Maunongon Kang Kristo ug sa Iyang Matinumanong Ulipon

‘Igatudlo siya sa iyang agalon ibabaw sa tanan niyang mga kabtangan.’​—MATEO 24:45-47.

1, 2. (a) Kinsay gipaila sa Kasulatan nga atong Pangulo? (b) Unsay nagpakita nga si Kristo aktibong nagapanguna sa Kristohanong kongregasyon?

 “AYAW kamo pagpatawag nga ‘mga pangulo,’ kay usa ra ang inyong Pangulo, si Kristo.” (Mateo 23:10) Niining mga pulonga, giklaro ni Jesus ngadto sa iyang mga sumusunod nga walay tawo dinhi sa yuta nga mahimong ilang pangulo. Ang ilang bugtong Pangulo anaa sa langit—si Jesu-Kristo mismo. Si Jesus gitudlo sa Diyos sa maong posisyon. Si Jehova ‘nagbangon kaniya gikan sa mga patay ug naghimo kaniyang ulo ibabaw sa tanang butang nganha sa kongregasyon, nga mao ang iyang lawas.’—Efeso 1:20-23.

² Sanglit si Kristo mao ang “ulo ibabaw sa tanang butang” maylabot sa Kristohanong kongregasyon, siya adunay awtoridad ibabaw sa tanan nga nagakahitabo sulod sa kongregasyon. Iyang makita ang tanang nahitabo diha niana. Siya adunay dulot nga interes sa espirituwal nga kahimtang sa matag grupo sa mga Kristohanon, o kongregasyon. Tin-aw kaayo kini diha sa pinadayag nga gihatag kang apostol Juan sa kataposan sa unang siglo K.P. Ngadto sa pito ka kongregasyon, kalima miingon si Jesus nga nahibalo siya sa ilang mga buhat, sa ilang maayong mga hiyas, ug sa ilang mga kahuyangan, ug siya naghatag ug tambag ug pagdasig sumala niana. (Pinadayag 2:2, 9, 13, 19; 3:1, 8, 15) Makatuo gayod kita nga si Kristo nahibalo usab sa espirituwal nga kahimtang sa ubang mga kongregasyon sa Asia Minor, Palestina, Sirya, Babilonya, Gresya, Italya, ug sa uban pang dapit. (Buhat 1:8) Komosta karon?

 Usa ka Matinumanong Ulipon

3. Nganong haom nga itandi si Kristo sa usa ka ulo ug ang iyang kongregasyon sa usa ka lawas?

³ Human sa iyang pagkabanhaw ug sa dayon na niyang saka ngadto sa iyang Amahan sa langit, giingnan ni Jesus ang iyang mga tinun-an: “Ang tanang awtoridad gihatag na kanako sa langit ug sa yuta.” Miingon usab siya: “Tan-awa! ako magauban kaninyo sa tanang adlaw hangtod sa kataposan sa sistema sa mga butang.” (Mateo 28:18-20) Magpadayon siya sa pag-uban kanila ingong ilang Ulo nga aktibong magapanguna kanila. Sa iyang mga sulat ngadto sa mga Kristohanon sa Efeso ug Colosas, gipakasama ni apostol Pablo ang Kristohanong kongregasyon sa usa ka “lawas,” nga niana si Kristo ang Ulo. (Efeso 1:22, 23; Colosas 1:18) Ang The Cambridge Bible for Schools and Colleges nag-ingon nga kining maong pagtandi “wala lamang magpasabot nga hinungdanong mahiusa sa Ulo, kondili nagpasabot usab nga ang kabubut-on sa Ulo maoy ipatuman nganha sa mga membro. Sila maoy Iyang mga galamiton.” Unsang pundoka ang gigamit ni Kristo sukad siya mahatagi ug gahom sa pagmando sa Gingharian niadtong 1914?—Daniel 7:13, 14.

4. Sumala sa gitagna ni Malaquias, unsay nakita ni Jehova ug ni Kristo Jesus sa dihang gisusi nila ang espirituwal nga templo?

