Sa Dihang ang mga Pagdahom Wala Matuman

MAHIMONG motungha ang pagmahay diha sa kaminyoon ni bisan kinsang tawo, bisan pag daw bagay kaayo sila dihang managtrato pa. Apan sa unsang paagi ang duha ka tawo nga daw nagkasinabtanay pag-ayo sa wala pa molitok sa mga panaad sa kaminyoon nahimong magkalahi kaayo pagkahuman niana?

Ang Bibliya nag-ingon nga kadtong magminyo makaagom sa “kasakit ug kasubo.” (1 Corinto 7:28, The New English Bible) Kasagaran nga ang maong kasakitan maoy resulta sa pagkadili-hingpit sa tawo. (Roma 3:23) Dugang pa, ang usa o silang duha lagmit wala magpadapat sa mga prinsipyo sa Bibliya. (Isaias 48:17, 18) Apan, usahay, ang usa ka lalaki o babaye magminyo nga adunay dili-realistikong mga pagdahom. Kon mahitabo kini, ang mga dili-pagsinabtanay mahimong mosangpot sa seryosong mga suliran.

Dili-Realistikong mga Pagdahom

Kon ikaw usa ka bana o asawa, lagmit nagminyo ka nga may daghang pagdahom; tinuod kana sa kadaghanang tawo. Palandonga kadiyot ang matang sa kinabuhi nga imong gilaoman. Ang kahimtang ba sa imong kaminyoon dili maoy imong gilaoman? Kon mao, ayaw panghinapos nga ang mga suliran dili na masulbad. Ang pagpadapat sa mga prinsipyo sa Bibliya makatabang kanimo sa pagtul-id sa kahimtang. a (2 Timoteo 3:16) Kasamtangan, maayong susihon nimo ang pipila nimo ka pagdahom bahin sa kaminyoon.

Pananglitan, naghunahuna ang pipila nga ang kinabuhing minyo kanunayng romantiko, sama nianang gibatbat sa mga sugilanong may malipayong kataposan. O tingali naghunahuna ka nga ikaw ug ang imong kapikas kanunayng mag-uban o kamong duha makasulbad sa tanang kasungian sa hapsay, hinamtong nga paagi. Daghan ang nagtuo nga sa dihang maminyo, mapatuyangan na nila ang ilang tinguha sa pagpakigsekso. Tungod kay kining tanang kasagarang mga pagdahom dili man realistiko, seguradong mahigawad gayod ang pipila.—Genesis 3:16.

Ang laing dili-realistikong pagdahom mao nga ang pagminyo maghimo sa usa ka tawo nga malipayon. Siyempre, ang pagkaadunay kapikas sa kinabuhi mahimong tinubdan sa dakong kalipay. (Proverbio 18:22; 31:10; Ecclesiastes 4:9) Apan angay bang dahomon nga ang kaminyoon maoy sulbad sa tanang kasungian? Kadtong naghunahuna niana kasagarang makuratan pag-ayo!

Giluom nga mga Pagdahom

Dili buot sabton nga ang tanang pagdahom dili realistiko. Sukwahi niana, ang pipila niini nahiangay man. Ugaling lang, ang pipila ka pagdahom mopatunghag mga suliran. “Nakakita kog mga magtiayon nga nasuko sa usag usa tungod kay ang usa ka kapikas nagpaabot nga ang usa ka tinguha matagbaw, samtang ang laing kapikas wala gayod mahibalo sa maong tinguha,” matod sa usa ka magtatambag sa kaminyoon. Sa pagsabot  kon sa unsang paagi mahimong mahitabo kini, tagda ang mosunod nga kahimtang.

Si Maria naminyo kang David, kinsa nagpuyo ug ginatos ka kilometro gikan sa iyang pinuy-anan. Sa wala pa maminyo, si Maria nakaamgo nga makasinati siyag daghang suliran inigbalhin niya sa usa ka di-sinating lugar—ilabina kay siya maulawon. Bisan pa niana, masaligon siya nga si David motabang kaniya sa pagpasibo. Pananglitan, gidahom ni Maria nga si David anaa kanunay sa iyang kiliran ug motabang kaniya sa paghimamat sa mga higala niini. Ugaling lang, wala kana mahitabo. Puliki kaayo si David sa pagpakig-estorya sa iyang daghang higala—nga si Maria, nga bag-ohan pa, nag-inusara na lang. Gibati ni Maria nga siya gipasagdan ug daw giabandonar pa gani. ‘Naunsa ba nga si David wala man makasabot sa akong gibati?’ siya naghunahuna.

