Sugilanon sa Kinabuhi

Ang Buluhatong Paghimog Tinun-an Nag-umol sa Akong Kinabuhi

Sumala sa Giasoy ni Lynette Peters

Miabot ang mga sundalo sa pagluwas kanamo. Ang usa nga hingigo miposisyon sa ibabaw sa usa ka bilding. Ang mga marine nanghapa diha sa kasagbotan nga nagpunting sa ilang mga pusil. Mikaratil mig dagan sa akong kaubang mga misyonaryo ngadto sa naghulat nga helikopter nianang buntag sa Dominggo, nga naningkamot nga magpabiling kalmado. Wala madugay, kami diha na sa kahanginan. Napulo ka minuto sa ulahi, luwas kaming misakay sa barko sa militar, nga gidunggo duol sa baybayon.

PAGKASUNOD buntag, among nahibaloan nga gibombahan diay sa mga rebelde ang hotel nga among gisak-an sa miaging gabii. Ang dugay nang kagubot sa mga sibilyan sa Sierra Leone nahimong usa ka gubat. Ang tanang langyaw, apil mi, gipapahawa dayon sa maong nasod. Sa pagsaysay kon nganong nasugamak ko sa maong kahimtang, sugdan nako sa sinugdanan.

Ako midako sa British Guiana, nga nailhang Guyana sukad pa sa 1966. Walay problema ug makalilipay ang akong kinabuhi sa bata pa ko sa katuigan sa 1950. Gipabilhan pag-ayo sa kadaghanang ginikanan ang edukasyon, ug ang mga batan-on gidahom nga magtinarong sa pag-eskuyla. Nahinumdom ko nga kausa gipangutana si Papa sa usa ka teller sa bangko, “Nganong mobayad man kag dako sa matrikula sa imong mga anak?” Si Papa mitubag, “Magmalamposon lamang sila kon maayo ang ilang edukasyon.” Niadtong panahona, siya naghunahuna nga ang kinamaayohang edukasyon mabatonan diha sa inilang mga eskuylahan. Sa ngadtongadto nausab ra ang iyang panglantaw.

Sa nag-edad kog 11 anyos, si Mama misugod pagtuon sa Bibliya uban sa mga Saksi ni Jehova. Mitambong siya sa Kingdom Hall uban sa usa ka  silingan. Ang ilang nadunggan niadtong gabhiona nakapakombinsir kanila nga ilang nakaplagan ang kamatuoran. Dayon, gisultihan ni Mama ang laing silingan bahin sa nahisgotan sa Kingdom Hall. Wala madugay, silang tulo nagtuon na uban sa mga misyonaryo nga sila si Daphne Harry (Baird, sa naminyo) ug Rose Cuffie. Wala dangtig usa ka tuig, si Mama ug ang iyang duha ka higala nabawtismohan. Lima ka tuig human niana, mibiya si Papa sa Simbahan sa Sabadista ug siya nabawtismohan ingong usa sa mga Saksi ni Jehova.

Sa bata pa, kaming tulo sa akong mga manghod nga babaye—ang kinamagulangan sa napulo ka anak—naggugol ug daghang malipayong oras sa balay sa mga misyonaryo diin nagpuyo si Daphne ug Rose. Sa maong mga higayon namati kami sa ilang mga kasinatian sa pag-alagad sa kanataran. Kini nga mga misyonaryo malipayon sa ilang makugihong pag-atiman sa espirituwal nga kaayohan sa uban. Ang ilang panig-ingnan maoy nagsilsil kanako sa tinguha nga magmisyonarya.

Apan, unsay nakatabang kanako nga magpabilin ang akong tumong sa bug-os-panahon nga ministeryo, nga nalibotan man kog mga paryente ug mga isigka-estudyante nga ang tumong maoy pagkab-ot ug sekular nga karera? Dihay daghang makapadani nga mga kahigayonan—mahimo kong magtuon ug abogasiya, musika, medisina, o uban pa. Ang maayong panig-ingnan sa akong mga ginikanan naghatag kanako sa gikinahanglang giya. Sila nagkinabuhi subay sa kamatuoran, makugihong nagtuon sa Bibliya, ug naggugol sa ilang kaugalingon sa pagtabang sa uban nga makakat-on bahin kang Jehova. a Dugang pa, kanunay silang magdapit ug bug-os-panahong mga ministro sa among balay. Ang kalipay ug katagbawan nga gipakita niining mga igsoona nagpalig-on sa akong tinguha nga umolon sa buluhatong paghimog tinun-an ang akong kinabuhi.

