Napalig-on ang Kongregasyon

“Ang kongregasyon . . . nakabaton ug yugto sa kalinaw, nga napalig-on.”—BUHAT 9:31.

1. Unsang mga pangutana ang ikasukna maylabot sa “kongregasyon sa Diyos”?

 SA ADLAW sa Pentekostes 33 K.P., pormal nga gidawat ni Jehova ang usa ka grupo sa mga tinun-an ni Kristo isip bag-ong nasod, ang “Israel sa Diyos.” (Galacia 6:16) Kining dinihogan-sa-espiritung mga Kristohanon nahimo usab nga “ang kongregasyon sa Diyos,” segun sa pagtawag niini sa Bibliya. (1 Corinto 11:22) Apan, unsay nalangkit sa pagkahimong kongregasyon sa Diyos? Sa unsang paagi giorganisar “ang kongregasyon sa Diyos”? Sa unsang paagi kini naglihok sa yuta, bisan kon diin nagpuyo ang mga membro niini? Ug sa unsang paagi apektado ang atong mga kinabuhi ug kalipay?

2, 3. Sa unsang paagi gipaila ni Jesus nga adunay kahikayan ang kongregasyon?

² Sumala sa gipahayag sa nag-unang artikulo, gitagna ni Jesus ang paglungtad niining kongregasyon sa dinihogang mga sumusunod, nga giingnan si apostol Pedro: “Ibabaw niining dakong-bato [Jesu-Kristo] pagatukoron ko ang akong kongregasyon, ug ang mga ganghaan sa Hades dili makabuntog niini.” (Mateo 16:18) Dugang pa, samtang si Jesus kauban pa sa mga apostoles, mihatag siyag mga impormasyon bahin sa kalihokan ug kahikayan sulod sa kongregasyon nga hapit nang matukod niadto.

³ Pinaagi sa pulong ug sa buhat, si Jesus nagtudlog pipila ka sakop sa kongregasyon aron sila ang manguna niana. Ilang himoon kana pinaagi sa pag-alagad sa uban pa sa ilang grupo. Si Kristo miingon: “Kamo nahibalo nga kadtong mopatim-aw nga nagamando sa mga nasod mahariharion ibabaw kanila ug ang ilang mga kadagkoan naggamit sa awtoridad ibabaw kanila. Dili kini ang paagi sa inyong taliwala; kondili si bisan kinsa nga buot mahimong dako sa inyong taliwala kinahanglang mahimong inyong alagad, ug si bisan kinsa nga buot mahimong una sa inyong taliwala kinahanglang mahimong ulipon sa tanan.” (Marcos 10:42-44) Tin-aw, “ang kongregasyon sa Diyos” maoy dili lang nagkatibulaag, nagkabulagbulag nga mga tawo, nga susamag way-kahikayang kongregasyon. Hinunoa, adunay kahikayan, diin ang mga indibiduwal sa kongregasyon nagkauban pagbuhat ug may komunikasyon sa usag usa.

4, 5. Sa unsang paagi nahibalo kita nga ang kongregasyon kinahanglang tudloan bahin sa Bibliya?

⁴ Ang Usa nga nahimong Ulo sa maong “kongregasyon sa Diyos” nagpaila nga ang iyang mga apostoles ug ang uban nga nakakat-on gikan kaniya makabaton ug espesipikong mga responsabilidad maylabot sa ubang mga sakop sa kongregasyon. Aron buhaton ang unsa? Ang pangunang buluhaton mao ang pagtudlo sa mga sakop sa kongregasyon. Hinumdomi nga ang nabanhawng Jesus, atubangan sa pipila ka apostoles, miingon kang Pedro: “Simon anak ni Juan, gihigugma mo ba ako?” Si Pedro mitubag: “Oo, Ginoo, nahibalo ka nga gimahal ko ikaw.” Si Jesus miingon kaniya: “Pakan-a ang akong mga nating karnero. . . . Bantayi ang akong gagmayng mga karnero. . . . Pakan-a ang akong gagmayng mga karnero.” (Juan 21:15-17) Pagkaseryoso nga buluhaton!

⁵ Atong masabtan gikan sa mga pulong ni Jesus nga kadtong gitigom nga nahimong kongregasyon gipanig-ingon sa mga karnero sa usa ka toril. Ang maong mga karnero—ang Kristohanong mga lalaki, mga babaye, ug mga bata—kinahanglang tudloan bahin sa Bibliya ug bantayan sa tukmang paagi. Dugang pa, sanglit si Jesus nagsugo sa iyang tanang sumusunod sa pagtudlo sa uban ug sa paghimog mga tinun-an, ang mga  bag-ohan kinahanglang bansayon kon unsaon pagtuman ang maong sugo sa Diyos.—Mateo 28:19, 20.

