Espirituwal nga Pagpanukod Diha sa “Balay nga Bato”

Ang ngalan niining nasora sa Aprika nagkahulogang “Balay nga Bato.” Kini usa ka nasod nga nailado tungod sa Victoria Falls ug sa nagkadaiyang kalalangan sa kalasangan. Bisan pa niana, aduna kiniy dagko kaayong ginama-sa-tawo nga mga tinukod sa habagatan sa Sahara. Nagtadlas sa sentro niini ang may pagkahabog nga granitong patagong rehiyon nga bahin sa bukid. Tabunok ug lunhaw ang palibot tungod sa timpladong klima sa maong patag. Kini ang Zimbabwe, ang pinuy-anan sa mga 12 ka milyong katawhan.

NGANONG ginganlan kinig Balay nga Bato? Niadtong 1867, ang mangangayam ug manunuhid nga si Adam Renders nakakitag mga tinukod nga ginama sa bato nga nakatagkatag sa 720 ka ektarya. Mipanaw siya niadto sa kapatagan sa Aprika, diin ang mga balay kasagarang ginama sa lapok, sa mga tukon nga kahoy, ug kogon ang atop. Unya nakabagat siyag gun-ob nga mga bato sa usa ka dako kaayong siyudad, nga karon ginganlan ug Dakong Zimbabwe.

Ang maong kagun-oban anaa sa habagatan sa dapit nga sa pagkakaron nailhang Masvingo. Ang pipila ka paril may kahabogong kapig 9 ka metro, nga ang granitong mga bato gipatongpatong nga wala palitadahig semento. Anaa sa tunga sa kagun-oban ang talagsaong koniko nga torre nga moabot ug 11 ka metro nga may panukaranan nga unom ka metro ang diyametro. Wala hisayri kon unsay eksaktong katuyoan sa maong torre. Ang kagun-oban gipetsahan nga iya sa ikawalong siglo K.P.,  apan adunay ebidensiya nga kanang puwestoha giokupar gatosan ka katuigan una pa niana.

Niadtong 1980 ang nasod nga nailhang Rhodesia nahimong independente gikan sa Britanya ug giilisan ang ngalan nianag Zimbabwe. Ang mga molupyo niini naglakip sa duha ka dagkong etnikong mga grupo—ang Shona, nga naglangkob sa kinabag-an sa populasyon, ug ang Ndebele. Ang katawhan maabiabihon, ingon nga subsob namatikdan sa mga Saksi ni Jehova sa ilang pagwali sa balay-balay. Usahay bisag wala pa mailhi ang bisita, sa iyang pagtuktok sa pultahan siya dapiton sa pagdayon ug sa paglingkod. Ang kadaghanang taga-Zimbabwe may dakong pagtahod sa Bibliya ug kasagarang mamugos sa ilang mga anak sa paglingkod ug sa pagpamati sa panaghisgot sa Kasulatan.

Pagtanyag ug Makapalig-ong Mensahe sa Kahupayan

Ang “AIDS” ug “hulaw” maoy mga pulong nga kanunayng gigamit sa media inighisgot sa Zimbabwe. Ang pagkaylap sa AIDS nakadaot pag-ayo sa katawhan ug sa ekonomiya sa kanasoran sa Aprika nga kanait sa Sahara. Ang mga pagpaospital dinhi kasagarang nalangkit sa HIV. Nadaot ang pamilyahanong kinabuhi sa daghang tawo tungod sa maong sakit.

Aron matabangan ang mga tawo sa Zimbabwe, ang mga Saksi ni Jehova napuliki sa pagsangyaw nga ang pagkinabuhi nga giniyahan sa mga sukdanan sa Diyos nga gipadayag sa Bibliya mao ang labing maayong pagkinabuhi. Pananglitan, ang Pulong sa Diyos nagtudlo nga ang gasa sa Diyos sa pagpakigsekso angay lang himoon sa mga magtiayon, nga ang Diyos dili uyon sa homoseksuwalidad, ug ang mga pag-abonog dugo ug ang paggamit ug mga droga alang sa kalingawan gidili sa balaod ni Jehova. (Buhat 15:28, 29; Roma 1:24-27; 1 Corinto 7:2-5; 2 Corinto 7:1) Ang mga Saksi nagmantala usab sa usa ka mensahe sa paglaom nga may pasikaranan, nga nagpasiugda nga ang tanang sakit duol nang papason sa Gingharian sa Diyos.—Isaias 33:24.

