Kon sa Unsang Paagi Maila ang Matuod nga Pagsimba

KADAGHANANG relihiyon nangangkon nga ang ilang gitudlo naggikan sa Diyos. Busa, kinahanglang patalinghogan nato ang mga pulong sa apostol ni Jesus nga si Juan, kinsa misulat: “Mga hinigugma, ayaw ninyo tuohi ang matag inspiradong pahayag, hinunoa sulayi ang inspiradong mga pahayag aron masuta kon kini nagagikan ba gayod sa Diyos, tungod kay daghang mini nga mga manalagna ang nanungha sa kalibotan.” (1 Juan 4:1) Unsaon nato pagsulay ang usa ka butang aron atong masuta kon kini naggikan ba sa Diyos?

Ang tanan nga naggikan sa Diyos nagbanaag sa iyang personalidad, ilabina sa iyang pangunang hiyas, ang gugma. Pananglitan, ang atong igsisimhot, nga pinaagi niana matagbaw kita sa kahumot sa mga hilba, mga bulak, o bag-ong luto nga tinapay, maoy timailhan sa gugma sa Diyos. Ang atong katakos sa pagkakita sa pagsalop sa adlaw, sa usa ka alibangbang, o sa pahiyom sa usa ka gamayng bata nagbanaag sa gugma sa Diyos kanato. Tinuod usab kana kon bahin sa atong katakos sa pagkadungog sa mananoy nga musika, honi sa usa ka langgam, o sa tingog sa usa ka minahal. Ang ato mismong pagkagama, bisag dili hingpit, nagpakita sa gugma sa Diyos. Mao kanay hinungdan kon nganong sagad natong masinati ang pagkatinuod sa mga pulong ni Jesus: “Adunay labaw nga kalipay sa paghatag kay sa pagdawat.” (Buhat 20:35) Malipay kita sa pagpahayag ug gugma tungod kay gilalang kita “sa larawan sa Diyos.” (Genesis 1:27) Bisan tuod aduna pay daghang hiyas si Jehova, ang gugma mao ang kinalabwang bahin sa iyang personalidad.

Ang mga sinulat nga naggikan sa Diyos angay nga magbanaag sa gugma sa Diyos. Ang mga relihiyon sa kalibotan adunay daghang karaan nga mga sinulat. Nagbanaag ba ang maong mga sinulat sa gugma sa Diyos?

Ang tinuod mao, kadaghanan sa karaang relihiyosong mga sinulat halos wala maghisgot kon sa unsang paagi gihigugma kita sa Diyos o kon sa unsang paagi higugmaon nato ang Diyos. Busa, milyonmilyong tawo ang walay makaplagang tubag sa dihang sila mangutana, “Nganong makakita kitag ebidensiya sa gugma sa Diyos diha sa kalalangan samtang nagpadayon ang pag-antos ug pagkadaotan?” Sa laing bahin, ang Bibliya mao lamang ang karaang relihiyosong sinulat nga nagsaysay sa bug-os sa gugma sa Diyos. Kini nagtudlo usab kanato kon unsaon sa pagpakitag gugma.

Ang Basahon Bahin sa Gugma

Ang Pulong sa Diyos, ang Bibliya nagbutyag nga si Jehova maoy “Diyos sa gugma.” (2 Corinto 13:11) Gihubit sa Bibliya kon sa unsang paagi gipalihok si Jehova sa gugma aron hatagan ang unang magtiayon ug kinabuhi nga walay sakit ug kamatayon. Apan tungod sa pagrebelde nila sa awtoridad sa Diyos, ang tawo nag-antos. (Deuteronomio 32:4, 5; Roma 5:12) Milihok si Jehova aron ipasig-uli kon unsay nawala. Ang Pulong sa Diyos nag-ingon: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.”  (Juan 3:16) Ang Balaang Kasulatan naghatag ug dugang katin-awan bahin sa gugma sa Diyos pinaagi sa paghubit niini kon sa unsang paagi gitagana sa Diyos ang usa ka hingpit nga kagamhanan nga pagamandoan ni Jesus aron ipasig-uli ang pakigdait ngadto sa masinugtanong katawhan.—Daniel 7:13, 14; 2 Pedro 3:13.