Pag-edad nakog 15 anyos, ako nabawtismohan. Dayon, sa dihang migraduwar ko sa hayskul, misulod ko sa bug-os-panahong ministeryo ingong payunir. Si Philomena, usa ka kawani sa ospital, mao ang unang tawo nga akong natabangan nga magpahinungod ug magpabawtismo. Ang kalipay nga makita siyang nakakat-on sa paghigugma kang Jehova nakapalig-on ug dugang sa akong tinguha sa pagpadayon sa bug-os-panahong ministeryo. Wala madugay human niana, gitanyagan akog mas maayong trabaho diha sa buhatan sa gobyerno, diin ako nagtrabaho ingong usa ka sekretarya. Gibalibaran nako kana, ug gipili nako nga ipadayon ang akong pagpayunir.

Didto pa gihapon ko sa balay nagpuyo, ug ang mga misyonaryo nagpadayon sa pagduaw kanamo. Nalipay gayod ako sa pagpamati sa ilang mga kasinatian! Kining tanan nakapasamot sa akong tinguha nga magmisyonarya, bisag daw kana lisod kab-oton. Nagpadala kaniadtog mga misyonaryo sa Guyana ug duna pa gihapoy ginapadala karon. Usa ka adlaw niana sa 1969, ako nakurat apan nalipay sa pagkadawat ug usa ka imbitasyon  sa pagtungha sa Watchtower Bible School of Gilead sa Brooklyn, New York.

Usa ka Asaynment nga Wala Nako Damha

Dihay mga 54 ka estudyante gikan sa 21 ka nasod sa ika-48 nga klase sa Gilead. Napulog-pito kanamo maoy tagsaanon nga mga sister. Bisag mga 37 na ka tuig ang milabay, lab-as pa gihapon sa akong panumdoman ang maong lima ka bulan. Daghan kaayog tun-anan—dili lamang mga kamatuoran sa Kasulatan kondili mga praktikal nga sugyot usab ug tambag alang sa pagkinabuhi ingong umaabot nga mga misyonaryo. Pananglitan, ako nakakat-on sa pagsunod sa instruksiyon, sa pagkahimong timbang kon bahin sa uso, ug sa paglahutay bisan sa malisod nga mga kahimtang.

Gipasiugda kanunay sa akong mga ginikanan ang regular nga pagtambong sa tigom. Bisan kinsa kanamo nga magpasakit-sakit aron dili makatambong sa tigom sa Dominggo, dili tugtan nga moadto sa pasundayag sa pagpiano o konsiyerto pagkasunod gabii. Apan, sa pipila ka higayon panahon sa akong pagtungha sa Gilead, wala ko motambong sa tigom. Usa niana ka gabii sa Biyernes, daghan kog gisulting pasangil kang Don ug Dolores Adams, usa ka magtiayon nga Bethelite nga maoy nagtagana nakog kasakyan paingon sa mga tigom, kon nganong dili ko motambong. Daghan man god kaayog homwork ug duna pa gyoy mga bahin! Unsaon man nako pagtambong sa Tunghaan sa Teokratikanhong Ministeryo ug Tigom sa Pag-alagad? Human mangatarongan kanako, si Brader Adams miingon: “Himoang giya ang imong tanlag.” Naminaw ko sa iyang tambag ug wala ko mopalta sa tigom nianang gabhiona o sa ubang tigom human niana. Sa daghang katuigan, gawas kon dili gyod itugot sa kahimtang, wala nako tugti ang bisan unsa nga mobalda sa akong pagtambong sa Kristohanong mga tigom.

Sa tungatunga sa klase, dihay hulungihong bahin sa pagdawat ug mga asaynment. Maoy akong pagtuo nga didto ra ko iasayn sa Guyana, diin gikinahanglan kaayo ang tabang sa buluhatong pagsangyaw. Handurawa ang akong katingala sa dihang akong nahibaloan nga dili diay ko pabalikon didto. Hinunoa, ako giasayn sa Sierra Leone, Kasadpang Aprika. Mapasalamaton kaayo ako kang Jehova nga natuman ra gayod ang akong tinguha nga magmisyonarya sa halayong dapit!