6. Unsang mga kahikayan ang gihimo diha sa bag-ong naporma nga “kongregasyon sa Diyos”?

⁶ Sa dihang naporma “ang kongregasyon sa Diyos,” ang mga membro niini nagtigom nga regular alang sa instruksiyon ug pagdinasigay: “Sila nagpadayon sa pagdeboto sa ilang kaugalingon sa ginatudlo sa mga apostoles ug sa pagpakig-ambitay sa usag usa, sa mga pagpangaon ug sa mga pag-ampo.” (Buhat 2:42, 46, 47) Ang laing talagsaong detalye sa talaan sa kasaysayan mao nga ang pipila ka may-katakos nga mga lalaki gitudlo aron makatabang pag-atiman sa ubang mga buluhaton. Sila gitudlo dili tungod sa daghang katuigan sa pag-eskuyla o sa teknikal nga mga kahanas. Sila maoy mga lalaki nga “puno sa espiritu ug kaalam.” Usa kanila mao si Esteban, ug ang asoy nagpasiugda nga siya “usa ka tawong puno sa pagtuo ug sa balaang espiritu.” Ang usa ka resulta sa kahikayan sa kongregasyon mao nga “ang pulong sa Diyos padayong mikaylap, ug ang mga tinun-an sa Jerusalem padayong nagkadaghan sa hilabihan gayod.”—Buhat 6:1-7.

Mga Lalaki nga Gigamit sa Diyos

7, 8. (a) Nag-alagad sa unsang katungdanan ang mga apostoles ug mga ansiyano sa Jerusalem taliwala sa unang mga Kristohanon? (b) Unsay misangpot sa dihang gihatag ang instruksiyon pinaagi sa mga kongregasyon?

⁷ Hisabtan nga ang mga apostoles maoy nanguna sa kahikayan sa unang kongregasyon, apan may mga kauban pa sila. Sa usa ka higayon, si Pablo ug ang iyang mga kauban namalik sa Antioquia sa Sirya. Ang Buhat 14:27 nag-asoy: “Sa dihang sila nakaabot na ug natigom na ang kongregasyon, ilang gisugdag asoy ang daghang butang nga gibuhat sa Diyos pinaagi kanila.” Samtang nakig-uban pa sila sa maong kongregasyon, mitungha ang isyu kon kinahanglan bang matuli ang Hentil nga mga magtutuo. Aron mahusay ang suliran, si Pablo ug si Bernabe gipadala “ngadto sa mga apostoles ug sa mga ansiyano sa Jerusalem,” kinsa tin-awng nag-alagad ingon nga nagamandong lawas.—Buhat 15:1-3.

⁸ Ang Kristohanong ansiyano nga si Santiago, ang igsoon ni Jesus sa inahan apan dili usa ka apostoles, maoy nagdumala sa dihang “ang mga apostoles ug ang mga ansiyano nagtigom aron susihon kining butanga.” (Buhat 15:6) Human sa panaghisgot ug sa tabang sa balaang espiritu, ilang  nakab-ot ang konklusyon nga nahiuyon sa Kasulatan. Sila nagpadalag sulat bahin niini ngadto sa lokal nga mga kongregasyon. (Buhat 15:22-32) Kadtong nakadawat sa maong impormasyon nagtuo ug nagpadapat niini. Unsay resulta? Ang kaigsoonan napalig-on ug nadasig. Ang Bibliya nagtaho: “Busa, sa pagkatinuod, ang mga kongregasyon padayong nalig-on diha sa pagtuo ug miuswag sa gidaghanon adlaw-adlaw.”—Buhat 16:5.

