Pag-anhi ni Kristo—Angay ba Kitang Mahadlok Niini?

UNSAY mosantop sa imong hunahuna bahin sa pag-anhi ni Jesu-Kristo? Giisip ba nimo kini ingong usa ka hitabo nga magdalag kalaglagan, kasub-anan, ug silot alang sa katawhan? O ikaw ba nagdahom nga hanawon niini ang tanan natong mga suliran? Angay ba natong kahadlokan ang pag-anhi ni Kristo? O angay ba natong kahinaman kini?

Maylabot sa pag-anhi ni Kristo, ang Bibliya nag-ingon: “Tan-awa! Siya moanhi uban sa mga panganod, ug ang tanang mata makakita kaniya, . . .  ug ang tanang tribo sa yuta magapukpok sa ilang kaugalingon sa kasubo tungod kaniya.” (Pinadayag 1:7) Kini nga pag-anhi nagtumong sa pagtungha ni Jesus sa umaabot aron sa pagganti sa mga matarong ug pagsilot sa mga daotan.

Inay mahadlok niini, si apostol Juan naghinamhinam sa pag-anhi ni Kristo. Human madawat ang pinadayag bahin sa maong pag-anhi ug kon unsay epekto niini sa yuta, si Juan tim-os nga nag-ampo: “Umari ka, Ginoong Jesus.” (Pinadayag 22:20) Apan nganong ang “tanang tribo sa yuta magapukpok sa ilang kaugalingon sa kasubo tungod kaniya”? Sa unsang paagi ang “tanang mata” makakita kaniya? Unsay malampos sa pag-anhi ni Kristo? Sa unsang paagi ang pagtuo niana makahatag ug kaayohan kanato karon? Ang mosunod nga artikulo motubag niining mga pangutanaha.