Baldado—Apan Maikagon sa Pagtabang

KON imong mahimamat si Leonardo sa unang higayon, makaingon ka gayod nga dili siya mahimong motabang sa pagtukod ug bilding. Napungkol ang iyang duha ka kamot kaniadto tungod sa usa ka aksidente sa trabahoan. Apan, bisan pag baldado siya, si Leonardo kugihan kaayong nagtabang sa pagtukod ug bilding sa Acajutla, El Salvador, nga imong makita sa hulagway.

Aron makaapil sa proyekto sa pagtukod, si Leonardo naghimog iyang kaugalingong mga himan. Iyang isuksok ang iyang tuong braso diha sa galunggalong nga gitaod sa gunitanan sa pala ug eksperto kaayo siyang mopala ug yuta ngadto sa kariton. Ang gunitanan sa kariton iyang gitaoran ug mga galunggalong aron iya kining matulod. Nganong gusto man siyang moapil niining proyektoha?

Si Leonardo gustong motabang sa pagtukod ug Kingdom Hall, o dapit sa pagsimba sa kongregasyon sa mga Saksi ni Jehova. Daghan siya ug ikapangatarongan aron dili siya makatabang sa pagtukod. Siya dunay bug-os-panahong sekular nga trabaho, baldado, ug nag-alagad pa ingong ministeryal nga alagad diha sa iyang kongregasyon. Apan nagtinguha siya sa pagbuhat kutob sa iyang maarangan sa pag-alagad sa Diyos pinaagi sa pagtabang usab sa pagtukod ug Kingdom Hall.

Sama ba usab niana ang imong espiritu sa pag-alagad sa Diyos? Imbes himoong pasangil ang iyang pagkabaldado, gigamit ni Leonardo ang iyang katakos sa paghunahuna sa paggama ug iyang kaugalingong mga himan aron iyang mahimo ang malisod unta nga trabaho. Siya nag-alagad sa Diyos ‘sa tibuok niyang kaisipan.’ (Mateo 22:37) Baldado o dili, ang mga tawong nakigbahin sa pagtukod ug mga Kingdom Hall sa mga Saksi ni Jehova sa tibuok kalibotan adunay espiritu sa pagboluntaryo. Ang ilang mga tigom bukas alang sa tanan, ug ikaw gidapit sa pagtambong.