Malipay nga Maghulat Kang Jehova

NAKAKAON ka na ba ug hilaw nga prutas? Sa walay duhaduha, wala ka lamii niana. Ang prutas nagkinahanglag panahon una mahinog, ug ang paghulat sa pagkahinog niana mapuslanon gayod. Adunay ubang mga kahimtang diin mapuslanon ang paghulat. “Maayo nga ang usa ka tawo maghulat, nga mahilom gayod, alang sa kaluwasan ni Jehova,” nag-ingon ang Bibliya. (Lamentaciones 3:26; Tito 2:13) Sa unsang mga paagi nga ang mga Kristohanon kinahanglang maghulat kang Jehova? Sa unsang paagi makabaton kitag kaayohan sa paghulat kaniya?

Paghulat sa Diyos—Unsay Nalangkit Niana?

Ingong mga Kristohanon, kita “nagapaabot ug nagabutang kanunay sa hunahuna sa presensiya sa adlaw ni Jehova.” Naglaom kita ug kahupayan sa dihang iyang ‘laglagon ang mga tawong dili-diyosnon.’ (2 Pedro 3:7, 12) Gusto ni Jehova nga taposon ang tanang pagkadaotan, apan nagpugong lang siya aron ipahinabo ang kaluwasan sa mga Kristohanon sa paagi nga mahimaya ang iyang ngalan. Ang Bibliya nag-ingon: “Ang Diyos, bisan pag may tinguha nga ipasundayag ang iyang kapungot ug ipaila ang iyang gahom, nagtugot uban ang dagayang hataas-nga-pailob sa mga sudlanan sa kapungot nga gihimong angay sa kalaglagan, aron iyang ikapaila ang bahandi sa iyang himaya nganha sa mga sudlanan sa kaluoy.” (Roma 9:22, 23) Sama sa iyang gihimo sa adlaw ni Noe, nahibalo si Jehova sa eksaktong panahon sa pagluwas sa iyang katawhan karon. (1 Pedro 3:20) Busa, ang paghulat sa Diyos naglangkit ug paghulat sa iyang panahon sa paglihok.

Samtang naghulat kita sa adlaw ni Jehova, kita tingali mapikal usahay nga makita nga nag-anam kadaot ang moral nga mga sukdanan sa mga tawo sa atong palibot. Kon mapikal kita, maayong tagdon ang mga pulong sa manalagna sa Diyos nga si Miqueas, kinsa misulat: “Ang maunongon nahanaw gikan sa yuta, ug taliwala sa katawhan walay matul-id.” Dayon midugang siya: “Bahin kanako, magalantaw ako kang Jehova. Magpakita ako ug mahulatong tinamdan sa Diyos sa akong kaluwasan.” (Miqueas 7:2, 7) Unsa ang “mahulatong tinamdan” nga angay natong ugmaron? Sanglit ang paghulat subsob nga makapahigawad, sa unsang paagi kita magmalipayon samtang naghulat sa Diyos?

Malipayon Samtang Naghulat

Makakat-on kita sa hustong tinamdan gikan kang Jehova. Sa tanang panahon siya usa ka “malipayong Diyos.” (1 Timoteo 1:11) Siya malipayon samtang naghulat tungod kay siya nagpadayon sa pagbuhat aron matuman ang iyang katuyoan sa pagbayaw sa mga tawo nga nahigugma kaniya ngadto sa kahingpitan nga maoy iyang katuyoan alang sa mga tawo sa dihang gilalang niya sila. (Roma 5:12; 6:23) Nakita niya ang maayong mga resulta sa iyang buhat—milyonmilyong tawo ang nadani sa matuod nga pagsimba. Si Jesus miingon: “Ang akong Amahan nagpadayon sa pagbuhat hangtod karon, ug ako nagpadayon sa pagbuhat.” (Juan 5:17) Ang pagbuhat ug mga butang alang sa uban hinungdanon aron magmalipayon. (Buhat 20:35) Sa samang paagi, ang matuod nga mga Kristohanon wala magtinapolan samtang naghulat. Hinunoa, sila nagpadayon sa pagbuhat aron tabangan ang uban nga makakat-on sa katuyoan sa Diyos alang sa katawhan.

Ang matinumanong mga tawo nagmakontento gayod sa pagdayeg sa Diyos samtang naghulat sa iyang panahon sa paglihok. Tagda ingong pananglitan ang salmistang si David. Si David gilutos sa iyang hari, giluiban sa usa ka suod nga higala, ug sa iyang anak. Sa matag usa niining maong mga kahimtang, nagmalipayon kaha si David samtang siya naghulat nga moabot ang kahupayan sa gitakdang panahon ni Jehova? Ang Salmo 71, nga dayag nga gisulat ni David, nag-ingon: “Alang kanako, ako  magahulat kanunay, ug dugangan ko ang imong tanang pagdayeg. Ang akong baba magasugilon sa imong pagkamatarong, sa imong pagluwas sa tibuok nga adlaw.” (Salmo 71:14, 15) Imbes maghulat nga dili-mapailobon, si David nagmalipayon tungod kay siya puliki sa pagdayeg kang Jehova ug sa pagpalig-on sa uban diha sa matuod nga pagsimba.—Salmo 71:23.

