun-an. (Proverbio 27:11) Dayag nga gipanalanginan ni Jehova ang ilang mga paningkamot. Pananglitan, sulod sa tuig 2005, ang maayong balita nasangyaw diha sa 235 ka kayutaan ug, sa aberids, kapin sa 6,061,500 ka pagtuon sa Bibliya ang nadumala. Ingong resulta, daghang tawo ‘nakadungog sa pulong sa Diyos ug nagdawat niini, dili ingong pulong sa mga tawo, kondili ingon sa kon unsa kini sa pagkatinuod, ingong pulong sa Diyos.’ (1 Tesalonica 2:13) Sa miaging duha ka tuig, kapin sa katunga sa milyong bag-ong mga tinun-an nagpahiuyon sa ilang kinabuhi sa mga sukdanan ni Jehova ug nagpahinungod sa ilang kaugalingon sa Diyos.

3. Unsang mga pangutana bahin sa paggamit sa librong Gitudlo sa Bibliya ang pagasusihon niining artikuloha?

³ Nakasinati ka bag kalipay di pa dugay tungod sa pagdumalag pagtuon sa Bibliya uban sa usa ka tawo? Sa tibuok kalibotan, aduna pay mga tawo nga may “maputli ug maayong kasingkasing” nga sa dihang makadungog sa pulong sa Diyos magpadayon sa “paghupot niini ug magapamunga uban ang paglahutay.” (Lucas 8:11-15) Atong hisgotan kon sa unsang paagi imong magamit ang librong Gitudlo sa Bibliya diha sa buluhatong paghimog tinun-an. Ang atong panaghisgot magsusi sa tulo ka pangutana: (1) Sa unsang paagi makasugod kag usa ka pagtuon sa Bibliya? (2) Unsang mga metodo sa pagpanudlo  ang labing epektibo? (3) Sa unsang paagi imong matabangan ang usa ka tawo aron mahimong dili lang tumutuon kondili magtutudlo usab sa sinulat nga Pulong sa Diyos, ang Bibliya?

Kon sa Unsang Paagi Makasugod Kag Usa ka Pagtuon sa Bibliya

4. Nganong ang pipila lagmit magpanuko sa pagtuon sa Bibliya, ug sa unsang paagi makatabang ka kanila sa pagpukgo sa ilang pagpanuko?

⁴ Kon patabokon ka sa usa ka lapad nga sapa sa usa lang ka paglukso, lagmit dili ka mosugot. Apan kon butangan ug mga batong-tikanganan nga sal-angsal-ang aron matabok kini, lagmit sulayan nimo ang pagtabok. Sa susamang paagi, ang tawong puliki lagmit magpanuko sa pagtuon sa Bibliya. Ang tagbalay lagmit maghunahuna nga gikinahanglan ang dako kaayong panahon ug paningkamot sa pagtuon niini. Sa unsang paagi makatabang ka kaniya sa pagpukgo sa iyang pagpanuko? Pinaagi sa pagdumalag sunodsunod nga mugbo, matulon-anong mga panaghisgot, imong magamit ang librong Gitudlo sa Bibliya aron agakon ang maong tawo ngadto sa regular nga pagtuon sa Pulong sa Diyos. Kon mangandam ka pag-ayo, ang matag balik-duaw mahisamag batong-tikanganan padulong sa iyang pagpakighigala kang Jehova.

5. Nganong angay nimong basahon ang librong Gitudlo sa Bibliya?

⁵ Ugaling lang, sa dili ka pa motabang ug laing tawo aron makapahimulos siya sa librong Gitudlo sa Bibliya, kinahanglang masinati ka sa bug-os niini. Nabasa mo na ba ang tibuok basahon? Usa ka magtiayon nagdala sa libro sa ilang pagbakasyon ug nagsugod pagbasa niana samtang nagpahayahay sa baybayon. Sa dihang miduol kanila ang usa ka lokal nga babayeng nanindag mga butang alang sa mga turista, siya nakamatikod sa titulong Unsay Tinuod nga Gitudlo sa Bibliya? Iyang giingnan ang magtiayon nga sa miaging pipila ka takna, siya nag-ampo bahin sa maong pangutana mismo, nga nangayog tubag sa Diyos. Ang magtiayon nalipayng mihatag ug kopya sa maong libro ngadto sa babaye. Ikaw ba ‘nakapalit na ug panahon’ sa pagbasa niana, lagmit sa ikaduhang higayon, samtang nagpaabot ug usa ka tawong gikasabot o nagpahulay sa trabahoan o tunghaan? (Efeso 5:15, 16) Kon gihimo mo kana, ikaw masinati sa maong tabang sa pagtuon sa Bibliya ug lagmit mamugna ang kahigayonan sa pagpakigsulti sa uban bahin sa kaundan niini.

