Usahan Ta sa Pagbayaw ang Ngalan ni Jehova

“Oh padakoa ninyo si Jehova uban kanako, ug usahan ta ang pagbayaw sa iyang ngalan.”—SALMO 34:3.

1. Unsang maayong panig-ingnan ang gipakita ni Jesus panahon sa iyang yutan-ong ministeryo?

 SA GABII sa Nisan 14, 33 K.P., si Jesus ug ang iyang mga apostoles nag-usa sa pag-awit ug mga pagdayeg kang Jehova didto sa lawak sa itaas sa usa ka balay sa Jerusalem. (Mateo 26:30) Mao kadto ang kataposang higayon nga gibuhat kana ni Jesus uban sa iyang mga apostoles. Apan, haom nga iyang taposon ang iyang pagpakig-uban kanila pinaagi sa pag-awit ug mga pagdayeg kang Jehova. Sukad sa sinugdanan sa iyang yutan-ong ministeryo hangtod sa kataposan, si Jesus nagdayeg sa iyang Amahan ug masibotong nagpaila sa Iyang ngalan. (Mateo 4:10; 6:9; 22:37, 38; Juan 12:28; 17:6) Sa diwa, iyang gipalanog ang mainitong pagdapit sa salmista: “Oh padakoa ninyo si Jehova uban kanako, ug usahan ta ang pagbayaw sa iyang ngalan.” (Salmo 34:3) Pagkamaayong panig-ingnan nga atong sundogon!

2, 3. (a) Giunsa nato pagkahibalo nga ang Salmo 34 adunay matagnaong kahulogan? (b) Unsay atong hisgotan niining artikuloha ug sa sunod?

² Pipila ka oras human sa pag-awit ug mga pagdayeg uban kang Jesus, si apostol Juan nakasaksi ug lahi kaayong panghitabo. Nakita niya ang iyang Agalon ug ang duha ka kriminal nga gilansang diha sa mga estaka sa pagsakit. Gibali sa Romanong mga sundalo ang mga bitiis sa duha ka kriminal aron mamatay dayon sila. Apan, si Juan nagtaho nga wala nila balia ang mga bitiis ni Jesus. Pag-abot sa mga sundalo kang Jesus, siya patay na. Diha sa iyang Ebanghelyo, gipaila ni Juan ang maong hitabo ingong katumanan sa laing bahin sa Salmo 34: “Walay bukog niya nga magupok.”—Juan 19:32-36; Salmo 34:20, Septuagint.

³ Ang Salmo 34 adunay daghan pang mga punto nga makapainteres sa mga Kristohanon. Busa, niining artikuloha ug sa sunod, atong susihon ang mga kahimtang nga ilalom niana gisulat ni David ang maong salmo ug dayon atong hisgotan ang makapadasig nga unod niana.

Ang Pagkalagiw ni David Gikan Kang Saul

4. (a) Nganong gidihogan man si David ingong umaabot nga hari sa Israel? (b) Nganong si Saul “nahigugma” pag-ayo kang David?

⁴ Sa bata pa si David, si Saul mao ang hari sa Israel. Apan, si Saul nagmasinupakon ug nawad-an sa pag-uyon ni Jehova. Tungod niana, ang manalagnang si Samuel miingon kaniya: “Si Jehova naggisi sa harianong pagmando sa Israel gikan kanimo niining adlawa, ug tinong kini iyang ihatag sa imong isigkatawo nga mas maayo kay kanimo.” (1 Samuel 15:28) Sa ulahi, gisugo ni Jehova si Samuel sa pagdihog kang David, ang kinamanghorang anak ni Jese, aron mahimong sunod nga hari sa Israel. Sa kasamtangan, kay nawad-an na sa espiritu sa Diyos, may mga panahon nga si Haring Saul nagmasulub-on. Si David, nga usa ka batid nga musikero, gidala ngadto sa Gibea aron mag-alagad sa hari, ug ang musika ni David nakahupay kang Saul, kinsa “nahigugma kaniya pag-ayo.”—1 Samuel 16:11, 13, 21, 23.

