Padayona sa Pagpauswag ang Imong Pagkamapasalamaton
Padayona sa Pagpauswag ang Imong Pagkamapasalamaton
“Pagkabililhon uyamot sa imong mga hunahuna! Oh Diyos, pagkadako gayod sa ilang katibuk-ang gidaghanon!”—SALMO 139:17.
1, 2. Nganong angay natong pabilhan ang Pulong sa Diyos, ug sa unsang paagi gipahayag sa salmista ang iyang pagpabili?
USA kadto ka talagsaong kaplag. Samtang giayo ang templo ni Jehova sa Jerusalem, ang Hataas nga Saserdoteng si Hilkias nakakita sa “basahon sa balaod ni Jehova nga gihatag pinaagi sa kamot ni Moises,” sa walay duhaduha ang orihinal nga kopya nga natapos pagsulat mga 800 ka tuig una pa niana! Mahanduraw ba nimo kon unsay gibati sa mahinadlokon-sa-Diyos nga si Haring Josias sa dihang gitunol kaniya ang maong basahon? Sa pagkatinuod, gipabilhan niya kana ug dihadiha gipabasa kanag kusog kang Sapan nga sekretaryo.—2 Cronicas 34:14-18.
2 Karon, ang Pulong sa Diyos, sa bug-os o sa bahin lang, mabasa na sa bilyonbilyong tawo. Apan, kana ba nakapamenos sa pagkabililhon ug pagkahinungdanon sa Kasulatan? Siyempre, wala! Ang tinuod mao, kini naundan sa mga hunahuna mismo sa Labing Gamhanan, nga gipasulat alang sa atong kaayohan. (2 Timoteo 3:16) Sa pagpahayag sa iyang pagbati sa Pulong sa Diyos, ang salmistang si David misulat: “Alang kanako pagkabililhon uyamot sa imong mga hunahuna! Oh Diyos, pagkadako gayod sa ilang katibuk-ang gidaghanon!”—Salmo 139:17.
3. Unsay nagpakita nga si David maoy tawo nga halalom ug pagsabot sa espirituwal nga mga butang?
3 Ang pagpabili ni David kang Jehova, sa iyang Pulong, ug sa iyang kahikayan alang sa matuod nga pagsimba wala gayod molubad. Ang daghang maanindot nga mga salmo nga gikomposo ni David nagpahayag sa iyang pagbati. Pananglitan, sa Salmo 27:4, siya misulat: “Usa ka butang ang gipangayo ko kang Jehova—kini ang akong pagapangitaon, nga makapuyo ako sa balay ni Jehova sa tanang adlaw sa akong kinabuhi, aron sa pagtan-aw sa pagkakahimut-anan ni Jehova ug sa pagtan-aw nga mapabilhon sa iyang templo.” Sa orihinal nga Hebreohanon, ang ekspresyong “pagtan-aw nga mapabilhon” nagpasabot ug dugayng pagpamalandong, pagsusi, pagtan-aw uban ang kahimuot, kalipay, pagdayeg. Klaro nga si David maoy tawo nga halalom ug pagsabot sa espirituwal nga mga butang nga nagpabili gayod sa espirituwal nga mga tagana ni Jehova ug nagtagamtam sa matag tipik sa espirituwal nga kamatuoran nga gipadayag sa Diyos. Ang iyang ehemplo sa pagkamapabilhon takos nga sundogon.—Salmo 19:7-11.
Magmapasalamaton sa Pribilehiyo nga Nakakat-on sa Kamatuoran sa Bibliya
4. Ngano man nga si Jesus “nalipay sa hilabihan diha sa balaang espiritu”?
4 Ang pagsabot sa Pulong sa Diyos wala mag-agad sa intelihensiya o kalibotanong edukasyon, nga lagmit mopukaw sa garbo. Hinunoa, kini nagdepende sa dili-takos nga kalulot ni Jehova, nga iyang gipakita ngadto sa mapainubsanon, matinud-anog-kasingkasing nga mga tawo nga mahunahunaon sa ilang espirituwal nga panginahanglan. (Mateo 5:3; 1 Juan 5:20) Sa dihang namalandong si Jesus sa kamatuoran nga ang mga ngalan sa pipila ka dili-hingpit nga mga tawo nasulat sa langit, “siya nalipay sa hilabihan diha sa balaang espiritu ug miingon: ‘Ako nagadayeg kanimo sa dayag, Amahan, Ginoo sa langit ug yuta, tungod kay gitagoan mo nga maampingon kining mga butanga gikan sa mga maalamon ug sa mga makinaadmanon, ug nagbutyag niini ngadto sa mga bata.’”—Lucas 10:17-21.
