Si Jehova Usa ka Mapabilhong Diyos

“Ang Diyos dili kay dili-matarong nga kalimtan ang inyong buhat ug ang gugma nga inyong gipakita alang sa iyang ngalan.”—HEBREOHANON 6:10.

1. Sa unsang paagi gipakita ni Jehova ang iyang pagpabili sa Moabihanong si Ruth?

 SI Jehova dulot nga nagpabili sa mga paningkamot niadtong sinserong nagtinguha sa pagbuhat sa iyang kabubut-on, ug siya dagayang nagaganti kanila. (Hebreohanon 11:6) Ang matinumanong tawo nga si Boaz nasinati niining talagsaong bahin sa personalidad sa Diyos, kay siya miingon sa Moabihanong si Ruth, kinsa mahigugmaong nag-atiman sa iyang biyuda nga ugangan: “Hinaot nga gantihan ni Jehova ang imong gibuhat, ug hinaot nga adunay hingpit nga suhol alang kanimo gikan kang Jehova.” (Ruth 2:12) Gipanalanginan ba sa Diyos si Ruth? Oo! Sa pagkatinuod, ang iyang sugilanon natala diha sa Bibliya! Dugang pa, siya naminyo kang Boaz ug nahimong katigulangan ni Haring David ug ni Jesu-Kristo. (Ruth 4:13, 17; Mateo 1:5, 6, 16) Usa lamang kana sa daghang pananglitan diha sa Bibliya nga nagpakita sa pagpabili ni Jehova sa iyang mga alagad.

2, 3. (a) Unsay nakapatalagsaon sa pagpakitag pagpabili ni Jehova? (b) Nganong makahimo man si Jehova sa pagpadayag ug tinuod nga pagpabili? Iilustrar.

² Isipon ni Jehova nga pagkadili-matarong sa iyang bahin kon dili siya magpakitag pagpabili. Nag-ingon ang Hebreohanon 6:10: “Ang Diyos dili kay dili-matarong nga kalimtan ang inyong buhat ug ang gugma nga inyong gipakita alang sa iyang ngalan, sa pagkaagi nga kamo nag-alagad sa mga balaan ug nagpadayon sa pag-alagad.” Ang nakapatalagsaon niining maong pahayag mao nga nagpabili ang Diyos sa debotadong mga tawo bisan pag sila mga makasasala ug nakabsan sa iyang himaya.—Roma 3:23.

³ Tungod sa atong pagkadili-hingpit, bation tingali nato nga ang atong mga buhat sa diyosnong pagkamahinalaron walay bili ug dili takos sa panalangin sa Diyos. Apan, si Jehova nakasabot gayod sa atong mga motibo ug mga sirkumstansiya, ug pabilhan gayod niya ang atong tibuok-kalag nga pag-alagad. (Mateo 22:37) Sa pag-ilustrar: Nakita sa inahan diha sa iyang lamesa ang usa ka regalo—usa ka baratohon nga kuwentas. Mahimong dili niya pabilhan ang regalo ug ipadaplin lang kini. Apan, nabasa niya diha sa gisukip nga kard nga ang regalo gikan diay sa iyang batang babaye, kinsa migasto sa tanang tinigom niini aron mapalit ang kuwentas. Niining tungora lahi na ang panglantaw sa inahan sa maong gasa. Tingali nga magluhaluha pa ang iyang mata, iyang halogon ang iyang anak ug ipahayag ang iyang kinasingkasing nga pagpasalamat.

4, 5. Sa unsang paagi gisundog ni Jesus si Jehova sa pagpakitag pagpabili?