6, 7. Sa unsang paagi imong magamit ang librong Gitudlo sa Bibliya sa pagsugod ug mga pagtuon sa Bibliya?

⁶ Sa pagtanyag sa maong libro diha sa publikong pagsangyaw, gamita sa epektibong paagi ang mga ilustrasyon, mga teksto, ug mga pangutana diha sa mga panid 4, 5, ug 6. Pananglitan, makasugod ka sa kabildohay pinaagi sa pagsukna, “Tungod sa tanang suliran nga naagoman sa katawhan karong adlawa, sa imong hunahuna, unsay kasaligang tinubdan sa giya?” Human mamati pag-ayo sa iyang tubag, basaha ang 2 Timoteo 3:16, 17, ug isaysay nga ang Bibliya nagpadayag ug tinuod nga kasulbaran sa mga suliran sa katawhan. Unya ipunting ang pagtagad sa tagbalay sa mga panid 4 ug 5, ug suknaa siya: “Sa mga kahimtang nga gipasundayag niining mga panira, hain ang labing makapaguol kanimo?” Kon itudlo sa tagbalay ang usa ka ilustrasyon, pakupti niya ang libro samtang imong basahon ang tekstong naghisgot niana gikan sa imong Bibliya. Dayon, basaha ang panid 6, ug suknaa ang tagbalay, “Sa unom ka pangutanang gihisgotan sa ubos niining maong panid, hain ang gusto  nimong matubag?” Sa dihang mopilig usa ka pangutana ang maong tawo, ipakita kaniya ang kapitulo nga motubag sa maong pangutana, ibilin ang libro, ug hikaya ang balik-duaw aron inyong mahisgotan ang maong pangutana.

⁷ Dangtan lang ug lima ka minuto ang presentasyon nga bag-o pang gisugyot. Apan nianang lima ka minuto, imo nang masayran ang interes sa tagbalay, mabasa ug mapadapat ang duha ka teksto, ug mahikay ang balik-duaw. Ang imong mubong pagpakigkabildo sa tagbalay lagmit maoy labing madasigon ug makahupay nga kasinatiang iyang nasinati sa dugayng panahon. Ingong resulta, bisan ang tawong puliki lagmit maikag sa paggugol ug pipila pa ka minuto samtang imo siyang tabangan sa paghimo sa iyang sunod nga tikang aron makasubay sa “dalan padulong sa kinabuhi.” (Mateo 7:14) Ngadtongadto, samtang modako ang interes sa tagbalay, angayng pauswagan ang gidugayon sa pagtuon. Kini mahimo pinaagi sa pagsugyot nga kamo manglingkod ug magtuon sa tinong mas taas nga yugto.

Mga Metodo sa Pagpanudlo nga Labing Epektibo

8, 9. (a) Sa unsang paagi imong maandam ang imong gitun-an sa Bibliya sa pagsagubang nga malamposon sa mga kababagan ug mga pagsulay nga lagmit iyang masinati? (b) Asa hikaplagi ang mga materyales nga dili masunog sa kalayo aron matukod ang lig-ong pagtuo?

⁸ Sa dihang ang usa ka tawo mosugod pagsugot kon unsay gitudlo sa Bibliya, lagmit moatubang siyag mga kababagan nga makapugong sa iyang pag-uswag. Si apostol Pablo miingon: “Ang tanan nga nagtinguha sa pagkinabuhi uban ang diyosnong pagkamahinalaron kalangkit ni Kristo Jesus pagalutoson usab.” (2 Timoteo 3:12) Gipanig-ingon ni Pablo ang maong mga pagsulay sa kalayong mout-ot sa menos-ug-kalidad nga mga materyales nga igtutukod apan dili makadaot sa mga materyales nga sama sa bulawan, plata, ug bililhong bato. (1 Corinto 3:10-13; 1 Pedro 1:6, 7) Aron matabangan ang imong gitun-an sa Bibliya sa pag-ugmad sa mga hiyas nga gikinahanglan sa pagsagubang sa mga pagsulay nga lagmit iyang masinati, kinahanglang tabangan mo siya pinaagi sa pagtukod ginamit ang mga materyales nga dili masunog sa kalayo.

