Nahinumdom Ka Ba?

Gipabilhan mo ba ang pagbasa sa bag-ong mga gula sa Ang Bantayanang Torre? Sulayi kon makatubag ka ba sa mosunod nga mga pangutana:

• Unsay atong makat-onan gikan sa ilustrasyon ni Jesus bahin sa porsigidong tig-abiabi? (Lucas 11:5-10)

Kining maong ilustrasyon nagpakita kon unsay angay natong tinamdan sa dihang kita mag-ampo. Kita kinahanglan nga porsigidong mohangyo, o magpadayon sa pagpangayo, ilabina alang sa balaang espiritu sa Diyos. (Lucas 11:11-13)—12/15, panid 20-2.

• Unsang leksiyon ang atong makat-onan gikan sa ilustrasyon ni Jesus bahin sa babayeng balo ug sa maghuhukom? (Lucas 18:1-8)

Kini nagpasiugda sa panginahanglan sa pag-ampo. Si Jehova matarong ug buot nga motabang kanato, dili sama sa maghuhukom. Dugang pa, kita kinahanglan nga dunay pagtuo sama nianang sa babayeng balo sa ilustrasyon.—12/15, panid 26-8.

• Nganong gisultihan ni apostol Pablo ang mga Kristohanon sa Corinto nga “magpasangkad?” (2 Corinto 6:11-13)

Daw ang uban diha sa Corinto wala kaayoy pagpabili sa ilang mga isigkamagtutuo, kay sila mapihigon man ug dili mahigugmaon. Kinahanglang maningkamot kita sa pag-ugmad ug kinasingkasing nga pagpabili sa atong mga isigkamagtutuo, nga maningkamot pa sa pagbaton ug bag-ong mga higala.—1/1, panid 9-11.

• Unsang pagtimbre ang gihisgotan sa Pinadayag 7:3?

Sa dihang ang Diyos magdihog sa mga Kristohanon ug balaang espiritu, sila matimbrehan sa unang higayon. Apan ang Pinadayag 7:3 nagtumong sa kataposang pagtimbre, sa dihang bug-os na nga mapamatud-an sa maong mga dinihogan ang ilang pagkamaunongon.—1/1, panid 30-1.

• Unsay makat-onan sa mga ginikanan gikan sa asoy sa Bibliya bahin kang Samuel?

Una, kinahanglang ilang tudloan ang ilang mga anak bahin sa pulong sa Diyos, nga mao gayoy gitudlo sa mga ginikanan ni Samuel kaniya. Dugang pa, kinahanglang ilang dasigon ang ilang mga anak sa paghimo sa pag-alagad kang Jehova ingong ilang karera sa kinabuhi.—1/15, panid 16.

• Sa unsang paagi atong ikapakita nga kita malipayon nga naghulat kang Jehova?

Kita “nagapaabot . . . sa adlaw ni Jehova,” nga naglaom ug kahupayan sa dihang laglagon na niya ang tanang tawo nga dili-diyosnon. (2 Pedro 3:7, 12) Apan, bisan tuod ug maikagon si Jehova sa pagtapos sa tanang daotan, siya nagpugong sa iyang kaugalingon aron maluwas ang mga Kristohanon sa paagi nga mahimaya ang iyang ngalan. Kita kinahanglang mosalig nga si Jehova nahibalo kon kanus-a ang hustong panahon sa paglihok, ug sa kasamtangan, kita angayng magmaaktibo sa pagdayeg kaniya. (Salmo 71:14, 15)—3/1, panid 17-18.

• Pila ka buok sa matag hinlong mananap ang gidala ni Noe sa arka, pito ka buok o pito ka paris?

Si Noe gisugo sa ‘pagdala ug tinagpito’ sa matag hinlo nga mananap. (Genesis 7:1, 2) Sa Hebreohanong pinulongan, ang ekspresyong “tinagpito” sa literal nagkahulogan ug “pito pito.” Kini wala magpasabot ug pito ka paris, sama sa gipakita sa ubang mga teksto sa Bibliya. Si Noe dayag nga nagdala ug pito ka buok sa matag hinlong mananap, tulo ka paris ug ang ikapito nga maoy iyang gihalad sa ulahi. (Genesis 8:20)—3/15, panid 31.

• Nganong angayng ‘palandongon’ sa mga Kristohanon ang resulta sa pagtuo sa mga ansiyano nga nagapanguna?

Si apostol Pablo nag-awhag kanato sa ‘pagpalandong,’ o paghunahuna pag-ayo, sa sangpotanan sa matinumanong panggawi sa mga ansiyano ug sa pagsundog sa maong mga panig-ingnan sa pagtuo. (Hebreohanon 13:7) Kini atong ginahimo tungod kay ang Pulong sa Diyos nagsugo kanato sa pagbuhat niini. Dugang pa, kombinsido kita nga ang mga ansiyano nagtinguha kon unsay labing maayo maylabot sa mga intereses sa Gingharian ug alang kanato.—4/1, panid 28.