Usa ka Umahan nga “Puti na Aron Anihon”

Nahimutang ang Guajira Peninsula sa amihanang tumoy nga bahin sa Amerika del Sur. Anaa kini sa amihanang Colombia ug sa amihanan-kasadpang Venezuela. Ang makapagbang kainit sa adlaw ug diyutayng ulan maoy katalagman niining may-pagkaumaw nga yuta, diin ang mga temperatura moabot ug 43 grado Celsius. Bisan pa sa klima niini, ang katawhan dinhi maoy puliki ug mabungahong mga mag-uuma. Tungod sa makanunayong huyohoy gikan sa dagat ug sa hanging amihan, maayoayo ra ang pagkinabuhi, hinungdan nga ang mga dumuduaw dinhi mahimong makapahimulos sa madanihong mga talan-awon ug sa nindot nga mga baybayon.

MALIPAYONG pag-abot sa yuta sa mga Wayuu Indian. Dunay mga 305,000 ka katawhang Wayuu, nga 135,000 kanila nagpuyo sa Colombia. Kining triboha dugay nang nagpuyo dinhi sa wala pa kini makolonya sa mga Katsila.

Ang pagbuhig kahayopan ug pag-uma mao ang pangunang panginabuhi sa mga Wayuu. Sila mangisda ug makignegosyo usab sa kanait nga mga nasod. Ang mga babaye batid nga tighablon ug sulaw nga mga kolor, ug ang ilang mga produkto himalitan sa mga turista.

Ang katawhang Wayuu ilado sa ilang pagkasinsero ug pagkamaabiabihon. Bisan pa niana, sila nagkinabuhi usab sa “makuyaw nga mga panahong lisod sagubangon.” (2 Timoteo 3:1) Ang kakabos maoy usa sa ilang dagkong mga suliran nga miresulta sa uban pang mga suliran, sama sa pagkadili-makamaong mobasa ug mosulat, malnutrisyon sa mga bata, kakulang sa medikal nga pag-atiman ug, sa pipila ka dapit, delingkuwensiya.

Sa daghang katuigan, ang mga relihiyon sa Kakristiyanohan nagpadalag mga misyonaryo aron mopuyo taliwala sa katawhang Wayuu. Ingong sangpotanan, kadaghanan sa mga tunghaan sa pagkamagtutudlo ug mga tunghaang may dormitoryo para sa mga estudyante gidumala sa mga relihiyon. Gisagop sa daghang Wayuu ang Kristohanon kono nga mga kostumbre, sama sa pagsimbag imahen ug pagbunyag sa masuso, apan wala nila biyai ang mga tinuohan ug rituwal nga naggikan sa tradisyonal nga mitolohiya ug mga patuotuo.

Sa katibuk-an, ang katawhang Wayuu mahadlokon sa Diyos ug moangay sa mga kamatuoran sa Bibliya nga gitudlo sa mga Saksi ni Jehova. Sa mga 1980, pito lang ang Saksing Wayuu sa Guajira, nga tulo kanila nagpuyo sa Ríohacha, ang kaulohan. Gawas sa lumad nga mga Saksi, 20 ka ubang magmamantala ang nagsangyaw sa maayong balita sa Gingharian didto ginamit ang pinulongang Kinatsila.

Mensahe nga Gipahayag sa Ilang Lumad nga Pinulongan

Ang kinabag-an sa katawhang Wayuu nga nagpuyo sa Ríohacha makasultig diyutayng Kinatsila gawas pa sa ilang lumad nga pinulongan, ang Wayuunaiki. Sa sinugdan, gamay ra kaayo ang gihimong pagsangyaw sa mensahe sa Gingharian. Daw molikay ang mga lumad sa arijunas, ingon sa ilang gingalan sa mga dili-Wayuu. Sa dihang moduaw ang mga Saksi sa ilang mga balay, ang kadaghanang Wayuu motubag ginamit ang ilang lumad nga pinulongan, dili ang Kinatsila. Ang mga Saksi moadto na lang sa sunod nga balay.

 Hinunoa, sa kataposan sa 1994, ang sangang buhatan sa mga Saksi ni Jehova nag-asayn ug grupo sa mga espesyal payunir o bug-os-panahong mga magtutudlo sa Bibliya aron mag-alagad sa Kongregasyon sa Ríohacha. Gihangyo sa mga payunir ang usa ka Wayuu nga Saksi nga tudloan sila sa pinulongang Wayuunaiki. Human makasag-ulog pipila ka yanong mga presentasyon, ang maong mga ministro nangadto sa teritoryo ug ila dayong namatikdan ang dakong kausaban sa pagsanong sa katawhan. Bisan pag ang mga magtutudlo sa Bibliya nagsultig binayabas nga Wayuunaiki, ang mga tagbalay natingala ug nahimuot ug gusto nang mamati, nga may mga panahong ilang gipadayon ang bibo nga pag-estoryahay ginamit ang ilang diyutayng Kinatsila!