9. Unsang mga katungdanan ang gilatid sa Bibliya alang sa may-katakos nga Kristohanong mga lalaki?

⁹ Apan sa unsang paagi naglihok ang lokal nga mga kongregasyon sa adlaw-adlaw? Tagda, pananglitan, ang mga kongregasyon sa isla sa Creta. Bisan pag daotag dungog ang daghang tawo nga nagpuyo didto, ang pipila nagbag-o ug nahimong matuod nga mga Kristohanon. (Tito 1:10-12; 2:2, 3) Ang mga Kristohanon didto nagpuyo sa lainlaing mga siyudad, ug ang tanan layo gikan sa nagamandong lawas sa Jerusalem. Apan, dili kadto dakong suliran tungod kay ang mga may kasinatian na aron mag-alagad ingong “mga ansiyano” gitudlo sa matag usa sa lokal nga mga kongregasyon sa Creta, sama ra sa ubang dapit. Nakakab-ot ang maong mga lalaki sa mga kuwalipikasyon nga nahitala diha sa Bibliya. Sila gitudlo ingong mga ansiyano o mga magtatan-aw, kinsa “makatambag pinaagi sa makapahimsog nga pagtulon-an ug sa pagbadlong niadtong mosumpaki.” (Tito 1:5-9; 1 Timoteo 3:1-7) Ang ubang may-katakos nga mga lalaki nagtabang sa mga kongregasyon ingong ministeryal nga mga alagad o mga diakono.—1 Timoteo 3:8-10, 12, 13.

10. Sumala sa Mateo 18:15-17, sa unsang paagi pagahusayon ang seryosong mga suliran?

¹⁰ Gipadayag ni Jesus nga maglungtad ang maong kahikayan. Hinumdomi ang asoy sa Mateo 18:15-17, diin iyang gipahayag nga mahimong motungha usahay ang panagbingkil tali sa duha ka alagad sa Diyos, nga ang usa makasala batok sa lain. Ang igsoong nasilo mao ang moadto sa nakasala ug “ipadayag ang iyang sayop” sa pribadong paagi, tali kanila lamang. Kon ang maong tikang dili makahusay sa panagbingkil, ang usa o duha pa ka igsoon nga nasayod sa mga panghitabo basin hangyoon sa pagtabang. Komosta man kon ang suliran dili gihapon mahusay? Si Jesus miingon: “Kon dili siya mamati kanila, sultihi ang kongregasyon. Kon dili siya mamati bisan sa kongregasyon, isipa siya nga sama sa tawo sa mga nasod ug ingon nga usa ka maniningil ug buhis.” Sa dihang gisulti kana ni Jesus, “ang kongregasyon sa Diyos” gilangkoban pa sa mga Hudiyo busa ang iyang mga pulong unang gipadapat kanila. a Ugaling lang, sa dihang natukod na ang Kristohanong kongregasyon, ang sugo ni Jesus ikapadapat niana. Kini maoy laing ebidensiya nga ang katawhan sa Diyos makabaton ug kahikayan sa kongregasyon sa pagpalig-on ug paggiya sa matag Kristohanon.

11. Unsa ang papel sa mga ansiyano diha sa paghusay sa mga suliran?

¹¹ Haom gayod, ang mga ansiyano o mga magtatan-aw, maoy maghawas sa lokal nga kongregasyon sa paghusay sa mga suliran o sa pag-atiman sa mga kaso sa daotang buhat. Nahiuyon kana sa mga kuwalipikasyon sa mga ansiyano nga gihisgotan sa Tito 1:9. Tinuod, ang lokal nga mga ansiyano maoy dili-hingpit nga mga tawo, sama kang Tito, nga gipadala ni Pablo ngadto sa mga kongregasyon aron “magtul-id sa mga butang nga depektoso.” (Tito 1:4, 5) Karong mga adlawa, ang mga lalaki nga itudlo ingong mga ansiyano kinahanglan nga nakapamatuod na sa ilang pagtuo ug debosyon sa taastaas nga panahon. Busa ang ubang membro sa kongregasyon adunay katarongan nga mosalig sa pagdumala ug sa pagpanguna nga gihatag pinaagi sa maong kahikayan.

12. Unsa ang responsabilidad sa mga ansiyano maylabot sa kongregasyon?

¹² Sa mga ansiyano sa kongregasyon sa Efeso, si Pablo miingon: “Tagda ang inyong kaugalingon ug ang tibuok panon, nga niana kamo gitudlo sa balaang espiritu nga mga magtatan-aw, aron magbantay sa kongregasyon sa Diyos, nga iyang gipalit pinaagi sa dugo sa iyang kaugalingong Anak.” (Buhat 20:28) Tinuod usab nga ang mga magtatan-aw sa kongregasyon gitudlo karon aron ‘sa pagbantay sa kongregasyon sa Diyos.’ Angay nilang himoon kana sa mahigugmaong paagi, nga  dili magharihari sa panon. (1 Pedro 5:2, 3) Ang mga magtatan-aw angayng maningkamot sa pagpalig-on ug sa pagtabang sa “tibuok panon.”

