Mga Demonyo​—Sa Unsang Paagi Makasukol Kita Kanila?

‘Ang mga manulonda nga wala magpadayon sa paghupot sa ilang orihinal nga pagkabutang apan mitalikod sa ilang nahiangay nga puloy-anang dapit gitagana sa Diyos uban ang walay kataposang mga gapos ilalom sa naglugitom nga kangitngit alang sa paghukom sa dakong adlaw.’—JUDAS 6.

1, 2. Unsang mga pangutana ang motungha bahin kang Satanas nga Yawa ug sa mga demonyo?

 “HUPTI ninyo ang maayong panghunahuna, magmabinantayon,” nagpasidaan si apostol Pedro. “Ang inyong kaaway, ang Yawa, nagasuroysuroy sama sa usa ka leyon nga nagangulob, nga nagapangitag matukob.” (1 Pedro 5:8) Mahitungod sa mga demonyo, si apostol Pablo miingon: “Dili ko buot nga kamo mahimong mga mag-aambit sa mga demonyo. Dili kamo mahimong moinom sa kopa ni Jehova ug sa kopa sa mga demonyo; dili kamo mahimong moambit sa ‘lamesa ni Jehova’ ug sa lamesa sa mga demonyo.”—1 Corinto 10:20, 21.

² Apan, kinsa si Satanas nga Yawa ug ang mga demonyo? Sa unsang paagi ug kanus-a sila mitungha? Gilalang ba sila sa Diyos? Unsa ka gamhanan ang ilang impluwensiya sa mga tawo? Unsay atong depensa, kon aduna man, batok kanila?

Sa Unsang Paagi Mitungha si Satanas ug ang mga Demonyo?

3. Sa unsang paagi ang usa ka manulonda sa Diyos nahimong Satanas nga Yawa?

³ Sayo sa kasaysayan sa tawo, sa didto pa ang tawo sa tanaman sa Eden, ang usa ka manulonda sa Diyos mirebelde. Ngano? Tungod kay wala siya matagbaw sa iyang papel diha sa langitnong kahikayan ni Jehova. Sa paglalang kang Adan ug Eva, iyang nakita ang kahigayonan nga mabalhin ngadto kaniya ang ilang pagkamasinugtanon ug pagsimba sa matuod nga Diyos. Pinaagi sa pagrebelde batok sa Diyos ug sa paghaylo sa unang tawhanong magtiayon sa pagsubay sa makasasalang dalan, kining maong manulonda naghimo sa iyang kaugalingon nga Satanas nga Yawa. Sa ngadtongadto, ang ubang mga manulonda miduyog kaniya sa pagrebelde. Sa unsang paagi?—Genesis 3:1-6; Roma 5:12; Pinadayag 12:9.

4. Unsay gibuhat sa pipila ka rebelyosong mga manulonda sa wala pa ang Lunop sa adlaw ni Noe?

⁴ Ang inspiradong Kasulatan nagtug-an kanato nga una pa sa dakong Lunop sa adlaw ni Noe, ang pipila ka manulonda misugod sa pagkaibog sa mga babaye dinhi sa yuta. Sa sayop nga katuyoan, “ang [langitnong] mga anak sa matuod nga Diyos nakamatikod sa mga anak nga babaye sa mga tawo, nga sila maanyag,” nag-ingon ang Bibliya,  “ug sila nagkuhag mga asawa alang sa ilang kaugalingon, nga mao, ang tanan nga ilang napili.” Kining maong mga relasyon dili kinaiyanhon, ug sila nanganak ug mga mestiso nga nailhan ingong mga Nepilim. (Genesis 6:2-4) Busa ang espiritung mga linalang nga misupak sa Diyos miduyog kang Satanas sa pagrebelde kang Jehova.

5. Unsay nahitabo sa mga rebelde sa dihang gipahinabo ni Jehova ang kalaglagan pinaagi sa dakong Lunop?

⁵ Sa dihang gipalunopan ni Jehova ang yuta, ang mga Nepilim ug ang ilang tawhanong mga inahan nangamatay. Ang rebeldeng mga manulonda napugos sa pagbiya sa ilang tawhanong mga lawas ug sa pagbalik sa espiritung dapit. Apan, wala na nila mahupti ang “ilang orihinal nga pagkabutang” atubangan sa Diyos. Hinunoa, gitambog sila sa “naglugitom nga [espirituwal nga] kangitngit,” nga nailhang Tartaro.—Judas 6; 2 Pedro 2:4.