5. Nganong dili angayng pakamenoson sa mga tinun-an ni Jesus ang mga kamatuoran sa Gingharian nga gipadayag kanila?
5 Human litoka kanang kinasingkasing nga pag-ampo, si Jesus miliso ngadto sa iyang mga tinun-an ug miingon: “Malipayon ang mga mata nga nakakita sa mga butang nga inyong nakita. Kay ako magaingon kaninyo, Daghang manalagna ug mga hari nga nagtinguha sa pagkakita sa mga butang nga inyong nakita apan wala makakita niini, ug sa pagkadungog sa mga butang nga inyong nadungog apan wala makadungog niini.” Oo, gidasig ni Jesus ang iyang matinumanong mga sumusunod nga dili pakamenoson ang bililhong mga kamatuoran sa Gingharian nga gipadayag kanila. Kining maong mga kamatuoran wala ipadayag ngadto sa nag-unang mga kaliwatan sa mga alagad sa Diyos, ug tino nga wala kini ibutyag ngadto sa ‘mga maalamon ug makinaadmanon’ sa adlaw ni Jesus!—Lucas 10:23, 24.
6, 7. (a) Unsay atong mga katarongan sa pagpabili sa kamatuoran gikan sa Diyos? (b) Unsang kalainan ang makita karon tali sa matuod ug bakak nga relihiyon?
6 Sa atong adlaw, mas daghan kitag katarongan nga pabilhan ang kamatuoran sa Diyos, kay si Jehova, pinaagi sa “matinumanon ug maalamong ulipon,” naghatag sa iyang katawhan ug mas lalom pa nga pagsabot sa iyang Pulong. (Mateo 24:45; Daniel 12:10) Mahitungod sa panahon sa kataposan, ang manalagnang si Daniel misulat: “Daghan ang magngadto-nganhi, ug ang matuod nga kahibalo modagaya.” (Daniel 12:4) Dili ka ba mouyon nga ang kahibalo sa Diyos ‘midagaya’ karon ug ang mga alagad ni Jehova gitagan-an ug abundang espirituwal nga pagkaon?
7 Pagkadakong kalainan ang atong makita tali sa espirituwal nga kauswagan sa katawhan sa Diyos ug sa relihiyosong kalibog niadtong anaa sa Dakong Babilonya! Tungod niini, daghan nga nahigawad o nayugot sa bakak nga relihiyon ang midangop sa matuod nga pagsimba. Sila mao ang mga karnerohon nga ‘dili buot makaambit sa mga sala sa Dakong Babilonya,’ o ‘dili buot makadawat ug bahin sa iyang mga hampak.’ Si Jehova ug ang iyang mga alagad nagdapit nianang mga tawhana ngadto sa matuod nga Kristohanong kongregasyon.—Pinadayag 18:2-4; 22:17.
Ang mga Mapasalamaton Nagganayan Ngadto sa Diyos
8, 9. Sa unsang paagi ang mga pulong sa Haggeo 2:7 nagakatuman karon?
8 Mahitungod sa iyang espirituwal nga balay sa pagsimba, si Jehova nagtagna: “Uyogon ko ang tanang kanasoran, ug ang tilinguhaong mga butang sa tanang kanasoran manulod; ug pun-on ko kining balaya sa himaya.” (Haggeo 2:7) Kining makapahingangha nga tagna natuman sa panahon ni Haggeo sa dihang ang napasig-uling nahibilin sa katawhan sa Diyos nagtukod pag-usab sa templo sa Jerusalem. Karon, ang mga pulong ni Haggeo adunay mas dakong katumanan maylabot sa dakong espirituwal nga templo ni Jehova.
