Mapainubsanong Magpasakop sa Mahigugmaong mga Magbalantay

“Magmasinugtanon kamo sa mga nagapanguna kaninyo ug magmapinasakopon.”​—HEBREOHANON 13:17.

1, 2. Unsang mga teksto ang nagpakita nga si Jehova ug si Jesus maoy mahigugmaong mga Magbalantay?

 SI Jehova nga Diyos ug ang iyang Anak, si Jesu-Kristo, maoy mahigugmaong mga Magbalantay. Si Isaias nagtagna: “Tan-awa! Ang Soberanong Ginoong Jehova moabot ingong usa nga kusganon, ug ang iyang bukton magmando alang kaniya. . . . Sama sa usa ka magbalantay sa hayop iyang bantayan ang iyang kaugalingong panon. Pinaagi sa iyang bukton iyang tapokon ang mga nating karnero; ug sa iyang sabakan iya silang kugoson. Kadtong mga nagapasuso iyang agakon uban ang pag-amping.”—Isaias 40:10, 11.

² Kanang maong tagna bahin sa kapasig-ulian unang natuman sa dihang ang Hudiyong nanghibilin namalik sa Juda sa 537 W.K.P. (2 Cronicas 36:22, 23) Ang ikaduhang katumanan niana maoy sa dihang ang dinihogang nanghibilin giluwas sa Mas Dakong Ciro nga si Jesu-Kristo, gikan sa “Dakong Babilonya” niadtong 1919. (Pinadayag 18:2; Isaias 44:28) Siya mao ang “bukton” ni Jehova alang sa pagmando, pagtigom pag-usab sa mga karnero ug pagbantay kanila uban ang mahigugmaong pag-atiman. Si Jesus mismo miingon: “Ako ang maayong magbalantay, ug ako nakaila sa akong mga karnero ug ang akong mga karnero nakaila kanako.”—Juan 10:14.

3. Sa unsang paagi nagpakita si Jehova ug mahigugmaong kabalaka sa paagi nga gitratar ang iyang mga karnero?

³ Ang tagna sa Isaias 40:10, 11 nagpasiugda kon unsa ka mahigugmaon ang pagbantay ni Jehova sa iyang katawhan. (Salmo 23:1-6) Panahon sa iyang yutan-ong ministeryo, si Jesus nagpakita usab ug mahigugmaong kabalaka sa iyang mga tinun-an ug sa katawhan sa katibuk-an. (Mateo 11:28-30; Marcos 6:34) Gidumtan ni Jehova ug ni Jesus ang kawalay-kaluoy sa mga magbalantay, o mga pangulo, sa Israel, kinsa walay-kokaulawng nagpabaya ug nagpahimulos sa ilang mga panon. (Ezequiel 34:2-10; Mateo 23:3, 4, 15) Nagsaad si Jehova: “Luwason ko ang akong mga karnero, ug sila dili na mahimong agawonon; ug ako magahukom tali sa karnero ug karnero. Ug ibabaw kanila ako magbangon ug usa ka magbalantay, ug siya magpakaon kanila, ang akong alagad nga si David. Siya magpakaon kanila, ug siya mahimong ilang magbalantay.” (Ezequiel 34:22, 23) Niining panahon sa kataposan, si Jesu-Kristo, ang Dakong David, mao ang “magbalantay” nga gitudlo ni Jehova nga mangulo sa tanang alagad Niya sa yuta, sa dinihogan-sa-espiritung mga Kristohanon ug sa “ubang mga karnero.”—Juan 10:16.

 Mga Gasa sa Diyos Ngadto sa Kongregasyon

4, 5. (a) Unsang bililhong gasa ang gihatag ni Jehova sa iyang katawhan sa yuta? (b) Unsang gasa ang gihatag ni Jesus sa iyang kongregasyon?

⁴ Si Jehova naghatag ug bililhong gasa ngadto sa Kristohanong kongregasyon pinaagi sa pagtagana ug “usa ka magbalantay”—si Jesu-Kristo—nga maoy mangulo sa Iyang mga alagad dinhi sa yuta. Kining gasa nga usa ka langitnong Pangulo gitagna sa Isaias 55:4: “Tan-awa! Ingong saksi ngadto sa nasodnong mga pundok akong gihatag siya, ingong pangulo ug komandante ngadto sa nasodnong mga pundok.” Ang dinihogang mga Kristohanon ug ang mga membro sa “dakong panon” parehong natigom gikan sa tanang nasod, tribo, katawhan, ug pinulongan. (Pinadayag 5:9, 10; 7:9) Sila naglangkob sa usa ka internasyonal nga kongregasyon, “usa ka panon,” ubos sa pagpanguna sa “usa ka magbalantay,” si Kristo Jesus.

