Ang Pangandoy ni Adryana

SI Adryana, usa ka sayis-anyos nga batang babaye nga taga-Tulsa, Oklahoma, U.S.A., nangandoy ug susama nianang gipangandoy ni salmistang David, nga gipahayag niya pinaagig awit: “Usa ka butang ang gipangayo ko kang Jehova—kini ang akong pagapangitaon, nga makapuyo ako sa balay ni Jehova sa tanang adlaw sa akong kinabuhi, aron sa pagtan-aw sa pagkakahimut-anan ni Jehova ug sa pagtan-aw nga mapabilhon sa iyang templo.”—Salmo 27:4.

Sa unom pa lang ka bulan ang edad ni Adryana, siya nadayagnos nga dunay neuroblastoma, usa ka kanseron nga tumor nga motubo diha sa sistema sa nerbiyos. Tungod niining makamatayng sakit, naparalisar ang iyang duha ka bitiis. Makadaghan siya nga gioperahan sa mga doktor ug tibuok tuig siya nga gi-chemotherapy.

Ang amahan ni Adryana, nga dili samag tinuohan ni Adryana ug sa iyang inahan, miduol sa usa ka organisasyon aron mohangyo nga makaadto ang iyang anak sa usa ka ilado kaayong parke nga lulinghayawan. Sa wala pa ihatag ang hangyo, si Adryana giinterbiyo una sa maong organisasyon. Nagpasalamat siya nga misugot sila sa hangyo apan iyang giingnan sila nga mas gusto siyang moadto sa Bethel, ang sentro sa tibuok-kalibotang kalihokan sa mga Saksi ni Jehova sa New York. Sa dihang nahibaloan niya ang hangyo sa iyang amahan, si Adryana miampo kang Jehova nga makahigayon unta siya sa pag-adto sa Bethel. Bisan tuod ang organisasyon nabalaka sa sinugdanan nga basin ug dili makalingaw sa bata ang pag-adto sa Bethel, gituman sa maong organisasyon ang pangandoy ni Adryana sa dihang wala mosupak niini ang iyang amahan.

Uban sa iyang inahan, igsoong babaye, ug sa usa ka higala, si Adryana miadto sa unang higayon sa Bethel sa New York. “Gitubag ni Jehova ang akong pag-ampo,” miingon si Adryana. “Nahibalo ako nga abiabihon gayod kami sa Bethel. Akong nakita kon giunsa paggama ang mga libro, magasin, ug mga Bibliya. Mas nindot ang Bethel kay sa parkeng lulinghayawan.”

Nakita gayod ni Adryana ang “pagkakahimut-anan ni Jehova” ug nagpabili gayod siya sa buluhaton diha sa sentro sa mga kalihokan sa katawhan ni Jehova karon. Ikaw usab gidapit sa pagbisita sa Bethel. Gawas sa tibuok-kalibotang hedkuwarter sa mga Saksi ni Jehova sa New York, adunay mga sangang buhatan usab diha sa nagkalainlaing mga bahin sa kalibotan.