Mga Pangutana Gikan sa mga Magbabasa

Unsa ang “gubat . . . sa Diyos nga Labing Gamhanan” sa Har–Magedon, ug unsay resulta unya niini?—Pinadayag 16:14, 16.

Sa yanong pagkasulti, ang gubat sa Har–Magedon maoy umaabot nga tibuok-kalibotang gubat diin ang tinudlong Hari ni Jehova nga si Jesu-Kristo, magalaglag sa mga kaaway sa Diyos. Ang Bibliya nag-ingon nga kining maong mga kaaway, ang “mga hari sa tibuok gipuy-ang yuta,” molihok tungod sa “mga pahayag nga inspirado sa mga demonyo” ug pagatigomon “ngadto sa gubat sa dakong adlaw sa Diyos nga Labing Gamhanan . . . sa dapit nga gitawag sa Hebreohanon ug Har–Magedon.”—Pinadayag 16:14, 16.

Ang dapit diin ang naggubatayng mga partido magtigom dili literal. Ang pulong Har–Magedon, nga gihubad ug “Armagedon” sa ubang mga hubad sa Bibliya, nagkahulogang “Bukid sa Megiddo.” (Pinadayag 16:16) Wala gayoy bukid nga dunay ngalan nga ingon niana. Dugang pa, “ang mga hari sa yuta ug ang ilang kasundalohan” dili mahimong sa literal magtigom sa usa ka dapit. (Pinadayag 19:19) Hinunoa, ang “dapit” nagtumong sa kondisyon o kahimtang diin ang politikanhong mga lider ug ang ilang mga dumadapig pagaagakon—sa usa ka kahimtang sa pagbatok kang Jehova ug sa “mga panon nga didto sa langit” ilalom sa militaryong pagmando sa “Hari sa mga hari ug Ginoo sa mga ginoo,” si Jesu-Kristo.—Pinadayag 19:14, 16.

Labawng hinungdanon, ang terminong “Har–Magedon” nalangkit sa karaang siyudad sa Megiddo sa Israel. Nahimutang sa sidlakan sa Bukid sa Carmelo, ang Megiddo maoy pangunang ruta sa mga negosyante ug mga kasundalohan niadtong panahona. Dinhi usab nahitabo ang dagkong mga gubat. Pananglitan, diha “sa katubigan sa Megiddo” gipildi ni Maghuhukom Barak sa Israel ang gamhanang mga sundalo sa Canaan nga gipangulohan ni Heneral Sisera. (Maghuhukom 4:12-24; 5:19, 20) Nianang lugara usab giparot ni Maghuhukom Gideon ang mga Midianhon. (Maghuhukom 7:1-22) Pinaagi sa paglangkit sa Megiddo sa umaabot nga gubat, ang Bibliya nagpasalig kanato nga ang Diyos, pinaagi sa iyang Anak, bug-os magpukan sa tanang kaawayng mga puwersa.

Unsa man unyay resulta niini? Ang gubat sa Har–Magedon magwala sa tanang korapsiyon ug pagkadaotan dinhi sa yuta. Buksan niini ang dalan alang sa labing mahimayaong yugto sa tibuok kasaysayan sa tawo. (Pinadayag 21:1-4) Ilalom sa mahigugmaong pagdumala sa Gingharian sa Diyos, ang yuta pagahimoong usa ka paraiso diin ang mga matarong mabuhi sa walay kataposan.—Salmo 37:29.