9 Milyonmilyon na ang nagganayan ngadto sa mahulagwayong templo aron mosimba sa Diyos “uban sa espiritu ug sa kamatuoran,” ug kada tuig gatosan ka libo sa “tilinguhaong mga butang sa tanang kanasoran” ang nagpadayon sa paghugop ngadto niana. (Juan 4:23, 24) Pananglitan, ang tibuok-kalibotang taho sa 2006 nga tuig sa pag-alagad nagpakita nga 248,327 ang nabawtismohan ingong simbolo sa ilang pagpahinungod kang Jehova. Nagpasabot kana nga sa aberids 680 ang nabawtismohan kada adlaw! Ang ilang gugma sa kamatuoran ug ang ilang tinguha nga moalagad kang Jehova ingong mga magmamantala sa Gingharian nagpamatuod nga sila gikabig gayod sa Diyos.—Juan 6:44, 65.
10, 11. Iasoy ang usa ka eksperyensiya nga nagpakita kon sa unsang paagi ang mga tawo misugod sa pagpabili sa kamatuoran sa Bibliya.
10 Daghan niining matinud-anog-kasingkasing nga mga tawo ang nadani sa kamatuoran tungod kay ilang naila ang “kalainan tali sa usa nga matarong ug sa usa nga daotan, tali sa usa nga nagaalagad sa Diyos ug sa usa nga wala mag-alagad kaniya.” (Malaquias 3:18) Tagda ang eksperyensiya ni Wayne ug Virginia, usa ka magtiayon nga Protestante kanhi apan daghag wala-matubag nga mga pangutana bahin sa relihiyon. Sila nayugot sa gubat ug nalibog ug napikal sa dihang ilang nakita ang mga klero nga nagbendisyon sa mga sundalo ug sa mga armas. Samtang nagkatigulang ang maong magtiayon, ilang gibati nga wala na sila panumbalinga sa ilang mga kauban sa simbahan, bisan tuod si Virginia nagtudlo ug Sunday school sulod sa daghang katuigan. “Walay miduaw namo o nagpakitag interes sa among espirituwal nga kahimtang,” matod nila. “Interesado lamang ang simbahan sa among kuwarta. Nahigawad kami.” Misamot ang ilang kahigawad sa dihang ang ilang simbahan nahimong matinugoton sa homoseksuwalidad.
11 Sa kasamtangan, ang apo nga babaye ni Wayne ug Virginia ug dayon ang ilang anak nga babaye nahimong mga Saksi ni Jehova. Bisan tuod sa sinugdan wala makaangay niini si Wayne ug Virginia, sa ulahi nausab ra ang ilang hunahuna ug sila misugot nga magtuon sa Bibliya. “Sulod lamang sa tulo ka bulan,” matod ni Wayne, “mas daghan kamig nakat-onan bahin sa Bibliya kay sa among nakat-onan sulod sa miaging 70 ka tuig! Wala gayod kami mahibalo nga Jehova diay ang ngalan sa Diyos, ug wala usab kamiy kalibotan bahin sa Gingharian ug sa Paraisong yuta.” Wala madugay, kining sinserong magtiayon nagtambongan na sa Kristohanong mga tigom ug nakig-ambit na sa ministeryo. “Gusto namong isulti sa tanan ang kamatuoran,” miingon si Virginia. Sila nabawtismohan niadtong 2005 sa dihang sila kapin na sa 80 anyos. “Among nakaplagan ang grupo sa tinuod nga mga Kristohanon nga interesado gayod kanamo,” matod nila.
Pabilhi ang Pagkahimong ‘Nasangkapan Alang sa Tanang Maayong Buhat’
12. Unsay kanunayng gitagana ni Jehova sa iyang mga alagad, ug unsay kinahanglan natong buhaton aron makabenepisyo niana?
