Unsay Imong Makat-onan Gikan sa mga Bata?

“GABINATA man ka!” Kon kita ang sultihan niana, lagmit masuko kita. Bisan pag makalingaw ang mga bata, sila dili pa hamtong, kulang sa kasinatian ug kaalam nga sagad mag-agad sa pangedaron.—Job 12:12.

Apan, kas-a giingnan ni Jesus ang iyang mga tinun-an: “Sa pagkatinuod ako magaingon kaninyo, Gawas kon kamo motalikod ug mahimong sama sa mga bata, dili gayod kamo makasulod sa gingharian sa mga langit.” (Mateo 18:3) Unsay gipasabot ni Jesus? Unsang mga hiyas ang anaa sa mga bata nga angayng sundogon sa mga hamtong?

Pag-ugmad sa Pagkamapaubsanon nga Sama sa Iya sa Bata

Tagda ang situwasyon nga nakatukmod kang Jesus sa pagsulti niana. Pag-abot nila sa Capernaum human sa taas nga panaw, gipangutana ni Jesus ang iyang mga tinun-an: “Unsay inyong gilalisan sa dalan?” Wala maningog ang naulaw nga mga tinun-an, kay sila naglalis kon kinsa kanila ang labaw. Sa kataposan, nangarisgar sila sa pagpangutana kang Jesus: “Kinsa ba gayod ang labing dako sa gingharian sa mga langit?”—Marcos 9:33, 34; Mateo 18:1.

Morag makapatingala nga human sa duolag tulo ka tuig nga pagpakig-uban kang Jesus, ang mga tinun-an maglalis gihapon bahin sa posisyon o ranggo. Hinuon, sila nagdako sa relihiyon sa mga Hudiyo, nga nagpasiugda gayod sa kahinungdanon sa maong mga butang. Dayag nga ang ilang relihiyosong kagikan, ug ang tawhanong pagkadili-hingpit, nakaimpluwensiya sa ilang panghunahuna.

Milingkod si Jesus, gitawag ang iyang mga tinun-an, ug miingon: “Kon adunay  buot nga mauna, siya kinahanglang maulahi sa tanan ug alagad sa tanan.” (Marcos 9:35) Lagmit nahiugnok sila niining mga pulonga. Ang pangatarongan ni Jesus sukwahi gayod sa panghunahuna sa mga Hudiyo sa pagkahalangdon! Dayon nagtawag si Jesus ug usa ka bata ug iya kining gipatapad kaniya. Mabinationg naghalog sa bata, iyang gipasiugda ang iyang punto: “Sa pagkatinuod ako magaingon kaninyo, Gawas kon kamo motalikod ug mahimong sama sa mga bata, dili gayod kamo makasulod sa gingharian sa mga langit. Busa, bisan kinsa nga magapaubos sa iyang kaugalingon sama niining bataa mao ang labing dako sa gingharian sa mga langit.”—Mateo 18:3, 4.

Pagkahinungdanong pagtulon-an kana sa pagkamapaubsanon! Handurawa ang esena. Usa ka grupo sa hamtong ug seryoso nga mga lalaki ang naglibot ug nagtutok pag-ayo sa usa ka gamayng bata. Walay timik ug masaligon gayod ang bata! Wala makig-indig ug walay daotang hunahuna! Mapinasakopon ug mapaubsanon! Oo, ang bata nagpasiugda gayod sa diyosnong hiyas nga pagkamapaubsanon.

Tin-aw ang punto ni Jesus. Kitang tanan kinahanglang mag-ugmad sa sama-sa-bata nga pagkamapaubsanon kon buot kitang makapanunod sa Gingharian sa Diyos. Sa kahikayan ni Jehova labot sa samag-pamilya nga relasyon sa matuod nga mga Kristohanon, walay luna alang sa maindigong panag-away o garbo. (Galacia 5:26) Sa pagkatinuod, kining mga hiyasa mao gayod ang nag-aghat kang Satanas nga Yawa sa pagrebelde sa Diyos. Walay duhaduha nga gidumtan kini ni Jehova!—Proverbio 8:13.

