Ang Pagpangita sa Hustong mga Tambag

Sa unsang paagi mahuptan nako ang maayong panglawas?

Unsay akong mahimo aron mas magmalipayon ang akong pamilya?

Sa unsang paagi mahuptan nako ang akong trabaho?

NAKAPANGUTANA ka na ba sukad sa bisan hain nianang mga pangutanaha? Nakakaplag ka bag praktikal nga mga tambag nga misaler gayod? Kada tuig, mga 2,000 ka nagkalainlaing libro ang gipatik nga nagtanyag ug tambag bahin niini ug sa uban pang mahinungdanong mga ulohan. Sa Britanya lamang, ang mga magbabasa mogastog 80 milyones libra esterlina (mga $150 milyones, U.S.) kada tuig sa pagpalit ug mga libro nga nagtanyag ug tambag kon sa unsang paagi sagubangon ang mga suliran sa kinabuhi. Sa Tinipong Bansa, ang mga libro nga naghatag ug tambag mohalin ug mga $600 milyones kada tuig. Sa pagkatinuod, dili kay ikaw ra ang nangitag maayong tambag kon unsaon pagsagubang ang adlaw-adlawng kinabuhi.

Kon bahin sa tambag nga makaplagan sa daghan kaayong mga basahon, usa ka magsusulat miingon: “Igo rang gisubli sa daghang bag-ong mga basahon ang nahisulat na kaniadto.” Sa pagkatinuod, kadaghanan sa mga tambag nga makaplagan niining mga basahona maoy pagsubli lamang sa kaalam nga nasulat sa usa sa kinakaraanang mga libro sa kalibotan. Kini mao ang labing kaylap nga napanagtag nga basahon sa tibuok kalibotan. Kini nahubad na, sa bug-os o sa bahin, sa mga 2,400 ka pinulongan. Kon sumahon, kapin na sa 4.6 bilyones ka kopya ang napatik sa tibuok kalibotan. Kining libroha mao ang Bibliya.

Ang Bibliya tin-awng nag-ingon: “Ang tibuok Kasulatan inspirado sa Diyos ug mapuslanon sa pagpanudlo, sa pagpamadlong, sa pagpanul-id sa mga butang, sa pagdisiplina diha sa pagkamatarong.” (2 Timoteo 3:16) Tinuod, ang Bibliya wala isulat ingong basahon sa mga tambag. Ang pangunang katuyoan niini mao ang pagbutyag sa kabubut-on sa Diyos alang sa mga tawo. Bisan pa niana, ang Bibliya daghag impormasyon bahin sa kon unsaon pagsagubang sa mga suliran nga giatubang natong tanan, ug kini nagpasalig nga ang tanang mosunod sa giya niini makabaton ug kaayohan. (Isaias 48:17, 18) Kon ipadapat, ang praktikal nga tambag niini kanunayng mosaler, bisan unsa pay etniko, kultural, o edukasyonal nga kagikan sa usa ka tawo. Nganong dili nimo ipadayon ang pagbasa sa mosunod nga artikulo ug susihon kon praktikal ba gayod ang ginaingon sa Bibliya bahin sa panglawas, pamilya, ug panarbaho?