⁴ Tungod kay nahibalo gayod si Jehova sa atong mga motibo ug mga limitasyon, pabilhan niya kon ihatag nato kaniya ang atong kinamaayohan, gamay man kana o dako. Bahin niini, si Jesus maoy hingpit nga sumbalik-silaw sa iyang  Amahan. Hinumdomi ang asoy sa Bibliya bahin sa duha ka diyot sa babayeng balo. “Sa miyahat [si Jesus], nakita niya ang mga dato nga nanghulog sa ilang mga gasa sa mga panudlanag bahandi. Unya nakita niya ang usa ka kabos nga babayeng balo nga naghulog ug duha ka gagmayng sensilyo nga kubos kaayog bili, ug siya miingon: ‘Sa pagkatinuod sultihan ko kamo, Kining babayeng balo, bisan kabos, naghulog ug labaw pa kay kanilang tanan. Kay silang tanan naghulog ug mga gasa gikan sa ilang mga sobra, apan kining bayhana gikan sa iyang kawalad-on naghulog sa tanan niyang panginabuhian.’”—Lucas 21:1-4.

⁵ Oo, tungod kay nahibalo si Jesus sa kahimtang sa babaye—nga siya biyuda ug kabos—iyang nasabtan ang tinuod nga bili sa gasa niini, ug iya kanang gipabilhan pag-ayo. Mao man usab si Jehova. (Juan 14:9) Dili ba makapadasig ang pagkahibalo nga bisan unsay imong mga sirkumstansiya, mahimong mabatonan nimo ang pag-uyon sa atong mapabilhong Diyos ug sa iyang Anak?

Gigantihan ni Jehova ang Mahinadlokon-sa-Diyos nga Etiopianhon

6, 7. Ngano ug sa unsang paagi gipakita ni Jehova ang iyang pagpabili kang Ebedmelek?

⁶ Subli-subling gipakita diha sa Kasulatan nga si Jehova nagaganti niadtong nagabuhat sa iyang kabubut-on. Tagda ang iyang pakiglabot sa mahinadlokon-sa-Diyos nga Etiopianhong si Ebedmelek, nga katalirongan ni Jeremias ug sulugoon sa panimalay sa dili-matinumanong Haring Zedekias sa Juda. Nasayran ni Ebedmelek nga ang mga prinsipe sa Juda dili-makataronganong nagpasakag sumbong nga si manalagnang Jeremias mirebelde sa kagamhanan ug nagtambog kaniya sa usa ka atabay, aron mamatay didto sa gutom. (Jeremias 38:1-7) Kay nahibalo nga gidumtan pag-ayo si Jeremias tungod sa mensahe nga iyang gisangyaw, gipameligro ni Ebedmelek ang iyang kinabuhi ug mihangyo siya sa hari. Ang Etiopianhon maisogong misulti: “Oh akong ginoo nga hari, kining mga tawhana nakahimo ug daotan sa tanan nga ilang gibuhat kang Jeremias nga manalagna, nga ilang gitambog sa atabay, aron siya mamatay didto tungod sa gutom.” Sa sugo sa hari, nagkuha si Ebedmelek ug 30 ka lalaki ug giluwas ang manalagna sa Diyos.—Jeremias 38:8-13.

 ⁷ Nakita ni Jehova nga si Ebedmelek adunay pagtuo, nga nakatabang kaniya sa pagbuntog sa bisan unsang kahadlok nga iya tingaling gibati. Busa, gipakita ni Jehova ang iyang pagpabili ug miingon siya kang Ebedmelek pinaagi kang Jeremias: “Ania, tumanon ko ang akong mga pulong bahin niining siyudara alang sa katalagman ug dili alang sa kaayohan . . . Ug luwason ko ikaw nianang adlawa, . . . ug dili ka itugyan ngadto sa kamot sa mga tawo nga imo mismong gikahadlokan. Kay ako sa walay pakyas magtagana kanimo ug kaikyasan . . . ; ug tino nga mabatonan mo ang imong kalag ingon nga inagaw, tungod kay ikaw misalig kanako.” (Jeremias 39:16-18) Oo, giluwas ni Jehova si Ebedmelek, maingon man si Jeremias, gikan sa daotang mga prinsipe sa Juda ug sa ulahi gikan sa mga Babilonyanhon, nga naglumpag sa Jerusalem. “[Si Jehova] nagabantay sa mga kalag sa mga maunongon kaniya; siya nagaluwas kanila gikan sa kamot sa mga daotan,” nag-ingon ang Salmo 97:10.

