Mga Asawa—Tahora Pag-ayo ang Inyong mga Bana
Mga Asawa—Tahora Pag-ayo ang Inyong mga Bana
“Ang mga asawa kinahanglang magpasakop sa ilang mga bana.”—EFESO 5:22.
1. Nganong kasagarang lisod ang pagtahod sa bana?
SA DAGHANG kanasoran, sa dihang magminyo ang lalaki ug babaye, ang babaye manaad nga iyang tahoron pag-ayo ang iyang bana. Apan, kon sayon ba o lisod ang pagtuman niana nga panaad magdepende sa paagi sa pagtratar sa daghang bana sa ilang mga asawa. Hinuon, ang kaminyoon may maayong sinugdanan. Gikuha sa Diyos ang usa ka gusok gikan kang Adan, ang unang lalaki, ug gihimo kining usa ka babaye. Si Adan mipatugbaw: “Kini sa kataposan bukog sa akong mga bukog ug unod sa akong unod.”—Genesis 2:19-23.
2. Unsay nagakahitabo maylabot sa kababayen-an ug sa kaminyoon sa di pa dugayng mga panahon?
2 Bisan pa nianang maayong sinugdanan, ang usa ka kalihokan nga gitawag ug kagawasan sa kababayen-an—usa ka pagsulay sa paglingkawas gikan sa pagdominar sa kalalakin-an—nagsugod sa unang katuigan sa 1960 didto sa Tinipong Bansa. Niadtong panahona, adunay proporsiyon nga 300 ka bana kontra 1 ka asawa nga nagbiya sa ilang mga pamilya. Pagkatapos sa katuigan sa 1960, ang proporsiyon nausab ngadto sa 100 kontra 1. Karon, ang mga babaye mamalikas, moinom, manigarilyo, ug imoral ug panggawi sama ra sa mga lalaki. Busa mas malipayon na ba ang mga babaye? Dili. Diha sa pipila ka nasod, duolan sa katunga sa mga nanagminyo ang magbulag sa ngadtongadto. Ang mga paningkamot sa pipila ka babaye sa pagpauswag sa ilang kaminyoon nakatabang ba sa pagpaarang-arang sa ilang kaminyoon o nakapasamot hinuon sa mga suliran?—2 Timoteo 3:1-5.
3. Unsa ang lintunganayng suliran nga nakadaot sa kaminyoon?
3 Unsa ang lintunganayng suliran? Sa usa ka sukod, kini mao ang problema nga naglungtad sukad gitental si Eva sa rebeldeng manulonda, “ang orihinal nga halas, ang usa nga gitawag Yawa ug Satanas.” (Pinadayag 12:9; 1 Timoteo 2:13, 14) Gituis ni Satanas ang gitudlo sa Diyos. Pananglitan, bahin sa kaminyoon, gipakita sa Yawa nga ang kaminyoon morag sobra ka estrikto ug malupigon. Ang propaganda nga iyang giduso pinaagi sa media niining kalibotana—nga siya mao ang magmamando—gidisenyo sa paghimo sa mga instruksiyon sa Diyos nga morag dili-makataronganon ug kinaraan na. (2 Corinto 4:3, 4) Apan, kon atong susihon pag-ayo kon unsay gisulti sa Diyos bahin sa papel sa babaye diha sa kaminyoon, atong mahibaloan nga ang Pulong sa Diyos maalamon ug mapuslanon gayod.
Pasidaan Alang Niadtong Magminyo
4, 5. (a) Nganong angayng mag-amping ang usa ka babaye sa dihang maghunahunang magminyo? (b) Unsay angayng buhaton sa usa ka babaye sa dili pa mosugot nga makigminyo?