⁴ Ang tagna ni Malaquias nag-ingon nga si Jehova, “ang matuod nga Ginoo,” uban sa iyang “mensahero sa pakigsaad,” ang iyang bag-ong naentronong Anak, si Kristo Jesus, moabot aron sa paghukom ug pagsusi sa Iyang “templo,” o espirituwal nga balay sa pagsimba. “Ang tinudlong panahon” sa pagsugod sa ‘paghukom sa balay sa Diyos’ dayag nga miabot niadtong 1918. a (Malaquias 3:1; 1 Pedro 4:17) Haom lang nga susihon kadtong nag-angkong naghawas sa Diyos ug sa iyang matuod nga pagsimba dinhi sa yuta. Gisalikway ang mga relihiyon sa Kakristiyanohan, kinsa sulod sa daghang siglo nagtudlo ug nagpasipala-sa-Diyos nga mga doktrina ug dakog kalambigitan sa pagpamatay ug daghang tawo panahon sa Gubat sa Kalibotan I. Ang matinumanong nanghibilin sa dinihogan-sa-espiritung mga Kristohanon gisulayan, nga samag gidalisay sa kalayo, ug giuyonan, nga nahimong “katawhan nga magahalad ug halad nga gasa diha sa pagkamatarong” alang kang Jehova.—Malaquias 3:3.

5. Nahiuyon sa tagna ni Jesus mahitungod sa iyang “presensiya,” kinsa ang napamatud-an nga matinumanong “ulipon”?

⁵ Nahiuyon sa tagna ni Malaquias, ang daghag-bahin nga ilhanan nga gihatag ni Jesus sa iyang mga tinun-an aron ilang mahibaloan ang panahon sa iyang ‘presensiya ug ang kataposan sa sistema sa mga butang’ naglakip sa pag-ila sa “ulipon.” Si Jesus miingon: “Kinsa ba gayod ang matinumanon ug maalamong ulipon nga gitudlo sa iyang agalon ibabaw sa iyang mga sulugoon sa panimalay, sa paghatag kanila sa ilang pagkaon sa hustong panahon? Malipayon kanang ulipona kon sa pag-abot sa iyang agalon makaplagan siya nga nagabuhat sa ingon! Sa pagkatinuod ako magaingon kaninyo, igatudlo niya siya ibabaw sa tanan niyang mga kabtangan.” (Mateo 24:3, 45-47) “Sa pag-abot” aron sa pagsusi sa “ulipon” niadtong 1918, si Kristo nakakaplag ug dinihogan-sa-espiritung nanghibilin sa matinumanong mga tinun-an kinsa sukad sa 1879 naggamit niining magasina ug sa ubang binase-sa-Bibliya nga mga publikasyon sa pagtagana ug espirituwal nga “pagkaon sa hustong panahon.” Iyang giila sila ingong iyang galamiton, o “ulipon,” ug sa 1919 iyang gipiyal kanila ang pagdumala sa tanan niyang mga kabtangan sa yuta.

Pagdumala sa mga Kabtangan ni Kristo sa Yuta

6, 7. (a) Unsa pang mga terminoha ang gigamit ni Jesus sa paghisgot bahin sa iyang matinumanong “ulipon”? (b) Unsay gipasabot sa paggamit ni Jesus sa pulong “piniyalan”?

⁶ Pipila ka bulan una pa ihatag ni Jesus ang iyang tagna bahin sa ilhanan sa iyang presensiya, lakip na sa paglungtad sa usa ka “ulipon” nga maghawas kaniya dinhi sa yuta, naggamit siyag lahi nga mga termino sa paghisgot bahin niining maong “ulipon” nga nagpadayag kon unsay ilang mga responsibilidad. Si Jesus miingon: “Kinsa sa pagkatinuod ang matinumanong piniyalan, ang usa nga maalamon, kinsa itudlo sa iyang agalon sa pagdumala sa iyang pundok sa mga tig-alagad aron sa pagpadayon paghatag kanila sa ilang taganang pagkaon sa hustong panahon? Sa pagkatinuod  sultihan ko kamo, Iyang igatudlo siya sa pagdumala sa iyang tanang kabtangan.”—Lucas 12:42, 44.

⁷ Dinhi ang ulipon gitawag nga piniyalan, usa ka pulong nga gihubad gikan sa usa ka Gregong termino nga nagpasabot ug “tigdumala sa usa ka panimalay o kabtangan.” Ang pundok sa piniyalan dili lamang usa ka grupo sa makinaadmanong mga tawo nga nagpatin-aw sa makaiikag nga mga punto gikan sa Bibliya. Gawas pa sa pagtagana ug makapalig-ong espirituwal nga pagkaon “sa hustong panahon,” “ang matinumanong piniyalan” igatudlo ibabaw sa tanang tig-alagad ni Kristo ug magdumala sa tanang intereses niya dinhi sa yuta, sa “iyang tanang kabtangan.” Unsay nalakip niining maong mga kabtangan?

