Kon Unsay Malampos sa Pag-anhi ni Kristo

“KAPINTASAN SA SÃO PAULO.” Mao kanay paghubit sa magasing Veja sa upat ka adlaw sa Mayo 2006 sa dihang ang giorganisar nga krimen “grabeng nakadaot” sa kinadak-an ug kinadatoang siyudad sa Brazil. Mga 150 ka sundalo ug mga polis, mga kriminal, ug ordinaryong mga molupyo ang napatay sulod sa “kapin sa 100 ka oras nga kapintasan.”

Ang kapintasan maoy ulohan sa mga balita sa halos tanang bahin sa kalibotan. Ang tawhanong mga lider daw walay mahimo sa pagpukgo niini. Misamot ka delikadong puy-an ang atong kalibotan. Basin ikaw nasubo kay bisan asa ka molantaw, daghan kaayog daotang mga balita. Apan, ang panahon sa kausaban haduol na.

Si Jesus nagtudlo sa iyang mga sumusunod sa pag-ampo nga moabot ang Gingharian sa Diyos ug matuman ang kabubut-on sa Diyos, “maingon sa langit, mao man usab sa yuta.” (Mateo 6:9, 10) Kining maong Gingharian maoy usa ka kagamhanan nga si Kristo Jesus mao ang tinudlong Hari sa Diyos. Sulbaron niini ang tanang suliran sa mga tawo. Apan aron mahimo sa Gingharian sa Diyos kining maong mga kausaban sa yuta, kinahanglan nga ang tawhanong pagmando ilisan sa pagmando ni Kristo. Mao gayod kini ang palamposon sa pag-anhi ni Kristo.

Malinawong Kausaban?

Ang mga nasod magpasakop kaha sa pagmando ni Kristo sa malinawong paagi? Si apostol Juan gihatagag panan-awon nga motubag niini. Si Juan nag-asoy: “Nakita ko ang mapintas nga mananap [ang politikal nga sistema sa kalibotan] ug ang mga hari sa yuta ug ang ilang kasundalohan nga nagkatigom aron makiggubat sa usa [si Jesus] nga nagsakay sa kabayo ug uban sa iyang kasundalohan.” (Pinadayag 19:19) Unsay dangatan sa mga hari sa yuta niining gubata? Ang tinudlong Hari ni Jehova ‘magadugmok kanila pinaagi sa setro nga puthaw, iyang pulpogon sila ingon sa usa ka sudlanan sa magkukulon,’ nag-ingon ang Bibliya. (Salmo 2:9) Ang politikal nga sistema laglagon sa bug-os. Ang Gingharian sa Diyos “magadugmok ug magatapos niining tanang gingharian [sa tawo], ug kini mobarog hangtod sa panahong walay tino.”—Daniel 2:44.

Komosta ang mga tawong mosupak sa Gingharian sa Diyos? “Inigpadayag na sa Ginoong Jesus gikan sa langit uban sa iyang gamhanang mga manulonda sa nagdilaab nga kalayo,” si Jesus gihulagway nga “manimalos kanilang wala makaila sa Diyos ug kanilang wala magsunod sa  maayong balita.” (2 Tesalonica 1:7, 8) “Kon mahitungod sa mga daotan,” nag-ingon ang Proverbio 2:22, “sila pagaputlon gikan sa yuta; ug kon bahin sa mga maluibon, sila pagalukahon gikan niini.”

Maylabot sa pag-anhi ni Kristo, ang Bibliya nag-ingon: “Tan-awa! Siya moanhi uban sa mga panganod, ug ang tanang mata makakita kaniya.” (Pinadayag 1:7) Ang mga tawo dili makakita kaniya sa ilang literal nga mga mata. Sukad sa iyang pagsaka sa langit, si Jesus maoy usa ka espiritung persona “nga nagpuyo sa kahayag nga dili-maduol, nga kaniya walay tawo nga nakakita o makakita.”—1 Timoteo 6:16.

Si Jesus dili kinahanglang magsul-ob ug lawas sa tawo aron ‘makita’ sa mga molupyo sa yuta sama nga si Jehova dili kinahanglang magpakita sa dihang iyang gipadala ang Napulo ka Hampak sa mga Ehiptohanon sa mga adlaw ni Moises. Ang mga tawo niadto wala magduhaduha nga si Jehova ang nagpahinabo sa mga hampak, ug sila napugos sa pag-ila sa iyang gahom. (Exodo 12:31) Sa samang paagi, sa dihang si Kristo molihok na ingong Tiglaglag ni Jehova, ang mga daotan mapugos sa ‘pagkakita,’ o pagsabot, nga si Jesus gigamit sa Diyos sa paghukom kanila. Mahibalo sila niini kay ang mga tawo gipasidan-an na nga abante. Oo, ‘ang tanang mata makakita kang Jesus, ug ang tanang tribo sa yuta magapukpok sa ilang kaugalingon sa kasubo tungod kaniya.’—Pinadayag 1:7.