“Ang Imong Amahan nga Nagatan-aw sa Tago Magabalos Kanimo”

8, 9. Ingon sa gipasundayag ni Jesus, unsang matanga sa mga pag-ampo ang pabilhan ni Jehova?

⁸ Ang laing pamatuod nga pabilhan ni Jehova ang atong pagpakitag diyosnong pagkamahinalaron makita diha sa giingon sa Bibliya bahin sa pag-ampo. “Ang pag-ampo sa mga matul-id makapahimuot [sa Diyos],” miingon ang maalamong tawo. (Proverbio 15:8) Sa adlaw ni Jesus daghang pangulo sa relihiyon ang nag-ampo sa publiko, dili tungod sa tiunayng pagkadiyosnon, kondili sa tinguha nga dayegon sila sa mga tawo. “Sila nakabaton na sa ilang bug-os nga ganti,” miingon si Jesus. Dayon, gihatagan niyag instruksiyon ang iyang mga sumusunod: “Apan ikaw, sa dihang ikaw mag-ampo, sulod sa imong kaugalingong lawak ug, human masirhi ang imong pultahan, pag-ampo sa imong Amahan nga anaa sa tago; unya ang imong Amahan nga nagatan-aw sa tago magabalos kanimo.”—Mateo 6:5, 6.

⁹ Siyempre, wala sawaya ni Jesus ang publikong pag-ampo, kay siya mismo nag-ampo sa publiko sa pipila ka higayon. (Lucas 9:16) Pabilhan gayod ni Jehova kon kita moampo kaniya nga kinasingkasing, dili aron dayegon sa uban. Sa pagkatinuod, ang atong pribadong mga pag-ampo maoy maayong timailhan sa kalalom sa atong gugma sa Diyos ug sa atong pagsalig kaniya. Busa, dili ikatingala nga si Jesus subsob nga mangitag hilit nga dapit sa dihang mag-ampo. Kas-a gibuhat niya kini “sayo sa buntag, samtang ngitngit pa.” Sa laing higayon, “siya mitungas sa bukid nga siya ra aron mag-ampo.” Ug sa wala pa niya pilia ang iyang 12 ka apostoles, gigugol ni Jesus ang tibuok gabii nga nag-inusara sa pag-ampo.—Marcos 1:35; Mateo 14:23; Lucas 6:12, 13.

10. Sa dihang ang atong mga pag-ampo nagbanaag ug pagkasinsero ug dulot nga tinguha nga pahimut-an ang Diyos, sa unsa kita makaseguro?

¹⁰ Tino nga si Jehova namati gayod sa kinasingkasing nga mga pangamuyo sa iyang Anak! Sa pagkatinuod, may mga panahon nga si Jesus nag-ampo “uban ang makusog nga mga pagtuaw ug mga luha, ug gidungog siya nga may pag-uyon tungod sa iyang diyosnong kahadlok.” (Hebreohanon 5:7; Lucas 22:41-44) Sa dihang ang atong mga pag-ampo nagbanaag ug susamang pagkasinsero ug dulot nga tinguha nga pahimut-an ang Diyos, makaseguro kita nga ang atong langitnong Amahan mamati pag-ayo ug magpabili niana. Oo, “si Jehova haduol kanilang tanan . . . nga nagatawag kaniya sa kamatinud-anon.”—Salmo 145:18.

11. Unsay pagbati ni Jehova labot sa atong ginabuhat sa tago?

¹¹ Kon pabilhan ni Jehova ang atong pag-ampo kaniya sa tago, pabilhan gayod usab niya kon kita motuman kaniya bisan sa tago! Oo, nahibalo si Jehova kon unsay atong ginabuhat sa tago. (1 Pedro 3:12) Sa pagkatinuod, ang atong pagkamatinumanon ug pagkamasinugtanon sa dihang kita nag-inusara maoy maayong timailhan nga kita adunay “bug-os nga kasingkasing” ngadto kang Jehova, usa ka kasingkasing nga putli ug motibo ug lig-ong mobarog dapig sa kon unsay matarong. (1 Cronicas 28:9) Makapalipay gayod sa kasingkasing ni Jehova ang maong panggawi!—Proverbio 27:11; 1 Juan 3:22.