Dili ba realistiko ang pagdahom ni Maria? Dili sa ingon. Buot lang niyang tabangan siya sa iyang bana sa pagpasibo sa iyang bag-ong palibot. Si Maria maulawon, ug nalisdan siya sa pagpakighimamat sa daghan kaayong tawo nga dili niya kaila. Apan, ang tinuod mao nga si Maria wala gayod mosugid sa iyang pagbati ngadto kang David. Busa, si David wala mahibalo kon unsay gibati ni Maria. Unsay mahitabo kon magpadayon ang maong kahimtang? Mag-umido ang kayugot ni Maria, ug sa lakat sa panahon, mahimong maghunahuna siya nga ang iyang bana wala gayoy pagtagad sa iyang mga pagbati.

Lagmit ikaw mibati usab ug kahiubos ug kahigawad sa dihang ang imong kapikas daw wala magtagad sa imong mga panginahanglan. Kon mao kanay kahimtang, unsay imong mahimo?

Mag-estorya Kamo Bahin Niana

Ang mga pagdahom nga wala matuman makapaguol pag-ayo. (Proverbio 13:12) Bisan pa niana, duna kay mahimo. “Ikaw makadani sa uban kon ikaw maalamon ug mosulti uban ang pagkamasinabtanon,” matod sa usa ka sanglitanan sa Bibliya. (Proverbio 16:23, Contemporary  English Version) Busa, kon imong gibati nga duna kay makataronganong pagdahom nga wala matuman, ipakig-estorya kana sa imong kapikas.

Paningkamoti ang pagpilig angayng panahon, angayng kahimtang, ug tukmang mga pulong sa pagpahayag sa imong mga suliran. (Proverbio 25:11) Magmakalmado ug magmatinahoron sa pagpakigsulti. Hinumdomi ang imong tumong—dili ang pag-akusar sa imong kapikas kondili ang pagpahibalo kaniya sa imong mga pagdahom ug mga pagbati.—Proverbio 15:1.

Nganong angay man nimong buhaton kini? Dili ba ang mahunahunaong kapikas mahibalo unta sa imong mga panginahanglan? Aw, mahimong gilantaw lang sa imong kapikas ang maong mga butang gikan sa laing punto-debista apan andam siyang tagdon ang imong mga panginahanglan kon imo kanang ipatin-aw. Wala magpasabot nga dili malamposon ang inyong kaminyoon kon imong ipahayag ang imong gusto o gikinahanglan, ni kana maoy pamatuod nga ang usa ka kapikas dili sensitibo.

Busa ayaw pagpanuko nga isulti sa imong kapikas ang maong mga butang. Pananglitan, sa kahimtang nga gibatbat ganina, si Maria mahimong moingon kang David: “Lisod kaayo nga makighimamat ug daghan kaayong tawo nga dili nako kaila. Mahimo bang imo kong tabangan nga mailaila silang tanan hangtod nga makapasibo na ko?”

“Magmaabtik sa Pagpaminaw”

Karon tagda ang maong butang gikan sa laing panglantaw. Pananglitan giduol ka sa imong kapikas,  ug siya naguol kay wala ka makatuman sa usa ka makataronganong pagdahom. Kon mahitabo kini, paminawi ang imong kapikas! Paningkamoti nga dili dayon managang sa mga panaway. Hinunoa, “magmaabtik sa pagpaminaw, magmahinay sa pagsulti, magmahinay sa pagkapungot.” (Santiago 1:19; Proverbio 18:13) Giawhag ni apostol Pablo ang mga Kristohanon: “Magpadayon pagpangita ang matag usa, dili sa iyang kaugalingong kaayohan, kondili nianang sa laing tawo.”—1 Corinto 10:24.

Mahimo nimo kini pinaagi sa pagbutang sa imong kaugalingon sa kahimtang sa imong kapikas. Ang Bibliya nag-ingon: “Kamong mga bana, magpadayon sa pagpuyo sa samang paagi uban [sa inyong mga asawa] sumala sa kahibalo,” o, sumala sa pagkasulti sa J. B. Phillips nga hubad, “kamong mga bana angayng maningkamot sa pagsabot sa mga asawa nga inyong kaipon sa pagpuyo.” (1 Pedro 3:7) Siyempre, maayo nga maningkamot usab ang mga asawa sa pagsabot sa ilang mga bana.