6. Sa unsang paagi ang mga demonyo naglimbong sa mga tawo?

⁶ Sukad nga ang daotang mga manulonda nawad-an sa “ilang orihinal nga pagkabutang,” sila nahimong demonyo nga mga kauban ni Satanas ug nagpaluyo sa iyang daotang mga tinguha. Sukad nianang panahona, ang mga demonyo wala nay gahom sa pagsul-ob ug tawhanong mga lawas. Apan, makahaylo sila sa mga lalaki ug babaye sa pagpakigbahin sa lainlaing matang sa seksuwal nga kahiwian. Ang mga demonyo aktibo usab nga naglimbong sa mga tawo pinaagi sa espiritismo, nga mahimong maglangkit sa mga orasyon, pamarang, ug mga espiritista. (Deuteronomio 18:10-13; 2 Cronicas 33:6) Ang dulnganan sa daotang mga manulonda susama nianang sa Yawa—walay-kataposang kalaglagan. (Mateo 25:41; Pinadayag 20:10) Apan, sa kasamtangan, kita kinahanglang mobarog nga malig-on ug mosukol kanila. Maalamong hisgotan nato kon unsa ka gamhanan si Satanas ug kon sa unsang paagi molampos kita sa pagsukol kaniya ug sa iyang mga demonyo.

Unsa ka Gamhanan si Satanas?

7. Unsang gahom ang nabatonan ni Satanas ibabaw sa kalibotan?

⁷ Si Satanas nagpasipala kang Jehova latas sa kasaysayan. (Proverbio 27:11) Ug iyang naimpluwensiyahan ang kadaghanan sa mga tawo. “Ang tibuok kalibotan nailalom sa gahom sa usa nga daotan,” nag-ingon ang 1 Juan 5:19. Mao kanay hinungdan kon nganong ang Yawa nakahimo sa pagtental kang Jesus pinaagi sa pagtanyag kaniya sa awtoridad ug himaya sa “tanang gingharian sa gipuy-ang yuta.” (Lucas 4:5-7) Mahitungod kang Satanas, si apostol Pablo miingon: “Kon, karon, ang maayong balita nga among ginapahayag sa pagkatinuod gitaptapan man, kini gitaptapan taliwala niadtong nagakalaglag, taliwala kanilang ang diyos niini nga sistema sa mga butang nagbuta sa mga hunahuna sa mga dili-magtutuo, aron nga ang kahayag sa mahimayaong maayong balita bahin kang Kristo, nga mao ang larawan sa Diyos, dili makadan-ag.” (2 Corinto 4:3, 4) Si Satanas “bakakon ug ang amahan sa bakak,” apan nagpakaaron-ingnon siyang “manulonda sa kahayag.” (Juan 8:44; 2 Corinto 11:14) Nabatonan niya ang gahom ug ang mga pamaagi nga gikinahanglan sa pagbuta sa mga hunahuna sa mga magmamando sa kalibotan ug sa ilang mga ginsakpan. Pinaagi sa pagsabwag ug sayop nga impormasyon ug mga tumotumo ug kabakakan bahin sa relihiyon, iyang nalimbongan ang katawhan.

8. Unsay gipaila sa Bibliya bahin sa impluwensiya ni Satanas?

⁸ Ang gahom ug impluwensiya ni Satanas nadayag sa panahon ni manalagnang Daniel, mga lima ka siglo una pa sa atong Komong Panahon. Sa dihang gipadala ni Jehova ang usa ka manulonda aron sa paghatod ug makapadasig nga mensahe ngadto kang Daniel, ang manulonda gibabagan sa “[espiritung] prinsipe sa gingharian sa Persia.” Ang matinumanong manulonda nalangan sulod sa 21 ka adlaw hangtod nga “si Miguel, ang usa sa mga labawng prinsipe,” miabot sa pagtabang kaniya. Ang mao gihapong asoy naghisgot usab bahin sa “[demonyo nga] prinsipe sa Gresya.” (Daniel 10:12, 13, 20) Ug sa Pinadayag 13:1, 2, si Satanas gihulagway ingong “dragon” nga naghatag sa politikal nga mapintas nga mananap ug ‘gahom, trono ug dakong awtoridad.’