Daghan Pag Angayng Kat-onan

“Matahom,” mao kanay pulong nga makahubit sa akong unang impresyon sa Sierra Leone, uban sa daghang bungtod ug bukid, luok ug kabaybayonan niini. Apan, ang tinuod nga katahom niining nasora sa Kasadpang Aprika anaa sa mga molupyo niini, nga bisan ang mga langyaw mobating komportable tungod sa ilang kamahigugmaon ug kamaluloton. Dako gayod kinig naamot sa pagtabang sa mga misyonaryo nga dili sobrang magmamingawon. Ang mga taga-Sierra Leone malipay sa pagpakigsulti bahin sa ilang mga tradisyon ug kultura ug ilabina sa pagtabang sa mga bag-ohan nga mahanas sa pagsultig Krio, ang komon nga pinulongan sa nasod.

Ang nagsultig-Krio nga mga tawo daghan kaayog tataw nga mga panultihon. Pananglitan, ang panultihon nga—Unggoy ang nagtrabaho, amo ang mikaon—nagkahulogan nga ang nagpugas dili mao kanunay ang nag-ani. Tukma gayod kanang paghubit sa inhustisya nga kaylap kaayo sa kalibotan!—Isaias 65:22.

Ang pagsangyaw ug paghimog-tinun-an nga buluhaton naghatag kanakog kalipay. Pipila ra ang mga tawo nga dili interesado sa Bibliya. Latas sa katuigan, ang mga misyonaryo ug ang dugay nang mga alagad ni Jehova nakatabang sa  mga tawo—batag tigulang—gikan sa tanang kahimtang sa kinabuhi ug tribo sa pagdawat sa kamatuoran.

Si Erla St. Hill, ang akong unang kauban sa pagmisyonaryo, kugihan kaayo. Ang iyang kakugi sa pag-atiman sa mga kaakohan niya diha sa misyonaryong puy-anan maoy ikaduha lamang sa iyang kasibot sa pagministeryo. Gitabangan ko niya nga masabtan ang kahinungdanon sa daghang butang, sama sa pag-ilaila sa mga silingan, pagduaw sa mga Saksi ug mga interesado nga nasakit, ug pagsuportar sa kahikayan sa paglubong kon posible. Iya usab gisilsil kanako nga hinungdanong mohapit sa mga igsoon nga nagpuyo sa teritoryong gisangyawan, bisag kadiyot lang, aron komostahon sila usa pa mobiya sa maong teritoryo. Sa paghimo niini, dali ra kong nakabaton ug mga inahan, mga igsoong lalaki ug babaye, ug mga higala, ug nahimo na nakong pinuy-anan ang akong asaynment.—Marcos 10:29, 30.

Nasuod usab nako pag-ayo ang kauban nakong mga misyonaryo. Lakip kanila mao ang akong kauban sa kuwarto nga si Adna Byrd, nga mialagad sa Sierra Leone tali sa 1978 ug 1981, ug si Cheryl Ferguson, nga maoy akong kauban sa kuwarto sulod na sa 24 ka tuig.

Pagsulay nga Dala sa Giyera-Sibil

Sa 1997, mga usa ka bulan human sa pagdedikar sa bag-ong mga pasilidad sa sanga sa Sierra Leone, kinahanglan ming mobiya sa nasod tungod sa gubat, sumala sa nahisgotan na ganina. Unom ka tuig una pa niana, kami nakadayeg sa pagtuo sa mga Saksi sa Liberia nga mibakwet ngadto sa Sierra Leone aron sa pag-ikyas sa gubat sa Liberia. Ang pipila miabot nga walay dala. Bisan pa sa malisod nga kahimtang, sila nakigbahin sa ministeryo kada adlaw. Makatandog gayod nga makita ang ilang gugma kang Jehova ug sa mga tawo.

Niadtong tungora nga kami na mismo ang mga kagiw sa nasod sa Guinea, among gisundog ang panig-ingnan sa mga igsoon nga taga-Liberia ug kami nagpadayon sa pagsalig kang Jehova ug nag-una sa intereses sa Gingharian. Usa ka tuig sa ulahi, kami nakabalik sa Sierra Leone, apan sulod lang sa pito ka bulan, miulbo ang gubat ug busa mibakwet na usab kami ngadto sa Guinea.

