Bitaw, Sayon Basahon, Apan Tukma Ba?

SA Septiyembre 2005, mainitong giluwatan sa Church of England ang The 100-Minute Bible. Kay gidisenyo nga basahon sulod sa 100 minutos, gipamubo niining bag-ong bersiyon ang Hebreohanong Kasulatan ug gihimong usa ka panid ang matag usa sa 17 ka seksiyon samtang ang Gregong Kasulatan gihimong 33 ka seksiyon, busa sama sa giingon sa usa ka tawo nga nagsusi niana, gikuha niini ang tanang “makalaay nga mga bahin.” Kini sayon basahon, apan kini tukma ba?

Gawas nga wala gamita ang balaang ngalang Jehova, ubay-ubay pang mga sayop ang mamatikdan sa seryosong mga estudyante sa Bibliya. (Salmo 83:18) Pananglitan, ang seksiyon 1 nag-ingon nga ang Diyos “naglalang sa langit ug yuta sulod sa unom ka adlaw nga yugto.” Apan, ang Genesis 1:1, yanong nag-ingon: “Sa sinugdanan gilalang sa Diyos ang mga langit ug ang yuta.” Human niana, ang orihinal nga teksto nag-asoy sa lain pang mga buhat sa Diyos sa paglalang sa mga butang may kalabotan sa yuta, nga mikabat ug unom ka “adlaw,” o mga yugto sa panahon. Dayon, gisuma sa Genesis 2:4 ang tibuok yugto sa paglalang, nga nagtawag niana nga ‘ang adlaw nga si Jehova nga Diyos naghimo sa yuta ug sa langit.’

Sumala pa sa The 100-Minute Bible, si Job, nga usa ka tawong lig-on ug integridad, giatake sa “usa sa mga alagad [sa Diyos], si Satanas, . . . nga mao ang may responsibilidad sa paglihok ingong magsusumbong sa katawhan.” Nakita mo ba ang panagsumpaki dinhi? Ang pulong “Satanas” nagkahulogang “Magsusupak.” Inay usa ka alagad sa Diyos, si Satanas, sa pagkatinuod, maoy pangunang kaaway sa Diyos ug sa iyang kaugalingong pagbuot mipili sa pagsumbong sa katawhan.—Pinadayag 12:7-10.

Unsay ikasulti bahin sa Kristohanon Gregong Kasulatan diha sa The 100-Minute Bible? Diha sa sambingay sa mga karnero ug sa mga kanding, ang bag-ong bersiyon nag-ingon nga kahimut-an ni Jesus kadtong motabang “kang bisan kinsa, bisag unsa pa ka gamay,” samtang ang giingon gayod ni Jesus nga iyang panalanginan mao kadtong mohimog maayo ngadto sa nagasunod sa iyang mga tunob—ang iyang “mga igsoon.” (Mateo 25:40) Ang sumarya sa Pinadayag nag-asoy ngadto sa mga magbabasa niini nga ang “Roma, nga dakong Babilonya, malaglag sa bug-os.” Apan, ang mga estudyante sa Bibliya nahibalo nga wala gipaila diha sa orihinal nga mga sinulat kon unsang nasora ang “Dakong Babilonya.”—Pinadayag 17:15–18:24.

Alang niadtong nagtinguha nga makabaton ug kahibalo bahin sa atong Maglalalang ug makasabot sa iyang katuyoan, dili gayod kapulihan ang kompletong Bibliya. Tinuod, ang pagbasa sa Bibliya magkinahanglan ug kapin sa 100 ka minutos, apan ang pagbuhat niini mohatag ug bililhon kaayong mga kaayohan. (Juan 17:3) Hinaot nga imong dawaton ang tahas sa pagbasa niini ug imong maani ang mga kaayohan.—2 Timoteo 3:16, 17.