Pagpakigsuod sa Kongregasyon

13. Unsay mahimong mahitabo usahay sa usa ka kongregasyon, ug ngano?

¹³ Ang mga ansiyano ug uban pa diha sa kongregasyon maoy dili hingpit, busa matag karon ug unya mahitabo ang mga di-pagsinabtanay o mga suliran sama ra sa unang siglo sa dihang ang pipila ka apostoles kauban pa nila. (Filipos 4:2, 3) Ang usa ka magtatan-aw o ang laing tawo mahimong may masulti nga daw binagis, makapasilo, o dili bug-os nga tinuod. O mahimong naghunahuna kita nga nagkahitabo ang usa ka di-kasulatanhong butang, apan wala kana tul-ira sa lokal nga mga ansiyano bisan pag sila nahibalo niana. Hinuon, mahimong ang isyu gitagad na o ginatagad pa sa Kasulatanhong paagi ug pinasukad sa tinuod nga mga panghitabo nga wala nato mahibaloi. Apan bisan pag ang usa ka di-kasulatanhong buhat tinuod nga nahitabo, tagda kini: May nahitabo nga usa ka seryosong sala sa taastaas nga panahon sa kongregasyon sa Corinto, nga usa ka kongregasyon nga gitagad ni Jehova. Sa kadugayan gipahusay niya ang daotang buhat, sa tukma ug ugdang nga paagi. (1 Corinto 5:1, 5, 9-11) Kita makasukna sa kaugalingon, ‘Kon ako buhi pa niadto sa Corinto, unsa kahay akong reaksiyon?’

14, 15. Nganong mihunong ang pipila sa pagsunod kang Jesus, ug unsang pagtulon-an ang gihatag niana kanato?

¹⁴ Tagda ang laing posibleng mahitabo diha sa kongregasyon. Pananglitan, usa ka igsoon dili makasabot ug makadawat sa usa ka Kasulatanhong pagtulon-an. Mahimong siya nagdukiduki na sa Bibliya ug sa mga publikasyon nga anaa sa kongregasyon ug nangayo nag tabang sa hamtong nga mga isigka-Kristohanon, sa mga ansiyano pa gani. Sa gihapon, siya dili makasabot o makadawat sa maong punto. Unsay iyang mahimo? Nahitabo ang susamang butang mga usa ka tuig sa wala pa mamatay si Jesus. Siya miingon nga siya mao “ang tinapay sa kinabuhi” ug aron mabuhi hangtod sa kahangtoran, ang usa ka tawo kinahanglang “mokaon sa unod sa Anak sa tawo ug moinom sa iyang dugo.” Kadto nakapakugang pag-ayo sa pipila niya ka tinun-an. Imbes mangitag katin-awan o mapailobong maghulat kang Jehova, ang daghang tinun-an “wala na molakaw kauban [kang Jesus].” (Juan 6:35, 41-66) Sa makausa pa, kon kita buhi pa niadto, unsa kahay atong himoon?

¹⁵ Sa atong panahon karon, ang pipila mihunong sa pagpakig-uban sa lokal nga kongregasyon, kay mibati nga sila kinaugalingong mag-alagad  sa Diyos. Mahimong sila nag-ingon nga nasilo sila, naghunahuna nga ang usa ka daotang buhat wala tul-ira, o dili sila makadawat sa usa ka pagtulon-an. Makataronganon ba ang ilang gibuhat? Bisag tinuod nga ang matag Kristohanon angayng magbaton ug personal nga relasyon sa Diyos, dili nato ikalimod nga siya nagagamit sa tibuok-kalibotan nga kongregasyon, sama sa adlaw sa mga apostoles. Dugang pa, si Jehova naggamit ug nagpanalangin sa lokal nga mga kongregasyon sa unang siglo, nga ang mga ansiyano ug ministeryal nga mga alagad nakatabang sa mga kongregasyon. Kana tinuod usab karon.