5. Nganong nausab ang tinamdan ni Saul kang David, ug napugos si David sa pagbuhat sa unsa?

⁵ Sa paglabay sa panahon, napamatud-an nga si Jehova nagauban kang David. Si Jehova nagtabang kaniya sa pagbuntog sa higanteng Filistehanon nga si Goliat ug gipaluyohan siya samtang siya gipasidunggan sa Israel tungod sa iyang kabatid sa panggubatan. Apan, ang pagpanalangin ni Jehova kang David nakapasina kang Saul, ug naugmad ang iyang pagdumot kang David. Dihay duha ka higayon nga samtang si David nagtugtog  sa iyang alpa atubangan kang Saul, ang hari nagbangkaw kang David. Nianang duha ka higayon si David nakalihay. Sa dihang gisulayan pagpatay ni Saul si David sa ikatulong higayon, naamgohan sa umaabot nga hari sa Israel nga kinahanglang mokalagiw na siya aron maluwas ang iyang kinabuhi. Sa ngadtongadto, tungod sa padayong pagpaningkamot ni Saul sa pagdakop ug pagpatay kaniya, nakahukom si David sa pagpangitag katagoan sa gawas sa teritoryo sa Israel.—1 Samuel 18:11; 19:9, 10.

6. Nganong gipapatay ni Saul ang mga molupyo sa Nob?

⁶ Sa pagpaingon niya sa utlanan sa Israel, si David mihapit sa siyudad sa Nob, diin nahimutang ang tabernakulo ni Jehova. Dayag nga si David giubanan sa mga batan-ong lalaki sa iyang pagkalagiw, ug si David nangayog matimo alang kaniya ug sa iyang mga kauban. Nasayran ni Saul nga ang hataas nga saserdote naghatag kang David ug sa iyang mga tawo ug matimo ug sa espada nga gikuha ni David gikan sa namatayng si Goliat. Sa kasuko, gipapatay ni Saul ang tanang molupyo sa siyudad, lakip na ang 85 ka saserdote.—1 Samuel 21:1, 2; 22:12, 13, 18, 19; Mateo 12:3, 4.

Nakaikyas na Usab sa Kamatayon

7. Nganong ang Gat dili maayong dapit nga tagoan ni David?

⁷ Gikan sa Nob, si David mikalagiw ug mga 40 kilometros pakasadpan paingon sa teritoryo sa mga Filistehanon ug midangop kang Haring Akis sa lungsod nga natawhan ni Goliat, sa Gat. Tingali naghunahuna si David nga lagmit gayong dili mangita si Saul kaniya sa Gat. Apan, sa wala madugay, nahimawngan si David sa mga alagad sa hari sa Gat. Sa dihang nabatian ni David nga nahimawngan siya, “siya nahadlok pag-ayo tungod kang Akis nga hari sa Gat.”—1 Samuel 21:10-12.

8. (a) Unsay gitug-an kanato sa Salmo 56 bahin sa kasinatian ni David sa Gat? (b) Sa unsang paagi si David igo ra gayong nakaikyas sa kamatayon?

⁸ Dayon gidakop si David sa mga Filistehanon. Lagmit niining panahona nga gikomposo ni David ang kinasingkasing nga salmo diin mihangyo siya kang Jehova: “Isulod ang akong mga luha sa imong botelya nga panit.” (Salmo 56:8 ug superskripsiyon) Busa iyang gipahayag ang iyang pagsalig nga si Jehova dili malimot sa iyang kagul-anan kondili mahigugmaong mag-atiman ug manalipod kaniya. Naglaraw usab si David ug usa ka  paagi nga malansisan ang hari sa mga Filistehanon. Nagpabuangbuang siya. Sa pagkakita niini, gikasab-an ni Haring Akis ang iyang mga alagad sa pagdala ngadto sa iyang atubangan ug usa ka tawong ‘buang.’ Tin-aw nga gipaluyohan ni Jehova ang laraw ni David. Gipapahawa si David gikan sa maong siyudad, nga igo ra gayod siyang nakaikyas sa kamatayon.—1 Samuel 21:13-15.

9, 10. Nganong gisulat man ni David ang Salmo 34, ug kinsay lagmit nga gihunahuna ni David sa dihang gikomposo niya ang maong salmo?

⁹ Wala mag-ingon ang Bibliya kon ang mga tigpaluyo ni David mikalagiw ba ngadto sa Gat uban kaniya o nagpabilin lamang diha sa sikbit nga mga balangay sa Israel samtang nagbantay kaniya. Bisan unsa may kahimtang, lagmit gayong gikalipay nila ang ilang panagkita pag-usab sa dihang gitaho ni David kanila kon sa unsang paagi giluwas na usab siya ni Jehova. Ang maong hitabo mao ang gibasehan sa Salmo 34, ingon sa gipakita sa superskripsiyon. Sa unang pito ka bersikulo sa maong salmo, gidayeg ni David ang Diyos tungod sa pagluwas kaniya ug gidapit niya ang iyang mga tigpaluyo sa pagduyog kaniya sa pagbayaw kang Jehova ingong Dakong Manluluwas sa Iyang katawhan.—Salmo 34:3, 4, 7.