8, 9. Unsang “mga kabtangan” ang gipadumala sa ulipon?

⁸ Ang mga responsibilidad sa ulipon naglakip sa pagdumala sa mga pasilidad nga gigamit sa mga sumusunod ni Kristo sa pagtuman sa ilang Kristohanong mga kalihokan, sama sa tibuok-kalibotang hedkuwarter ug mga sangang buhatan sa mga Saksi ni Jehova, maingon man sa ilang mga dapit sa pagsimba—mga Kingdom Hall ug mga Assembly Hall—sa tibuok kalibotan. Labawng hinungdanon, ang ulipon naghikay usab ug makapalig-on-sa-espirituwal nga mga programa sa pagtuon sa Bibliya diha sa senemanang mga tigom ug sa popanahong mga asembliya ug mga kombensiyon. Niining maong mga panagkatigom, gitagana ang impormasyon bahin sa katumanan sa mga tagna sa Bibliya, ug ang nunot-sa-panahong tabang kon unsaon pagpadapat ang mga prinsipyo sa Bibliya diha sa adlaw-adlaw nga pagkinabuhi.

⁹ Ang mga responsibilidad sa piniyalan naglakip usab sa pagdumala sa hinungdanon-kaayong buluhaton nga pagsangyaw ‘niining maayong balita sa gingharian’ ug “paghimog mga tinun-an sa katawhan sa tanang kanasoran.” Naglangkit kini sa pagtudlo sa mga tawo sa pagbuhat sa tanang butang nga gisugo ni Kristo, ang Ulo sa kongregasyon, nga buhaton niining panahon sa kataposan. (Mateo 24:14; 28:19, 20; Pinadayag 12:17) Ang buluhatong pagsangyaw ug pagpanudlo nakapatungha ug “usa ka dakong panon” sa maunongong mga kauban sa dinihogang nanghibilin. Sa walay duhaduha, kining “tilinguhaong mga butang sa tanang kanasoran” maoy bahin sa bililhong “mga kabtangan” ni Kristo nga giatiman sa matinumanong ulipon.—Pinadayag 7:9; Haggeo 2:7.

Usa ka Hawas nga Nagamandong Lawas

10. Unsang grupoha ang natudlo sa paghimog mga desisyon sa unang siglo, ug unsay epekto niini diha sa mga kongregasyon?

¹⁰ Ang bug-at nga mga responsibilidad sa matinumanong ulipon dayag nga maglangkit ug paghimog daghang desisyon. Sa unang Kristohanong kongregasyon, ang mga apostoles ug mga ansiyano sa Jerusalem naghawas sa ulipon nga matang, nga naghimog mga desisyon alang sa tibuok Kristohanong kongregasyon. (Buhat 15:1, 2) Ang mga desisyon niining unang-siglong nagamandong lawas gipahibalo ngadto sa mga kongregasyon pinaagi sa mga sulat ug sa nagapanawng mga hawas. Ang unang mga Kristohanon nalipay sa pagdawat  niining klarong mga instruksiyon, ug ang ilang pagkaandam nga mokooperar sa nagamandong lawas nagpalambo sa kalinaw ug panaghiusa.—Buhat 15:22-31; 16:4, 5; Filipos 2:2.

11. Kinsay gigamit ni Kristo karon sa pagtultol sa iyang kongregasyon, ug sa unsang paagi lantawon nato kining maong grupo sa dinihogang mga Kristohanon?

¹¹ Sama sa sinugdanan sa Kristohanong panahon, ang usa ka gamayng grupo sa dinihogan-sa-espiritu nga mga magtatan-aw naglangkob sa Nagamandong Lawas sa mga sumusunod ni Kristo dinhi sa yuta karon. Pinaagi sa iyang “tuong kamot”—ang iyang gigamit nga gahom—si Kristo, ang Ulo sa kongregasyon, nagtultol niining matinumanong mga lalaki samtang gidumala nila ang buluhaton sa Gingharian. (Pinadayag 1:16, 20) Sa iyang sugilanon sa kinabuhi, si Albert Schroeder, usa ka membro sa Nagamandong Lawas sulod sa daghang katuigan kinsa bag-o lang nakatapos sa iyang yutan-ong kinabuhi, misulat: “Ang Nagamandong Lawas magmiting kada Miyerkoles, nga magbukas niana pinaagig pag-ampo ug mangayo sa giya sa espiritu ni Jehova. Naningkamot sila pag-ayo sa pagtino nga ang tanang butang nga dumalahon ug ang tanang desisyon nga himoon nahiuyon sa Pulong sa Diyos, ang Bibliya.” b Makasalig kita nianang matinumanon nga dinihogang mga Kristohanon. Ilabina maylabot kanila, angay natong sundon ang sugo ni apostol Pablo: “Magmasinugtanon kamo sa mga nagapanguna kaninyo ug magmapinasakopon, kay sila nagabantay sa inyong mga kalag.”—Hebreohanon 13:17.