Hinumdomi, bisag magkabagay kamo sa imong kapikas, dili managsama ang inyong panglantaw sa tanang butang. (Tan-awa ang kahon nga “Samang Talan-awon, Lahing mga Panglantaw.”) Sa pagkatinuod, kini mapuslanon, kay maayo ang paghunahuna sa mga butang gikan sa panglantaw sa laing tawo. Ikaw ug ang imong kapikas parehong adunay linaing mga pagdahom sa kaminyoon nga gipasukad sa kahimtang sa pamilya ug kultura. Ingong resulta, mahimong nagkahigugmaay kamo pag-ayo bisag magkalahi ang inyong mga pagdahom.

Pananglitan, ang Kristohanong magtiayon mahimong nahibalo sa Kasulatanhong prinsipyo sa pagkaulo. (Efeso 5:22, 23) Apan, sa unsang paagi ipatuman ang pagkaulo diha sa imong pamilya, ug sa unsang paagi ipasundayag ang pagpasakop? Kamo bang duha gigiyahan niining maong prinsipyo sa Bibliya, ug kamo ba naningkamot gayod sa pagsunod niini?

Mahimong aduna usab kamoy magkalahing ideya bahin sa ubang mga isyu sa adlaw-adlaw nga pagkinabuhi. Kinsay mag-atiman sa pipila ka buluhaton sa panimalay? Kanus-a kamo mogugol ug panahon uban sa mga paryente, ug unsa ka dugaya? Sa unsang paagi ipakita sa Kristohanong mga magtiayon nga ilang ginauna ang intereses sa Gingharian diha sa ilang kinabuhi? (Mateo 6:33) Maylabot sa panalapi, sayon rang magkautang-utang, busa mapuslanon nga mahimong daginotan ug mapaagihon. Apan, unsay ipasabot sa pagkahimong daginotan ug mapaagihon? Kining mga butanga angayng hisgotan sa walay-lipodlipod ug sa matinahorong paagi, ug kon himoon kini, makabenepisyo kamog dako.

Ang maong mga panaghisgot makatabang nga mahimong mas malinawon ang inyong kaminyoon, bisan pag hangtod karon ang pipila ka pagdahom wala pa matuman. Sa pagkatinuod, mas makaarang kamo sa pagpadapat sa tambag ni apostol Pablo: “Magpadayon sa pag-antos sa usag usa ug kinabubut-on nga magpasaylo sa usag usa kon ang usa adunay reklamo batok sa lain.”—Colosas 3:13.

[Footnote]

[Kahon/Hulagway sa panid 10]

SAMANG TALAN-AWON, LAHING MGA PANGLANTAW

“Handurawa nga ang usa ka panon sa mga turista nagtan-aw sa usa ka matahom nga talan-awon. Bisan pag ang enterong grupo nagtan-aw sa samang talan-awon, lain ang pagtan-aw sa matag tawo. Ngano? Kay ang matag indibiduwal may lahing bantaaw nga dapit. Walay duha ka tawo ang nagbarog sa eksakto, parehong dapit. Dugang pa, dili ang tanan mopunting sa tinan-awan sa parehong bahin sa talan-awon. Ang matag tawo makakitag usa ka lahi nga bahin nga ilabinang makapaikag. Tinuod usab kana sa kaminyoon. Bisan pag sila bagay kaayo, walay duha ka kapikas ang nagbatog pareho gayong panud-ong sa mga butang. . . . Ang komunikasyon naglakip sa paningkamot nga sagolon ang maong mga kalainan ngadto sa usa-ka-unod nga relasyon. Nagkinahanglan kini nga gahinan ug panahon ang pagsultianay.”—Ang Bantayanang Torre, Agosto 1, 1993, panid 4.

[Kahon sa panid 11]

KON UNSAY IMONG MAHIMO KARON

• Susiha pag-usab ang imong mga pagdahom. Realistiko ba kana? Makataronganon ba ang imong gidahom sa imong kapikas?—Filipos 2:4; 4:5.

• Paningkamoti nga itul-id ang dili-realistiko nga mga pagdahom. Pananglitan, imbes moingon, “Dili gayod kami magkabangi,” ihukom nga inyong paningkamotan ang paghusay sa mga dili-pagsinabtanay sa malinawong paagi.—Efeso 4:32.

• Hisgoti kon unsay inyong mga pagdahom. Ang paghisgot sa mga butang maoy pangunang tikang sa pagkakat-on sa pagpasundayag sa gugma ug pagtahod sa usag usa.—Efeso 5:33.

[Hulagway sa panid 9]

“Magmaabtik sa pagpaminaw” sa mga suliran sa imong kapikas