¹⁰ Si David ug ang iyang mga tawo nagtago sa langob sa Adulam sa bukirong rehiyon sa Israel, mga 15 kilometros sidlakan sa Gat. Didto, ang mga Israelinhon nga wala makaangay sa mga kahimtang ilalom sa pagmando ni Haring Saul nangabot ug mianib kanila. (1 Samuel 22:1, 2) Sa dihang gikomposo ni David ang mga pulong sa Salmo 34:8-22, lagmit naghunahuna siya kanila. Ang mga pahinumdom nianang mga bersikuloha hinungdanon usab kanato karon, ug makabenepisyo gayod kita sa usa ka detalyadong panaghisgot niining matahom nga salmo.

Ang Imo Bang Pangunang Gitinguha Susama sa Iya ni David?

11, 12. Unsay atong mga katarongan sa pagdayeg kanunay kang Jehova?

¹¹ “Pagadayegon ko si Jehova sa tanang panahon; ang pagdayeg kaniya maanaa kanunay sa akong baba.” (Salmo 34:1) Sa pagkinabuhi ingong sinalikway, lagmit gayod nga si David nahingawa bahin sa kalan-on, apan sa gipakita niining mga pulonga, wala niya tugoti ang iyang adlaw-adlawng mga kahingawa nga mopahuyang sa iyang determinasyon nga dayegon si Jehova. Pagkamaayong panig-ingnan alang kanato sa dihang kita mag-atubang ug mga kalisdanan! Anaa man kita sa eskuylahan, sa trabahoan, kauban sa mga isigka-Kristohanon, o nagsangyaw sa kanataran, angay nga ang atong pangunang tinguha mao ang pagdayeg kang Jehova. Hunahunaa lang ang daghan kaayong katarongan kon nganong dayegon nato siya! Pananglitan, walay kinutoban ang atong madiskobrehan ug mahimong kalipayan sa kahibulongang mga linalang ni Jehova. Ug palandonga kon unsay iyang nalampos pinaagi sa iyang organisasyon dinhi sa yuta! Bisan tuod sila dili hingpit, gigamit ni Jehova ang matinumanong mga tawo sa gamhanang paagi niining modernong panahon. Kon itandi nimo ang mga buhat sa Diyos nianang iya sa mga tawo nga giidolo sa kalibotan, unsay imong ikasulti? Dili ka ba mouyon kang David, kinsa misulat usab: “Oh Jehova, walay sama kanimo taliwala sa mga diyos, ni adunay mga buhat nga sama sa imoha”?—Salmo 86:8.

¹² Sama kang David, matukmod kita sa pagdayeg kanunay kang Jehova tungod sa iyang walay-ikatandi nga mga buhat. Dugang pa, malipay kita sa pagkahibalo nga ang Gingharian sa Diyos anaa na karon sa mga kamot sa permanenteng Manununod ni David, si Jesu-Kristo. (Pinadayag 11:15) Nagpasabot kini nga haduol na ang kataposan niining sistemaha sa mga butang. Nameligro ang walay-kataposang kaugmaon sa kapin sa unom ka bilyong tawo. Wala pa mahitabo sukad nga adunay dinaliang panginahanglan sa pagsulti sa uban bahin sa Gingharian sa Diyos ug kon unsay hapit nang buhaton niini alang sa katawhan ug sa pagtabang kanila sa pagdayeg kang Jehova uban kanato. Segurado nga ang atong prioridad sa kinabuhi mao gayod ang paggamit sa matag kahigayonan sa pagdasig sa uban nga modawat niining “maayong balita” sa dili pa ulahi ang tanan.—Mateo 24:14.

13. (a) Bahin kang kinsa si David nanghambog, ug unsang matanga sa mga tawo ang misanong? (b) Sa unsang paagi nadani ang mga maaghop ngadto sa Kristohanong kongregasyon karon?