9. Batok kang kinsa nakig-away ang mga Kristohanon?

⁹ Mao diay nga misulat si apostol Pablo: “Kita adunay pakigdumog, dili batok sa dugo ug unod, kondili batok sa mga kagamhanan, batok sa mga awtoridad, batok sa mga magmamando sa  kalibotan niini nga kangitngit, batok sa daotang mga puwersa nga espirituhanon sa langitnong mga dapit.” (Efeso 6:12) Bisan karon, ang dili-makitang demonyohanong mga puwersa ilalom sa pagkontrolar ni Satanas nga Yawa nag-impluwensiya sa tawhanong mga magmamando ug sa katawhan sa katibuk-an, nga nag-aghat kanila sa paghimog dili-matukib nga mga buhat sa pagpuo sa rasa, terorismo, ug pagbuno. Susihon nato karon kon sa unsang paagi molampos kita sa pagsukol niining gamhanang espiritung mga puwersa.

Unsa May Atong Depensa?

10, 11. Sa unsang paagi masuklan nato si Satanas ug ang iyang daotang mga manulonda?

¹⁰ Dili nato masuklan si Satanas ug ang iyang daotang mga manulonda pinaagi sa atong pisikal o mental nga kusog. Si Pablo nagtambag kanato: “Magpadayon sa pagbaton ug gahom diha sa Ginoo ug diha sa pagkagamhanan sa iyang kusog.” Kinahanglang modangop kita sa Diyos aron mapanalipdan. Midugang si Pablo: “Isul-ob ang kompletong armadura gikan sa Diyos aron kamo makabarog nga malig-on batok sa mga malipatlipatong kaugdahan sa Yawa . . . Dad-a ang kompletong armadura sa Diyos, aron kamo makaarang sa pagsukol sa daotang adlaw ug, human ninyo mabuhat sa bug-os ang tanang butang, sa pagbarog nga malig-on.”—Efeso 6:10, 11, 13.

¹¹ Kaduha awhaga ni Pablo ang iyang kaubang mga Kristohanon sa pagsul-ob sa “kompletong armadura sa Diyos.” Ang pulong ‘kompleto’ nagpasabot nga ang dili-masibotong pagpakigbisog dili magsilbi sa pagsukol sa mga pag-atake sa mga demonyo. Busa, unsa man ang hinungdanong mga bahin sa espirituwal nga armadura nga gikinahanglan gayod sa mga Kristohanon karon aron makasukol sa mga demonyo?

“Barog nga Malig-on”—Sa Unsang Paagi?

12. Sa unsang paagi mabaksan sa mga Kristohanon ang ilang mga hawak sa kamatuoran?

¹² Si Pablo nagpatin-aw: “Busa, barog nga malig-on, nga binaksan ang inyong mga hawak sa kamatuoran, ug sinul-oban sa panagang sa dughan sa pagkamatarong.” (Efeso 6:14) Ang duha ka bahin sa armadura nga gitumong dinhi mao ang bakos ug kotamaya. Kinahanglang hugot nga isul-ob sa sundalo ang iyang bakos aron mapanalipdan ang iyang bat-ang, bulog, ug pus-on ug aron dili mahushos ang bakos inigtakin niya sa espada. Sa samang paagi, ang kamatuoran sa Bibliya kinahanglang hugot natong ibakos, ingnon ta, aron magkinabuhi kita nga kaharmonya niana. Aduna ba kitay eskedyul sa pagbasa sa Bibliya sa adlaw-adlaw? Nalangkit ba ang tibuok pamilya? Aduna ba kitay rutina sa pagkonsiderar sa inadlaw nga teksto ingong pamilya? Dugang pa, nagpasignunot ba kita sa mga katin-awan diha sa mga publikasyon nga gitagana sa “matinumanon ug maalamong ulipon”? (Mateo 24:45) Kon mao, naningkamot kita sa pagpadapat sa tambag ni Pablo. Aduna usab kitay mga video ug mga DVD nga makahatag ug Kasulatanhong giya. Ang paghawid pag-ayo sa kamatuoran makatabang kanato sa paghimog maalamong mga desisyon ug makapanalipod kanato batok sa pagsubay sa sayop nga dalan.

