Kalipayi ang Atong Matahom nga Yuta

NAKITA sa mga astronomo nga ang puy-anan sa tawo maoy usa lamang ka gamayng tulbok diha sa walay-kinutoban nga uniberso. Walay laing dapit sa pisikal nga uniberso diin makaplagan ang kinabuhi. Sa planetang Yuta lamang naglungtad ang hingpit nga mga kahimtang.

Dugang pa, mahimong magmalipayon ang atong pagkinabuhi niining matahom nga globo. Pagkanindot ang bation kon mainitan ka sa adlaw sa panahon nga mabugnaw! Kinsa ba kanato ang dili malipayng magtan-aw sa usa ka matahom nga pagsubang o pagsalop sa adlaw? Siyempre, ang atong adlaw wala lamang maghatag kanatog kalipay. Kini hinungdanon sa ato mismong paglungtad.

Sulod sa milyonmilyong katuigan, ang grabidad sa adlaw maoy nagpahinabo nga ang yuta ug ang ubang mga planeta magpabilin diha sa ilang mga orbito. Ug, sumala sa nakat-onan sa mga estudyante diha sa tunghaan, ang tibuok nga sistema sa adlaw nagbiyo sa sentro sa atong galaksiya nga Milky Way. Apan sa atong galaksiya, ang adlaw maoy usa lamang sa kapin sa 100 ka bilyong bituon nga nagbiyo sa sentro niini.

Ang Milky Way nahugpong uban sa mga 35 ka galaksiya tungod sa grabidad. Ang mas dagkong mga hugpong adunay libolibong galaksiya. Ang mga orbito sa mga planeta diha sa atong sistema sa adlaw lagmit nga mausab-usab kon kini nahimutang pa sa mas dagko, mas dasok nga hugpong sa mga galaksiya. Apan, sa pagkatinuod, walay laing dapit sa uniberso nga “haom sa komplikadong kinabuhi sama sa atoa,” miingon si Guillermo Gonzalez ug Jay W. Richards diha sa ilang librong The Privileged Planet.

Ang paglungtad ba sa kinabuhi niining planetaha sulagma lamang, usa ka wala-damhang resulta sa “big bang”? O aduna bay mas dakong katuyoan sa kinabuhi dinhi sa matahom nga planetang Yuta?

Daghang tawo ang nakahinapos nga ang yuta nga atong gipuy-an espesipikong gidisenyo aron sa pagpatunhay ug kinabuhi. * Kasiglohan kanhi, ang usa ka Hebreohanong magbabalak misulat bahin sa yuta ug sa mga langit. Siya miingon: “Sa dihang makakita ako sa imong mga langit, ang mga buhat sa imong mga tudlo, sa bulan ug sa mga bituon nga imong giandam, unsa ba ang may-kamatayong tawo?” (Salmo 8:3, 4) Kining maong magbabalak nagtuo nga aduna gayoy Maglalalang. Makataronganon ba kana nga panghinapos niining atong siyentipikanhong panahon?

[Footnote]

[Kahon/Hulagway sa panid 3]

“Kon tan-awon sa layo, ang Yuta naggilakgilak samag asul nga mutya diha sa mangiob nga kawanangan,” nag-ingon ang The Illustrated Science Encyclopedia—Amazing Planet Earth.

[Credit Line]

Globe: U.S. Fish & Wildlife Service, Washington, D.C./NASA