¹³ “Diha kang Jehova manghambog ang akong kalag; ang mga maaghop makadungog ug managmaya.” (Salmo 34:2) Dinhi, wala manghambog si  David sa bisan unsang personal nga kalamposan. Pananglitan, wala siya manghambog sa paagi nga iyang gilansisan ang hari sa Gat. Naamgohan niya nga gipanalipdan siya ni Jehova sa dihang didto siya sa Gat ug siya nakaikyas tungod sa tabang ni Jehova. (Proverbio 21:1) Busa, si David nanghambog, dili sa iyang kaugalingon, kondili bahin kang Jehova. Tungod niini, ang mga maaghop nasuod kang Jehova. Gibayaw usab ni Jesus ang ngalan ni Jehova, ug tungod niini, nasuod Kaniya ang mga mapaubsanon, daling-matudloan nga mga tawo. Sa pagkakaron, ang mga maaghop sa tanang kanasoran nadani ngadto sa internasyonal nga kongregasyon sa dinihogang mga Kristohanon, nga niana si Jesus ang Ulo. (Colosas 1:18) Ang kasingkasing nianang maong mga maaghop napalihok sa dihang nadungog nila nga ang ngalan sa Diyos gihimaya sa iyang mapaubsanong mga alagad ug sa dihang nadungog nila ang mensahe sa Bibliya, nga nasabtan nila sa tabang sa balaang espiritu sa Diyos.—Juan 6:44; Buhat 16:14.

Mga Tigom nga Nagpalig-on sa Atong Pagtuo

14. (a) Kontento na ba si David sa pagdayeg kang Jehova sa pribado lamang? (b) Unsang panig-ingnan ang gihatag ni Jesus mahitungod sa mga tigom alang sa pagsimba?

¹⁴ “Oh padakoa ninyo si Jehova uban kanako, ug usahan ta ang pagbayaw sa iyang ngalan.” (Salmo 34:3) Wala makontento si David sa pagdayeg kang Jehova sa pribado lamang. Mahigugmaon niyang giawhag ang iyang mga kauban sa pagduyog kaniya sa pagbayaw sa ngalan sa Diyos. Sa samang paagi, si Jesu-Kristo, ang Mas Dakong David, nalipay sa pagdayeg kang Jehova sa dayag—diha sa lokal nga sinagoga, sa mga pista didto sa templo sa Diyos sa Jerusalem, ug sa dihang kauban niya ang iyang mga sumusunod. (Lucas 2:49; 4:16-19; 10:21; Juan 18:20) Pagkamakapalipay nga pribilehiyo nga sundon ang panig-ingnan ni Jesus sa pagdayeg kang Jehova sa tanang higayon kauban sa mga isigkamagtutuo, ilabina karon nga ‘nakita nato nga ang adlaw nagkaduol na’!—Hebreohanon 10:24, 25.

15. (a) Unsay epekto sa eksperyensiya ni David nganha sa iyang mga tawo? (b) Sa unsang paagi kita makabatog kaayohan sa pagtambong sa atong mga tigom?

¹⁵ “Nagpakisayod ako kang Jehova, ug gitubag niya ako, ug giluwas niya ako gikan sa tanan kong gikalisangan.” (Salmo 34:4) Hinungdanon kang David kining maong kasinatian. Busa, nagpadayon siya sa pag-ingon: “Kining sinakit mitawag, ug gidungog ni Jehova. Ug Siya nagluwas kaniya gikan sa tanan niyang kasakit.” (Salmo 34:6) Sa dihang makig-uban sa mga isigkamagtutuo, daghan kitag kahigayonan sa pag-asoy ug makapalig-ong mga eksperyensiya kon sa unsang paagi gitabangan kita ni Jehova sa paglahutay sa malisod nga mga kahimtang. Magpalig-on kini sa pagtuo sa atong  mga isigkamagtutuo, sama ra nga ang mga pahayag ni David nagpalig-on sa pagtuo sa iyang mga tigpaluyo. Sa kahimtang ni David, ang iyang mga kauban “mitan-aw [kang Jehova] ug nahimong madan-agon, ug ang ilang mga nawong dili gayod maulawan.” (Salmo 34:5) Bisag kanunayng nagkalagiw gikan kang Haring Saul, wala sila maulaw. Masaligon sila nga ang Diyos nagpaluyo kang David, ug madan-agon ang ilang mga nawong. Sa samang paagi, ang bag-ong mga interesado maingon man kadtong matuod nga mga Kristohanon sulod sa dugay nang panahon nangayo ug tabang kang Jehova. Tungod kay naeksperyensiyahan nila mismo ang iyang tabang, ang ilang madan-agong mga nawong nagbanaag sa ilang determinasyon nga magpabiling matinumanon.