13. Sa unsang paagi mapanalipdan nato ang atong mahulagwayong kasingkasing?

¹³ Ang literal nga kotamaya nagsilbing proteksiyon sa dughan, kasingkasing, ug ubang hinungdanong mga organo sa sundalo. Mapanalipdan sa usa ka Kristohanon ang iyang mahulagwayong kasingkasing—ang iyang sulod nga pagkatawo—pinaagi sa pag-ugmad ug gugma alang sa pagkamatarong sa Diyos ug pinaagi sa pagsunod sa matarong nga mga sukdanan ni Jehova. Ang mahulagwayong kotamaya mopugong kanato sa pagpamenos sa kahinungdanon sa Pulong sa Diyos. Sa dihang makat-onan nato ang  ‘pagdumot sa daotan, ug paghigugma sa maayo,’ atong mapugngan ang atong mga tiil “gikan sa tanang daotan nga alagianan.”—Amos 5:15; Salmo 119:101.

14. Unsay kahulogan sa ekspresyon nga ang atong ‘mga tiil sinul-oban sa kasangkapan sa maayong balita sa pakigdait’?

¹⁴ Ang mga tiil sa Romanong mga sundalo kasagarang gisul-oban ug sapin nga modurar sa pagmartsa ug gatosan ka milya diha sa Romanhong mga alagianan nga nagkuros-kuros sa imperyo. Unsay kahulogan sa ekspresyong ‘mga tiil nga sinul-oban sa kasangkapan sa maayong balita sa pakigdait’ alang sa mga Kristohanon? (Efeso 6:15) Nagpasabot kana nga kita andam sa paglihok. Andam kitang mosangyaw sa maayong balita sa Gingharian sa Diyos sa matag nahiangay nga panahon. (Roma 10:13-15) Ang atong pagkaaktibo diha sa Kristohanong ministeryo maoy panalipod batok sa “mga malipatlipatong kaugdahan” ni Satanas.—Efeso 6:11.

15. (a) Unsay nagpakita nga ang dakong taming sa pagtuo hinungdanon kaayo? (b) Unsang “nagdilaab nga mga udyong” ang posibleng makapahuyang sa atong pagtuo?

¹⁵ Nagpadayon si Pablo: “Labaw sa tanang butang, dad-a ang dakong taming sa pagtuo, nga pinaagi niini kamo makapalong sa tanang nagdilaab nga mga udyong sa daotan.” (Efeso 6:16) Ang tambag nga dad-on ang dakong taming sa pagtuo gisugdan sa ekspresyong “labaw sa tanang butang,” nga nagpaila nga kining bahina sa armadura hinungdanon kaayo. Kinahanglang walay makulang sa atong pagtuo. Sama sa dakong taming, ang atong pagtuo manalipod kanato batok sa “nagdilaab nga mga udyong” ni Satanas. Unsa man kahay gihawasan niini sa atong adlaw? Kini mahimong magtumong sa masakit kaayong mga insulto, kabakakan, ug malimbongong mga pulong nga gipakaylap sa mga kaaway ug mga apostata aron sa pagpahuyang sa atong pagtuo. Kining  maong “mga udyong” mahimong magtumong usab sa mga tentasyon nga mahimong materyalistiko, nga tungod niana mapuliki kaayo kita sa pagpamalit ug daghang butang ug maaghat pa gani kita sa pagpakig-indig niadtong nahaylo sa magarbohong estilo sa kinabuhi. Tingali namalit sila ug mas dagko ug mas nindot nga mga balay ug mga sakyanan o nagpasigarbo sa ilang mahalong mga alahas ug sa kinaulahiang uso sa mga sinina. Bisan unsa pay buhaton sa uban, kinahanglang batonan nato ang lig-on nga pagtuo nga makasanta niining “nagdilaab nga mga udyong.” Sa unsang paagi maugmad ug mahuptang lig-on ang atong pagtuo?—1 Pedro 3:3-5; 1 Juan 2:15-17.

16. Unsay makatabang kanato sa pag-ugmad ug lig-ong pagtuo?

¹⁶ Makapakigsuod kita sa Diyos pinaagi sa regular nga personal nga pagtuon sa Bibliya ug sa tim-os nga mga pag-ampo. Makapangamuyo kita kang Jehova nga palig-onon ang atong pagtuo ug dayon molihok kita nga kaharmonya sa atong mga pag-ampo. Pananglitan, nangandam ba kita pag-ayo alang sa senemanang Pagtuon sa Bantayanang Torre sa tuyo nga makigbahin niana? Ang atong pagtuo molig-on kon kita magtuon sa Bibliya ug sa binase-sa-Bibliya nga mga publikasyon.—Hebreohanon 10:38, 39; 11:6.

