Mga Pangutana Gikan sa mga Magbabasa

Angay bang likayan sa usa ka Kristohanon ang mga ilimnon ug pagkaon nga dunay caffeine?

Ang Bibliya wala magdili sa pag-inom ug kape, tsa, tsokolate, maté, ug soft drink nga dunay caffeine. Apan adunay mga prinsipyo diha sa Kasulatan nga makatabang kanato sa paghimog maalamong mga desisyon. Ato unang hisgotan kon nganong ang pipila ka tawo naglikay sa mga ilimnon ug pagkaon nga dunay caffeine.

Ang usa sa pangunang hinungdan mao nga mahimong isipon ang caffeine nga usa ka substansiya nga makausab sa buot ug makapalagsik sa hunahuna. Makagiyan usab kini. Ang usa ka reperensiyang basahon alang sa mga parmasista nag-ingon: “Kon daghan kaayong caffeine ang mainom o makaon sulod sa taas nga yugto sa panahon, kini mahimong moresulta sa pagkaanad sa lawas o pagkagiyan. Kon kini kalit nga undangon, makasinati ang usa sa gitawag nga withdrawal syndrome, diin mobati ang usa ug paglabad sa ulo, pagkasuk-anon, pagkanerbiyoson, pagkadili-mahimutang, ug pagkalipong.” Ang caffeine-withdrawal syndrome gikonsiderar nga ilakip paglista diha sa Diagnostic and Statistical Manual of Mental Disorders nga apil sa ginatawag nga drug withdrawal syndrome, o epekto sa pag-undang sa paggamit ug droga. Busa, hisabtan nga ang pipila ka Kristohanon mahimong mobati nga dili maayong mokaon ug mga pagkaon o kaha moinom ug mga ilimnon nga dunay caffeine kay dili nila gustong magiyan niini ug buot nilang magpakitag pagpugong sa kaugalingon.—Galacia 5:23.

Ang pipila nagtuo nga ang caffeine makaapektar sa panglawas sa usa ka tawo o nianang sa gisabak nga bata. Kinahanglang higugmaon sa mga Kristohanon ang Diyos ‘sa tibuok nilang kalag,’ busa dili sila mohimog bisan unsang butang nga makapamubo sa ilang kinabuhi. Ug kay sila gisugo man usab sa paghigugma sa ilang silingan, sila maglikay sa mga butang nga lagmit makadaot sa gisabak nga bata.—Lucas 10:25-27.

Makataronganon ba ang maong mga kabalaka bahin sa panglawas? Bisag dunay mga pangangkon nga ang caffeine makahatag ug daghang sakit, dili mouyon niana ang tanan. Ang pipila ka tigdukiduki nag-ingon pa gani nga makaayo kono sa lawas ang kape. Sa 2006, ang magasing Time nagtaho: “Ang mga pagtuon kaniadto nagpakita [nga ang caffeine] mahimo konong moresulta sa kanser sa pantog, taas nga presyon sa dugo ug uban pang mga sakit. Ang mga panukiduki ning bag-o pa wala lamang magpanghimakak sa maong mga pangangkon kondili nagpakita usab nga makahatag ug pipila ka kaayohan ang caffeine. Ang caffeine daw makasanta sa pagkadaot sa atay, sakit nga Parkinson, diabetes, sakit nga Alzheimer, bato sa apdo, depresyon ug bisan pa gani tingali sa pipila ka matang sa kanser.” Kon bahin sa paggamit ug caffeine, ang usa ka magasin nagtaho: “Masabot nga ang yawi mao ang pagkamakasaranganon.”

Ang matag Kristohanon angayng mohimog personal nga desisyon pinasukad sa iyang pagsabot sa mga impormasyon nga mabatonan karon bahin sa caffeine ug sa mga prinsipyo sa Bibliya nga morag dunay kalangkitan niana. Pananglitan, ang usa ka mabdos nga Kristohanon molikay tingali sa mga ilimnon o pagkaon nga dunay caffeine samtang nagsabak siya kon sa iyang hunahuna makaapekto kini sa bata nga iyang gisabak. Kon maamgohan sa usa ka Kristohanon nga mahimo siyang suk-anon o kaha maglain ang iyang lawas kon dili siya makainom ug ilimnon o makakaon ug pagkaon nga dunay caffeine, tingali tambagan siya nga molikay usa sa caffeine, bisag temporaryo lang. (2 Pedro 1:5, 6) Angayng tahoron sa ubang mga Kristohanon ang maong desisyon, nga dili ipugos ang ilang hunahuna.

Bisan unsa pay imong desisyon bahin sa mga ilimnon ug pagkaon nga dunay caffeine, hinumdomi ang tambag ni Pablo: “Kon kamo magakaon o magainom o magabuhat sa bisan unsa, himoa ang tanang butang alang sa kahimayaan sa Diyos.”—1 Corinto 10:31.