Paghatag ug Hinabang

Ang hulaw nagdaot sa Zimbabwe sa miaging napulo ka tuig. Nangatumba ang mga hayop tungod sa gutom ug kay ang lawas nawad-an nag tubig. Nangamatay ang gatosan ka libong baka. Nadaot sa sunog ang ektaektarya nga kakahoyan. Nangamatay ang daghang bata ug tigulang tungod sa kakulang sa pagkaon. Bisan ang katubigan sa dakong Suba sa Zambezi nagkahubas mao nga nameligro ang pag-andar sa mga plantang hydroelektrik.

Ingong sanong sa maong kadaot, ang mga Saksi ni Jehova nagtukod ug walo ka komite sa hinabang sa nagkalainlaing bahin sa nasod. Ang nagapanawng mga magtatan-aw nagduaw sa mga kongregasyon aron susihon ang aktuwal nga mga panginahanglan. Ang maong impormasyon gipadala ngadto sa tukmang komite sa hinabang. Usa ka nagapanawng magtatan-aw mitaho: “Sa miaging lima ka tuig, nakahatag kamig kapin sa usa ka libo nga toneladang mais, napulo ka toneladang bulad nga isda, ug samang gidaghanon sa bitsuylas. Ang among mga igsoon sa pagtuo nagprosesog duha ka toneladang mufushwa [gipauga nga utanon]. Nanghatag usab kamig daghang gidonar nga mga sinina ug gikinahanglang salapi.” Ang laing nagapanawng magtatan-aw miingon: “Sa dihang ako mahinumdom sa mga kalisdanan nga among naagian sa pagkuhag mga permiso nga gikinahanglan sa Zimbabwe ug sa Habagatang Aprika aron sa pagpasulod sa maong mga suplay ug sa kanunayng kanihit sa gasolina nga gikinahanglan sa paghatod niining kinahanglanon kaayong hinabang, makaingon gayod ko nga ang paghatod sa maong hinabang maoy dugang ebidensiya sa pasalig ni Jesus nga ang atong langitnong Amahan nahibalo  nga gikinahanglan nato kining mga butanga.”—Mateo 6:32.

Sa unsang paagi gisagubang sa nagapanawng mga magtatan-aw ang pag-alagad sa gihulaw nga mga dapit? Ang pipila magdalag pagkaon alang sa ilang kaugalingon ug sa mga pamilya nga ilang abotan. Usa kanila mitaho nga naglalis ang pipila ka Kristohanong mga babaye kon angay ba nga dili na lang sila mosangyaw niadtong adlawa aron makaapil sa paglinya alang sa gipaabot nga hinabang sa gobyerno. Sila midesisyon sa pagsalig kang Jehova pinaagi sa pagtan-aw na lang kon unsay resulta. Walay miabot nga hinabang sa gobyerno niadtong adlawa.

Ang Kristohanong tigom naeskedyul sa sunod nga adlaw, ug ang maong mga igsoong babaye kinahanglang modesisyon pag-usab. Motambong ba sila sa tigom, o ilang hulaton ang pag-abot sa hinabang? Kay sila nag-una sa tukmang mga prioridad, sila mitambong sa tigom sa Kingdom Hall. (Mateo 6:33) Samtang nag-awit sa paniklop nga awit, ilang nadungog nga may trak nga nagsingabot. Didto mismo miabot ang hinabang, nga gidala sa ilang mga igsoon sa pagtuo nga mga sakop sa komite sa hinabang! Dili masukod ang kalipay ug pagkamapasalamaton sa matinumanong mga Saksi nga nanambong sa maong tigom.

