Kon sa Unsang Paagi Nagmalinawon ang Hunahuna ni Ana

ANG usa ka matinumanong babaye miampo sa kusog nga tingog nga nagdayeg kang Jehova. Siya nagtuo nga ang Diyos maoy nagbangon kaniya gikan sa abog ug gipulihag kalipay ang iyang kaguol.

Si Ana ang maong babaye. Unsay hinungdan sa talagsaong kausaban sa iyang pagbati? Nganong malipayon na kaayo siya karon? Sa unsang paagi kita makabenepisyo gikan sa iyang kasinatian? Aron atong mahibaloan ang mga tubag niining mga pangutanaha, atong susihon ang kasaysayan ni Ana.

May Suliran nga Pamilya

Si Ana maoy usa sa duha ka asawa ni Elkana, nga usa ka Levihanon nga nagpuyo sa teritoryo sa Epraim. (1 Samuel 1:1, 2a; 1 Cronicas 6:33, 34) Bisan tuod sa sinugdan dili katuyoan sa Diyos nga ang usa ka lalaki magbaton ug daghang asawa, kini gitugotan ug gikontrolar sa Balaod ni Moises. Ang pamilya ni Elkana nagsimba kang Jehova, apan ang daghag-asawa nga kaminyoon kasagarang magpatunghag mga suliran, ingon sa gipakita sa mga panghitabo sa panimalay ni Elkana.

Si Ana walay anak, samtang si Penina, ang laing asawa ni Elkana, daghag anak. Si Penina maoy karibal ni Ana.—1 Samuel 1:2b.

Ang pagkawalay-anak giisip nga kaulawan taliwala sa mga babayeng Israelinhon ug ilhanan pa gani sa pagkadili-takos sa panan-aw sa Diyos. Apan walay gipaila nga ang pagkadili-makaanak ni Ana maoy pamatuod sa dili pag-uyon sa Diyos. Ugaling lang, imbes hupayon si Ana, gigamit na hinuon ni Penina ang iyang katakos nga makaanak aron maguol pag-ayo si Ana.

Mga Panaw Ngadto sa Sangtuwaryo ni Jehova

Bisan pa sa maong mga kapit-os, ang pamilya ni Elkana tuigtuig nga moadto sa sangtuwaryo ni Jehova sa Shilo aron sa paghalad. a Lagmit sila magbaktas ug mga 60 kilometros idabuwelta. Kining mga okasyona ang ilabinang makapaguol kang Ana tungod kay hatagan man ug daghang bahin sa halad sa panag-ambit si Penina ug ang iyang mga anak, samtang usa lang ka bahin ang iya ni Ana. Gipahimuslan ni Penina ang maong mga higayon sa pagsungog kang Ana, nga magpalagot kaniya tungod kay morag ‘gitak-opan ni Jehova ang iyang tagoangkan.’ Kini nga kaguol mahitabo tuigtuig, ug tungod niana si Ana mohilak ug dili mokaon. Ang mga biyahe nga angay untang makapalipay alang kaniya nahimo na hinuong mga panahon sa kaguol. Bisan pa niana, si Ana moadto gayod sa sangtuwaryo ni Jehova.—1 Samuel 1:3-7.

Imo bang nasabtan kon sa unsang paagi si Ana naghatag ug maayong panig-ingnan kanato? Kon maguol ka, unsay imong reaksiyon? Magpalain ka ba ug magpalayo sa imong mga isigkamagtutuo? Wala kana buhata ni Ana. Gibatasan niya nga mahiuban sa mga magsisimba ni Jehova. Bisan pa sa malisod nga mga kahimtang, angay usab natong himoon kana.—Salmo 26:12; 122:1; Proverbio 18:1; Hebreohanon 10:24, 25.

Gipaningkamotang mahupay ni Elkana si Ana ug gidasig siya sa pagpahayag sa iyang pagbati. “Ana, nganong naghilak ka, ug nganong dili ka mokaon, ug nganong masulub-on ang imong kasingkasing?” nangutana siya. “Dili ba ako labi  pang maayo alang kanimo kay sa napulo ka anak nga lalaki?” (1 Samuel 1:8) Tingali si Elkana wala mahibalo sa pagkadili-maluloton ni Penina, ug lagmit gipalabi na lang ni Ana nga mag-antos sa hilom inay moreklamo. Bisag unsa pay kahimtang, gipasundayag ni Ana ang iyang pagsalig kang Jehova pinaagi sa pagdangop kaniya sa pag-ampo.