17. Sa unsang paagi ‘dawaton nato ang helmet sa kaluwasan’?

¹⁷ Gitapos ni Pablo ang iyang paghubit sa espirituwal nga armadura pinaagi sa tambag: “Dawata ang helmet sa kaluwasan, ug ang espada sa espiritu, nga mao, ang pulong sa Diyos.” (Efeso 6:17) Ang helmet nanalipod sa ulo ug utok sa sundalo, ang sentro sa paghimog desisyon. Sa samang paagi, ang atong Kristohanong paglaom manalipod sa atong mga gahom sa pangisip. (1 Tesalonica 5:8) Inay pun-on ang atong mga hunahuna sa kalibotanong mga tumong ug materyalistikong mga pangandoy, kinahanglang isentro nato ang atong hunahuna sa atong hinatag-Diyos nga paglaom, sama sa gibuhat ni Jesus.—Hebreohanon 12:2.

18. Nganong dili nato angayng pasagdan ang atong programa sa regular nga pagbasa sa Bibliya?

¹⁸ Ang atong kataposang panalipod batok sa impluwensiya ni Satanas ug sa iyang mga demonyo mao ang pulong o mensahe sa Diyos nga nasulat diha sa Bibliya. Kini maoy lain pang katarongan kon nganong dili nato angayng pasagdan ang atong programa sa regular nga pagbasa sa Bibliya. Ang tukma ug lawom nga kahibalo sa Pulong sa Diyos manalipod kanato batok sa kabakakan ug demonyohanong mga propaganda ni Satanas maingon man sa mayugtanong mga pulong sa mga apostata.

“Magpadayon Kamo sa Pag-ampo sa Tanang Higayon”

19, 20. (a) Unsa unyay mahitabo kang Satanas ug sa iyang mga demonyo? (b) Unsay makapalig-on kanato sa espirituwal?

¹⁹ Hapit nang laglagon si Satanas, ang iyang mga demonyo, ug ang daotang kalibotan. Nahibalo si Satanas nga “hamubo na lamang ang iyang panahon.” Siya napungot ug nakiggubat niadtong “nagabantay sa mga sugo sa Diyos ug may buluhaton sa pagpamatuod bahin kang Jesus.” (Pinadayag 12:12, 17) Hinungdanon nga atong suklan si Satanas ug ang iyang mga demonyo.

²⁰ Pagkamapasalamaton nato sa tambag nga isul-ob ang kompletong armadura gikan sa Diyos! Gitapos ni Pablo ang iyang paghisgot sa espirituwal nga armadura pinaagi niining maong tambag: “Uban ang tanang matang sa pag-ampo ug pangamuyo magpadayon kamo sa pag-ampo sa tanang higayon pinaagi sa espiritu. Ug sa maong katuyoan magpadayon sa pagtukaw uban ang bug-os nga pagkamakanunayon ug uban ang pagpangamuyo alang sa tanang balaan.” (Efeso 6:18) Ang pag-ampo makapalig-on kanato sa espirituwal ug motabang kanato sa pagpabiling nagtukaw. Sundon nato ang gisulti ni Pablo ug magpadayon kita sa pag-ampo, kay motabang kini kanato sa pagsukol kang Satanas ug sa iyang mga demonyo.

Unsay Imong Nakat-onan?

• Sa unsang paagi mitungha si Satanas ug ang iyang mga demonyo?

• Unsa ka gamhanan ang Yawa?

• Unsay atong depensa batok kang Satanas ug sa iyang mga demonyo?

• Sa unsang paagi masul-ob nato ang kompletong armadura gikan sa Diyos?

[Mga Pangutana sa Pagtuon]

[Mga hulagway sa panid 26]

“Ang mga anak sa matuod nga Diyos nakamatikod sa mga anak nga babaye sa mga tawo”

[Hulagway sa panid 28]

Makapatin-aw ka ba sa unom ka bahin sa atong espirituwal nga armadura?

[Mga hulagway sa panid 29]

Sa unsang paagi ang pagpakigbahin niini nga mga kalihokan makapanalipod kanato batok kang Satanas ug sa iyang mga demonyo?