Sugilanon sa Kinabuhi

Kon Nganong Ako Malipay sa Paghimog mga Tinun-an

Sumala sa giasoy ni Pamela Moseley

Ang Inglaterra nalangkit na pag-ayo sa Gubat sa Kalibotan II niadtong 1941 sa gidala ko sa akong inahan sa Leicester aron motambong sa usa ka kombensiyon sa mga Saksi ni Jehova. Nakabati mi sa espesyal nga pakigpulong ni Joseph Rutherford bahin sa mga bata. Sa dihang nagpabawtismo si Mama ug ako sa maong kombensiyon, namatikdan kong nalipay pag-ayo kadtong nagtabang kanamo aron mouswag kami sa espirituwal. Wala ko hiamgohi kaniadto ang dakong kalipay nga moresulta sa paghimog mga tinun-an ni Jesu-Kristo.

NAGSUGOD kami pag-uswag sa pagkahimong mga tinun-an sa 1940. Mahinumdoman ko pa ang makalilisang nga adlaw sa Septiyembre 1939 sa dihang misilaob ang Gubat sa Kalibotan II. Nakita ko ang mga luha nga midaligdig sa mga aping sa akong inahan samtang nagsige siyag pangutana, “Ngano bang dili man magmalinawon ang kalibotan?” Ang akong mga ginikanan nakasilbi sa kasundalohan panahon sa Gubat sa Kalibotan I ug nakasinati sila sa makalilisang nga mga panghitabo nianang gubata. Nangutana si Mama sa ministrong Anglikano sa Bristol bahin niana. Miingon lang siya: “Kanunayng may mga gubat sa nangagi ug mao man usab sa umaabot.”

Apan wala madugay human niadto, may usa ka edarang babaye nga mibisita sa among balay. Usa siya ka Saksi ni Jehova. Siya gisukna sa akong inahan sa samang pangutana: “Ngano bang dili man magmalinawon ang kalibotan?” Ang Saksi misaysay nga ang mga gubat maoy bahin sa ilhanan nga kita nagkinabuhi na sa kataposan niining mapintasong sistema sa mga butang. (Mateo 24:3-14) Sa wala madugay ang iyang anak babaye mao na ang nagdumalag pagtuon sa Bibliya kanamo. Silang duha apil sa malipayong mga tumatan-aw sa dihang kami gibawtismohan. Nganong malipay pag-ayo ang mga tawo sa paghimog mga tinun-an? Nasayran  ko kana sa ulahi. Paasoya akog pipila ka pagtulon-an nga akong nakat-onan sa paghimog mga tinun-an sa kapig 65 ka tuig.

Pagkadiskobre sa Kalipay sa Pagpanudlo

Nagsugod ko sa pagpakig-ambit sa pagsangyaw sa Gingharian sa Bristol sa dihang ako 11 anyos pa. Gihatagan ko sa usa ka brader ug ponograpo ug kard sa testimonya ug siya miingon: “Ikaw ang moduaw sa tanang balay sa pikas nga bahin sa kalye.” Busa milakaw ko nga nag-inusara. Siyempre, gikulbaan ko pag-ayo. Akong gipatokar ang girekord nga pakigpulong sa Bibliya ug dayon gipakita ko sa tagbalay ang kard sa testimonya, nga nagdasig sa mga tawo sa pagdawat ug mga basahon bahin sa Bibliya.

Sugod sa katuigang 1950, mas gipasiugda ang pagbasag Bibliya panahon sa among pagbalay-balay. Sa sinugdan, tungod kay maulawon, ako nalisdan sa pagpakigsulti sa mga estranyo ug sa pagpatin-aw sa mga teksto sa Bibliya. Apan ngadtongadto nagmasaligon na ko. Niadtong tungora gayod nagsugod ang akong pagkalipay sa pagsangyaw. Giisip kami sa pipila ka tawo ingong mga ahenteg libro, apan sa dihang amo silang gibasahag mga teksto sa Bibliya ug gipatin-aw kana, ila kaming giila ingong mga magtutudlo sa Pulong sa Diyos. Nagustohan ko pag-ayo kini nga buot kong mas makig-ambit pa niana. Busa sa Septiyembre 1955, ako misulod sa bug-os-panahong ministeryo isip payunir.