“Puti na Aron Anihon”

Gipanig-ingon ni apostol Pablo ang Kristohanong buluhaton nga paghimog tinun-an ngadto sa pagtikad sa usa ka umahan, nga maoy pagtandi nga daling masabtan sa mga mag-uuma nga Wayuu. (1 Corinto 3:5-9) Sa masambingayong diwa, ang Wayuu nga umahan tinuod gayong “puti na aron anihon.”—Juan 4:35.

Si Neil, usa ka Wayuu Indian nga nagpuyo sa Manaure, may depekto sukad sa iyang pagkatawo. Nga nagbasol sa Diyos, si Neil mibatig tumang kaguol hangtod sa punto nga misulay siya sa paghikog. Usa ka Saksi ang nakahigayon pagsangyaw sa balay-balay samtang nagduawg lainlaing mga lungsod maylabot sa iyang sekular nga trabaho ug iyang naestorya kang Neil ang bahin sa Gingharian ni Jehova. Si Neil 14 anyos lamang. Sa pagkamatikod sa interes ni Neil, gisugdan sa Saksi ang usa ka pagtuon sa Bibliya uban niya. Nalipay si Neil sa pagkat-on bahin sa mahigugmaong personalidad ni Jehova, nga siya nakahinapos nga ang Diyos dili mao ang nakaingon sa iyang sakit. Natandog siya pag-ayo sa dihang iyang nabasa ang gisaad sa Diyos nga paraisong yuta, diin wala na unyay sakit!—Isaias 33:24; Mateo 6:9, 10.

Niadtong panahona, ang pamilya ni Neil may gikaaway nga laing pamilya. Sa paningkamot nga mapanalipdan gayod sila, ang mga paryente ni Neil nagtuman ug pipila ka rituwal sa tribo. Si Neil nahinumdom: “Sa sinugdan, ako nahadlok nga makigsulti sa akong pamilya bahin sa nakaplagan kong bag-ong pagtuo, ilabina ngadto sa mga ulo sa pamilya, kinsa gitamod pag-ayo.” Nasuko ang mga ginikanan ni Neil sa pagkahibalong siya dili na motuo sa dili-kasulatanhong mga tinuohan o mohimo sa espiritistikanhong mga tulumanon. Unya si Neil mibalhin sa Ríohacha ug nakig-uban sa kongregasyon didto. Sa wala madugay siya nabawtismohan. Niadtong 1993 siya natudlong usa ka ministeryal nga alagad, ug tulo ka tuig sa ulahi siya nahimong regular payunir. Unya niadtong 1997 siya natudlong usa ka ansiyano sa kongregasyon. Sa tuig 2000, iya pang gipalapad ang iyang pag-alagad, nga nahimong espesyal payunir.

Tagda usab ang kahimtang ni Teresa, usa ka lumad nga Wayuu nga misugod sa pagtuon sa Bibliya uban sa mga Saksi. Si Daniel, ang iyang puyopuyo, nagbugalbugal ug nagdagmal kaniya ug sa ilang tulo ka anak. Bisan pag sa ulahi siya misugot nga magtuon sa Bibliya uban kang Teresa, siya kasagarang nakig-inom uban sa iyang mga higala, usahay sulod sa upat o lima ka adlaw. Nag-antos sa kakabos ang iyang pamilya. Si Teresa nagpadayon sa makanunayong pagtuon ug pagtambong sa Kristohanong mga tigom. Kadto nakatabang kang Daniel sa pagsabot nga ang pagtuon sa Bibliya mahinungdanon. Unya usa sa ilang mga  anak aksidenteng natumba sa kalderong may nagbukal nga tubig ug namatay gumikan sa grabeng mga paso. Gawas pa sa pag-antos sa dakong kasubo tungod sa pagkamatay sa anak, gisagubang usab ni Teresa ang pagpit-os sa mga higala ug silingan nga sundon ang dili-kasulatanhong mga kostumbre sa paglubong.

Niadtong lisod nga panahon, ang magtiayon gidasig ug gilipay sa mga membro sa dug-ol nga mga kongregasyon. Human sa paglubong, sila padayong giduaw ug gilipay sa mga membro sa Wayuu-ug-pinulongang lokal nga kongregasyon. Sa dihang nakita ni Daniel nga ang mga membro sa kongregasyon nagpasundayag ug Kristohanong gugma, siya natukmod sa paghimog espirituwal nga pag-uswag. Iyang gihunong ang pag-inom ug pagdagmal kang Teresa. Si Daniel ug Teresa nagpakasal, ug si Daniel misugod sa pagkugi aron masuportahan ang iyang pamilya. Miuswag ang ilang kahibalo bahin sa Diyos ug sila nabawtismohan niadtong 2003. Silang duha nagdumalag daghang pagtuon sa Bibliya. Tungod sa maayo kaayong pagpamatuod ni Teresa sa iyang pamilya, ang iyang mga paryente gusto na karong mamati sa mga Saksi sa dihang sila moduaw. Usa sa mga pag-umangkong lalaki ni Daniel maoy dili-bawtismadong magmamantala, ug duha sa iyang mga pag-umangkong babaye nagtuon sa Bibliya ug nagtambongan na sa mga tigom sa kongregasyon. Ang bayaw nga babaye ni Teresa, kinsa namatyan usab ug anak sa usa ka aksidente, ug ang iyang pamilya nagpakitag interes sa pagtuon sa Bibliya.