12 Si Jehova kanunayng motabang sa iyang mga alagad sa pagbuhat sa iyang kabubut-on. Pananglitan, si Noe nakadawat ug klaro, espesipikong mga instruksiyon kon unsaon pagtukod ang arka—usa ka proyekto nga kinahanglang himoon sa eksaktong paagi! Ug kadto nahimo gayod sa eksaktong paagi. Ngano? Tungod kay “gibuhat ni Noe ang sumala sa tanan nga gisugo sa Diyos kaniya. Gibuhat niya ang ingon gayod.” (Genesis 6:14-22) Karon usab, si Jehova bug-os nga nagsangkap sa iyang mga alagad sa pagbuhat sa iyang kabubut-on. Siyempre, ang atong pangunang buluhaton mao ang pagsangyaw sa maayong balita sa natukod nang Gingharian sa Diyos ug pagtabang sa mga takos aron mahimong mga tinun-an ni Jesu-Kristo. Ug sama kang Noe, ang atong kalamposan nagdepende sa atong pagkamasinugtanon. Kinahanglang masinugtanon natong sundon ang pagtultol nga gitagana ni Jehova pinaagi sa iyang Pulong ug sa iyang organisasyon.—Mateo 24:14; 28:19, 20.
13. Pinaagi sa unsa nga si Jehova nagabansay kanato?
13 Aron matuman ang maong buluhaton, kinahanglang makakat-on kita sa ‘paggamit sa hustong paagi’ sa atong pangunang galamiton—ang Pulong sa Diyos—nga “mapuslanon sa pagpanudlo, sa pagpamadlong, sa pagpanul-id sa mga butang, sa pagdisiplina diha sa pagkamatarong, aron ang tawo sa Diyos mahimong takos gayod, bug-os nga masinangkapan alang sa tanang maayong buhat.” (2 Timoteo 2:15; 3:16, 17) Sama sa unang siglo, si Jehova nagtagana kanato ug mapuslanong pagbansay pinaagi sa Kristohanong kongregasyon. Karon, diha sa 99,770 ka kongregasyon sa tibuok kalibotan, ang Tunghaan sa Teokratikanhong Ministeryo ug ang Tigom sa Pag-alagad gihimo kada semana aron tabangan kita nga magmaepektibo diha sa ministeryo. Gipabilhan ba nimo kining hinungdanong mga tigom pinaagi sa regular nga pagtambong ug pagpadapat sa mga butang nga imong nakat-onan?—Hebreohanon 10:24, 25.
14. Sa unsang paagi ang mga alagad ni Jehova nagpakita sa ilang pagkamapasalamaton sa pribilehiyo nga mag-alagad sa Diyos? (Ilakip ang mga komento diha sa tsart sa mga panid 27-30.)
14 Milyonmilyon sa katawhan sa Diyos sa tibuok kalibotan ang nagpakita sa ilang pagkamapasalamaton sa pagbansay nga ilang nadawat pinaagi sa pagkamakugihon diha sa ministeryo. Pananglitan, sa 2006 nga tuig sa pag-alagad, 6,741,444 ka magmamantala sa Gingharian ang migugol ug katibuk-ang 1,333,966,199 ka oras diha sa tanang bahin sa buluhaton sa ministeryo, nga naglakip sa pagdumala ug 6,286,618 ka panagtuon sa Bibliya sa balay. Pipila lamang kini sa makapadasig nga mga detalye nga nalista diha sa tibuok-kalibotang taho. Gidapit ka namo sa pagsusi niining maong taho ug madasig niana, maingon nga ang atong unang-siglong mga igsoon sa walay duhaduha nadasig usab pag-ayo sa mga taho bahin sa pagkaylap sa buluhatong pagsangyaw sa ilang panahon.—Buhat 1:15; 2:5-11, 41, 47; 4:4; 6:7.
15. Nganong walay angayng mahigawad bahin sa iyang tibuok-kalag nga pag-alagad kang Jehova?
15 Ang makusog nga singgit sa pagdayeg sa Diyos kada tuig nagbanaag sa halalom nga pagpasalamat sa mga alagad ni Jehova alang sa pribilehiyo nga mailhan siya ug magpamatuod bahin kaniya. (Isaias 43:10) Tinuod, ang halad sa pagdayeg nga gitanyag sa pipila nato ka tigulang, masakiton, o maluyahon nga mga igsoon susama sa duha ka diyot sa babayeng balo. Apan, dili nato kalimtan nga si Jehova ug ang iyang Anak nagpabili gayod sa tanan nga nag-alagad sa Diyos nga tibuok-kalag, samtang ginabuhat nila ang tanan nilang maarangan.—Lucas 21:1-4; Galacia 6:4.