Ang Pagkamalahutayon Adunay mga Balos

Ang usa sa unang mga pagtulon-ang nakat-onan ko mao nga adunay mga balos ang malulotong pagkamalahutayon. Usa niana ka higayon, gibinlan kog kopya sa magasing Bantayanang Torre ang usa ka babaye, si Violet Morice. Sa dihang ako siyang gibalik-duaw, iyang giabrehan pag-ayo ang pultahan, nangiyugpos siya, ug namati pag-ayo samtang gipatin-aw ko kaniya ang Kasulatan. Sa matag pagduaw ko kaniya, siya daw interesado kaayo. Ugaling lang, sa gitanyagan ko siyag regular nga pagtuon sa Bibliya, siya miingon: “Dili usa karon. Unya na ko magtuon pagkadagko na sa mga bata.” Nahisagmuyo ko kaayo! Ang Bibliya naghisgot bahin sa “panahon sa pagpangita ug panahon sa pagdawat sa pagkawala.” (Ecclesiastes 3:6) Midesisyon ko nga dili mosurender.

Paglabay sa usa ka bulan, akong gibalikan ug gisaysayan ug pipila ka teksto si Violet. Wala madugay, siya nagtuon na sa Bibliya kada semana diha mismo sa pultahan. Sa kataposan siya miingon: “Dili ba maayong modayon ka?” Si Violet nahimo gayong talagsaon kaayo nga isigkamagtutuo ug personal kong higala! Oo, si Violet nabawtismohan ingong Saksi ni Jehova.

Usa niana ka adlaw, hilabihan ang kakurat ni Violet sa pagkahibalo nga ang iyang bana nagbaligya sa ilang balay nga wala siyay kalibotan ug mibiya kaniya. Ikalipay nga siya nakabatog laing balay niadtong hapona mismo sa tabang sa usa ka Saksing higala. Tungod sa iyang pagkamapasalamaton kang Jehova, midesisyon siya sa paggamit sa nahibilin niyang kinabuhi sa pagpayunir. Sa dihang akong nakita nga siya nahupngan ug kasibot alang sa matuod nga pagsimba tungod sa espiritu ni Jehova, naamgohan ko kon nganong ang paghimog mga tinun-an moresulta sa dakong kalipay. Oo,nahimo kini nga akong karera sa kinabuhi!

Niadtong 1957, si Mary Robinson ug ako giasayn ingong mga payunir sa industriyal nga dapit sa Rutherglen sa Glasgow, Scotland. Tigsangyaw kami bisag gabonon, kusog ang hangin, nag-ulan, ug may niyebe, apan mapuslanon kadto. Usa niana ka adlaw, nahimamat ko si Jessie. Nalipay kong nagtuon sa Bibliya uban niya. Ang iyang bana nga si Wally maoy Komunista, ug sa sinugdan iya akong gilikayan. Sa dihang si Wally nagtuon na sa Bibliya ug nakaamgo nga ang Gingharian sa Diyos magpatungha sa labing maayong kahimtang taliwala sa katawhan, siya nalipay. Ngadtongadto, silang duha nahimong mga tighimog tinun-an.

Ang Unang mga Reaksiyon Mahimong Malimbongon

Among nadawat sa ulahi ang bag-ong asaynment nga mao ang Paisley, Scotland. Usa  niana ka adlaw sa akong pagsangyaw didto, gilambahan kog pultahan sa usa ka babaye. Apan sa taudtaod iya akong gipangita aron mangayog pasaylo. Sa pagbalik ko sa sunod semana, siya miingon: “Gibati ko nga daw ang Diyos ang akong gisirhan ug pultahan mao nga ako kang gipangita.” Pearl ang iyang ngalan. Iya akong giingnan nga grabe ang iyang kahigawad sa iyang mga higala ug mga paryente nga nag-ampo siya nga hatagan unta siya sa Diyos ug tinuod nga higala. “Ug dayon nanuktok ka sa pultahan,” matod niya. “Naamgohan ko na karon nga ikaw mao ang maong tinuod nga higala.”