⁹ Ang salmista nagpanig-ingon sa “mga pulong ni Jehova” ngadto sa “plata nga dinalisay sa tunawanang hudno diha sa yuta, nga inulay sa makapito.” (Salmo 12:6) Sa pagkatinuod, ang Bibliya nasudlan sa tanang bililhong mga materyales nga magamit sa pagtukod ug lig-ong pagtuo. (Salmo 19:7-11; Proverbio 2:1-6) Ug ang librong Gitudlo sa Bibliya nagpadayag kanimo kon sa unsang paagi mahimong epektibo sa paggamit sa Kasulatan.

10. Sa unsang paagi imong ikapunting ang pagtagad sa gitun-an diha sa Bibliya?

¹⁰ Panahon sa pagtuon, ipunting ang pagtagad sa gitun-an sa Bibliya diha sa mga teksto nga anaa sa matag kapitulo nga inyong ginatun-an. Gamita ang mga pangutana sa pagtabang sa gitun-an nga makasabot sa pangunang mga teksto sa Bibliya ug magpadapat niana sa personal. Mag-amping nga dili siya sultihan kon unsay angay niyang buhaton. Sunda hinuon ang panig-ingnan ni Jesus. Sa dihang siya gisukna sa usa ka tawong batid sa Balaod, si Jesus mitubag: “Unsay nahisulat diha sa Balaod? Unsay imong nabasa?” Ang tawo mitubag pinasukad sa Kasulatan, ug siya gitabangan ni Jesus sa pagsabot kon unsaon pagpadapat ang prinsipyo sa iyang kaugalingon. Pinaagi sa paggamit ug usa ka ilustrasyon, gitabangan usab ni Jesus kadtong tawhana sa pagsabot kon sa unsang paagi siya angayng maapektohan sa maong pagtulon-an. (Lucas 10:25-37) Ang librong Gitudlo sa Bibliya napuno ug yano nga mga ilustrasyon nga imong magamit sa pagtabang sa gitun-an sa pagpadapat sa mga prinsipyo sa Kasulatan sa iyang kaugalingon.

11. Unsa ka daghang materyal ang angay ninyong kobrehan sa matag sesyon sa pagtuon?

¹¹ Ang librong Gitudlo sa Bibliya naggamit ug yano, direktang mga pulong aron mapatin-aw ang Pulong sa Diyos, maingon nga si Jesus nagpasabot sa komplikadong mga ideya pinaagig yano nga mga pulong. (Mateo 7:28, 29) Sunda ang iyang panig-ingnan. Ipahayag ang impormasyon sa yano, tin-aw, ug tukmang paagi. Ayaw dalia pagkobre ang materyal. Hinunoa, ang mga kahimtang ug katakos sa gitun-an maoy magpaigo sa gidaghanon sa mga parapo nga inyong kobrehan sa matag sesyon sa pagtuon. Si Jesus nahibalo sa mga limitasyon sa iyang mga tinun-an ug wala niya ihan-ok kanila ang mas daghang impormasyon kay sa ilang gikinahanglan niadtong panahona.—Juan 16:12.

12. Sa unsang paagi gamiton ang apendise?

¹² Ang librong Gitudlo sa Bibliya adunay apendise nga may 14 ka topiko. Sumala sa panginahanglan sa gitun-an, isip iyang magtutudlo, makaarang ka sa  pagtino kon unsaon paggamit sa labing epektibong paagi ang maong impormasyon. Pananglitan, kon adunay usa ka ulohan nga lisod masabtan sa gitun-an o siya may mga pangutana bahin sa tinong mga ulohan tungod sa iyang kanhing mga gituohan, igo na tingali nga ipunting ang iyang pagtagad diha sa haom nga seksiyon sa apendise ug siya na lang ang magtuon sa maong ulohan. Sa laing bahin, tungod sa panginahanglan sa gitun-an, kinahanglan tingaling inyong tun-an ang materyal. Ang apendise adunay hinungdanong Kasulatanhong mga ulohan, sama sa “‘Kalag’ ug ‘Espiritu’—Unsay Tinuod nga Kahulogan sa Maong mga Termino?” ug “Pag-ila sa ‘Dakong Babilonya.’” Basin buot nimong hisgotan ang maong mga topiko uban sa imong gitun-an. Sanglit walay gitagana nga mga pangutana ang mga ulohang anaa sa apendise, kinahanglang mahibalo ka sa mga impormasyon aron makapatunghag undanon nga mga pangutana.