Ang matuod nga mga Kristohanon maningkamot sa pag-alagad, dili aron sa paggahom. Bisag unsa pa ka dili-makapahimuot ang usa ka buluhaton o bisan unsa pa ka ubos ang tawo nga atong alagaran, ang matuod nga pagkamapaubsanon mopalihok kanato sa pag-alagad sa uban. Ang maong mapaubsanong pag-alagad pagabalosan gayod. Matod ni Jesus: “Si bisan kinsa nga magadawat sa usa sa ingon niini nga mga bata pinasukad sa akong ngalan, magadawat kanako; ug si bisan kinsa nga magadawat kanako, magadawat, dili lamang kanako, kondili kaniya usab nga nagpadala kanako.” (Marcos 9:37) Ang pag-ugmad ug mahinatagon, mapaubsanon, sama-sa-bata nga espiritu maghiusa kanato uban sa kinatas-ang Persona sa uniberso ug sa iyang Anak. (Juan 17:20, 21; 1 Pedro 5:5) Atong maangkon ang kalipay tungod sa pagpanghatag. (Buhat 20:35) Ug kita mobatig  katagbawan nga nakaamot kita sa kalinaw ug panaghiusa taliwala sa katawhan sa Diyos.—Efeso 4:1-3.

Daling Matudloan ug May Pagsalig

Sunod nga gipasiugda ni Jesus ang laing leksiyon nga makat-onan sa mga hamtong gikan sa mga bata: “Bisan kinsa nga dili magadawat sa gingharian sa Diyos sama sa usa ka gamayng bata dili gayod makasulod niini.” (Marcos 10:15) Ang mga bata dili lang mapaubsanon; sila daling matudloan. “Sila dali rang makakuhag impormasyon samag espongha,” matod sa usa ka inahan.

Busa aron makapanunod sa Gingharian sa Diyos, kinahanglang atong dawaton ug tumanon ang mensahe sa Gingharian. (1 Tesalonica 2:13) Sama sa mga bata nga bag-o pang nahimugso, kinahanglang atong “[ugmaron] ang pagpangandoy sa walay sambog nga gatas nga iya sa pulong, nga pinaagi niini [kita] managtubo ngadto sa kaluwasan.” (1 Pedro 2:2) Nan, komosta kon ang pagtulon-an sa Bibliya daw lisod sabton? “Ang mga bata kanunayng mangutana ug ‘Ngano?’ hangtod ilang makuha ang makapatagbaw nga mga tubag sa ilang mga pangutana,” nag-ingon ang usa ka tig-atiman sa bata. Angay natong sundogon ang ilang panig-ingnan. Busa pagtuon kanunay. Pakigsulti sa may-kasinatiang mga Kristohanon. Hangyoa si Jehova nga hatagan kag kaalam. (Santiago 1:5) Segurado nga ang imong pagkamalahutayon diha sa pag-ampo pagadunggon ra.—Mateo 7:7-11.

Ugaling lang, naghunahuna ang pipila, ‘Dili ba dali rang malimbongan ang mga tawo nga daling matudloan?’ Dili, kon sila adunay kasaligang giya. Pananglitan, ang mga bata kinaiyanhon nang magpagiya sa ilang mga ginikanan. “Mapamatud-an sa mga ginikanan nga sila kasaligan pinaagi sa pagpanalipod ug pagtagana sa adlaw-adlawng mga panginahanglan sa ilang mga anak,” nag-ingon ang usa ka amahan. Dayag nga kita adunay susamang mga katarongan sa pagsalig sa atong langitnong Amahan, si Jehova. (Santiago 1:17; 1 Juan 4:9, 10) Si Jehova naghatag kanato ug dili-mapakyas nga giya pinaagi sa iyang sinulat nga Pulong. Ang iyang balaang espiritu ug organisasyon naghupay ug nagpaluyo kanato. (Mateo 24:45-47; Juan 14:26) Ang pagpahimulos niining mga taganaha manalipod kanato batok sa espirituwal nga kadaot.—Salmo 91:1-16.

Ang pag-ugmad ug pagsalig sa Diyos nga sama  sa iya sa bata maghatag usab kanato ug malinawong hunahuna. Usa ka eskolar sa Bibliya miingon: “Sa bata pa kita, kita molakaw nga walay ikaplete, ug wala mahibalo kon sa unsang paagi kita makaabot sa atong destinasyon, apan bisan pa niana wala gayod mosantop sa atong alimpatakan ang pagduhaduha nga ang atong mga ginikanan magdala kanato nga luwas didto.” Kita ba adunay susamang pagsalig kang Jehova samtang kita naglakaw diha sa dalan sa kinabuhi?—Isaias 41:10.