Dili sayon ang pagpakighigala kang Pearl. Nagpuyo siya sa tuktok sa titip kaayong bungtod, ug kinahanglang tungason ko kana nga magbaktas. Sa dihang ako siyang gikuha sa iyang balay aron patambongon sa iyang unang tigom, ako hapit matumba tungod sa hangin ug ulan. Gilabay ko ang akong payong sa dihang nabungkag kadto. Unom lang ka bulan human nga iya akong gisirhan ug pultahan, nagpabawtismo si Pearl ingong simbolo sa iyang pagpahinungod sa Diyos.

Wala madugay human niadto, ang iyang bana midesisyon sa pagtuon sa Bibliya, ug sa mubong panahon, siya mikuyog kanako sa pagsangyaw sa balay-balay. Sumala sa naandan, nag-ulan niadto. “Ayaw kabalaka,” matod niya. “Motindog kog daghang oras sa ingon niini nga panahon aron lang makatan-awg potbol, busa ako makatindog gayod samtang nag-ulan tungod kang Jehova.” Kanunay kong gidayeg ang pagkadeterminado sa mga taga-Scotland.

Makalilipay gayod nga sa pagbalik ko daghang katuigan sa ulahi, akong nakita nga ang kadaghanan sa akong gitun-an nagmalahutayon gihapon sa pagtuo! Kana mao ang kalipay sa paghimog mga tinun-an. (1 Tesalonica 2:17-20) Niadtong 1966, paglabay sa kapig walo ka tuig nga pagpayunir sa Scotland, ako gidapit sa pagtungha sa Watchtower Bible School of Gilead aron bansayon ingong misyonaryo.

Sa Langyaw nga Natad

Ako giasayn sa Bolivia, sa tropikanhong lungsod sa Santa Cruz, diin may kongregasyong gilangkoban ug mga 50 ka magmamantala. Ang lungsod nagpahinumdom kanako sa Wild West o usa ka wala maugmad nga dapit ingong gihulagway diha sa mga lilas sa Hollywood. Sa paghinumdom, ako naghunahuna nga ako ordinaryo lang nga misyonaryo. Ako wala sukad atakeha ug mga buaya, maliboti ug magubtanong mga panon, mahisalaag sa desyerto, o malunod sa dakong lawod. Apan, alang kanako ang paghimog mga tinun-an mas makapaukyab.

Usa sa unang mga babayeng akong gitun-an sa Bibliya sa Santa Cruz mao si Antonia. Nalisdan ko sa pagtudlo nga ginamit ang Kinatsilang pinulongan. Kas-a niana, ang batang lalaki ni Antonia miingon: “Ma, gituyo ba niya ang pagsultig mga sayop aron mangatawa ta?” Sa ngadtongadto si Antonia nahimong tinun-an, ug mao man usab si Yolanda, ang iyang anak babaye. Si Yolanda may higala, nga nagtuon ug abogasiya nga gianggaan ug Dito, kinsa misugod usab pagtuon sa Bibliya ug sa pagtambong sa among mga tigom. Sa pagpakig-uban kaniya, nakat-onan ko ang laing butang bahin sa pagtudlo sa kamatuoran sa Bibliya: Kinahanglan usahay nga iduso ang mga tawo.

Sa dihang tigpalta na si Dito sa iyang mga pagtuon sa Bibliya, ako miingon: “Dito, dili ka pugson ni Jehova sa pagsuportar sa iyang Gingharian. Kinahanglan kang modesisyon.” Sa dihang mitubag siya nga gusto niyang mag-alagad sa Diyos, ako miingon: “Duna kay mga letrato sa usa ka rebolusyonaryong lider. Ang bisita nga makakita niana moingon ba nga imong gipili ang pagsuportar sa Gingharian sa Diyos?” Kadto ang hinay nga pagduso nga iyang gikinahanglan.