4 Ang Bibliya naghatag ug pasidaan. Kini nag-ingon nga niining kalibotan nga gimandoan sa Yawa, bisan kadtong adunay malamposong kaminyoon makaagom ug “kasakitan.” Busa, bisan tuod ang kaminyoon maoy kahikayan sa Diyos, ang Bibliya nagpasidaan niadtong magminyo. Ang usa ka inspiradong magsusulat sa Bibliya nag-ingon bahin sa usa ka babaye kansang bana namatay ug busa gawasnon nang magminyo pag-usab: “Siya mas malipayon kon siya magpabiling ingon sa kon unsa siya.” Si Jesus usab nagdasig sa pagkatagsaanon alang niadtong “makahatag ug luna alang niini.” Apan, kon dunay gustong magminyo, siya kinahanglang magminyo “diha sa Ginoo,” sa ato pa, ngadto lang sa usa ka dedikado ug bawtismado nga magsisimba sa Diyos.—1 Corinto 7:28, 36-40; Mateo 19:10-12.
5 Ang rason nga angayng tagdon sa usa ka babaye kon kinsay iyang minyoan mao ang pasidaan sa Bibliya: “Ang usa ka babayeng minyo nagapos sa balaod ngadto sa iyang bana.” Gawas lang kon ang iyang bana mamatay o makahimog imoralidad ug sila magdiborsiyo nga siya ‘mahigawas na gikan sa balaod [sa iyang bana].’ (Roma 7:2, 3) Ang pagkaibog sa usag usa sa unang panagkita mahimong igo na alang sa makalipay nga paghigugmaay, apan dili pa kini igong basehanan alang sa malipayong kaminyoon. Busa, kinahanglang pangutan-on sa usa ka tagsaanong babaye ang iyang kaugalingon, ‘Andam ba akong mosulod sa usa ka kahikayan diin ako mailalom sa balaod niining tawhana?’ Kining pangutanaha kinahanglang pamalandongon sa dili pa magminyo, dili human maminyo.
6. Unsang desisyon ang mahimong himoon sa kadaghanang mga babaye karon, ug nganong hinungdanon kaayo kini?
6 Sa daghang dapit karon, ang babaye makapili sa pagsugot o pagbalibad sa sakna sa kaminyoon. Apan, ang maalamong pagpili lagmit mao ang kinalisorang butang nga himoon sa usa ka babaye, sanglit kusog kaayo ang iyang tinguha sa pagpakigsuod ug sa paghigugma nga posible sa kaminyoon. Usa ka magsusulat miingon: “Kon adunay gusto gayod natong buhaton—magminyo man o mokatkat ug bukid—lagmit hunahunaon nato nga maayo ra ang mga kahimtang ug dawaton lang ang impormasyon nga gusto natong madungog.” Ang dili-makataronganong desisyon sa usa ka tigkatkat ug bukid mahimong makapatay kaniya; ang dili-maalamong pagpili sa usa ka kapikas sa kaminyoon mahimong ingon usab niana ka peligroso.
7. Unsang maalamong tambag ang gihatag labot sa pagpilig kapikas sa kaminyoon?
7 Angayng palandongon pag-ayo sa usa ka babaye kon unsay nalangkit sa pagkanailalom sa balaod sa usa ka lalaki nga mosakna nga makigminyo kaniya. Daghang katuigan kanhi, ang usa ka batan-ong dalaga nga taga-India mapainubsanong miangkon: “Ang atong mga ginikanan mas tigulang ug mas maalamon, ug sila dili daling malingla kay kanatong mga batan-on. . . . Dali ra kaayo kong masayop.” Hinungdanon ang tabang nga ikahatag sa mga ginikanan ug sa uban. Usa ka maalamong magtatambag sa daghan nang katuigan nagdasig sa mga batan-on nga ilhon pag-ayo ang mga ginikanan sa ilang minyoan ug sa pagmatikod pag-ayo sa paagi sa pagpakiglabot sa iyang minyoan sa iyang mga ginikanan ug mga igsoon.
Kon sa Unsang Paagi Nagpasakop si Jesus
8, 9. (a) Sa unsang paagi gilantaw ni Jesus ang iyang pagpasakop sa Diyos? (b) Unsang kaayohan ang makuha gikan sa pagpasakop?