Pagpakitag Angayang Pagtahod Alang sa Matinumanong Ulipon

12, 13. Unsa ang Kasulatanhong mga rason kon nganong kita magpakitag pagtahod sa ulipon nga matang?

¹² Ang usa ka hinungdanong rason kon nganong kita magpakitag angayang pagtahod sa matinumanong ulipon nga matang mao nga sa pagbuhat niana, kita sa pagkatinuod nagtahod sa Agalon, si Jesu-Kristo. Misulat si Pablo mahitungod sa mga dinihogan: “Siya nga gitawag sa dihang tawong gawasnon maoy usa ka ulipon ni Kristo. Kamo gipalit sa usa ka bili.” (1 Corinto 7:22, 23; Efeso 6:6) Busa, kon kita maunongong magpasakop sa pagtultol sa matinumanong ulipon ug sa Nagamandong Lawas niini, kita nagpasakop kang Kristo, ang Agalon sa ulipon. Ang atong pagpakitag angayan nga pagtahod sa pundok nga gigamit ni Kristo sa pagdumala sa iyang yutan-ong mga kabtangan maoy usa ka paagi diin kita ‘nagaila sa dayag nga si Jesu-Kristo maoy Ginoo alang sa kahimayaan sa Diyos nga Amahan.’—Filipos 2:11.

¹³ Ang laing Kasulatanhong rason kon nganong kita magpakitag pagtahod sa matinumanong ulipon mao nga ang dinihogang mga Kristohanon sa yuta mahulagwayong gihubit ingong “templo” nga gipuy-an ni Jehova “pinaagi sa espiritu.” Tungod niana, sila maoy “balaan.” (1 Corinto 3:16, 17; Efeso 2:19-22) Gipiyal ni Jesus ang iyang yutan-ong mga kabtangan ngadto niining balaan nga templong matang, nga nagpasabot nga ang pipila ka katungod ug mga responsibilidad sulod sa Kristohanong kongregasyon iya lamang niining pundoka sa ulipon. Tungod niini, ang tanan diha sa kongregasyon nag-isip nga ilang sagradong katungdanan ang pagsunod ug pagpaluyo sa pagtultol sa matinumanong ulipon ug sa Nagamandong Lawas niini. Sa pagkatinuod, ang “ubang mga karnero” nag-isip nga usa ka dakong pribilehiyo ang pagtabang sa ulipon nga matang sa pag-atiman sa mga intereses sa Agalon.—Juan 10:16.

Maunongong Pagpaluyo

14. Ingon sa gitagna ni Isaias, sa unsang paagi ang ubang mga karnero anaa sa luyo sa dinihogang ulipon nga matang ug nag-alagad ingong “dili-binayrang mga mamumuo”?

¹⁴ Ang mapainubsanong pagpasakop sa ubang mga karnero ngadto sa dinihogang mga membro sa espirituwal nga Israel gitagna ni Isaias: “Mao kini ang giingon ni Jehova: ‘Ang dili-binayrang mga mamumuo sa Ehipto ug ang mga magpapatigayon sa Etiopia ug ang mga Sabeanhon, nga tag-as nga mga tawo, sila manganha gayod kanimo, ug sila mahimong imoha. Sa imong luyo manglakaw sila; manganha sila nga tinalikalaan, ug kanimo sila moyukbo. Kanimo sila moampo, nga mag-ingon, “Sa pagkatinuod ang Diyos nahiusa kanimo, ug wala nay lain; wala nay laing Diyos.”’” (Isaias 45:14) Sa mahulagwayong paagi, ang ubang mga karnero karon anaa sa luyo sa dinihogang ulipon nga matang ug sa Nagamandong Lawas niini, nga nagsunod sa ilang pagpanguna. Ingong “dili-binayrang  mga mamumuo,” ang ubang mga karnero kinabubut-ong naggamit sa ilang kusog ug mga kahinguhaan sa pagpaluyo sa tibuok-kalibotang buluhaton nga pagsangyaw nga gisugo ni Kristo sa iyang dinihogang mga sumusunod sa yuta.—Buhat 1:8; Pinadayag 12:17.