Duha ka semana sa ulahi, nahitabo ang usa ka rebolusyon, ug ang pagpinusilay misugod tali sa mga estudyante sa unibersidad ug sa mga polis. “Mamahawa ta dinhi!” giagda ni Dito ang iyang higala. “Dili! Kini ang dakong adlaw nga atong gipaabot,” mitubag ang iyang higala, nga misakmit ug riple ug miadto sa bubong sa unibersidad. Usa siya sa walo ka higala ni Dito nga namatay niadtong adlawa. Mahanduraw mo ba ang akong kalipay sa pagkakita niining tawhana, si Dito, kinsa namatay na unta kon wala pa siya modesisyon nga mahimong tinuod nga Kristohanon?

Pagkakita sa Paglihok sa Espiritu ni Jehova

Usa niana ka adlaw, ako miagi lang sa usa ka pultahan, kay nagtuo mi nga naduaw na kadtong balaya, sa dihang ako gitawag sa ginang sa balay. Ignacia ang iyang ngalan. Nahibalo siya bahin sa mga  Saksi ni Jehova, apan tungod sa grabeng pagsupak sa iyang bana—usa ka dakog-lawas nga polis nga ginganlag Adalberto—siya wala mouswag sa espirituwal. Nalibog siya bahin sa daghang pagtulon-an sa Bibliya, busa gisugdan ko ang pagtuon sa Bibliya uban niya. Bisan pag si Adalberto determinado sa pagpahunong sa maong pagtuon sa Bibliya, nakahimo ko sa pagpakigsulti kaniya sa taastaas nga panahon bahin sa laing mga ulohan. Kadto maoy unang tikang aron kami magkahigala.

Dako gayod ang akong kalipay sa pagkakita nga si Ignacia nahimong matinagdanong membro sa kongregasyon, nga nag-atiman sa espirituwal ug pisikal nga kaayohan sa daghan nga nagkinahanglag kahupayan. Ngadtongadto, ang iyang bana ug tulo sa ilang mga anak nahimong mga Saksi. Sa pagkatinuod, sa dihang nasabtan na gayod ni Adalberto ang kahulogan sa maayong balita, siya mibalik sa estasyon sa polis ug madasigon kaayong nakigsulti mao nga nakakuha siyag 200 ka suskrisyon sa Ang Bantayanang Torre ug Pagmata! gikan sa mga polis.

Si Jehova ang Nagpatubo

Human sa pag-alagad ug unom ka tuig sa Santa Cruz, ako giasayn sa kaulohang siyudad sa Bolivia, ang La Paz, diin gigugol ko ang misunod nga 25 ka tuig. Sa sinugdan sa katuigang 1970, ang balay sa sangang buhatan sa mga Saksi ni Jehova sa La Paz may 12 lang ka membro. Samtang mikaylap ang pagsangyaw, nga nagkinahanglag mas dagkong mga pasilidad, ang usa ka bag-ong bilding sa sangang buhatan gitukod sa mauswagon kaayong siyudad sa Santa Cruz. Gibalhin didto ang sangang buhatan niadtong 1998, ug ako gidapit nga maapil sa mga kawani sa sangang buhatan, nga kapig 50 ang mga membro karon.

Ang usa lang ka kongregasyon niadto sa Santa Cruz niadtong 1966 nahimong kapig 50 ka kongregasyon karon. Ang 640 ka Saksi sa tibuok Bolivia niadto nahimong duolag 18,000 na karon!

Ikalipay, mabungahon ang akong asaynment sa Bolivia. Bisan pa niana, ako kanunayng madasig sa pagkamatinumanon sa mga isigka-Kristohanon sa bisan diin. Kitang tanan malipay sa pagkakita nga si Jehova nagpanalangin sa buluhaton sa pagsangyaw sa Gingharian. Makalilipay gayod ang pagpakig-ambit sa buluhaton sa paghimog mga tinun-an.—Mateo 28:19, 20.

[Hulagway sa panid 13]

Pagpayunir sa Scotland

[Mga hulagway sa panid 15]

Pag-alagad diha sa sangang buhatan sa Bolivia; (gisukip) graduwasyon sa ika-42 nga klase sa Gilead