Si Ana Mihimog Panaad

Ang mga halad sa panag-ambit kaonon didto sa sangtuwaryo ni Jehova. Human mibiya si Ana sa lawak kan-anan, siya miampo sa Diyos. (1 Samuel 1:9, 10) Siya nangaliyupo: “Oh Jehova sa mga panon, kon ikaw sa walay pakyas magsud-ong sa kasakitan sa imong ulipong babaye ug mahinumdom gayod kanako, ug ikaw dili mahikalimot sa imong ulipong babaye ug maghatag gayod sa imong ulipong babaye ug usa ka anak nga lalaki, akong ihatag siya kang Jehova sa tanang adlaw sa iyang kinabuhi, ug walay labaha nga modapat sa iyang ulo.”—1 Samuel 1:11.

Espesipiko ang pag-ampo ni Ana. Siya mihangyo ug usa ka anak nga lalaki ug nanaad nga ang bata ihalad kang Jehova ingong usa ka Nazareo sa tibuok niyang kinabuhi. (Numeros 6:1-5) Ang maong panaad kinahanglang uyonan sa iyang bana, ug gipakita sa mga reaksiyon ni Elkana sa ulahi nga iyang giuyonan ang panaad sa iyang minahal nga asawa.—Numeros 30:6-8.

Ang Hataas nga Saserdoteng si Eli nagtuo nga nahubog si Ana tungod sa iyang paagi sa pag-ampo. Nagkibotkibot ang iyang mga ngabil, apan walay tingog nga madungog, kay si Ana nagsulti diha sa iyang kasingkasing. Kinasingkasing gayod ang maong pag-ampo. (1 Samuel 1:12-14) Hunahunaa lang kon unsay gibati ni Ana sa dihang gibadlong siya ni Eli kay hubog kono siya! Bisan pa niana, matinahoron niyang gitubag ang hataas nga saserdote. Sa dihang naamgohan ni Eli nga si Ana nag-ampo “tungod sa kadaghan sa [iyang] kabalaka ug kahasol,” si Eli miingon: “Hinaot ang Diyos sa Israel maghatag kanimo sa imong gipangaliya.” (1 Samuel 1:15-17) Pagkahuman niana, si Ana milakaw ug mikaon, ug “ang iyang nawong wala na magmabalak-on.”—1 Samuel 1:18.

Unsay atong makat-onan gikan niining tanan? Kon kita mag-ampo kang Jehova bahin sa atong mga gikabalak-an, atong ikapahibalo kaniya kon unsay atong gibati ug mohimog kinasingkasing nga mga hangyo. Kon wala na kitay laing mahimo sa pagsulbad sa problema, kinahanglang atong itugyan kini kaniya. Kini ang mas maayong butang nga pagahimoon.—Proverbio 3:5, 6.

Human makaampo nga kinasingkasing, ang mga alagad ni Jehova kasagarang makasinati ug kalinaw sa hunahuna nga susama sa nasinatian ni Ana. Kon bahin sa pag-ampo, si apostol Pedro misulat: “Ayaw kabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos; ug ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip pinaagi kang Kristo Jesus.” (Filipos 4:6, 7) Kon atong itugyan ang atong mga problema kang Jehova, kinahanglang isalig nato kaniya ang pag-atiman niana. Dayon, sama kang Ana, kita dili na angayng mabalaka pag-ayo.—Salmo 55:22.

Usa ka Anak nga Lalaki nga Gipahulam Kang Jehova

Giliso karon sa Diyos ang iyang pagtagad kang Ana; siya namabdos ug nanganak ug lalaki. (1 Samuel 1:19, 20) Kini maoy usa sa pipila ra ka asoy sa Bibliya diin ang Diyos nangilabot sa pagkatawo sa usa nga mahimo niyang alagad. Ang anak nila ni Elkana ug Ana nga si Samuel mahimong manalagna ni Jehova, kinsa mohimog hinungdanong papel sa pagtukod sa harianong panimalay sa Israel.

Walay duhaduha nga gitudloan ni Ana si Samuel bahin kang Jehova sukad gayod sa iyang pagkamasuso. Apan iya kahang kalimtan ang iyang gipanaad? Dili gayod! “Sa dihang malutas na ang bata, dad-on ko siya, ug magpakita siya sa atubangan ni Jehova ug mopuyo didto hangtod sa panahong walay tino,” matod niya. Sa dihang gilutas na si Samuel, tingali sa dihang mga tres anyos na siya o labaw pa, gidala siya ni Ana ngadto sa sangtuwaryo ni Jehova aron didto na mopuyo, sumala sa iyang gisaad.—1 Samuel 1:21-24; 2 Cronicas 31:16.