15. Sa unsang paagi ang Isaias 61:5, 6 nagtagna bahin sa relasyon sa ubang mga karnero ug sa espirituwal nga Israel?

¹⁵ Ang ubang mga karnero malipayon ug mapasalamatong nag-alagad kang Jehova ubos sa pagdumala sa ulipon nga matang ug sa Nagamandong Lawas niini. Ilang giila ang mga dinihogan ingong mga membro sa “Israel sa Diyos.” (Galacia 6:16) Ingong mahulagwayong “mga estranyo” ug mga “langyaw” nga nakig-uban sa espirituwal nga Israel, sila malipayong nag-alagad ingong “mga mag-uuma” ug “mga tig-atiman sa parasan” ubos sa pagtultol sa mga dinihogan, ang “mga saserdote ni Jehova” ug ‘mga alagad sa Diyos.’ (Isaias 61:5, 6) Sila masibotong nakigbahin sa pagsangyaw niining maayong balita sa Gingharian ug sa paghimog mga tinun-an sa katawhan sa tanang kanasoran. Sila naghatag ug tibuok-kasingkasing nga tabang ngadto sa ulipon nga matang diha sa pagbantay ug pag-atiman sa bag-ong nakaplagan nga mga karnerohon.

16. Unsay nagpalihok sa ubang mga karnero sa pagpakitag maunongong pagpaluyo sa matinumanon ug maalamong ulipon?

¹⁶ Giila sa ubang mga karnero nga sila nakabenepisyog dako gumikan sa makugihong mga paningkamot sa matinumanong ulipon sa pagtagana kanila ug tukma-sa-panahong espirituwal nga pagkaon. Mapainubsanon nilang giila nga kon wala pa ang matinumanon ug maalamong ulipon, diyutay ra o wala gayod unta silay mahibaloan bahin sa bililhong mga kamatuoran sa Bibliya, sama sa pagkasoberano ni Jehova, pagbalaan sa iyang ngalan, Gingharian, bag-ong mga langit ug bag-ong yuta, kalag, kahimtang sa mga patay, kon kinsa gayod si Jehova ug ang iyang Anak, ug kon unsa ang balaang espiritu. Tungod sa dulot nga pagkamapasalamaton ug pagkamaunongon, ang ubang mga karnero mahigugmaong nagpaluyo sa dinihogang “mga igsoon” ni Kristo dinhi sa yuta niining panahon sa kataposan.—Mateo 25:40.

17. Unsay giisip sa Nagamandong Lawas nga kinahanglang buhaton, ug unsay hisgotan sa sunod nga artikulo?

¹⁷ Tungod kay nagkadiyutay na sila, imposible nga sa matag kongregasyon adunay dinihogan nga magdumala sa mga kabtangan ni Kristo. Busa, ang Nagamandong Lawas nagtudlo ug mga lalaki gikan sa ubang mga karnero aron magdumala sa mga sangang buhatan, distrito, sirkito, ug mga kongregasyon sa mga Saksi ni Jehova. Ang ato bang tinamdan niining luyoluyong mga magbalantay adunay kalabotan sa atong pagkamaunongon kang Kristo ug sa iyang matinumanong ulipon? Hisgotan kini sa sunod nga artikulo.

[Mga footnote]

Agig Pagsubli

• Kinsa ang atong Pangulo, ug unsay nagpakita nga nahibalo siya sa mga kahimtang sulod sa mga kongregasyon?

• Sa pagsusi sa “templo,” kinsay nakaplagan nga naglihok ingong matinumanong ulipon, ug unsang mga kabtangan ang gipiyal kanila?

• Unsay Kasulatanhong mga rason kon nganong kita maunongong magpaluyo sa matinumanong ulipon?

[Mga Pangutana sa Pagtuon]

[Mga hulagway sa panid 23]

Ang “mga kabtangan” nga gidumala sa “piniyalan” naglakip sa materyal nga mga kabtangan, espirituwal nga mga programa, ug sa buluhatong pagsangyaw

[Hulagway sa panid 25]

Ang mga membro sa ubang mga karnero nagpaluyo sa matinumanong ulipon nga matang pinaagi sa ilang masibotong pagsangyaw