8 Bisan tuod ang pagpasakop mahimong lisod, kini mahimong lantawon sa mga babaye ingong dungganon, sama sa paglantaw ni Jesus niini. Bisan pag ang iyang pagpasakop sa Diyos naglangkit ug pag-antos, apil na ang kamatayon diha sa usa ka sakitanang estaka, siya malipayon gihapong nagpasakop sa Diyos. (Lucas 22:41-44; Hebreohanon 5:7, 8; 12:3) Si Jesus mahimong lantawon ingong panig-ingnan sa mga babaye, kay ang Bibliya nag-ingon: “Ang ulo sa usa ka babaye mao ang lalaki; sa baylo ang ulo ni Kristo mao ang Diyos.” (1 Corinto 11:3) Apan, matikdi nga dili lang inigkaminyo sa mga babaye nga sila mailalom sa pagkaulo sa mga lalaki.
9 Ang Bibliya nag-ingon nga ang mga babaye, minyo man o tagsaanon, kinahanglang magpasakop sa pagkaulo sa takos-sa-espirituwal nga mga lalaki nga nagdumala sa Kristohanong kongregasyon. (1 Timoteo 2:12, 13; Hebreohanon 13:17) Kon sundon sa mga babaye ang maong direksiyon sa Diyos, sila naghatag ug panig-ingnan sa mga manulonda diha sa organisasyonal nga kahikayan sa Diyos. (1 Corinto 11:8-10) Dugang pa, pinaagi sa ilang maayong panig-ingnan ug mapuslanong mga sugyot, ang edaran nga minyong mga babaye nagtudlo sa batabatang mga babaye sa ‘pagpasakop sa ilang mga bana.’—Tito 2:3-5.
10. Sa unsang paagi si Jesus nagpakitag panig-ingnan sa pagpasakop?
10 Si Jesus nahibalo sa bili sa nahiangay nga pagpasakop. Usa ka higayon niana, iyang gisugo si apostol Pedro sa pagbayad ug buhis ngadto sa tawhanong mga awtoridad para kanilang duha, nga naghatag pa ganig kuwarta kang Pedro nga ibayad. Si Pedro sa ulahi misulat: “Tungod sa Ginoo magpasakop kamo sa tanang tawhanong linalang.” (1 Pedro 2:13; Mateo 17:24-27) Mahitungod sa labing talagsaong panig-ingnan ni Jesus sa pagpasakop, atong mabasa: “Iyang gihaw-asan ang iyang kaugalingon ug gihuptan ang dagway sa usa ka ulipon ug nahisama sa mga tawo. Labaw pa niana, sa dihang iyang nakaplagan ang iyang kaugalingon nga diha sa dagway sa usa ka tawo, siya nagpaubos ug nagmasinugtanon hangtod sa kamatayon.”—Filipos 2:5-8.
11. Nganong gidasig man ni Pedro ang mga asawa nga magpasakop bisan ngadto sa ilang di-magtutuong mga bana?
11 Sa nagdasig sa mga Kristohanon nga magpasakop bisan ngadto sa malupigon, dili-makataronganong mga awtoridad niining kalibotana, si Pedro miingon: “Sa pagkatinuod, niini nga dalan kamo gipanagtawag, tungod kay bisan si Kristo nag-antos alang kaninyo, nga nagbilin kaninyog sulondan aron kamo managsunod pag-ayo sa iyang mga tunob.” (1 Pedro 2:21) Human mahubit kon sa unsang paagi nag-antos si Jesus ug kon sa unsang paagi siya mapinasakopong nag-antos, si Pedro nagdasig sa mga asawa nga may di-magtutuong mga bana: “Sa samang paagi, kamong mga asawa, magpasakop kamo sa inyong mga bana, aron nga, kon aduna may dili-masinugtanon sa pulong, sila makabig nga walay pulong pinaagi sa panggawi sa ilang mga asawa, tungod kay mga saksing-nakakita sa inyong maputling panggawi uban ang halawom nga pagtahod.”—1 Pedro 3:1, 2.