13. Unsay bahin sa pag-ampo diha sa pagpalig-on sa pagtuo?

¹³ “Gawas nga si Jehova ang magatukod sa balay, kawang lamang ang paghago sa mga magtutukod niini,” nag-ingon ang Salmo 127:1. Busa, samtang mangandam ka sa pagdumalag usa ka pagtuon sa Bibliya, ampo kang Jehova alang sa tabang. Ipabati diha sa mga pag-ampo nga imong litokon sa sinugdan ug kataposan sa matag pagtuon ang imong suod nga relasyon kang Jehova. Dasiga ang gitun-an sa pag-ampo kang Jehova alang sa kaalam sa pagsabot sa Iyang Pulong ug sa kusog sa pagpadapat sa tambag niini. (Santiago 1:5) Kon iyang himoon kana, ang gitun-an malig-on nga makaantos sa mga pagsulay ug magpadayong lig-on sa pagtuo.

Tabangi ang mga Gitun-an sa Bibliya nga Mahimong mga Magtutudlo

14. Unsang pag-uswag ang kinahanglang kab-oton sa mga gitun-an sa Bibliya?

¹⁴ Aron magmasinugtanon ang atong mga gitun-an sa Bibliya sa “tanang butang” nga gisugo ni Jesus sa iyang mga tinun-an, kinahanglan silang mouswag gikan sa pagkamagtutuon sa Pulong sa Diyos ngadto sa pagkamagtutudlo niini. (Mateo 28:19, 20; Buhat 1:6-8) Unsay mahimo nimo sa pagtabang sa gitun-an aron siya mouswag nga mahimong magtutudlo sa Pulong sa Diyos?

15. Nganong angay nimong dasigon ang imong gitun-an sa Bibliya sa pagtambong sa Kristohanong mga tigom?

¹⁵ Sukad gayod sa unang pagtuon, dapita ang gitun-an sa pagtambong sa mga tigom sa kongregasyon uban nimo. Ipatin-aw kaniya nga didto ka sa mga tigom nabansay ingong magtutudlo sa Pulong sa Diyos. Sulod sa ubay-ubayng semana, paggahig pipila ka minuto human sa matag pagtuon sa Bibliya aron ipatin-aw ang programa sa espirituwal nga pagtudlo nga imong nadawat panahon sa nagkalainlaing tigom ug sa mga asembliya. Madasigong hisgoti ang mga kaayohan nga imong nakuha sa maong mga okasyon. (Hebreohanon 10:24, 25) Sa dihang ang gitun-an mosugod pagtambong nga regular sa mga tigom, lagmit siya mahimong magtutudlo sa Pulong sa Diyos.

16, 17. Unsay pipila ka tumong nga mahimong kab-oton sa usa ka gitun-an sa Bibliya?

¹⁶ Tabangi ang gitun-an sa Bibliya sa paghan-ay ug mga tumong nga iyang makab-ot. Pananglitan, dasiga siya sa pagpaambit sa iyang nakat-onan uban sa usa ka higala o paryente. Dugang pa, isugyot nga himoon niyang tumong ang pagbasa sa tibuok Bibliya. Kon imo siyang tabangan sa paghimog eskedyul sa regular nga pagbasa sa Bibliya ug padayong pagsunod niana, ang maong batasan makahatag kaniyag kaayohan sa taas pang panahon human sa iyang pagpabawtismo. Dugang pa, nganong dili isugyot sa gitun-an sa Bibliya nga himoong tumong ang paghinumdom bisag usa lang ka teksto sa Bibliya nga motubag sa usa ka  pangunang pangutana gikan sa matag kapitulo sa librong Gitudlo sa Bibliya? Sa paghimo niana, siya mahimong “usa ka mamumuo nga walay angayng ikaulaw, nga nagagamit sa pulong sa kamatuoran sa hustong paagi.”—2 Timoteo 2:15.