16. Unsang mga galamiton sa pagpanudlo ang gitagana ni Jehova sa di pa dugayng mga panahon?
16 Gawas pa sa pagbansay kanato alang sa ministeryo, si Jehova pinaagi sa iyang organisasyon, nagsangkap kanato ug ekselenteng mga galamiton sa pagpanudlo. Sa di pa dugayng mga dekada, kini naglakip sa mga librong Ang Kamatuoran nga Motultol sa Kinabuhing Dayon, Ikaw Mabuhing Walay Kataposan sa Paraiso sa Yuta, Kahibalo nga Motultol sa Kinabuhing Walay Kataposan ug, sa pagkakaron, Unsay Tinuod nga Gitudlo sa Bibliya? Kadtong tinuod nga nagpabili niining maong mga tagana naggamit pag-ayo niining mga basahona diha sa ministeryo.
Gamita Pag-ayo ang Librong Gitudlo sa Bibliya
17, 18. (a) Unsang mga bahina sa librong Gitudlo sa Bibliya ang gusto nimong ipasiugda diha sa imong ministeryo? (b) Unsay giingon sa usa ka magtatan-aw sa sirkito bahin sa librong Gitudlo sa Bibliya?
17 Uban sa 19 ka kapitulo niini, detalyadong apendise, ug klaro, simpleng pinulongan, ang librong Unsay Tinuod nga Gitudlo sa Bibliya? mapuslanon gayod diha sa ministeryo. Pananglitan, ang kapitulo 12 naghisgot sa ulohang “Pagkinabuhi sa Paagi nga Makapahimuot sa Diyos.” Kining maong kapitulo nagpatin-aw ngadto sa ginatun-an kon sa unsang paagi siya mahimong higala sa Diyos, usa ka relasyon nga wala gani gayod palandonga o isipa sa daghan nga posibleng mabatonan. (Santiago 2:23) Unsay sanong sa mga tawo niining maong giya sa pagtuon sa Bibliya?
18 Usa ka nagapanawng magtatan-aw sa Australia nagtaho nga ang librong Gitudlo sa Bibliya “makadani dayon sa pagtagad mao nga dali rang makig-estorya sa mga tagbalay bahin niana.” Siya midugang nga ang libro sayon kaayong gamiton nga tungod niana “daghang magmamantala sa Gingharian ang nahimong mas masaligon ug malipayon diha sa ministeryo. Mao diay nga ang pipila nagtawag sa maong libro nga ‘Bulawan!’”
19-21. Iasoy ang pipila ka eksperyensiya nga nagpasiugda sa pagkamapuslanon sa librong Gitudlo sa Bibliya.
19 “Gipadala ka gayod sa Diyos,” matod sa usa ka babaye sa Guyana ngadto sa payunir nga brader nga nanuktok sa iyang pultahan. Ang kapuyo sa maong babaye bag-o pang nag-abandonar kaniya ug sa ilang duha ka gagmayng bata. Gipakli sa payunir ang librong Gitudlo sa Bibliya sa kapitulo 1 ug gibasa ug kusog ang parapo 11, ilalom sa sub-ulohang “Unsay Pagbati sa Diyos Bahin sa mga Inhustisya nga Atong Giatubang?” “Natandog kaayo siya sa mga punto niana,” matod sa payunir. “Gani, siya mitindog, miadto sa likod sa iyang tindahan, ug mihilak pag-ayo.” Kining babayhana midawat sa gitanyag nga regular nga pagtuon sa Bibliya uban sa usa ka sister sa maong dapit ug nagpadayon sa pag-uswag.