Magmapasalamaton sa Tabang Gikan sa mga Manulonda

16. Sa unsang paagi gigamit ni Jehova ang iyang mga manulonda sa pagluwas kanato?

¹⁶ “Ang manulonda ni Jehova nagkampo libot niadtong nangahadlok kaniya, ug siya nagluwas kanila.” (Salmo 34:7) Wala maghunahuna si David nga siya lamang ang giluwas ni Jehova. Tinuod, si David mao ang dinihogan ni Jehova, ang umaabot nga hari sa Israel; apan nahibalo siya nga gigamit ni Jehova ang iyang mga manulonda sa pagbantay sa tanan niyang matinumanong mga magsisimba, sila man inila o kabos. Sa atong modernong panahon, ang matuod nga mga magsisimba nakaeksperyensiya usab sa panalipod nga gitagana ni Jehova. Sa Nazi nga Alemanya—maingon man sa Angola, Malawi, Mozambique, ug sa daghan pang kayutaan—ang mga awtoridad naghimog mga kampanya aron paphaon ang mga Saksi ni Jehova. Kawang lang ang ilang mga paningkamot. Hinunoa, ang katawhan ni Jehova nianang mga yutaa nagpadayon sa pagdaghan samtang gibayaw nila ang ngalan sa Diyos. Ngano? Tungod kay gigamit ni Jehova ang iyang balaang mga manulonda sa pagpanalipod ug paggiya sa iyang katawhan.—Hebreohanon 1:14.

17. Sa unsang mga paagi ang mga manulonda sa Diyos nagtabang kanato?

¹⁷ Dugang pa, ang mga manulonda ni Jehova makamaniobra sa mga butang aron nga si bisan kinsa nga makapandol sa uban palagpoton gikan sa katawhan ni Jehova. (Mateo 13:41; 18:6, 10) Ug bisan tuod wala tingali kita makaamgo niana, ang mga manulonda nagkuha sa mga babag nga makapugong kanato sa atong pag-alagad sa Diyos, ug sila nanalipod kanato batok sa mga butang nga makapameligro sa atong relasyon kang Jehova. Labing hinungdanon, sila naggiya kanato diha sa buluhatong pagmantala sa “walay kataposang maayong balita” ngadto sa tanang katawhan, lakip na sa mga lugar diin ang buluhatong pagsangyaw gihimo ilalom sa peligrosong mga kahimtang. (Pinadayag 14:6) Ang pamatuod sa tabang sa mga manulonda subsob nga giasoy diha sa mga literatura sa Bibliya nga gipatik sa mga Saksi ni Jehova. a Ang maong mga eksperyensiya daghan kaayo nga dili kini mahimong isipon nga naatol lamang.

18. (a) Unsay gikinahanglan aron makabaton kitag kaayohan gikan sa tabang sa mga manulonda? (b) Unsay hisgotan sa sunod nga artikulo?

¹⁸ Aron padayon nga makabatog kaayohan gikan sa paggiya ug panalipod sa mga manulonda, kinahanglang kanunay natong bayawon ang ngalan ni Jehova bisan pa sa mga pagsupak. Hinumdomi, ang manulonda sa Diyos nagakampo lamang ‘palibot niadtong nangahadlok kang Jehova.’ Unsay gipasabot niana? Unsa ang pagkahadlok sa Diyos, ug sa unsang paagi maugmad nato kini? Nganong buot sa usa ka mahigugmaong Diyos nga mahadlok kita kaniya? Hisgotan kining mga pangutanaha sa sunod nga artikulo.

[Footnote]

Unsay Imong Tubag?

• Unsang mga pagsulay ang giantos ni David sa batan-on pa siya?

• Sama kang David, unsay atong pangunang gitinguha?

• Unsay atong panglantaw sa Kristohanong mga tigom?

• Sa unsang paagi gigamit ni Jehova ang iyang mga manulonda sa pagtabang kanato?

[Mga Pangutana sa Pagtuon]

[Mapa sa panid 21]

(Alang sa aktuwal nga pagkahan-ay, tan-awa ang publikasyon)

Rama

Gat

Ziklag

Gibea

Nob

Jerusalem

Betlehem

Adulam

Keila

Hebron

Zip

Hores

Carmelo

Maon

En-gedi

Dagat sa Asin

[Credit Line]

Map: Based on maps copyrighted by Pictorial Archive (Near Eastern History) Est. and Survey of Israel

[Hulagway sa panid 21]

Bisan ingong kagiw, gibayaw ni David ang ngalan ni Jehova

[Hulagway sa panid 23]

Ang atong pagtuo mapalig-on samtang mamati kita sa makapalig-ong mga kasinatian nga giasoy diha sa atong Kristohanong mga tigom