12, 13. Sa unsang paagi maampingan nato ang atong hunahuna ug kasingkasing ug mahisama sa matinumanong tinun-an nga si Natanael?

¹² Busa, ang matinumanong mga Kristohanon maglikay gayod sa pagbuhat ug tinagong mga  kasal-anan nga makahugaw sa hunahuna ug kasingkasing, sama sa pagtan-awg pornograpiya ug kapintasan. Bisan tuod ang pipila ka sala dili makita sa ubang mga tawo, kita nahibalo nga “ang tanang butang hubo ug binuksan sa mga mata niya nga kaniya manubag kita.” (Hebreohanon 4:13; Lucas 8:17) Pinaagi sa pagpaningkamot sa paglikay sa mga butang nga dili-makapahimuot kang Jehova, atong mahuptan ang hinlong konsensiya ug malipay kita sa pagkahibalo nga atong nabatonan ang pag-uyon sa Diyos. Oo, pabilhan gayod ni Jehova ang tawo nga “nagalakaw nga walay-ikasaway ug nagabuhat sa pagkamatarong ug nagasulti sa kamatuoran diha sa iyang kasingkasing.”—Salmo 15:1, 2.

¹³ Apan, sa unsang paagi maampingan nato ang atong hunahuna ug kasingkasing diha sa kalibotan nga puno sa pagkadaotan? (Proverbio 4:23; Efeso 2:2) Gawas pa sa bug-os nga pagpahimulos sa tanang espirituwal nga tagana, kinahanglang maningkamot gayod kita sa pagsalikway sa kon unsay daotan ug pagbuhat sa kon unsay maayo, nga molihok dayon aron ang sayop nga mga tinguha dili molambo ug mosangpot sa pagpakasala. (Santiago 1:14, 15) Hunahunaa kon unsa ka dako ang imong kalipay kon si Jesus maghubit kanimo sama sa paghubit niya kang Natanael: “Tan-awa, [usa ka lalaki] nga kaniya walay limbong.” (Juan 1:47) Si Natanael, nga gitawag usab ug Bartolome, nakapribilehiyo sa ulahi nga mahimong usa sa 12 ka apostoles ni Jesus.—Marcos 3:16-19.

“Maluluy-on ug Matinumanong Hataas nga Saserdote”

14. Unsay kalainan sa reaksiyon ni Jesus sa gibuhat ni Maria ug sa reaksiyon sa uban?

¹⁴ Sanglit si Jesus mao “ang larawan sa dili-makita nga Diyos,” si Jehova, siya hingpit gayod nga nagsundog sa iyang Amahan sa pagpakitag pagpabili niadtong nag-alagad sa Diyos uban ang hinlo nga kasingkasing. (Colosas 1:15) Pananglitan, lima ka adlaw una pa itugyan ang iyang kinabuhi, si Jesus ug ang pipila sa iyang mga tinun-an giabiabi diha sa panimalay ni Simon sa Betania. Pagkagabii, si Maria, nga igsoon ni Lazaro ug Marta, “mikuha ug usa ka libra sa pinahumotan nga lana, lunsay nga nardo, nga mahal kaayo,” (katumbas sa halos usa ka tuig nga suhol), ug gibubo niya kini sa ulo ug mga tiil ni Jesus. (Juan 12:3) “Nganong giusikan man kini?” miingon ang pipila. Apan, lahi ang panglantaw ni Jesus sa gibuhat ni Maria. Gilantaw niya kini ingong buhat nga nagpakitag talagsaong pagkamanggihatagon ug may lalom nga kahulogan tungod kay hapit na siyang mamatay ug ilubong. Busa, inay sawayon si Maria, gipasidunggan siya ni Jesus. Miingon siya: “Bisan diin gani sa tibuok kalibotan igawali kining maayong balita, ang gibuhat niini nga babaye igaasoy usab ingon nga paghandom kaniya.”—Mateo 26:6-13.