Ang Gugma Nagapalig-on

Ang malulotong mga buhat nga gipakita ngadto sa mga dili sakop sa Kristohanong kongregasyon nagbukas ug kahigayonan sa pagsangyaw. Usa ka nagapanawng magtatan-aw sa Masvingo, kauban sa pipila ka Saksi sa maong dapit ang nagsangyaw. Nakit-an niya ang usa ka batan-ong babaye nga nagbuy-od sa daplin sa karsada. Naamgohan sa mga Saksi nga masakiton kaayo ang batan-on kay siya dili makasultig tarong ug nagkurog ang iyang tingog. Ang ngalan sa dalagita maoy Hamunyari, nga sa Shona nagkahulogang “Dili Ka ba Maulaw?” Nasayran sa mga igsoon nga siya gibiyaan sa mga membro sa iyang simbahan nga nagpaingon sa usa ka relihiyosong serbisyo sa kabukiran. Mahigugmaong gitabangan sa mga Saksi ang batan-ong babaye, nga gidala siya sa duol nga balangay.

Niadtong balangaya, ang pipila ka tawo nakaila kang Hamunyari, mao nga ilang gipakuha siya sa iyang mga paryente. Mahitungod sa mga Saksi, ang mga tagabalangay miingon: “Kini ang tinuod nga relihiyon. Kini ang gugma nga angayng ipakita sa mga Kristohanon.” (Juan 13:35) Una molakaw, ang mga igsoon mihatag kang Hamunyari ug tract nga Gusto Ka Bang Makabaton ug Dugang Kahibalo Bahin sa Bibliya? *

Sa pagkasunod semana ang nagapanawng magtatan-aw nag-alagad sa kongregasyon sa dapit nga gipuy-an ni Hamunyari. Buot niyang masayran kon luwas ba siyang nakapauli sa ilang balay. Ang tibuok pamilya nalipay pag-ayo nga nakahimamat kaniya ug sa mga igsoong tagadidto. Ang iyang mga ginikanan miingon: “Kamo nagtuman sa tinuod nga relihiyon. Inyong giluwas ang kinabuhi sa among anak, nga gibiyaan sa karsada aron mamatay.” Ilang gipangutana ang mga membro sa iyang simbahan: Wala ba mo maulaw, sumala sa gipasabot sa ngalang Hamunyari, nga inyong gibiyaan siyang himalatyon?” Gisugdan sa mga Saksi ang paghisgot bahin sa Bibliya ug gibinlan ug mga basahong gibase sa Bibliya ang pamilya ni Hamunyari, nga midapit sa mga igsoon sa pagduaw pag-usab ug pagdumalag pagtuon sa Bibliya uban nila. Nausob ang panghunahuna sa pipila ka sakop sa pamilya nga sa nangagi supak sa mga Saksi. Usa kanila, ang bayaw nga lalaki ni Hamunyari, maoy pangulo sa usa ka simbahan sa maong dapit. Midawat siyag pagtuon sa Bibliya.

Pagpanukod ug mga Balay sa Pagsimba

Usa ka inspiradong magbabalak sa karaan misulat: “Oh Diyos, . . . ang akong kalag ginauhaw  kanimo. . . . Diha sa usa ka yuta nga mamala ug umaw, diin walay tubig.” (Salmo 63:1) Pagkatinuod niini kon bahin sa daghang tawo sa Zimbabwe! Sa lawasnon sila nag-antos sa hulaw, apan sa espirituwal sila giuhaw sa Diyos ug sa iyang pagkamaayo. Imo kining makita gikan sa mga resulta sa Kristohanong ministeryo sa mga Saksi ni Jehova. Sa dihang ang Zimbabwe nahimong independente niadtong 1980, mga 10,000 ka Saksi ang nag-alagad diha sa 476 ka kongregasyon. Karon, paglabay sa mga 27 ka tuig, tulo na ka pilo ang gidaghanon sa aktibong mga Saksi ug halos doble na ang gidaghanon sa mga kongregasyon.