12. Unsang mga kaayohan ang naangkon ni Jesus tungod sa iyang pagkamapinasakopon?
12 Ang pagpasakop bisan pa sa mga pagbiaybiay ug maabusohong sinultihan lagmit lantawon ingong kahuyangan. Apan, lahi ang panglantaw ni Jesus niini. Si Pedro misulat: “Sa gisultihan siya ug pasipala, wala siya mobalos sa pagsultig pasipala. Sa nag-antos siya, wala siya manghulga.” (1 Pedro 2:23) Ang pipila ka tawo nga nakakita kang Jesus nga nag-antos nahimong mga magtutuo, nga naglakip pa gani sa usa ka kawatan nga gilansang tupad kaniya ug sa opisyal sa kasundalohan nga nagtan-aw sa pagpatay kaniya. (Mateo 27:38-44, 54; Marcos 15:39; Lucas 23:39-43) Sa samang paagi, gipaila ni Pedro nga ang pipila ka di-magtutuong mga bana—bisan kadtong maabusohon—mahimong mga Kristohanon human makita ang mapinasakopong panggawi sa ilang mga asawa. Aduna kitay nakitang mga pamatuod nga nahitabo kini karon.
Kon sa Unsang Paagi Makabig sa mga Asawa ang Ilang mga Bana
13, 14. Sa unsang paagi mapuslanon ang pagpasakop sa di-magtutuong mga bana?
13 Ang mga asawa nga nahimong mga magtutuo makakabig sa ilang mga bana tungod sa ilang Kristohanong panggawi. Sa di pa dugayng distritong kombensiyon sa mga Saksi ni Jehova, ang usa ka bana miingon bahin sa iyang Kristohanong asawa: “Sa akong hunahuna, ako salbahis gayod sa akong paagi sa pagtratar kaniya. Apan, siya matinahoron kaayo kanako. Wala gayod niya ako tamaya. Wala gayod niya ipamugos ang iyang tinuohan kanako. Giatiman gayod niya ako sa mahigugmaong paagi. Sa dihang motambong siyag asembliya, iya gayong andamon daan ang akong pagkaon ug humanon daan ang mga buhatbuhaton sa balay. Ang iyang tinamdan nakapainteres kanako sa pagsusi sa Bibliya. Ug tungod niana, usa na ako ka Saksi karon!” Oo, siya ‘nakabig nga walay pulong’ tungod sa panggawi sa iyang asawa.
14 Sama sa gipasiugda ni Pedro, ang magpatunghag maayong mga resulta dili ang ginasulti lamang sa asawa kondili ang iyang ginabuhat. Kini giilustrar sa usa ka asawa nga nakakat-on sa mga kamatuoran sa Bibliya ug determinadong motambong sa Kristohanong mga tigom. “Agnes, mogawas gani ka nianang pultahana, ayaw na gayog balik!” singgit pa sa iyang bana. Siya wala mogawas agi “nianang pultahana” kondili sa laing pultahan. Pagkasunod tigom sa gabii, ang bana mihulga: “Di na ko nimo maabtan sa balay inig-uli nimo.” Aw, wala na tuod niya maabti ang iyang bana—milakaw ang iyang bana sulod sa tulo ka adlaw. Sa iyang pagbalik, ang asawa malulotong misukna: “Unsay gusto nimong kaonon?” Wala gayod matarog bisag gamay ang debosyon ni Agnes kang Jehova. Sa ngadtongadto ang iyang bana midawat ug pagtuon sa Bibliya, nagpahinungod sa iyang kinabuhi ngadto sa Diyos, ug sa ulahi nahimong ansiyano nga daghag kaakohan.