15, 16. Sa unsang paagi nakabenepisyo kita sa pagkinabuhi ug pag-alagad ni Jesus sa Diyos ingong tawo?

¹⁵ Pagkadako sa atong pribilehiyo nga makabaton ug Pangulo nga mapabilhon kaayo sama kang Jesus! Sa pagkatinuod, ang kinabuhi ni Jesus ingong tawo nag-andam kaniya sa buluhaton nga gitagana ni Jehova kaniya—ang pag-alagad ingong Hataas nga Saserdote ug Hari, una sa kongregasyon sa mga dinihogan ug dayon sa kalibotan.—Colosas 1:13; Hebreohanon 7:26; Pinadayag 11:15.

¹⁶ Sa wala pa siya moanhi sa yuta, si Jesus diha nay dulot nga kaikag ug linaing kahinangop sa mga tawo. (Proverbio 8:31) Pinaagi sa pagkinabuhi ingong tawo, mas bug-os niyang nasabtan kon sama sa unsa ang pag-antos ug paglahutay sa mga pagsulay nga atong naagoman diha sa atong pag-alagad sa Diyos. Misulat si apostol Pablo: “Kinahanglan nga [si Jesus] mahisama sa iyang ‘mga igsoon’ sa tanang paagi, aron siya mahimong maluluy-on ug matinumanong hataas nga saserdote . . . Tungod kay siya nag-antos sa dihang gisulayan, siya makaarang sa pagtabang kanila nga ginasulayan.” Si Jesus “mobati sa atong mga kaluyahon” tungod kay siya “nasulayan sa tanang paagi sama kanato, apan walay sala.”—Hebreohanon 2:17, 18; 4:15, 16.

17, 18. (a) Unsay gipadayag sa mga sulat ngadto sa pito ka kongregasyon sa Asia Minor bahin sa giladmon sa pagpabili ni Jesus? (b) Alang sa unsa giandam kadtong maong dinihogang mga Kristohanon?

¹⁷ Human sa iyang pagkabanhaw, nadayag ang labaw nga pagsabot ni Jesus sa mga pagsulay nga naagoman sa iyang mga sumusunod. Tagda ang iyang mga sulat ngadto sa pito ka kongregasyon sa Asia Minor, nga gisulat ni apostol Juan. Ngadto sa  kongregasyon sa Smirna, si Jesus miingon: “Nahibalo ako sa imong kasakitan ug kakabos.” Sama rang miingon si Jesus nga ‘Nasabtan gayod nako ang imong mga problema; nahibalo ko kon unsay imong naagoman.’ Ug tungod kay siya mismo nag-antos hangtod sa kamatayon, siya mabination ug may awtoridad nga miingon: “Pamatud-i ang imong kaugalingon nga matinumanon bisan hangtod sa kamatayon, ug igahatag ko kanimo ang purongpurong sa kinabuhi.”—Pinadayag 2:8-10.

¹⁸ Ang mga sulat ngadto sa pito ka kongregasyon dunay daghang pahayag nga nagpakita nga si Jesus nahibalo gayod sa mga pagsulay nga naagoman sa iyang mga tinun-an ug mapabilhon gayod siya sa ilang paghupot ug integridad. (Pinadayag 2:1–3:22) Hinumdomi nga ang gisultian ni Jesus maoy dinihogang mga Kristohanon nga may paglaom nga magmando uban kaniya sa langit. Sama sa ilang Ginoo, sila giandam alang sa ilang hamiling papel sa pagtabang sa pagpadapat, uban ang tumang pagkamabination, sa mga benepisyo sa halad lukat ni Kristo ngadto sa masakitong katawhan.—Pinadayag 5:9, 10; 22:1-5.