⁵ Naghatag usab si Jesus ug usa ka bililhong gasa sa iyang kongregasyon dinhi sa yuta. Iyang gitagana ang matinumanong luyoluyong mga magbalantay kinsa, ingong pagsundog kang Jehova ug kang Jesus, nagbantay sa panon uban ang mahigugmaong pag-atiman. Si apostol Pablo naghisgot bahin niining mahigugmaong gasa diha sa iyang sulat ngadto sa mga Kristohanon sa Efeso. Siya misulat: “‘Sa dihang siya misaka sa itaas siya nagdala ug mga binihag; siya mihatag ug mga gasa nga mga lalaki.’ . . . Iyang gihatag ang pipila ingong mga apostoles, ang pipila ingong mga manalagna, ang pipila ingong mga tig-ebanghelyo, ang pipila ingong mga magbalantay ug mga magtutudlo, alang sa pagpasibo ug balik sa mga balaan, alang sa ministeryal nga buluhaton, alang sa pagpalig-on sa lawas ni Kristo.”—Efeso 4:8, 11, 12.

6. Sa Pinadayag 1:16, 20, giunsa paghulagway ang dinihogang mga magtatan-aw nga nag-alagad ingong membro sa mga lawas sa mga ansiyano, ug unsay ikaingon bahin sa tinudlong mga ansiyano nga sakop sa ubang mga karnero?

⁶ Kining “mga gasa nga mga lalaki” mao ang mga magtatan-aw, o mga ansiyano, nga gitudlo ni Jehova ug sa iyang Anak, pinaagi sa balaang espiritu, aron sa pagbantay sa mga karnero uban ang gugma. (Buhat 20:28, 29) Sa sinugdan, kining maong mga magtatan-aw pulos dinihogang mga Kristohanon. Sa Pinadayag 1:16, 20, kadtong nag-alagad ingong membro sa lawas sa mga ansiyano sulod sa dinihogang kongregasyon gihulagway ingong mga “bituon” o “mga manulonda” nga anaa sa tuong kamot ni Kristo, sa ato pa, ilalom sa iyang pagkontrolar. Apan niining panahon sa kataposan, samtang nagkadiyutay ang dinihogang mga magtatan-aw nga ania pa sa yuta, ang kadaghanan sa Kristohanong mga ansiyano diha sa mga kongregasyon maoy mga sakop sa ubang mga karnero. Sanglit gitudlo sila sa mga hawas sa Nagamandong Lawas ubos sa pagtultol sa balaang espiritu, ikaingon usab nga sila ubos sa tuong kamot (o, ubos sa pagtultol) sa Maayong Magbalantay, si Jesu-Kristo. (Isaias 61:5, 6) Sanglit ang mga ansiyano sa atong mga kongregasyon nagpasakop kang Kristo, ang Ulo sa kongregasyon, sila takos sa atong bug-os nga pagpakigtambayayong.—Colosas 1:18.

 Pagsugot ug Pagpasakop

7. Unsang tambag ang gihatag ni apostol Pablo maylabot sa atong tinamdan ngadto sa Kristohanong mga magtatan-aw?

⁷ Ang atong langitnong mga Magbalantay, si Jehova nga Diyos ug si Jesu-Kristo, nagdahom nga kita magmasinugtanon ug magmapinasakopon sa luyoluyong mga magbalantay nga ilang gihatagag mga responsibilidad sulod sa kongregasyon. (1 Pedro 5:5) Ubos sa pagtultol sa balaang espiritu, si apostol Pablo misulat: “Hinumdomi sila nga nagapanguna kaninyo, nga nagasulti sa pulong sa Diyos kaninyo, ug samtang mamalandong kamo kon unsay gisangpotan sa ilang panggawi sundoga ang ilang pagtuo. Magmasinugtanon kamo sa mga nagapanguna kaninyo ug magmapinasakopon, kay sila nagabantay sa inyong mga kalag ingon nga sila maoy maghatag ug husay; aron buhaton nila kini uban ang kalipay ug dili uban ang pagpanghupaw, kay kini makadaot kaninyo.”—Hebreohanon 13:7, 17.