20 Si José, nga nagpuyo sa Espanya, namatyag asawa tungod sa usa ka aksidente sa trapiko. Migamit siyag droga aron mahupayan, ug nangonsulta usab siya sa mga sikologo. Apan, dili matubag sa mga sikologo ang pangutana nga naghasol pag-ayo kang José: “Nganong gitugotan man sa Diyos nga mamatay ang akong asawa?” Usa niana ka adlaw nahimamat ni José si Francesc, kinsa nagtrabaho usab sa kompaniya nga iyang gitrabahoan. Misugyot si Francesc nga ilang hisgotan ang kapitulo 11 sa librong Gitudlo sa Bibliya, nga nag-ulohang “Nganong Gitugotan sa Diyos ang Pag-antos?” Nakaangay kaayo si José sa Kasulatanhong katin-awan ug sa ilustrasyon bahin sa usa ka magtutudlo ug sa usa ka estudyante. Seryoso siyang nagtuon sa Bibliya, dayon mitambong sa usa ka sirkitong asembliya, ug karon nagtambongan na sa mga tigom sa lokal nga Kingdom Hall.
21 Si Roman, usa ka 40-anyos nga negosyante sa Polandia, may pagtamod gayod sa Pulong sa Diyos. Apan tungod kay okupado kaayo siya sa iyang trabaho, wala kaayo siya mouswag sa iyang pagtuon sa Bibliya. Bisan pa niana, siya mitambong sa usa ka distritong kombensiyon ug nakadawat ug kopya sa librong Gitudlo sa Bibliya. Human niana, dako na ang iyang pag-uswag. Miingon siya: “Niining libroha ang tanang sukaranang mga pagtulon-an sa Bibliya motakdo sa usag usa samag jigsaw puzzle, mao nga bug-os nimo kining masabtan.” Sa pagkakaron, si Roman regular nang nagtuon sa Bibliya ug padayong nag-uswag.
Padayona sa Pagpauswag ang Imong Pagkamapasalamaton
22, 23. Sa unsang paagi makapadayon kita sa pagpakita sa atong pagkamapasalamaton sa paglaom nga gibutang sa atong atubangan?
22 Ingon sa gipatin-aw panahon sa kulbahinam nga “Kaluwasan Haduol Na!” nga Distritong mga Kombensiyon, ang matuod nga mga Kristohanon nangandoy sa “walay kataposang kaluwasan” nga gisaad sa Diyos ug gipaposible pinaagi sa giula nga dugo ni Jesu-Kristo. Ang labing maayong paagi sa pagpakita sa atong kinasingkasing nga pagpasalamat niining bililhong paglaom mao ang pagpabiling hinlo “gikan sa patay nga mga buhat aron makahimo kitag sagradong pag-alagad ngadto sa buhi nga Diyos.”—Hebreohanon 9:12, 14.
23 Oo, usa gayod ka milagro nga ang kapin sa unom ka milyong magmamantala sa Gingharian matinumanong milahutay sa pag-alagad sa Diyos sa dihang kaylap kaayo ang pagpit-os nga magmahunahunaon lamang sa kaugalingon. Pamatuod usab kini nga ang mga alagad ni Jehova mapasalamaton kaayo sa kadungganan nga mag-alagad sa Diyos, nga nahibalo nga ang ilang “paghago dili makawang may kalabotan sa Ginoo.” Hinaot nga magpadayon pag-uswag ang maong pagkamapasalamaton!—1 Corinto 15:58; Salmo 110:3.
Unsay Imong Tubag?
• Unsay gitudlo kanato sa salmista bahin sa pagpakitag pagpabili sa Diyos ug sa iyang espirituwal nga mga tagana?
• Sa unsang paagi ang mga pulong sa Haggeo 2:7 nagakatuman karon?
• Sa unsang paagi si Jehova nagsangkap sa iyang mga alagad sa pag-alagad kaniya sa epektibong paagi?
• Unsay imong mahimo sa pagpakita sa imong pagkamapasalamaton sa pagkamaayo ni Jehova?
[Mga Pangutana sa Pagtuon]
[Chart sa panid 27-30]
2006 TUIG SA PAG-ALAGAD NGA TAHO SA MGA SAKSI NI JEHOVA SA TIBUOK KALIBOTAN
(Tan-awa ang bound volume)
[Mga hulagway sa panid 25]
Si Jehova bug-os nga nagsangkap kanato sa pagbuhat sa iyang kabubut-on