Espirituwal nga Pagkaon Diha sa Pinulongang Wayuunaiki

Niadtong 1998 ang pulyetong Tagamtama ang Kinabuhi sa Yuta sa Walay Kataposan! a giluwatan diha sa pinulongang Wayuunaiki. Kini nahimong bililhong kasangkapan sa pagtikad sa Wayuu nga umahan ug sa pagdumalag mga pagtuon sa Bibliya sa balay. Gihimo ang mga kahikayan niadtong 2003 sa pagbansay ug daghang igsoong lalaki sa paghubad sa mga publikasyon sa mga Saksi ni Jehova ngadto sa Wayuunaiki. Tungod sa pagkugi sa usa ka grupo sa mga maghuhubad sa Ríohacha, nahubad na ang mas daghang brosyur, nga nakatabang sa espirituwal nga pag-uswag sa mga tinun-an nga nagasultig Wayuunaiki.

Sukad sa tuig 2001, gihubad na sa Wayuunaiki ang pipila ka bahin sa programa sa distritong kombensiyon. Ang mga gitun-an sa Bibliya madasig sa espirituwal sa dihang ilang madungog ang programa diha sa ila mismong pinulongan. Nagpaabot sila sa adlaw nga ang mga drama sa Bibliya ipasundayag usab diha sa pinulongang Wayuunaiki.

Usa ka Mabungahong Umahan

Ang Uribia maoy usa ka lungsod mga 100 kilometros amihanan-silangan sa Ríohacha. Ang Uribia Wayuu nga Kongregasyon adunay 16 ka magmamantala sa Gingharian, nga daghan kanila nagpauswag sa ilang paningkamot sa pagsangyaw ngadto sa mga Indian nga nagpuyo sa kabanikanhan. Usa sa mga ansiyano sa kongregasyon nag-ingon bahin niadtong usa ka panaw sa pagsangyaw: “Among naduaw ang usa ka ranso nga gilangkoban ug mga usa ka dosenang balay nga mugbog atop ug gagmayg mga bentana. Sa atubangan sa matag balay dihay lapad nga atop nga ginama sa yotojolo, ang gahing subok sa lindog sa kaktus. Masalipdan didto ang pamilya ug mga bisita gikan sa makapagbang kainit sa adlaw. Nalipay kami sa pagkaplag ug daghang tawo nga nagpakitag interes, busa among gihikay nga mobalik aron makasugod ug mga pagtuon sa Bibliya. Sa among pagbalik, namatikdan namo nga ang daghan dili antigong mobasa. Misulti sila kanamo nga may eskuylahang gitukod apan wala matiwas tungod kay kulang ug kuwarta. Sa kamaluloton gitugotan kami sa tagdumala nga among gamiton ang usa sa mga klasrom aron himoon ang mga klase sa pagbasa ug pagsulat ug sa pagdumalag mga pagtuon sa Bibliya. Unom ka Wayuu ang nakakat-on sa pagbasa ug pagsulat ug sila nag-uswag sa ilang pagtuon sa Bibliya. Natandog kami pag-ayo sa pagpabili nga ilang gipakita, mao nga nagplano kami nga maghimog mga tigom sa ranso.”

Daghang dili-lumad nga mga Saksi ang nakakat-on sa pinulongang Wayuunaiki, ug ang ilang tabang gipabilhan pag-ayo. Sa Guajira Peninsula, walo ka kongregasyon ug duha ka grupo ang nagagamit karon sa maong pinulongan.

Dayag ang pagpanalangin ni Jehova sa maong paningkamot. Sa walay duhaduha, dako pa ang mahimong pagsangyaw sa maayong balita taliwala sa katawhang Wayuu. Gidahom ang maayong mga resulta samtang kadtong mahunahunaon sa ilang espirituwal nga panginahanglan mahimong Kristohanong mga tinun-an. Hinaot si Jehova magpadala ug dugang mga ministro sa pagtikad niini nga umahan, nga “puti na aron anihon.”—Mateo 9:37, 38.

[Footnote]

[Mga hapa sa panid  16]

(Alang sa aktuwal nga pagkahan-ay, tan-awa ang publikasyon)

VENEZUELA

COLOMBIA

LA GUAJIRA

Manaure

Ríohacha

Uribia

[Picture Credit Line sa panid 16]

Wayuu camp below: Victor Englebert