8. Unsay giawhag ni Pablo nga atong ‘palandongon,’ ug sa unsang paagi kita “magmasinugtanon”?

⁸ Matikdi nga giawhag kita ni Pablo nga ‘palandongon,’ o hunahunaon pag-ayo, ang sangpotanan sa matinumanong panggawi sa mga ansiyano ug sundogon kanang maong mga panig-ingnan sa pagtuo. Dugang pa, gitambagan niya kita nga magmasinugtanon ug magmapinasakopon sa pagtultol niining tinudlong mga lalaki. Ang eskolar sa Bibliya nga si R. T. France nagpatin-aw nga sa orihinal nga Grego, ang pulong dinhi nga gihubad ug “magmasinugtanon” dili mao “ang naandang termino alang sa pagkamasinugtanon, kondili sa literal maoy ‘makombinsir,’ nga nagpasabot ug kinabubut-ong pagsunod sa ilang pagpanguna.” Masinugtanon kita sa mga ansiyano dili lamang tungod kay ang Pulong sa Diyos nagsugo kanato sa pagbuhat niana kondili tungod kay kita kombinsido nga sila nagtinguha kon unsay labing maayo maylabot sa mga intereses sa Gingharian ug alang kanato. Magmalipayon gayod kita kon kita kinabubut-ong mosunod sa ilang pagpanguna.

9. Nganong kinahanglan nga kita “magmapinasakopon” gawas pa sa pagkahimong masinugtanon?

⁹ Apan, komosta kon kita dili kombinsido nga sa usa ka kahimtang ang instruksiyon sa mga ansiyano mao ang labing maayong paagi sa pagbuhat sa mga butang? Nianang bahina nga gikinahanglan ang pagpasakop. Dali rang sundon ang usa ka instruksiyon kon kana klaro ug kon kita uyon niana, apan atong ikapakita nga kita masinugtanon gayod kon kita mosunod bisan pag wala nato masabti ang instruksiyon nga gihatag. Si Pedro, nga sa ulahi nahimong apostol, nagpakita niining matanga sa pagpasakop.—Lucas 5:4, 5.

Upat ka Rason Kon Nganong Kita Kinabubut-ong Makigtambayayong

10, 11. Sa unsang paagi ang mga magtatan-aw ‘nagsulti sa pulong sa Diyos’ ngadto sa ilang mga isigka-Kristohanon sa unang siglo ug karon?

¹⁰ Sa Hebreohanon 13:7, 17, nga gikutlo sa ibabaw, si apostol Pablo naghatag ug upat ka rason kon nganong kita angayng magmasinugtanon ug magmapinasakopon sa Kristohanong mga magtatan-aw. Ang una mao nga sila “nagasulti sa pulong sa Diyos” kanato. Hinumdomi nga ang “mga gasa nga mga lalaki” nga gihatag ni Jesus sa kongregasyon maoy alang “sa pagpasibo ug balik sa mga balaan.” (Efeso 4:11, 12) Iyang gipasibo ug balik ang hunahuna ug panggawi sa unang-siglong mga Kristohanon pinaagi sa matinumanong luyoluyong mga magbalantay, nga ang pipila kanila gigiyahan sa balaang espiritu sa pagsulat sa mga kongregasyon. Gigamit niya ang maong tinudlo-sa-espiritung mga magtatan-aw aron sa paggiya ug pagpalig-on sa unang mga Kristohanon.—1 Corinto 16:15-18; 2 Timoteo 2:2; Tito 1:5.

¹¹ Karon, gitultolan kita ni Jesus pinaagi sa “matinumanon ug maalamong ulipon,” nga gihawasan sa Nagamandong Lawas niini ug sa tinudlong mga ansiyano. (Mateo 24:45) Tungod sa atong pagtahod sa “pangulong magbalantay,” si Jesu-Kristo, atong sundon ang tambag ni Pablo: “Tamdon ninyo silang naghago taliwala kaninyo ug nagdumala kaninyo diha sa Ginoo ug nagpahimangno kaninyo.”—1 Pedro 5:4; 1 Tesalonica 5:12; 1 Timoteo 5:17.