15. Unsang “dayandayan” ang gisugyot alang sa Kristohanong mga asawa?
15 Si apostol Pedro nagsugyot ug usa ka butang nga gipasundayag sa mga asawa nga gihisgotan sa ibabaw, nga mao ang “dayandayan,” apan dili pinaagi sa pagpasiugda sa “pagsalapid sa buhok” o sa “pagsul-ob ug panggawas nga mga besti.” Hinunoa, si Pedro nag-ingon: “Himoa nga ang inyong dayandayan . . . diha sa natago nga pagkatawo sa kasingkasing pinaagi sa dili-madunot nga sapot sa malinawon ug malumong espiritu, nga dakog bili sa mga mata sa Diyos.” Kini nga espiritu mapadayag diha sa lumo nga sinultihan ug buotang panggawi imbes mahagiton o mapugsanon. Sa ingon ipakita sa usa ka Kristohanong asawa nga siya may halawom nga pagtahod sa iyang bana.—1 Pedro 3:3, 4.
Mga Panig-ingnan nga Makuhaag Leksiyon
16. Sa unsang mga paagi si Sara usa ka maayong panig-ingnan alang sa Kristohanong mga asawa?
16 Si Pedro misulat: “Ang balaang mga babaye kanhi nga nanaglaom sa Diyos nagdayandayan sa ilang kaugalingon, nga nagpasakop sa ilang mga bana.” (1 Pedro 3:5) Sila nakaamgo nga ang pagpahimuot kang Jehova pinaagi sa pagtuman sa iyang tambag sa kapulihay mosangpot sa kalipay sa pamilya ug sa ganti nga kinabuhing walay kataposan. Si Pedro naghisgot kang Sara, ang matahom nga asawa ni Abraham, nga nag-ingon nga siya “nagmasinugtanon kang Abraham, nga nagtawag kaniya nga ‘ginoo.’” Gipaluyohan ni Sara ang iyang mahinadlokon-sa-Diyos nga bana, kinsa gisugo sa Diyos sa pag-adto sa layong dapit. Gisakripisyo ni Sara ang haruhay nga pagkinabuhi ug iyang pa ganing gipameligro ang kaugalingon niyang kinabuhi. (Genesis 12:1, 10-13) Gidayeg ni Pedro si Sara tungod sa iyang maisogong panig-ingnan, nga nag-ingon: “Kamo mahimong iyang mga anak, kon kamo magpadayon sa pagbuhat ug maayo ug dili mahadlok sa bisan unsang hinungdan sa kalisang.”—1 Pedro 3:6.
17. Nganong makaingon kita nga lagmit naghunahuna si Pedro kang Abigail ingong panig-ingnan alang sa Kristohanong mga asawa?
17 Si Abigail maoy laing maisogong babaye nga may pagsalig sa Diyos, ug lagmit naghunahuna usab si Pedro kaniya. Si Abigail “masinaboton,” apan ang iyang bana nga si Nabal “mapig-oton ug daotan sa iyang mga binuhatan.” Sa dihang midumili si Nabal sa pagtabang kang David ug sa iyang mga tawo, sila nangandam sa pagpatay kang Nabal ug sa tibuok niyang panimalay. Apan si Abigail milihok aron sa pagluwas sa iyang panimalay. Gikargahan niyag mga pagkaon ang mga asno ug gitagbo si David ug ang iyang mga tawo. Sa pagkakita kang David, siya mikawas, mihapa sa tiilan ni David, ug nangaliyupo nga dili unta siya magdalidali. Natandog gayod si David. “Dalayegon si Jehova nga Diyos sa Israel, nga nagpadala kanimo niining adlawa sa pagsugat kanako!” siya miingon, “ug dalayegon ang imong pagkamay-salabotan.”—1 Samuel 25:2-33.
18. Kon tentalon sa pagpangamoral sa laing lalaki, kang kinsang panig-ingnan ang mahimong palandongon sa mga asawa, ug ngano?