16. Kon matental sa pagbiya sa kongregasyon, unsay angayng hunahunaon sa usa ka tawo?

¹⁶ Kon mobati ang usa ka Kristohanon nga siya dili angayng makig-uban sa kongregasyon kay siya adunay personal nga relasyon sa Diyos, iyang ginasalikway ang kahikayan nga gitukod sa Diyos—ang tibuok-kalibotan nga kongregasyon ug ang lokal nga mga kongregasyon sa katawhan sa Diyos. Ang usa ka tawo mahimong magkinaugalingon sa pagsimba sa Diyos o makig-uban lang sa pipila ka igsoon, apan asa man ang kahikayan sa mga ansiyano sa kongregasyon ug sa gitaganang ministeryal nga mga alagad? Makahuloganon nga sa dihang si Pablo misulat ngadto sa kongregasyon sa Colosas ug nagsugo nga ang sulat basahon usab sa Laodicea, siya naghisgot bahin sa pagkahimong “gipagamot ug ginatukod diha [kang Kristo].” Ang mga sakop sa mga kongregasyon, dili ang mga tawo nga mibiya sa kongregasyon, ang makapahimulos niana.—Colosas 2:6, 7; 4:16.

Haligi ug Tukod sa Kamatuoran

17. Unsay gitudlo kanato sa 1 Timoteo 3:15 bahin sa kongregasyon?

¹⁷ Sa iyang unang sulat kang Timoteo, si kinsa nag-alagad ingong Kristohanong ansiyano, si apostol Pablo nagpadayag sa mga kuwalipikasyon sa mga ansiyano ug ministeryal nga mga alagad diha sa lokal nga mga kongregasyon. Human gayod niana, si Pablo naghisgot sa “kongregasyon sa buhing Diyos,” nga nag-ingon nga kini maoy “usa ka haligi ug tukod sa kamatuoran.” (1 Timoteo 3:15) Ang tibuok kongregasyon sa dinihogang mga Kristohanon nahimo gayong ingon nga haligi sa unang siglo. Ug segurado nga ang pangunang kahikayan aron ang matag Kristohanon makadawat sa maong kamatuoran maoy pinaagi sa lokal nga kongregasyon. Sila makadungog diha sa kongregasyon sa kamatuoran nga gipahayag ug gipamatud-an ug sila mapalig-on diha niana.

18. Nganong hinungdanon kaayo ang mga tigom sa kongregasyon?

¹⁸ Sa susamang paagi, ang tibuok-kalibotang Kristohanong kongregasyon mao ang panimalay sa Diyos, “usa ka haligi ug tukod sa kamatuoran.” Ang atong regular nga pagtambong ug pagpakigbahin sa mga tigom sa atong lokal nga kongregasyon maoy pangunang paagi aron kita mapalig-on, maingon man ang atong relasyon sa Diyos, ug kita maandam sa pagbuhat sa iyang kabubut-on. Sa pagsulat ngadto sa kongregasyon sa Corinto, gipasiugda ni Pablo kon unsay gipahayag sa maong mga tigom. Siya misulat nga iyang gitinguha nga ang gipahayag sa ilang mga tigom mahimong tin-aw ug masabtan aron kadtong nanambong “mapalig-on.” (1 Corinto 14:12, 17-19) Kita karon mapalig-on kon atong ilhon nga maoy kabubut-on ni Jehova nga Diyos nga ang maong kahikayan himoon alang sa lokal nga mga kongregasyon ug siya nagapaluyo niana.

19. Nganong angay kang magpasalamat sa imong kongregasyon?

¹⁹ Oo, kon nagtinguha kita nga mapalig-on ingong mga Kristohanon, angay kitang magpabilin sulod sa kongregasyon. Dugay nang napamatud-an nga kini maoy usa ka panalipod batok sa bakak nga mga pagtulon-an, ug kini gigamit sa Diyos aron ang maayong balita sa iyang Mesiyanikong Gingharian mapahayag sa tibuok yuta. Sa walay duhaduha, daghag nahimo ang Diyos pinaagi sa Kristohanong kongregasyon.—Efeso 3:9, 10.

[Footnote]

Makahinumdom Ka Ba?

• Nganong angay natong dahomon nga ang Diyos magagamit sa mga kongregasyon sa yuta?

• Bisag dili hingpit, unsay ginabuhat sa mga ansiyano alang sa kongregasyon?

• Sa unsang paagi gipalig-on ka sa lokal nga kongregasyon?

[Mga Pangutana sa Pagtuon]

[Hulagway sa panid 26]

Ang mga apostoles ug mga ansiyano sa Jerusalem nag-alagad ingong nagamandong lawas

[Hulagway sa panid 28]

Ang mga ansiyano ug ministeryal nga mga alagad makadawat ug instruksiyon aron matuman nila ang ilang mga responsabilidad maylabot sa kongregasyon