12. Sa unsang paagi ang mga magtatan-aw “nagabantay sa [atong] mga kalag”?

¹² Ang ikaduhang rason kon nganong kita makigtambayayong sa Kristohanong mga magtatan-aw mao nga “sila nagabantay sa [atong] mga kalag.” Kon duna silay mamatikdan sa atong tinamdan o panggawi nga lagmit magpameligro sa atong espirituwalidad, sila mohatag dayon kanato sa gikinahanglang tambag sa tuyo nga kita mapasibo  ug balik. (Galacia 6:1) Ang Gregong pulong nga gihubad ug “nagabantay” sa literal nagkahulogan ug “dili pagkatulog.” Sumala sa usa ka eskolar sa Bibliya, kini “nagtumong sa mapinadayonong pagtukaw sa magbalantay.” Gawas pa sa ilang pagpadayon sa pagtukaw sa espirituwal, may mga higayon nga ang mga ansiyano dili gani makatulog tungod sa ilang kabalaka sa atong espirituwal nga kahimtang. Dili ba angay nga kita kinabubut-ong makigtambayayong nianang mahigugmaong luyoluyong mga magbalantay, kinsa nagbuhat sa ilang kinamaayohan aron masundog ang mahigugmaong pag-atiman nga gipakita ni Jesu-Kristo, ang “dakong magbalantay sa mga karnero”?—Hebreohanon 13:20.

13. Kang kinsa ug sa unsang mga paagi nga ang mga magtatan-aw ug ang tanang Kristohanon manubag?

¹³ Ang ikatulong rason kon nganong kita kinabubut-ong makigtambayayong sa mga magtatan-aw mao nga sila nagabantay kanato “ingon nga sila maoy maghatag ug husay.” Hinumdoman sa mga magtatan-aw nga sila maoy luyoluyong mga magbalantay, nga nag-alagad ilalom sa langitnong mga Magbalantay, si Jehova nga Diyos ug si Jesu-Kristo. (Ezequiel 34:22-24) Si Jehova mao ang Tag-iya sa mga karnero, nga “iyang gipalit pinaagi sa dugo sa iyang kaugalingong Anak,” ug Iyang papanubagon ang tinudlong mga magtatan-aw sa paagi nga gitratar nila ang Iyang panon, nga angayng himoon “uban ang kalumo.” (Buhat 20:28, 29) Busa, kitang tanan manubag kang Jehova sa paagi nga kita mosanong sa iyang pagtultol. (Roma 14:10-12) Ang atong pagkamasinugtanon sa tinudlong mga ansiyano magpamatuod usab sa atong pagkamapinasakopon kang Kristo, ang Ulo sa kongregasyon.—Colosas 2:19.

14. Unsay lagmit nga hinungdan nga ang Kristohanong mga magtatan-aw mag-alagad “uban ang pagpanghupaw,” ug unsay mga resulta niini?

¹⁴ Gihatag ni Pablo ang ikaupat nga rason kon nganong kita angay nga mapainubsanong magpasakop sa Kristohanong mga magtatan-aw. Siya misulat: “Aron buhaton nila kini uban ang kalipay ug dili uban ang pagpanghupaw, kay kini makadaot kaninyo.” (Hebreohanon 13:17) Tungod sa ilang bug-at nga mga responsibilidad sa pagpanudlo, pagbantay sa panon, pagpanguna sa buluhatong pagsangyaw, pag-atiman sa ilang mga pamilya, ug pag-atiman sa mga problema sa kongregasyon, ang Kristohanong mga ansiyano nagpas-an ug bug-at nga responsibilidad. (2 Corinto 11:28, 29) Kon kita dili makigtambayayong kanila, gidugangan lamang nato ang ilang palas-anon. Moresulta kini sa ilang “pagpanghupaw.” Ang dili nato pagpakigtambayayong kanila dili makapahimuot kang  Jehova ug makadaot kanato. Hinunoa, kon kita magpakita ug hustong pagtahod ug makigtambayayong, ang mga ansiyano makatuman sa ilang mga katungdanan nga malipayon, ug kini makapalambo sa panaghiusa ug malipayong pagpakigbahin diha sa buluhatong pagsangyaw sa Gingharian.—Roma 15:5, 6.