Ang bug-os nga pagsalig sa Diyos motabang kanato sa paglikay sa mga tinamdan ug mga lihok nga magpameligro sa atong espirituwalidad. Hinunoa, kita bug-os makasalig sa mga pulong ni Jesus nga ang atong langitnong Amahan nahibalo sa atong mga buhat ug kon atong pangitaon pag-una ang Gingharian ug ang pagkamatarong sa Diyos, atimanon kita sa Diyos. Kini motabang kanato sa pagsukol sa tentasyon nga unahon ang materyal nga mga butang ug isakripisyo hinuon ang espirituwal nga mga kaakohan.—Mateo 6:19-34.

“Magpakabata sa Pagkadaotan”

Bisan tuod gipakatawo nga dili-hingpit, ang mga bata maoy putli gayod ug kasingkasing ug hunahuna. Tungod niini, ang Bibliya nag-awhag sa mga Kristohanon: “Magpakabata sa pagkadaotan.”—1 Corinto 14:20.

Tagda ang singko anyos nga si Monique, kinsa mahinamon kaayong nagsulti sa iyang inahan: “Ang akong bag-ong amiga nga si Sarah kulot usab ug buhok sama nako!” Ang lahi nga kolor sa panit ug kagikan ni Sarah wala niya hisgoti. Matod sa usa ka ginikanan: “Ang mga bata dili magmatikod sa kolor. Sila walay ideya bahin sa rasa o sila dili mapihigon.” Niining bahina, gibanaag gayod sa mga bata ang panghunahuna sa atong dili-mapihigong Diyos, nga nahigugma sa mga tawo sa tanang kanasoran.—Buhat 10:34, 35.

Ang mga bata nagbaton usab ug talagsaong katakos sa pagpasaylo. Matod pa sa usa ka ginikanan: “Sa nag-away ang among mga anak nga si Jack ug Levi, amo silang giingnan nga magpinasayloay, ug sa wala madugay sila malipayon na usab nga nagduladula. Sila dili magmug-ot, mag-ugkat sa nangagi, o mohimog nga kondisyon sa dili pa mopasaylo. Mag-uli ra dayon ang ilang maayong buot.” Pagkamaayong panig-ingnan nga sundogon sa mga hamtong!—Colosas 3:13.

Dugang pa, ang mga bata dali rang motuo nga naglungtad ang Diyos. (Hebreohanon 11:6) Ang ilang kinaiyanhong pagkaprangka sagad magtukmod kanila sa pagpamatuod sa uban nga may kaisog. (2 Hari 5:2, 3) Ang ilang yano ug kinasingkasing nga mga pag-ampo makatandog bisan sa tig-a kaayong mga kasingkasing. Ug kon makaatubang ug tentasyon, sila makapasundayag ug talagsaong moral nga kalig-on. Pagkabililhon gayod nga mga gasa ang mga bata!—Salmo 127:3, 4.

Napasig-uli nga Katahom

Mangutana ka tingali, ‘Posible bang maangkon pag-usab sa mga hamtong ang maanindot nga mga hiyas sa bata?’ Ang yano ug masaligong tubag maoy oo! Ang sugo ni Jesus nga “mahimong sama sa mga bata” nagpamatuod nga posible kana.—Mateo 18:3.

Sa pag-ilustrar: Usa ka tem sa mga tig-ayo ug mga dibuho nag-ayo sa usa ka mahal kaayong obra maestra. Sa ilang pagtrabaho, ilang gikuha ang nagpatongpatong nga mga hugaw ug giayo ang kampat nga agi sa unang mga nag-ayo. Human sa mapailobong paningkamot sa mga tig-ayo, ang orihinal nga maanindot nga mga kolor ug natural nga katahom sa dibuho napasig-uli aron makita sa tanan. Sa samang paagi, pinaagi sa makanunayong paningkamot, sa tabang sa balaang espiritu ni Jehova, ug sa mahigugmaong pagpaluyo sa Kristohanong kongregasyon, atong maangkon pag-usab ang matahom nga mga hiyas nga kinaiyanhon natong nabatonan sa dihang bata pa kita.—Efeso 5:1.

[Hulagway sa panid 9]

Ang mga bata kinaiyanhong mapaubsanon

[Hulagway sa panid 10]

Ang mga bata dili mapihigon, ug sila dali rang mopasaylo ug malimot niana