Gisumaryo sa Bibliya ang obligasyon sa tawo niining mga pulonga: “‘Higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan.’ Kini mao ang kinadak-an ug unang sugo. Ang ikaduha, nga susama niini, mao kini, ‘Higugmaon mo ang imong silingan sama sa imong kaugalingon.’ Niining duha ka sugo nagsukad ang tibuok Balaod.” (Mateo 22:37-40) Ang Bibliya nag-angkon nga kini inspirado sa Diyos. Sanglit kini klarong nagbanaag sa iyang personalidad, makaseguro kita nga kini naggikan sa “Diyos sa gugma.”—2 Timoteo 3:16.

Pinaagi sa paggamit niini nga sukdanan, atong maila kon unsang karaang mga sinulat ang naggikan gayod sa Diyos. Ang gugma magpaila usab sa matuod nga mga magsisimba, tungod kay ilang gisundog ang Diyos sa pagpakitag gugma.

Kon sa Unsang Paagi Maila ang mga Tawo nga Nahigugma sa Diyos

Kadtong tinuod nga nahigugma sa Diyos daling maila, ilabina karon nga kita nagkinabuhi na sa gitawag sa Bibliya nga “kataposang mga adlaw.” Ang mga tawo misamot pa ka ‘mahigugmaon sa ilang kaugalingon, mahigugmaon sa salapi, mahigugmaon sa kalipayan inay nga mga mahigugmaon sa Diyos.’—2 Timoteo 3:1-4.

Sa unsang paagi maila nimo ang mga tawo nga nahigugma sa Diyos? Ang Bibliya nag-ingon: “Kini ang kahulogan sa paghigugma sa Diyos, nga atong bantayan ang iyang mga sugo.” (1 Juan 5:3) Ang gugma sa Diyos magpalihok sa mga tawo sa pagtamod sa moral nga mga sukdanan sa Bibliya. Pananglitan, ang Pulong sa Diyos adunay mga balaod bahin sa sekso ug kaminyoon. Ang seksuwal nga relasyon gitugot lamang diha sa kaminyoon, ug ang kaminyoon maoy permanenteng relasyon. (Mateo 19:9; Hebreohanon 13:4) Sa dihang ang usa ka babaye sa Espanya nga nagtuon ug teolohiya mitambong sa tigom diin ang mga Saksi ni Jehova madasigong nagtuon sa moral nga mga balaod sa Bibliya, siya miingon: “Mibiya ko sa maong tigom nga napalig-on, dili lamang sa matulon-anong mga pakigpulong nga binase sa Bibliya kondili sa panaghiusa nga naglungtad taliwala niining mga tawhana, sa ilang hataas nga sukdanan sa moral, ug sa ilang maayong panggawi.”

Dugang pa sa ilang gugma sa Diyos, ang matuod nga mga Kristohanon daling maila pinaagi sa ilang pagpakitag gugma sa ilang mga silingan. Ang ilang labing hinungdanong buluhaton mao ang pagpakigsulti sa uban bahin sa bugtong paglaom alang sa katawhan, ang Gingharian sa Diyos. (Mateo 24:14) Wala nay lain pang magdalag dumalayong kaayohan ngadto sa ilang mga silingan gawas sa pagtabang kanila nga makabatog kahibalo bahin sa Diyos. (Juan 17:3) Ang matuod nga mga Kristohanon nagpakita usab sa ilang gugma sa uban pang mga paagi. Sila naghatag ug praktikal nga tabang niadtong nakaagom sa mga kalisdanan. Pananglitan, sa dihang gihampak sa linog ang Italya, ang usa ka lokal nga mantalaan nagtaho nga ang mga Saksi ni Jehova “milihok sa praktikal nga paagi, nga nagtabang niadtong nag-antos sa katalagman, bisan unsa pay ilang relihiyon.”