Ang kalaglagan sa mga daotan ug ang pagwagtang sa daotang pagmando gikinahanglan aron mapasig-uli ang tinuod nga pakigdait ug kauswagan sa yuta. Si Kristo ang magpalampos niana. Dayon iyang kontrolahon sa bug-os ang tanang kalihokan sa yuta, ug unya mosunod ang dagkong mga kausaban.

Ang Pagpasig-uli nga Magdalag mga Kaayohan

Si apostol Pedro naghisgot bahin sa “pagpasig-uli sa tanang butang nga gisulti sa Diyos pinaagi sa baba sa iyang balaang mga manalagna sa karaang panahon.” (Buhat 3:21) Kini nga pagpasig-uli maglakip sa kausaban nga mahitabo sa yuta panahon sa pagmando ni Kristo. Lakip sa mga manalagna nga gisultihan sa Diyos bahin sa “pagpasig-uli sa tanang butang” sa yuta mao si manalagnang Isaias, niadtong ikawalong siglo W.K.P. Siya nagtagna nga si Jesu-Kristo, ang “Prinsipe sa Pakigdait,” magpasig-uli sa pakigdait sa yuta. Maylabot sa pagmando ni Kristo, ang tagna ni Isaias nag-ingon: “Sa kadagaya sa prinsipenhong pagmando ug sa pakigdait walay kataposan.” (Isaias 9:6, 7) Edukahon ni Jesus ang mga tawo sa yuta aron sila magpuyo nga makigdaiton. Kadtong magpuyo sa yuta “makakaplag gayod sa ilang tumang kalipay sa kadagaya sa pakigdait.”—Salmo 37:11.

Unsay mahitabo sa kakabos ug kagutom ilalom sa pagmando ni Kristo? Si Isaias miingon: “Si Jehova sa mga panon maghikay gayod alang sa tanang katawhan, niining bukira, ug usa ka bangkete sa mantikaon kaayo nga pagkaon, usa ka bangkete sa bino nga pinalugdang, sa mantikaon kaayo nga pagkaon nga puno sa utok sa bukog, sa bino nga pinalugdang, sinala.” (Isaias 25:6) Ang salmista miawit: “Aduna unyay dagayang lugas sa ibabaw sa yuta; sa tumoy sa kabukiran adunay pagsugwak.” (Salmo 72:16) Dugang pa, bahin sa mga molupyo sa yuta, atong mabasa: “Sila gayod magtukod ug mga balay ug magpuyo niini; ug sila gayod magtanom ug kaparasan ug magkaon sa ilang mga bunga. Dili sila magtukod ug lain ang magpuyo; dili sila magtanom ug lain ang magkaon. Kay ang mga adlaw sa akong katawhan mahisama sa mga adlaw sa usa ka kahoy; ug gamiton sa bug-os sa akong mga pinili ang buhat sa ilang mga kamot.”—Isaias 65:21, 22.

Gitagna usab ni Isaias ang pagkahanaw sa sakit ug kamatayon. Ang Diyos misulti pinaagi kang Isaias, nga nag-ingon: “Nianang panahona ang mga mata sa mga buta mabuka, ug ang igdulungog sa mga bungol mabuksan. Nianang panahona ang bakol mosaka ingon sa laking osa, ug ang dila sa amang mosinggit sa kasadya.” (Isaias 35:5, 6) Dayon “walay pumoluyo nga moingon: ‘Ako masakiton.’” (Isaias 33:24) “Lamyon gayod [sa Diyos] ang kamatayon hangtod sa kahangtoran, ug ang Soberanong Ginoong Jehova tinong magpahid sa mga luha gikan sa tanang nawong.”—Isaias 25:8.

 Komosta naman ang tanang mga patay “sa handomanang mga lubnganan”? (Juan 5:28, 29) Si Isaias nagtagna: “Ang imong mga patay mangabuhi. . . . Sila mobangon.” (Isaias 26:19) Oo, kadtong nangatulog sa kamatayon mangabuhi pag-usab!

“Ang Diyos Maoy Imong Trono Hangtod sa Kahangtoran”

Ang pag-anhi ni Kristo mosangpot sa bug-os nga pagpasig-uli sa planetang Yuta. Ang yuta mahimong usa ka mahimayaong paraiso, ug ang mga tawo mahiusa sa pagsimba sa matuod nga Diyos. Makaseguro ba kita nga si Jesu-Kristo molampos sa paghanaw sa pagkadaotan gikan sa yuta ug sa pagpatunghag matarong nga mga kahimtang?

Matikdi ang tinubdan sa gahom ug awtoridad nga gihatag kang Jesus. Maylabot sa Anak, ang Bibliya nag-ingon: “Ang Diyos maoy imong trono hangtod sa kahangtoran, ug ang setro sa imong gingharian mao ang setro sa katul-id. Gihigugma mo ang pagkamatarong, ug gidumtan mo ang pagkamalapason.” (Hebreohanon 1:8, 9) Ang trono ni Jesus, nga mao ang iyang katungdanan o awtoridad, naggikan kang Jehova. Ang Diyos maoy Tinubdan ug Maghahatag niining maong trono. Walay problema nga sobra ka lisod nga dili masulbad ni Jesus.