19, 20. Sa unsang paagi kadtong naglangkob sa “dakong panon” nagpakita sa ilang pagkamapasalamaton kang Jehova ug sa iyang Anak?

¹⁹ Siyempre, ang gugma ni Jesus alang sa iyang dinihogang mga sumusunod gipakita usab ngadto sa iyang maunongong “ubang mga karnero,” nga milyonmilyon niana karon naglangkob sa umaabot nga “dakong panon . . . gikan sa tanang kanasoran,” nga makalabang-buhi sa nagsingabot nga “dakong kasakitan.” (Juan 10:16; Pinadayag 7:9, 14) Kini sila nagpanon ngadto sa kiliran ni Jesus tungod kay mapasalamaton sila sa iyang halad lukat ug sa ilang paglaom nga kinabuhing dayon. Sa unsang paagi gipakita nila ang ilang pagkamapasalamaton? Gibuhat nila kana pinaagi sa ‘paghatag sa Diyos ug sagradong pag-alagad adlaw ug gabii.’—Pinadayag 7:15-17.

²⁰ Ang tibuok-kalibotang taho sa 2006 nga tuig sa pag-alagad, nga gipakita diha sa mga panid 27 hangtod sa 30, klarong nagpamatuod nga kining matinumanong mga ministro nagahatag gayod kang Jehova ug “sagradong pag-alagad adlaw ug gabii.” Sa pagkatinuod, nianang tuiga, sila ug ang nahibilin sa dinihogang mga Kristohanon migugol ug 1,333,966,199 ka oras diha sa publikong ministeryo—katumbas sa kapin sa 150,000 ka tuig!

Padayon sa Pagpakitag Pagkamapasalamaton!

21, 22. (a) Maylabot sa pagpakitag pagkamapasalamaton, nganong kinahanglan gayong magbantay ang mga Kristohanon karon? (b) Unsay hisgotan sa sunod nga artikulo?

²¹ Sa pagpakiglabot sa dili-hingpit nga mga tawo, si Jehova ug ang iyang Anak nagpakita ug halalom kaayong pagpabili. Apan, ikasubo nga ang kadaghanan sa katawhan wala kaayo magtagad sa Diyos, nga nagsentro hinuon sa ilang pagtagad diha sa ilang mga kalihokan. Sa paghubit sa mga tawo nga nagkinabuhi sa “kataposang mga adlaw,” si Pablo misulat: “Ang mga tawo unya magmahigugmaon sa ilang kaugalingon, magmahigugmaon sa salapi, . . . dili-mapasalamaton.” (2 Timoteo 3:1-5) Pagkalahi nianang mga tawhana sa matuod nga mga Kristohanon, kinsa pinaagi sa kinasingkasing nga pag-ampo, kinabubut-ong pagsugot, ug tibuok-kalag nga pag-alagad nagpakita sa ilang pagkamapasalamaton sa tanan nga nahimo sa Diyos alang kanila!—Salmo 62:8; Marcos 12:30; 1 Juan 5:3.

²² Sa sunod nga artikulo, atong hisgotan ang pipila sa daghang espirituwal nga mga tagana nga mahigugmaong gihatag ni Jehova kanato. Samtang palandongon nato kining ‘maayong mga gasa,’ hinaot nga mas molalom pa ang atong pagkamapasalamaton.—Santiago 1:17.

Unsay Imong Tubag?

• Sa unsang paagi gipakita ni Jehova nga siya usa ka mapabilhong Diyos?

• Sa unsang paagi mapalipay nato ang kasingkasing ni Jehova diha sa tago?

• Sa unsang paagi gipakita ni Jesus ang pagpabili?

• Sa unsang paagi ang pagkinabuhi ingong tawo nakatabang kang Jesus nga mahimong mabination ug mapabilhong magmamando?

[Mga Pangutana sa Pagtuon]

[Hulagway sa panid 17]

Maingon nga magustoan sa usa ka ginikanan ang simpleng pagpahayag sa iyang anak ug gugma, pabilhan ni Jehova kon ihatag nato kaniya ang atong kinamaayohan