Gawas pa sa paghigugma sa Diyos ug sa silingan, ang matuod nga mga Kristohanon nahigugma sa usag usa. Si Jesus miingon: “Ako magahatag kaninyog bag-ong sugo, nga kamo maghigugmaay sa usag usa; ingon sa akong paghigugma kaninyo, nga kamo usab maghigugmaay sa usag usa. Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.”—Juan 13:34, 35.

Lahi ba gayod ang gugma nga gipakita sa matuod nga mga Kristohanon sa usag usa? Mao kanay hunahuna sa usa ka katabang nga ginganlan ug Ema. Siya nagtrabaho sa La Paz, Bolivia, diin nabahin-bahin ang dato ug pobre tungod sa lainlaing etnikong kagikan. Siya miingon: “Sa unang higayon nga mitambong ko sa tigom sa mga Saksi ni Jehova, nakita nako ang usa ka maayog-pamesti nga lalaki nga mitupad ug nakigsulti sa usa ka babayeng Indian. Wala pa gayod ako makakita niana sukad. Nianang tungora, akong natino nga sila gayod ang katawhan sa Diyos.” Sa susama, usa ka batan-ong babaye nga taga-Brazil nga ginganlag Miriam miingon: “Wala ko mahibalo kon sa unsang paagi magmalipayon, bisan diha sulod sa among pamilya. Diha sa mga Saksi ni Jehova nako unang nakita  ang gugma nga gipadayag sa buhat.” Sa Tinipong Bansa, ang direktor sa balita sa usa ka estasyon sa telebisyon misulat: “Kon mas daghan lang untang tawo ang magkinabuhi sama kaninyo, dili unta ingon niini ang kahimtang sa atong nasod. Usa ako ka tigbalita nga nahibalo nga ang inyong organisasyon gipasukad gayod sa gugma ug sa lig-ong pagtuo sa usa ka Maglalalang.”

Pangitaa ang Matuod nga Pagsimba

Ang gugma maoy timailhan sa matuod nga pagsimba. Gipakasama ni Jesus ang pagkakaplag sa matuod nga pagsimba sa pagkakaplag sa husto nga dalan ug sa pagpili nga mosubay niana. Mao kana ang bugtong dalan nga motultol sa kinabuhing walay kataposan. Matod pa ni Jesus: “Sulod kamo agi sa sigpit nga ganghaan; tungod kay halapad ug haluag ang dalan padulong sa kalaglagan, ug daghan ang mga nagasulod agi niini; samtang sigpit ang ganghaan ug hagip-ot ang dalan padulong sa kinabuhi, ug diyutay ra ang mga nakakaplag niini.” (Mateo 7:13, 14) Usa lamang ka grupo sa matuod nga mga Kristohanon ang naglakaw uban sa Diyos diha sa dalan sa matuod nga pagsimba. Busa, hinungdanon gayod kon unsang relihiyona ang imong pilion. Kon imong makaplagan kanang dalana, ug pilion nimo nga mosubay niana, imong nakaplagan ang kinamaayohang paagi sa pagkinabuhi, tungod kay kana ang dalan sa gugma.—Efeso 4:1-4.

Handurawa kon unsang kalipay ang imong maangkon samtang nagsubay ka sa dalan sa matuod nga pagsimba! Sama kana sa paglakaw uban sa Diyos. Gikan sa Diyos makakat-on ka sa kaalam ug gugma aron matagamtam ang maayong relasyon sa uban. Gikan kaniya imong makat-onan ang katuyoan sa kinabuhi, ug imong masabtan ang mga saad sa Diyos ug makabaton kag paglaom sa umaabot. Dili ka gayod magmahay sa pagpangita sa matuod nga pagsimba.

[Hulagway sa panid 5]

Taliwala sa karaan nga relihiyosong mga sinulat, ang Bibliya lamang ang nagbutyag sa gugma sa Diyos

[Mga hulagway sa panid 7]

Daling maila ang matuod nga mga Kristohanon tungod kay sila nagpakita ug gugma