Pagpakita sa Atong Pagkamapinasakopon

15. Sa unsang paagi ikapakita nato ang atong pagkamasinugtanon ug pagkamapinasakopon?

¹⁵ Adunay daghang praktikal nga mga paagi diin kita mahimong makigtambayayong sa tinudlong mga magtatan-aw. Sa tuyo nga mopasibo sa bag-ong mga sirkumstansiya diha sa teritoryo, naghikay ba ang mga ansiyano ug mga tigom alang sa pag-alagad sa kanataran sa mga adlaw ug panahon nga nagkinahanglag kausaban sa atong rutina? Maningkamot kita sa pagpaluyo sa bag-ong mga kahikayan. Basin makadawat kita ug wala-damhang mga panalangin. Duaw ba sa magtatan-aw sa pag-alagad sa atong Pagtuon sa Basahon sa Kongregasyon? Hinaot nga bug-os kitang makigbahin kutob sa mahimo diha sa buluhatong pagsangyaw nianang semanaha. Nakadawat ba kitag asaynment sa Tunghaan sa Teokratikanhong Ministeryo? Kinahanglang maningkamot kita sa pagtambong ug paghatag sa atong bahin. Gipahibalo ba sa magtatan-aw sa Pagtuon sa Libro sa Kongregasyon nga turno sa atong grupo sa paglimpiyo sa Kingdom Hall? Hinaot nga paluyohan nato siya sa bug-os, sumala sa limitasyon sa atong panglawas ug kusog. Niini ug sa daghan pang mga paagi, mapakita nato ang atong pagkamapinasakopon sa mga lalaki nga gitudlo ni Jehova ug sa iyang Anak sa pag-atiman sa panon.

16. Kon ang usa ka ansiyano dili mobuhat sa mga butang sumala sa instruksiyon nga gihatag kaniya, nganong dili kini rason nga kita morebelde?

¹⁶ Usahay, ang usa ka ansiyano dili tingali mobuhat sa mga butang sumala sa instruksiyon nga gihatag sa matinumanon ug maalamong ulipon nga matang ug sa Nagamandong Lawas niini. Kon magpadayon siya sa paglihok nianang paagiha, siya magahatag ug husay kang Jehova, ang “magbalantay ug magtatan-aw sa [atong] mga kalag.” (1 Pedro 2:25) Apan ang bisan unsang kapakyasan o kasaypanan nga nahimo sa pipila ka ansiyano dili rason nga kita dili na magpasakop. Si Jehova dili magapanalangin sa pagkamasinupakon ug pagkarebelyoso.—Numeros 12:1, 2, 9-11.

Si Jehova Magapanalangin sa Kinabubut-ong Pagpakigtambayayong

17. Unsay angay natong tinamdan sa atong mga magtatan-aw?

¹⁷ Si Jehova nga Diyos nahibalo nga ang mga lalaki nga iyang gitudlo ingong mga magtatan-aw dili hingpit. Bisan pa niana, gigamit niya sila, ug pinaagi sa iyang espiritu, gibantayan niya ang iyang katawhan dinhi sa yuta. Tinuod kini sa mga ansiyano—ug kanatong tanan—nga “ang gahom nga labaw sa kasarangan maiya sa Diyos ug dili gikan sa [atong] kaugalingon.” (2 Corinto 4:7) Busa angayng pasalamatan nato si Jehova sa iyang napalampos pinaagi sa atong matinumanong mga magtatan-aw, ug kita angay nga kinabubut-ong makigtambayayong kanila.

18. Pinaagi sa atong pagpasakop sa atong mga magtatan-aw, unsa, sa pagkatinuod, ang atong ginabuhat?

¹⁸ Ang mga magtatan-aw naghimo sa ilang kinamaayohan sa pagkinabuhi uyon sa paghubit ni Jehova sa mga magbalantay nga gitudlo ibabaw sa iyang panon niining kataposang mga adlaw, ingon sa makita diha sa Jeremias 3:15: “Hatagan ko kamo ug mga magbalantay nga uyon sa akong kasingkasing, ug sila magpakaon gayod kaninyo sa kahibalo ug sa hait nga salabotan.” Tino nga ang mga ansiyano sa atong taliwala naghimo ug maayong buluhaton sa pagpanudlo ug pagpanalipod sa mga karnero ni Jehova. Hinaot magpadayon kita sa pagpakita sa atong apresasyon sa ilang paghago pinaagi sa atong kinabubut-ong pagpakigtambayayong, pagkamasinugtanon, ug pagkamapinasakopon. Sa pagbuhat niana, atong ikapakita ang atong apresasyon sa atong langitnong mga Magbalantay, si Jehova nga Diyos ug si Jesu-Kristo.

Agig Pagsubli

• Sa unsang paagi si Jehova ug si Jesu-Kristo nagpamatuod nga sila maoy mahigugmaong mga Magbalantay?

• Gawas pa sa pagkamasinugtanon, nganong gikinahanglan ang pagkamapinasakopon?

• Sa unsang praktikal nga mga paagi nga atong ikapakita ang atong pagkamapinasakopon?

[Mga Pangutana sa Pagtuon]

[Hulagway sa panid 27]

Ang Kristohanong mga ansiyano nagpasakop sa pagpanguna ni Kristo

[Mga hulagway sa panid 29]

Adunay daghang paagi sa pagpasundayag sa atong pagkamapinasakopon sa tinudlong mga magbalantay ni Jehova