¹⁷ Imbes ipasag-ulo lang sa usa ka gitun-an ang mga teksto nga iyang giandam o ipahayag lang ang diwa niana, dasiga siya sa pagpatin-aw kon sa unsang paagi ang pipila ka bersikulo sa Bibliya mapadapat sa ulohan nga inyong gihisgotan samtang iyang tubagon kadtong mangayog katarongan sa iyang pagtuo. Ang mugbong mga pagbansaybansay lagmit makatabang, nga konohay ikaw iyang paryente o kauban sa trabaho nga gustog katin-awan sa iyang mga gituohan. Samtang magatubag ang gitun-an, ipakita kaniya kon unsaon pagtubag uban ang “kalumo sa buot ug halawom nga pagtahod.”—1 Pedro 3:15.

18. Sa dihang ang gitun-an sa Bibliya takos nang mahimong di-bawtismadong magmamantala, unsay dugang nimong ikatabang kaniya?

¹⁸ Ngadtongadto, ang gitun-an mahimong takos na aron makig-ambit sa pagsangyaw sa kanataran. Ipasiugda nga usa ka pribilehiyo nga siya tugotan sa pagpakig-ambit niining buluhatona. (2 Corinto 4:1, 7) Sa dihang mohukom ang mga ansiyano nga ang gitun-an takos na nga mahimong di-bawtismadong magmamantala, tabangi siya sa pag-andam ug yano nga presentasyon ug dayon kuyogi siya sa pagsangyaw sa kanataran. Magpadayon sa pagsangyaw nga regular uban kaniya diha sa nagkalainlaing bahin sa publikong ministeryo, ug tudloi siya kon unsaon pagpangandam ug paghimog epektibong mga balik-duaw. Ang imong maayong panig-ingnan magmapuslanon.—Lucas 6:40.

‘Luwasa ang Imong Kaugalingon ug Kadtong Mamati Kanimo’

19, 20. Unsang tumong ang angay natong himoon, ug ngano?

¹⁹ Walay duhaduha, gikinahanglan ang paghago aron tabangan ang usa ka tawo nga mahidangat sa “tukmang kahibalo sa kamatuoran.” (1 Timoteo 2:4) Bisan pa niana, pipila ra ang kalipay sa kinabuhi nga ikatandi sa kalipay nga ang usa ka tawo natabangan sa pagsugot kon unsay gitudlo sa Bibliya. (1 Tesalonica 2:19, 20) Sa pagkatinuod, pagkatalagsaon ang pribilehiyo nga mahimong “mga isigkamagbubuhat sa Diyos” niining tibuok-kalibotang buluhaton sa pagpanudlo!—1 Corinto 3:9.

²⁰ Pinaagi ni Jesu-Kristo ug sa gamhanang mga manulonda, hapit nang ipatuman ni Jehova ang dili-paborableng paghukom “kanilang wala makaila sa Diyos ug kanilang wala magsunod sa maayong balita bahin sa atong Ginoong Jesus.” (2 Tesalonica 1:6-8) Nameligro ang mga kinabuhi. Mahimo ba nga himoon nimong tumong ang pagdumalag bisan usa ra ka pagtuon sa Bibliya sa balay nga gamiton ang librong Unsay Tinuod nga Gitudlo sa Bibliya? Samtang makigbahin ka niining buluhatona, aduna kay kahigayonan sa ‘pagluwas sa imong kaugalingon ug niadtong mamati kanimo.’ (1 Timoteo 4:16) Labaw kay sukad masukad, dinalian karon nga atong tabangan ang uban sa pagsugot kon unsay gitudlo sa Bibliya.

[Footnote]

Unsay Imong Nakat-onan?

• Unsay katuyoan sa librong Gitudlo sa Bibliya?

• Sa unsang paagi makasugod kag mga pagtuon sa Bibliya ginamit ang librong Gitudlo sa Bibliya?

• Unsay labing epektibong mga metodo sa pagpanudlo?

• Sa unsang paagi makatabang ka sa usa ka gitun-an nga mahimong magtutudlo sa Pulong sa Diyos?

[Mga Pangutana sa Pagtuon]

[Hulagway sa panid 26]

Gipahimuslan mo ba kining libroha?

[Hulagway sa panid 27]

Ang mubong panaghisgot makapadasig sa usa ka tawo nga mokuhag kahibalo sa Bibliya

[Hulagway sa panid 29]

Unsay imong mahimo aron ipunting ang pagtagad sa gitun-an diha sa Bibliya?

[Hulagway sa panid 30]

Tabangi ang gitun-an sa Bibliya nga mouswag