Si Amos​—Tigpamupo o Tigtudyok sa mga Igos?

NIADTONG ikasiyam nga siglo W.K.P., ang manalagna nga si Amos gimandoan sa daotan nga si Amazias, usa ka saserdote nga nagsimbag baka, sa paghunong sa pagpanagna sa Israel. Si Amos mitutol, nga miingon: “Ako usa ka tig-alima sa mga hayop ug tigtudyok sa mga igos sa kahoyng sikomoro. Ug ako gikuha ni Jehova gikan sa pagkamagbalantay sa panon sa mga hayop, ug si Jehova miingon kanako, ‘Lakaw, panagna ngadto sa akong katawhang Israel.’” (Amos 7:14, 15) Oo, gisugo ni Jehova si Amos ingong manalagna; kadto dili kaugalingon niyang kabubut-on. Apan unsay gipasabot ni Amos sa dihang siya miingon nga siya “tigtudyok” sa mga igos sa kahoyng sikomoro?

Ang Hebreohanong pulong nga gihubad ug tigtudyok kausa ra makita sa Bag-ong Kalibotang Hubad. Ang ubang mga hubad sa Bibliya naghubad niini nga “tigpamupo,” “tigtikad,” “tigpul-ong,” o “tigtanom,” imbes “tigtudyok,” sa mga igos sa sikomoro. Apan, ang basahon nga Economic Botany nag-ingon nga ang haom nga hubad sa maong termino maoy “tigtusok” tungod kay kining pulonga nagpaila sa usa ka linaing aksiyon sa magtitikad sa mga igos sa sikomoro.

Ang pagtudyok o pagtusok sa mga igos sa sikomoro aron kini adunay gagmayng mga garas ilado kaayo sa Ehipto ug Cipro sukad pa sa kakaraanan. Ang pagtusok o pagtudyok wala na buhata karon sa Israel tungod kay aduna na may laing mga klase sa igos nga gipananom nianang yutaa. Hinunoa, ang pagtudyok ug mga igos gihimo sa mga Israelinhon sa panahon ni Amos, kay ang mga klase sa sikomoro nga nanubo sa Israel niadtong panahona naggikan man sa Ehipto.

Lagmit, ang pagtudyok sa mga igos magpaarang niini sa pagsuhop sa tubig aron mahimo kining dugaon. Kini magpauswag usab sa produksiyon sa gas nga ethylene, nga makapahinog ug dali sa igos, nga mopatunghag mas dagko ug mas tam-is nga bunga. Dugang pa, ang mga insekto dili makadaot sa bunga kay dali ra man kining mahinog.

Bisan pa sa iyang ubos nga kagikan ingong magbalantay sa karnero ug tigtudyok sa mga igos, si Amos wala mahadlok sa iyang mga kaaway. Hinunoa, siya maisogong nagpahayag sa mensahe sa paghukom ni Jehova batok sa Israel. Pagkamaayong panig-ingnan alang sa mga alagad sa Diyos karon, kinsa kinahanglang magmantala usab sa usa ka dili-popular nga mensahe!—Mateo 5:11, 12; 10:22.