Human makahalad kang Jehova, gidala ni Ana ug sa iyang bana si Samuel ngadto kang Eli. Lagmit gikuptan ni Ana ang kamot sa iyang gamayng anak samtang miingon siya kang Eli: “Tabi, akong  ginoo! Ingon nga buhi ang imong kalag, akong ginoo, ako kadtong babaye nga nagbarog uban kanimo niining dapita nga nag-ampo kang Jehova. May kalabotan niining bataa nga ako nag-ampo nga unta ihatag ni Jehova kanako ang akong gipangaliya kaniya. Ug ako, sa baylo, nagpahulam kaniya kang Jehova. Sa tanan niyang mga adlaw, siya ang gipangayo alang kang Jehova.” Busa, niining paagiha nagsugod ang tibuok-kinabuhi nga linaing pag-alagad ni Samuel ngadto sa Diyos.—1 Samuel 1:25-28; 2:11.

Paglabay sa panahon, wala gayod kalimti ni Ana si Samuel. Ang Kasulatan nag-ingon: “Ang iyang inahan naghimo ug usa ka gamayng kupo nga walay bukton alang kaniya, ug iyang gidala kini ngadto kaniya matag tuig sa dihang siya moadto uban sa iyang bana aron sa paghalad sa tinuig nga halad.” (1 Samuel 2:19) Dayag nga kanunayng nag-ampo si Ana alang kang Samuel. Panahon sa iyang tinuig nga pagbisita, siya nagdasig gayod kang Samuel sa pagpabiling matinumanon sa iyang pag-alagad sa Diyos.

Usa ka higayon niana, gipanalanginan ni Eli ang mga ginikanan ni Samuel ug giingnan si Elkana: “Hinaot si Jehova magtudlo kanimo ug usa ka kaliwat gikan niini nga asawa ilis sa gipahulam, nga gipahulam kang Jehova.” Uyon sa maong mga pulong, si Ana ug Elkana gipanalanginan ug tulo pa ka anak nga lalaki ug duha ka anak nga babaye.—1 Samuel 2:20, 21.

Pagkamaayong panig-ingnan ang gihatag ni Elkana ug Ana alang sa Kristohanong mga ginikanan! Daghang inahan ug amahan ang andam nga mopahulam sa ilang mga anak nga lalaki ug babaye kang Jehova, ingnon ta, pinaagi sa pagdasig kanila sa pagsulod sa bug-os-panahong ministeryo nga layo sa ilang panimalay. Dalayegon ang maong mga ginikanan tungod sa mga sakripisyo nga ilang gihimo. Ug seguradong panalanginan sila ni Jehova.

Ang Malipayong Pag-ampo ni Ana

Pagkamalipayon na karon ni Ana nga kanhi dili makaanak! Ang mga pag-ampo sa mga babaye talagsa rang narekord sa Kasulatan. Apan sa kahimtang ni Ana, nahibalo kita sa duha niya ka pag-ampo. Ang una naundan sa iyang mga pagbati sa dihang siya naguol ug nasakitan, ug ang ikaduha mao ang malipayong pag-ampo sa pagpasalamat. “Ang akong kasingkasing nagsadya tungod kang Jehova,” misugod si Ana. Siya nalipay nga “bisan ang apuli nanganak,” ug iyang gidayeg si Jehova ingong ‘usa nga Nagabayaw, usa nga Nagabangon sa timawa gikan sa abog.’ Sa pagkatinuod, “gikan sa gahong sa abo iyang alsahon ang kabos.”—1 Samuel 2:1-10.

Gipakita sa inspiradong asoy bahin kang Ana nga kita mahimong masakitan tungod sa pagkadili-hingpit o sa pagpangdaot sa uban. Bisan pa niana, kinahanglang dili nato tugotan ang maong mga pagsulay nga magkuha sa atong kalipay sa pag-alagad kang Jehova. Siya ang dakong Tigpatalinghog sa pag-ampo, kinsa motubag sa mga pagtuaw sa iyang matinumanong katawhan, nga magpalingkawas kanila gikan sa pag-antos ug maghatag kanila ug dagayang kalinaw ug uban pang mga panalangin.—Salmo 22:23-26; 34:6-8; 65:2.

[Footnote]

[Hulagway sa panid 17]

Gipahulam ni Ana si Samuel kang Jehova