Ang paghulat kang Jehova dili makapapikal sama sa paghulat sa nadelatar nga bus. Mas susama kini sa malipayong paghulat sa mga ginikanan samtang ang ilang gamayng bata mahimong usa ka hamtong nga ilang ikapasigarbo. Ang katuigan puno sa daghang kalihokan—pagbansay, paghatag ug instruksiyon, ug pagdisiplina—ang tanan gibuhat sa tuyo nga makab-ot ang gitinguhang sangpotanan. Sa samang paagi, kita nga naghulat kang Jehova makakaplag ug kalipay sa pagtabang sa uban nga masuod sa Diyos. Buot usab nato nga maangkon ang pag-uyon sa Diyos ug, sa ngadtongadto, ang kaluwasan.

Dili Mawad-ag Paglaom

Ang paghulat kang Jehova nagpasabot ug pagpadayon sa paghigugma ug pag-alagad kaniya nga dili mawad-ag paglaom. Malisod kini. Daghan sa mga alagad sa Diyos karon nagpuyo sa mga katilingban diin ang mga tawo magbugalbugal niadtong nagkinabuhi pinasukad sa ilang pagtuo sa mga saad sa Diyos. Apan, tagda ang panig-ingnan sa matinumanong mga Israelinhon nga nagpadayon sa paghupot sa ilang paglaom nga buhi panahon sa 70-ka-tuig nga pagkadestiyero sa Babilonya. Unsay nakatabang kanila sa paghupot sa ilang paglaom nga buhi? Sa walay duhaduha, ang pagbasa sa mga salmo nakapalig-on kanila. Ang usa ka makapadasig nga salmo nga lagmit nasulat na niadtong panahona nag-ingon: “Sa iyang pulong ako naghulat. Ang akong kalag naghulat kang Jehova labaw pa sa mga tigbantay nga naghulat sa kabuntagon, nga nagapaabot sa kabuntagon. Magpadayon unta nga maghulat kang Jehova ang Israel.”—Salmo 130:5-7.

Ang mga Hudiyo nga naghupot sa ilang paglaom nga buhi pinaagi sa pagbasa ug pagsulti bahin niana gigantihan sa dihang ang Babilonya nailog sa mga kaaway. Libolibong matinumanong mga Hudiyo ang mipanaw dayon paingon sa Jerusalem. Mahitungod nianang panahona, kini ang nahisulat: “Sa dihang gitigom na usab ni Jehova ang mga binihag sa Zion, . . . ang among baba napuno sa katawa.” (Salmo 126:1, 2) Ang maong mga Hudiyo wala molunga, kondili nagpadayon sila sa pagpalig-on sa ilang pagtuo. Ug wala gayod sila molunga sa pag-awit ug pagdayeg kang Jehova.

Sa samang paagi, ang matuod nga mga Kristohanon nga naghulat sa Diyos niining “kataposan sa sistema sa mga butang” naningkamot kanunay sa paghupot sa ilang pagtuo nga buhi. Sila nagtuon sa Pulong sa Diyos, nagdinasigay sa usag usa, ug nagpadayon sa pagdayeg kang Jehova pinaagi sa pagsangyaw sa maayong balita sa iyang Gingharian.—Mateo 24:3, 14.

Paghulat Aron Makabatog Kaayohan sa Disiplina

Ang manalagna sa Diyos nga si Jeremias misulat: “Maayo nga ang usa ka tawo maghulat, nga mahilom gayod, alang sa kaluwasan ni Jehova.” (Lamentaciones 3:26) Ang buot ipasabot ni Jeremias mao nga maayong dili moreklamo ang katawhan sa Diyos bahin sa paagi nga si Jehova nagdisiplina kanila sa dihang gitugotan niya nga malaglag ang Jerusalem. Hinunoa, angay silang makabatog kaayohan gikan sa maong kasinatian pinaagi sa pagpalandong  bahin sa ilang pagkamasinupakon ug sa ilang panginahanglan nga mag-usab sa ilang tinamdan.—Lamentaciones 3:40, 42.