18 Ang laing maayong panig-ingnan alang sa mga asawa mao ang batan-ong Sulamita nga nagpabiling maunongon ngadto sa ubos nga magbalantay nga iyang pamanhonon. Ang iyang gugma sa magbalantay nagpabiling lig-on bisan pa sa pangamoral sa usa ka datong hari. Nadasig sa pagpahayag sa iyang pagbati alang sa batan-ong magbalantay, siya miingon: “Ibutang ako ingong timbre diha sa imong kasingkasing, ingong timbre diha sa imong bukton; kay ang gugma kusganon sama sa kamatayon . . . Ang daghang katubigan dili makaarang sa pagpalong sa gugma, ni ang mga suba makabanlas niini.” (Awit ni Solomon 8:6, 7) Hinaot nga magmadeterminado usab ang tanang babaye nga modawat sa sakna sa pagpakigminyo sa pagpabiling maunongon sa ilang mga bana ug motahod pag-ayo kanila.
Dugang Tambag Gikan sa Diyos
19, 20. (a) Tungod sa unsang katarongan nga ang mga asawa kinahanglang magpasakop sa ilang mga bana? (b) Unsang maayong panig-ingnan ang gihatag alang sa mga asawa?
19 Sa kataposan, tagda ang konteksto sa atong tema nga teksto: “Ang mga asawa kinahanglang magpasakop sa ilang mga bana.” (Efeso 5:22) Nganong gikinahanglan ang maong pagpasakop? Ang sunod nga bersikulo nagpadayon: “Tungod kay ang bana maoy ulo sa iyang asawa ingon nga si Kristo usab maoy ulo sa kongregasyon.” Busa, giawhag ang mga asawa: “Ingon nga ang kongregasyon nagapasakop kang Kristo, mao man usab ang mga asawa angay nga magpasakop sa ilang mga bana sa tanang butang.”—Efeso 5:23, 24, 33.
20 Aron matuman kining sugoa, ang mga asawa kinahanglang magtuon ug dayon magsundog sa panig-ingnan sa kongregasyon sa dinihogang mga sumusunod ni Kristo. Palihog basaha ang 2 Corinto 11:23-28 ug sa ingon sayra kon unsay giantos sa usa ka membro sa kongregasyon, si apostol Pablo, tungod sa iyang pagkamatinumanon ngadto sa Ulo, si Jesu-Kristo. Sama kang Pablo, ang mga asawa ug ang ubang mga membro sa kongregasyon kinahanglang magpabiling maunongon nga magpasakop kang Jesus. Ang mga asawa makapasundayag niini pinaagi sa ilang pagpasakop sa ilang mga bana.
21. Unsay magtukmod sa mga asawa sa pagpasakop kanunay sa ilang mga bana?
21 Bisan tuod daghang asawa karon dili makagusto sa ideya sa pagpasakop, ang usa ka maalamong babaye maghunahuna sa mga kaayohan niini. Pananglitan, kon ang bana dili magtutuo, ang pagpasakop sa iyang pagkaulo, gawas sa mga kahimtang nga malapas ang mga balaod o mga prinsipyo sa Diyos, lagmit magpatunghag talagsaong ganti nga siya nakahimo sa ‘pagluwas sa iyang bana.’ (1 Corinto 7:13, 16) Dugang pa, siya malipay sa pagkahibalo nga giuyonan ni Jehova nga Diyos ang iyang pagkinabuhi ug dagayang magganti kaniya tungod sa pagsundog sa panig-ingnan sa iyang minahal nga Anak.
Nahinumdom Ka Ba?
• Nganong lisod tingali alang sa usa ka asawa ang pagtahod sa iyang bana?
• Nganong seryoso kaayo ang pagdawat sa sakna sa pagpakigminyo?
• Sa unsang paagi si Jesus naghatag ug panig-ingnan alang sa mga asawa, ug unsang mga kaayohan ang moresulta kon sundon ang iyang panig-ingnan?
[Mga Pangutana sa Pagtuon]
[Hulagway sa panid 19]
Nganong seryoso kaayo ang pagdesisyon nga modawat sa sakna sa pagpakigminyo?
[Hulagway sa panid 21]
Unsay makat-onan sa mga asawa gikan sa panig-ingnan ni Abigail diha sa Bibliya?