Diyutay ra ang mga kongregasyon nga adunay kaugalingong mga dapit sa pagsimba. Niadtong Enero 2001, 98 lamang sa kapig 800 ka kongregasyon sa Zimbabwe ang may balay sa pagsimba—usa ka Kingdom Hall—diin sila nagtigom. Ang daghang kongregasyon nagpahigayon sa ilang mga tigom ilalom sa kakahoyan o sa mga payag nga ginama sa mga tukon nga kahoy, nga ang mga bungbong gipalitadahag lapok ug kogon ang atop.

Tungod sa daghang amot ug sa makugihong pagboluntaryo sa ilang Kristohanong kaigsoonan sa tibuok kalibotan, nasugdan sa mga Saksi sa Zimbabwe ang usa ka proyekto nga tungod niana mas daghang kongregasyon nakabaton nag kasarangan apan desenteng mga Kingdom Hall. Ang daghang Saksi sa ubang nasod nga may mga kahanas sa pagpanukod naghikay sa ilang kahimtang aron moadto sa Zimbabwe ug motrabaho uban sa lokal nga mga boluntaryo. Usa sa lokal nga mga Saksi misulat: “Tim-os kaming nagpasalamat sa tanang igsoon gikan sa daghan kaayong nasod nga nanganhi sa Zimbabwe aron motabang kanamo sa pagtukod ug matahom nga mga Kingdom Hall. Ug kami nagpasalamat sa uban pa kaninyo tungod sa inyong pag-amot alang sa pondo sa Kingdom Hall mao nga nahimo ang maong pagpanukod.”

Sa silangang bahin sa nasod, ang mga igsoon nagtigom ilalom sa dako kaayong punoan sa kahoyng baobab sulod sa 50 ka tuig. Sa gisultihan ang Kristohanong mga ansiyano nga tukoron ang usa ka tinuod nga balay sa pagsimba, ang usa kanila nakahilak gayod. Sa duol nga kongregasyon, ang usa ka 91-anyos nga ansiyano miingon: “Dugay na kong nagtuaw kang Jehova nga matukod unta ang ingon niini nga tigomanan!”

Daghan ang komento bahin sa daling pagkatukod niining matahom nga mga balay sa pagsimba. Usa ka maniniid miingon: “Kamo nagtukod sa maadlaw, apan ang Diyos nagtukod gayod usab inigkagabii!” Ang panaghiusa ug kalipay sa mga trabahante namatikdan usab. Sa pagkakaron, kapig 350 ka bag-ong Kingdom Hall ang nahuman sa tibuok nasod. Tungod niini ang 534 ka kongregasyon makatigom na diha sa mga Kingdom Hall nga lig-ong pagkagama nga ginamit ang mga haloblak.

Nagpadayon pa ang hinungdanong espirituwal nga pagpanukod sa Zimbabwe. Samtang atong palandongon ang nangatukod na, kita madasig sa pagpasidungog kang Jehova, ang tinubdan sa maong mga panalangin. Oo, “gawas nga si Jehova ang magatukod sa balay, kawang lamang ang paghago sa mga magtutukod niini.”—Salmo 127:1.

[Footnote]

[Mga mapa sa panid 9]

(Alang sa aktuwal nga pagkahan-ay, tan-awa ang publikasyon)

ZIMBABWE

HARARE

Masvingo

Dakong Zimbabwe

[Hulagway sa panid 9]

Koniko nga torre

[Hulagway sa panid 12]

Bag-ong Kingdom Hall, Kongregasyon sa Concession

[Hulagway sa panid 12]

Mga membro sa Kongregasyon sa Lyndale sa gawas sa ilang bag-ong Kingdom Hall

[Picture Credit Lines sa panid 9]

Ruins with steps: ©Chris van der Merwe/AAI Fotostock/age fotostock; tower inset: ©Ingrid van den Berg/AAI Fotostock/age fotostock