Wala madugay giingnan mi nga ang mga membro sa usa sa naggubatayng mga pundok didto miestar sa among misyonaryong puy-anan sa Kissy ug ang among mga kabtangan gipanglungkab o kaha gipangdaot. Imbes maluya, kami mapasalamaton hinuon nga kami buhi. Pipila lang sa among mga butang ang nahibilin, apan kami nakasagubang ra niana.

 Human sa among ikaduhang pagbakwet, si Cheryl, ang akong kauban sa kuwarto, ug ako nagpabilin sa Guinea. Kini nagkahulogan nga kinahanglan ming magtuon ug Pranses. Gigamit dayon sa pipila sa akong kaubang mga misyonaryo ang Pranses nga ilang nakat-onan, nga wala ra kaayo manumbaling sa ilang mga sayop. Apan alang kanako, dili ko gustong mosulti sa salikwaot nga paagi, busa mosulti lang kog Pranses kon gikinahanglan gyod. Makapaguol gayod kadto. Adlaw-adlaw nakong pahinumdoman ang akong kaugalingon sa hinungdan kon nganong atua ko sa Guinea—aron tabangan ang uban nga makakat-on bahin kang Jehova.

Hinayhinay kong miuswag pinaagi sa pagtuon, pinaagi sa pagpaminaw niadtong larinong mosulti sa pinulongan, ug pinaagi sa tabang sa mga bata sa kongregasyon nga prangkag sinultihan. Dayon, sa wala damha, miabot ang tukma-sa-panahong tabang gikan sa organisasyon ni Jehova. Sukad sa Septiyembre 2001, ang Atong Ministeryo sa Gingharian nagtaganag mga sugyot sa pagpresentar sa mga magasin gawas pa sa mga ideya sa pagtanyag sa mga libro ug mga brosyur ngadto sa mga tawo nga lainlaig relihiyosong tinuohan. Mas may pagsalig na ako karon sa dihang ako makigbahin sa ministeryo, bisag dili kaayo ko larino sama sa akong lumad nga pinulongan.

Kay nagtubo man diha sa dakong pamilya, dali ra kong nakapasibo sa pagpuyo kauban sa daghang misyonaryo, nga sa usa ka higayon miabot ug 17 ang gidaghanon. Sulod sa akong 37 ka tuig nga pag-alagad ingong misyonarya, akong nakauban ang kapin sa 100 ka misyonaryo. Dako gayong pribilehiyo nga makaila ang daghang tawo nga lainlaig personalidad apan nagbuhat uban ang susamang tumong! Ug makalilipay gayod nga mahimong isigkamagbubuhat sa Diyos ug makapakigbahin sa pagkakita sa pagdawat sa mga tawo sa kamatuoran sa Bibliya!—1 Corinto 3:9.

Latas sa katuigan, daghang hinungdanong mga panghitabo sa kinabuhi sa akong pamilya nga wala nako matambongi, sama sa kasal sa akong mga manghod. Ug dili nako kanunay makita ang akong mga pag-umangkon. Dako gayod kana nga sakripisyo alang kanako ug sa akong pamilya, kinsa sa dili-mahakogong paagi nagdasig kanako sa pagpabilin sa misyonaryong buluhaton.

Hinuon, ang wala nako mapahimusli sa balay akong napahimuslan sa usa ka panahon o sa lain diha sa misyonaryong pag-alagad. Bisag gipili nako nga magpabiling tagsaanon, daghan akog espirituwal nga mga anak, dili lamang kadtong akong gitun-an sa Bibliya kondili kadtong nahimo usab nakong mga higala. Dugang pa, akong nakita ang ilang mga anak nga nanagko, nanagminyo, ug nagmatuto sa ilang mga anak sa dalan sa kamatuoran. Ang pipila kanila, sama kanako, nag-umol usab sa ilang kinabuhi pinaagi sa buluhatong paghimog tinun-an.

[Footnote]

[Mga mapa sa panid 15]

(Alang sa aktuwal nga pagkahan-ay, tan-awa ang publikasyon)

Ako giasayn sa Sierra Leone, Kasadpang Aprika

GUINEA

SIERRA LEONE

[Hulagway sa panid 13]

Ang akong duha ka manghod nga babaye, kinsa duyog kanako naggugol ug daghang malipayong mga oras kauban sa mga misyonaryo sa katuigan sa 1950

[Hulagway sa panid 14]

Uban sa akong mga isigka-estudyante sa ika-48 nga klase sa Gilead

[Hulagway sa panid 16]

Pagdedikar sa mga pasilidad sa sanga sa Sierra Leone