Human sa iyang pagkabanhaw, gisultihan ni Jesus ang iyang mga tinun-an: “Ang tanang awtoridad gihatag na kanako sa langit ug sa yuta.” (Mateo 28:18) “Ang mga manulonda ug ang mga awtoridad ug ang mga gahom gipailalom kaniya,” nag-ingon ang 1 Pedro 3:22. Walay gahom o awtoridad ang molampos sa pagsupak kang Jesus. Walay makapugong kaniya sa pagdalag dumalayong kaayohan sa katawhan.

Kon sa Unsang Paagi ang Pag-anhi ni Kristo Makaapektar sa mga Tawo

Sa iyang sulat ngadto sa mga taga-Tesalonica, si apostol Pablo misulat: “Kami walay-hunong nga nahinumdom sa inyong buhat sa pagtuo ug sa inyong mahigugmaong paghago ug sa inyong pag-antos tungod sa inyong paglaom diha sa atong Ginoong Jesu-Kristo atubangan sa atong Diyos ug Amahan.” (1 Tesalonica 1:3) Sumala kang Pablo, ang paglaom kang Jesu-Kristo magpatunghag mabungahong paghago ug pag-antos. Kanang maong paglaom naglakip sa pagtuo sa pag-anhi ni Kristo ug sa pagpasig-uli nga nahimong posible tungod niini. Kini nga paglaom makapalig-on sa tinuod nga mga Kristohanaon, o makapahimo kanila sa paglahutay, bisan pa sa lisod kaayong mga kahimtang.

Tagda pananglitan si Carlos, nga nagpuyo sa São Paulo, Brazil. Niadtong Agosto 2003, siya nadayagnos nga adunay kanser. Sukad niadto, kawalo na siya maoperahi ug giantos niya ang ul-ol kaayo ug makapaluya nga mga side effect. Apan padayon siyang nahimong tinubdan sa kadasig alang sa uban. Pananglitan, samtang siya nagsangyaw diha sa dalan atubangan sa usa ka dakong ospital, iyang nahibalag ang lain pang Saksi ni Jehova, kansang bana gi-chemotherapy. Kay nakaagom na sa kaul-ol sa kanser, si Carlos nakadasig ug nakahupay sa magtiayon. Human niadto, sila nakaingon nga ang ilang panag-estoryahay nakapadasig gayod kanila. Busa si Carlos nakasinati sa kamatuoran niining mga pulonga ni Pablo: ‘Ang Diyos nagahupay kanamo sa tanan namong kasakitan, aron kami makahupay kanila nga anaa sa bisan unsang matang sa kasakitan pinaagi sa paghupay nga pinaagi niini kami ginahupay sa Diyos.’—2 Corinto 1:4.

Unsay nakatabang kang Carlos sa pagbatog kalig-on nga makapadayon sa pagdasig sa uban bisan pa sa iyang sakit? Ang paglaom sa pag-anhi ni Kristo ug sa tanang malampos niini maoy nakapalig-on kang Carlos sa pagpadayon sa “pagbuhat ug maayo.”—Galacia 6:9.

Matikdi usab ang kahimtang ni Samuel, kansang manghod nga lalaki gipatay mga 50 metros lamang gikan sa balay sa ilang amahan. Napulo ka bala ang gitiro sa lawas sa iyang igsoon. Ang patayng lawas nagbuy-od ra sa aseras sulod sa walo ka oras samtang ang mga polis nag-imbestigar sa krimen. Dili malimtan ni Samuel ang nahitabo niadtong adlawa. Bisan pa niana, siya nalig-on sa paglaom nga si Kristo maghanaw sa tanang pagkadaotan sa yuta ug ang mosunod nga matarong nga pagmando magdalag mga panalangin sa katawhan. Kanunayng gihanduraw ni Samuel  nga siya naggakos sa iyang nabanhaw nga igsoon sa Paraiso sa yuta.—Buhat 24:15.

Unsay Angay Nimong Buhaton?

Ikaw mahupayan pag-ayo sa paglaom sa pag-anhi ni Kristo ug kon unsay palamposon niini. Lukahon gayod ni Jesu-Kristo ang tanang gamot sa mga problema sa tawo ug sa pagkadaotan nga atong giantos.

Unsay angay nimong buhaton aron imong mapahimuslan ang mga panalangin nga ipaabot sa pagmando ni Kristo alang sa katawhan? Paghimog maampingong pagtuon sa Pulong sa Diyos, ang Bibliya. Sa pag-ampo sa iyang Amahan, si Jesus miingon: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Himoang tumong ang pagsusi kon unsay gitudlo sa Bibliya. Ang mga Saksi ni Jehova sa inyong dapit malipay sa pagtabang kanimo niining bahina. Mainiton ka namong gidapit sa pagkontak kanila o sa pagsulat sa mga magpapatik niining magasina.

[Mga hulagway sa panid 7]

Ang pag-anhi ni Kristo mosangpot sa bug-os nga pagpasig-uli sa yuta

[Credit Line]

Inset, background only: Rhino and Lion Park, Gauteng, South Africa