Ang paagi nga ang disiplina gikan kang Jehova makahatag kanatog kaayohan mahimong ikatandi sa paagi nga mogulang ang prutas. Mahitungod sa disiplina gikan sa Diyos, ang Bibliya nag-ingon: “Alang kanila nga nabansay niini kini magpatunghag madaitong bunga, nga mao, ang pagkamatarong.” (Hebreohanon 12:11) Maingon nga ang prutas nagkinahanglag panahon una mahinog, gikinahanglan usab ang panahon aron atong mausab ang atong mga tinamdan agig pagsanong sa pagbansay nga gitagana sa Diyos. Pananglitan, kon ang atong sayop nga panggawi moresulta sa pagkatangtang sa pipila nato ka pribilehiyo diha sa kongregasyon, ang atong pagkaandam nga maghulat sa Diyos motabang kanato nga dili mahigawad ug molunga. Sa maong mga kahimtang, ang inspiradong mga pulong ni David makapadasig: ‘Ang pagkanailalom sa kasuko sa Diyos maoy daklit lamang, ang pagkanailalom sa iyang maayong kabubut-on maoy sa tibuok kinabuhi. Sa kagabhion ang paghilak mahimong magpadayon, apan sa kabuntagon adunay hugyaw sa kalipay.’ (Salmo 30:5) Kon atong ugmaron ang mahulatong tinamdan ug ipadapat ang tambag nga atong madawat gikan sa Pulong sa Diyos ug sa iyang organisasyon, moabot ra ang panahon nga kita ‘mohugyaw sa kalipay.’

Ang Pag-uswag Ngadto sa Pagkahamtong Nagkinahanglag Panahon

Kon ikaw batan-on pa o bag-o lang nabawtismohan, maghinamhinam ka tingali sa paghupot ug pipila ka responsibilidad diha sa Kristohanong kongregasyon. Apan nagkinahanglag panahon ang pag-ugmad sa espirituwal nga pagkahamtong nga gikinahanglan sa pag-abaga sa maong mga responsibilidad. Busa, pahimusli ang imong pagkabatan-on sa pag-uswag sa espirituwal. Pananglitan, ang pagkabatan-on maoy maayong panahon sa pagbasa sa enterong Bibliya, pag-ugmad sa Kristohanong mga hiyas, ug pagkat-on sa katakos sa paghimog mga tinun-an. (Ecclesiastes 12:1) Kon mapaubsanon kang magpakitag mahulatong tinamdan, moabot ra ang panahon nga hatagan ka ni Jehova ug dugang responsibilidad.

Ang buluhatong paghimog mga tinun-an nagkinahanglan usab ug pailob. Maingon nga ang mag-uuma kinahanglang magpadayon sa pagbisibis hangtod nga patuboon sa Diyos ang binhi, mao man usab sa buluhaton nga paghimog mga tinun-an. (1 Corinto 3:7; Santiago 5:7) Ang pag-ugmad ug pagtuo ug apresasyon kang Jehova diha sa kasingkasing sa uban nagkinahanglag daghang bulan o mga tuig pa gani sa mapailobong pagtuon sa Bibliya. Ang paghulat kang Jehova naglangkit ug paglahutay, bisan kon sa sinugdan, ang mga ginatun-an dili mosanong sa ilang nakat-onan. Kon sila nagpakita ug bisan gamayng apresasyon, mahimong timailhan kana nga sila misanong sa espiritu ni Jehova. Uban ang pagpailob, mahimong mabatonan nimo ang kalipay nga makita ang pagtabang ni Jehova sa imong ginatun-an nga mouswag ngadto sa pagkahimong tinun-an ni Kristo.—Mateo 28:20.

Pagpakitag Gugma Pinaagi sa Paghulat

Ingong pananglitan kon sa unsang paagi ang paghulat mahimong usa ka pagpahayag sa gugma ug pagsalig, tagda ang kahimtang sa usa ka tigulang nga sister nga nagpuyo sa usa ka desyerto sa Andes, sa Amerika del Sur. Siya ug ang usa pa ka sister mao lamang ang mga Saksi ni Jehova sa ilang balangay. Mahanduraw ba nimo kon unsa ka dako ang ilang kahinam nga maghulat sa pagduaw sa mga isigka-Kristohanon? Kas-a, usa ka magtatan-aw sa sirkito ang nasaag sa dihang nagpaingon sa ilang dapit sa pagduaw kanila sa unang higayon. Kinahanglang mobalik siya sa iyang agi mao nga nadelatar siya ug pipila ka oras. Kadlawon na sa dihang nakita niya sa halayo ang balangay. Tungod kay wala may koryente sa maong dapit, natingala siya nga nakakitag suga. Pagkadako sa iyang kalipay sa dihang nakaabot siya sa entrada sa balangay ug nakita nga ang kahayag naggikan diay sa lampara nga giisa sa tigulang nga sister! Segurado gayod ang maong sister nga moabot ang magtatan-aw sa sirkito, busa siya naghulat.

Uban ang pagpailob nga susama nianang sa sister, kita malipay sa paghulat kang Jehova. Segurado kita nga tumanon niya ang iyang mga saad. Ug sama nianang magtatan-aw sa sirkito, atong gipabilhan kadtong mahigugmaong naghulat kanato. Busa, dili ikatingala nga ang Diyos may kahimuot niadtong nagahulat kaniya. Ang Bibliya nag-ingon: “Si Jehova nagakalipay . . . niadtong nagahulat sa iyang mahigugmaong-kalulot.”—Salmo 147:11.

[Hulagway sa panid 18]

Ang mga tawo nga puliki sa pagdayeg sa Diyos makabaton ug kalipay sa paghulat kang Jehova